Category: لاہور

میانوالی میں چاپڑی ڈیم کے قریب کاؤنٹر ٹیررازم ڈپارٹمنٹ (سی ٹی ڈی) اور دہشتگردوں میں فائرنگ کے تبادلے میں 6 دہشتگرد اپنے ہی ساتھیوں کی فائرنگ سے ہلاک ہو گئے۔

ترجمان سی ٹی ڈی کے مطابق سی ٹی ڈی نے دہشتگردوں کی گرفتاری کے لیے چاپڑی ڈیم کے قریب چھاپہ مارا تھا کہ اسی دوران دہشتگردوں نے سی ٹی ڈی ٹیم پر فائرنگ کردی، 6 خطرناک دہشتگرد اپنے ہی ساتھیوں کی فائرنگ سے ہلاک ہو گئے جبکہ 8 دہشتگرد اندھیرے کا فائدہ اٹھاتے ہوئے فرار ہو گئی، دہشتگردوں سے ایک خودکش جیکٹ، 3 دستی بم، 3 ایس ایم جیز، 200 گولیاں اور بارودی مواد بھی برآمد ہوا ہے۔

سی ٹی ڈی حکام کا کہنا ہے کہ ہلاک دہشتگردوں کی شناخت کا عمل جاری ہے جبکہ فرار ہونے والے دہشتگردوں کی گرفتاری کے لیے بھی اقدامات کیے جا رہے ہیں۔

لاہور میں بسنت فیسٹیول کی خوشیاں ایک بار پھر لوٹ آنے سے نہ صرف شہریوں میں جوش و خروش پایا جا رہا ہے بلکہ اس سے وابستہ مختلف کاروبار بھی خوب چمک اُٹھے ہیں۔ شہر بھر میں رنگ برنگی پتنگوں، ڈور، روشنیوں اور دیگر سامان کی خریداری میں نمایاں اضافہ دیکھا جا رہا ہے۔

بسنت کی راتوں کو مزید یادگار بنانے کے لیے شہری خصوصی طور پر سرچ لائٹس کی خریداری کر رہے ہیں۔ مختلف مارکیٹوں میں چھوٹی، بڑی، جدید اور منفرد ڈیزائنز والی سرچ لائٹس دستیاب ہیں جو چھتوں اور کھلے مقامات پر پتنگ بازی کے دوران استعمال کی جا رہی ہیں۔ دکانداروں کے مطابق ان سرچ لائٹس کی قیمتیں 2 ہزار روپے سے لے کر 30 ہزار روپے تک ہیں، تاہم بسنت کی آمد کے ساتھ ہی ان کی فروخت میں غیر معمولی اضافہ ریکارڈ کیا گیا ہے۔

دکانداروں کا کہنا ہے کہ کئی سال بعد بسنت سے وابستہ کاروبار کو دوبارہ سانس لینے کا موقع ملا ہے۔ پتنگ فروش، ڈور بنانے والے، لائٹس اور دیگر سجاوٹی سامان کے تاجر اس بار خاصی پرامید نظر آ رہے ہیں اور ان کے مطابق فروخت میں گزشتہ برسوں کے مقابلے میں واضح فرق دیکھا جا رہا ہے۔

دوسری جانب شہریوں کا کہنا ہے کہ وہ اس بار بسنت کو نئے، مختلف اور محفوظ انداز میں منانے کی تیاری کر رہے ہیں۔ ان کا کہنا ہے کہ احتیاطی تدابیر اختیار کر کے اور قانون کی پاسداری کرتے ہوئے بسنت منانا نہ صرف خوشیوں کو دوبالا کرے گا بلکہ اس بات کو بھی یقینی بنائے گا کہ آئندہ کبھی اس تہوار پر پابندی نہ لگےشہریوں اور تاجروں دونوں کا ماننا ہے کہ اگر بسنت کو ذمہ داری اور نظم و ضبط کے ساتھ منایا گیا تو یہ تہوار نہ صرف لاہور کی ثقافتی شناخت کو مزید مضبوط کرے گا بلکہ مقامی معیشت کے لیے بھی ایک مثبت اور خوش آئند ثابت ہوگا۔


