Category: لاہور

وائس چیئرمین پاکستان بار کونسل چوہدری طاہر نصراللہ وڑائچ، نے لاہور ہائی کورٹ کی چیف جسٹس کی جانب سے پنجاب پروٹیکشن آف اونرشپ آف امووایبل پراپرٹی آرڈیننس 2025ء کے نفاذ کو معطل کرنے کے عبوری حکم کا خیرمقدم کیا ہے۔ مذکورہ آرڈیننس کے تحت ڈپٹی کمشنر کی سربراہی میں قائم کمیٹیوں کو جائیداد کے تنازعات کا فیصلہ کرنے کے اختیارات دیے گئے تھے، جسے عدالتی دائرہ اختیار میں مداخلت قرار دیا جا رہا ہے۔

وائس چیئرمین پاکستان بار کونسل نے وزیر اعلیٰ پنجاب کے اس بیان کی سخت الفاظ میں مذمت اور تنقید کی ہے جس میں انہوں نے مذکورہ آرڈیننس کا دفاع کرتے ہوئے کہا کہ اس کا مقصد طویل عرصے سے زمین اور جائیداد کے تنازعات میں مبتلا لاکھوں شہریوں کو ریلیف فراہم کرنا ہے۔ چوہدری طاہر نصراللہ وڑائچ نے کہا کہ یہ قانون درحقیقت سول نظام، شہری حقوق اور عدالتی بالادستی کو کمزور کرتا ہے، کیونکہ اس کے تحت ایک ریونیو افسر ایسے مقدمے میں جائیداد کا قبضہ دے سکتا ہے جو پہلے ہی سول کورٹ میں زیر سماعت ہو۔انہوں نے کہا کہ اس سے یہ تاثر ملتا ہے کہ کچھ عناصر عدالتی اختیارات سمیت تمام اختیارات اپنے ہاتھ میں لینا چاہتے ہیں۔ مزید برآں انہوں نے نشاندہی کی کہ اس نئے قانون کے ذریعے پٹواریوں اور اسسٹنٹ کمشنرز کے دائرہ اختیار پر بھی سوال اٹھتا ہے اور انہیں ان کے قانونی اختیارات سے کہیں بڑھ کر طاقت دی گئی ہے۔

چوہدری طاہر نصراللہ وڑائچ نے واضح کیا کہ کسی بھی قانون کی تشریح کا اختیار آئین کے مطابق عدلیہ کو حاصل ہے، لہٰذا لاہور ہائی کورٹ کے معزز چیف جسٹس مکمل طور پر بااختیار ہیں کہ وہ ایسا عبوری حکم جاری کریں۔ انہوں نے کہا کہ معزز چیف جسٹس کا یہ اقدام درست اور بروقت ہے کیونکہ مذکورہ آرڈیننس عدلیہ کے اختیارات کو مجروح کرتا ہے۔انہوں نے اس عزم کا اظہار کیا کہ ملک کی قانونی برادری لاہور ہائی کورٹ کے چیف جسٹس اور عدلیہ کے ادارے کے ساتھ کھڑی ہے اور عدالتی آزادی و بالادستی کے تحفظ کے لیے اپنی جدوجہد جاری رکھے گی۔

لاہور ہائیکورٹ، عثمان ڈار نے اپنا نام ایگزٹ کنٹرول لسٹ سے نکلوانے کے لیے لاہور ہائیکورٹ سے رجوع کرلیا

جسٹس ساجد محمود سیٹھی نے درخواست پر سیکرٹری داخلہ اور ڈی جی ایف آئی کو نوٹس جاری کر کے کل جواب طلب کرلیا ،عثمان ڈار کی جانب سے ابوزر سیلمان نیازی ایڈووکیٹ پیش ہوئے ،عثمان ڈار کی جانب سےدائر درخواست میں کہا گیا کہ 2024 میں عثمان ڈار کا نام ایگزٹ کنٹرول لسٹ سے نکالا گیا تھا ،وفاقی حکومت نے بغیر مؤقف سنے دوبارہ نام ایگزٹ کنٹرول لسٹ میں ڈال دیا ہے،عدالت عثمان ڈار کا نام ایگزٹ کنٹرول لسٹ سے نکالنے کا حکم دے

محکمہ اطلاعات و ثقافت پنجاب کے زیر اہتمام پاک تاجک فیسٹیول کا انعقاد کیا گیا، جس میں وزیر اطلاعات و ثقافت پنجاب عظمیٰ بخاری نے بطور مہمانِ خصوصی شرکت کی۔