اڈیالہ جیل کے فیکٹری ناکے پر میڈیا سے گفتگو کرتے ہوئے سہیل آفریدی نے کہا کہ آج رات دھرنا دیا جائے گا اور پارٹی کے ایم پی ایز اور ایم این ایز موقع پر پہنچ رہے ہیں۔
انہوں نے الزام عائد کیا کہ حالات کو زبردستی خراب کرنے کی کوشش کی جا رہی ہے، جبکہ ان کا مطالبہ ہے کہ بانی پی ٹی آئی سے ملاقات کروائی جائے۔
‎سہیل آفریدی کا کہنا تھا کہ بانی پی ٹی آئی سے ان کے ذاتی معالج اور اہلِ خانہ کی ملاقات کی اجازت بھی دی جائے۔

بدلتے عالمی اور علاقائی تناظر میں پاکستان اور بنگلہ دیش کے برادرانہ تعلقات کو فروغ دینے ، محبت اور بھائی چارے کے رشتے کو مزید مضبوط کرنے کی ضرورت ہے۔ دونوں ممالک نہ صرف اسلامی ، تاریخی رشتوں کے حامل ہیں بلکہ ایک دوسرے کے ساتھ دل اور جذبات کے اعتبار سے بھی گہرے رشتے رکھتے ہیں۔دونوں ملک ایک جسم کے دو بازو اور ایک جسم میں دھڑکنے والے دو دل کی مانند ہیں۔

ان خیالات کا اظہار پاکستان اسلامک کونسل کے چئیرمین اور جامعہ سعیدیہ سلفیہ کے پرنسپل ڈاکٹر حافظ مسعود اظہر نے کیا ۔انھوں نے کہا کہ دونوں برادر ممالک کو باہم لڑانے کی بھارت کی تمام سازشیں ناکام ہوچکی ہیں ۔ بھارت صرف پاکستان اور بنگلہ دیش کا ہی دشمن نہیں بلکہ اسلام ، قرآن اور رب رحمان کا بھی دشمن ہے ۔ اسلئے ضروری ہے کہ دونوں ممالک باہم تعلقات اور اپنا دفاع مضبوط کریں ۔ حالیہ دنوں میں بنگالی عوام، حکومت اور مسلح افواج کی جانب سے پاکستان کے لیے محبت اور عقیدت کے اظہار نے ثابت کر دیا ہے کہ نظریہ پاکستان آج بھی زندہ ہے ۔ اس محبت اور عقیدت کی روشنی میں دونوں ممالک کے درمیان تعلقات کو مزید مضبوط بنانے کے لیے عملی اقدامات کی ضرورت ہے۔پاکستان اور بنگلہ دیش کے درمیان تعلقات صرف سرکاری سطح تک محدود نہیں بلکہ عوام کے دلوں میں بھی ایک دوسرے کے لیے عزت اور محبت موجود ہے۔ یہ محبت، بھائی چارے اور باہمی احترام کے رشتے دونوں ممالک کے مستقبل میں تعلیمی، دفاعی اور اقتصادی تعاون کے دروازے کھولنے کا سبب بن سکتے ہیں۔دونوں ممالک کی قیادت کو چاہیے کہ وہ محبت اور بھائی چارے کے اس انمول رشتے کو مضبوط بنانے کے لیے اقدامات کرے اور عوام کے درمیان تعلقات کی مضبوطی کے لیے پل باندھے۔ اس سلسلے میں تعلیم، دفاع ، کھیل اور اقتصادی شعبوں میں مشترکہ منصوبے دونوں ممالک کے تعلقات کو نئی بلندیوں پر لے جا سکتے ہیں۔ہماری دعا ہے کہ اللہ تعالیٰ پاکستان اور بنگلہ دیش کے تعلقات میں مزید برکت ڈالے، محبت اور بھائی چارے کے رشتے کو ہمیشہ قائم رکھے اور دونوں ممالک کے عوام کے دلوں میں محبت کی روشنی کو روشن رکھے۔ یہ رشتہ آنے والے ہر دور میں مضبوط اور پائیدار رہے۔

مرکزی مسلم لیگ کے صدر خالد مسعود سندھو کی قیادت میں وفد نے لاہور پریس کلب کا دورہ کیا اور نومنتخب صدر ارشد انصاری، سیکرٹری جنرل افضال طالب سمیت دیگر نو منتخب عہدیداران کو مبارکباد دی،

مرکزی مسلم لیگ کے وفد میں مرکزی ترجمان تابش قیوم، ڈپٹی سیکرٹری اطلاعات طہٰ منیب،زمان سیف، عبدالحنان و دیگر شامل تھے، مرکزی مسلم لیگ کے وفد نے لاہور پریس کلب کے نومنتخب صدر ارشد انصاری سمیت دیگر سے ملاقات کی اور انتخابات 2026 میں کامیابی پر مبارکباد دی،اس موقع پر صدر مرکزی مسلم لیگ خالد مسعود سندھو کا کہنا تھا کہ صحافی معاشرے کی آنکھ اور کان ہوتے ہیں،مرکزی مسلم لیگ صحافیوں کے حقوق کے لئے ہمیشہ ان کے شانہ بشانہ کھڑی رہی ہے،تابش قیوم کا کہنا تھا کہ لاہور پریس کلب صحافیوں کی فلاح و بہبود کے لئے احسن انداز میں کام کر رہا ہے،گزشتہ برس مرکزی مسلم لیگ نے صحافیوں کے لئے لاہورپریس کلب میں‌تربیتی کورس کروائے، رواں برس بھی یہ سلسلہ جاری رکھا جائے گا،نومنتخب صدر لاہور پریس کلب ارشد انصاری، سیکرٹری جنرل افضال طالب و دیگر نے مرکزی مسلم لیگ کے وفد کا لاہور پریس کلب آمد پر شکریہ ادا کیا.

وزیراعلیٰ پنجاب مریم نواز شریف نے لاہور میں ماں اور بچی کے مین ہول میں گرنے کے دردناک واقعے پر ریسکیو آپریشن میں موجود تمام اداروں کے حکام کو کٹہرے میں کھڑا کردیا۔

وزیراعلیٰ پنجاب نے پولیس، ریسکیو 1122، واسا اور ضلعی انتظامیہ کو واقعے سے متعلق تمام پہلوؤں پر مبنی غیر جانبدار فیکٹ فائنڈنگ رپورٹ فوری پیش کرنے کی ہدایت کردی۔مریم نواز نے بھکر کی مصروفیات کے دوران مسلسل ماں اور بچی کے کے مین ہول میں گرنے واقعے کی لمحہ بہ لمحہ رپورٹ لی، آپریشن کی متضاد اور غیر مستند اطلاعات دینے والے تمام افسران اور اداروں کیخلاف کارروائی کی ہدایت کردی۔

دوسری جانب ڈائریکٹر جنرل لاہور ڈیولپمنٹ اتھارٹی طاہر فاروق نے بھاٹی چوک میں ماں اور بچی کے مین ہول میں گر کر جاں بحق ہونے کے معاملے پر سخت ایکشن لے لیا،انہوں نے داتا دربار منصوبے پر کام کرنے والی پوری ٹیم کو معطل کر دیا اور اس حوالے سے نوٹیفکیشن بھی جاری کر دیا ہے،نوٹیفکیشن کے مطابق پروجیکٹ ڈائریکٹر، ڈپٹی ڈائریکٹر، اسسٹنٹ ڈائریکٹر اور سب انجینئر کو معطل کر دیا گیا ہے۔

واضح رہے کہ ابتداء میں ادارے واقعے کو جھوٹ قرار دے رہے تھے، خاتون کے شوہر کو پولیس نے حراست میں لے لیا تھا، خاتون کی لاش ملنے کے بعد اسے رہا کیا گیا، بچی کی لاش 17 گھنٹے بعد نالے سے برآمد کی گئی۔

لاہور کے علاقے بھاٹی گیٹ میں خاتون اور بچی کے مین ہول میں گرنے کے واقعے پر متاثرین کے آبائی علاقے شورکوٹ میں بھی فضا سوگوار ہے،اہل خانہ کے مطابق واقعہ انتظامیہ کی نااہلی کے باعث پیش آیا، جاں بحق سعدیہ 3 بچوں کی ماں تھی،اہل خانہ نے دوران حراست پولیس کی جانب سے تشدد کئے جانے کا الزام بھی لگایا۔