فیسٹیول میں تاجکستان سے آئے فنکاروں نے روایتی ثقافتی رقص اور پرفارمنس پیش کیں جبکہ معروف گلوکار راحت فتح علی خان نے اپنی شاندار پرفارمنس سے حاضرین کے دل موہ لیے،72 رکنی تاجک ثقافتی وفد کی قیادت تاجکستان کے سفیر شریف زادہ یوسف نے کی۔ تقریب میں پارلیمانی سیکرٹری برائے اطلاعات پنجاب شازیہ رضوان، سیکرٹری اطلاعات سید طاہر رضا ہمدانی، ایگزیکٹو ڈائریکٹر الحمرا آرٹس کونسل محمد نواز گوندل اور ڈی جی پی آر شیخ فرید احمد بھی موجود تھے،تقریب سے خطاب کرتے ہوئے عظمیٰ بخاری نے وزیراعلیٰ پنجاب مریم نواز شریف کی جانب سے تاجک وفد کو خوش آمدید کہا اور کہا کہ پاکستان اور تاجکستان مشترکہ ثقافتی اقدار، روایات اور تہذیبی رشتوں میں گہری مماثلت رکھتے ہیں۔ ان کا کہنا تھا کہ پاکستان تاجکستان ثقافتی فیسٹیول نے دونوں ممالک کے باہمی روابط کو مزید مضبوط کیا ہے اور پنجاب حکومت تاجکستان کے ساتھ ثقافت کے فروغ کے لیے ہر ممکن تعاون جاری رکھے گی،عظمیٰ بخاری نے تاجک ثقافت کے منفرد رنگ، تشخص، لباس اور روایات کو سراہتے ہوئے کہا کہ تاجک خواتین کا وقار، حسن اور لباس قابلِ تحسین ہے۔تاجک فنکاروں کی موسیقی اور رقص نے دل موہ لیے ہیں، علامہ محمد اقبال کا کلام پاکستان اور تاجکستان کو ایک فکری رشتے میں جوڑتا ہے ۔

تاجکستان کے سفیر شریف زادہ یوسف نے کہا کہ علامہ اقبال کی شاعری و فکر پاکستان اور تاجکستان کے عوام کو یک جان کیے ہوئے ہے۔ انہوں نے لاہور کو جنت سے تشبیہ دیتے ہوئے خوبصورت فیسٹیول اور یادگار میزبانی پر وزیراعلیٰ پنجاب اور وزیر اطلاعات کا شکریہ ادا کیا۔

پاکستانی سرزمین پر افغانستان میں موجود دہشت گرد عناصر کی مداخلت کا ایک اور واضح ثبوت سامنے آ گیا ہے۔ 19 دسمبر کو شمالی وزیرستان کے علاقے بویا میں سیکیورٹی فورسز کے ہیڈ کوارٹر پر ہونے والے خودکش حملے میں ملوث دہشت گردوں میں سے ایک کے افغان شہری ہونے کی تصدیق ہو گئی ہے۔

سیکیورٹی اور انٹیلی جنس ذرائع کے مطابق اس حملے میں شامل چار دہشت گردوں میں سے ایک کی شناخت ذکی اللہ عرف احمد وزیرستانی ولد مولوی فیض محمد کے نام سے ہوئی ہے، جس کا تعلق افغانستان کے صوبہ کابل کے ضلع موسہی سے بتایا گیا ہے۔ ذرائع کا کہنا ہے کہ دستیاب شواہد اور انٹیلی جنس معلومات کی روشنی میں اس دہشت گرد کا افغان شہری ہونا ثابت ہو چکا ہے۔مزید تصدیق اس وقت ہوئی جب معتبر ذرائع نے بتایا کہ ہلاک ہونے والے خودکش حملہ آور کے لیے فاتحہ (تعزیتی) تقریب کابل میں اس کی رہائش گاہ پر منعقد کی گئی۔ یہ تقریب آج صبح 8 بجے سے دوپہر 12 بجے تک جاری رہی، جس میں مقامی افراد کی شرکت بھی سامنے آئی۔ اس تعزیتی اجتماع نے حملہ آور کی شناخت اور افغان پس منظر کی مزید تصدیق کر دی ہے۔

ذرائع کے مطابق یہ خودکش حملہ گل بہادر گروپ سے وابستہ افغان دہشت گردوں کی جانب سے کیا گیا، جو ماضی میں بھی پاکستان کے قبائلی علاقوں میں دہشت گرد سرگرمیوں میں ملوث رہا ہے۔ سیکیورٹی اداروں کا کہنا ہے کہ اس واقعے نے ایک بار پھر اس حقیقت کو اجاگر کیا ہے کہ پاکستان میں ہونے والی دہشت گرد کارروائیوں کے تانے بانے سرحد پار افغانستان سے جا ملتے ہیں۔دفاعی ماہرین کے مطابق اس طرح کے شواہد اس امر کی نشاندہی کرتے ہیں کہ افغان سرزمین پاکستان مخالف دہشت گرد عناصر کے لیے محفوظ پناہ گاہ کے طور پر استعمال ہو رہی ہے۔ ماہرین کا کہنا ہے کہ پاکستان نے متعدد بار افغان حکام کو اس حوالے سے شواہد فراہم کیے ہیں، تاہم مؤثر کارروائی نہ ہونے کے باعث ایسے واقعات کا تسلسل برقرار ہے