Category: لاہور

لاہور: پنجاب کے محکمہ داخلہ نے کالعدم تحریک لبیک پاکستان (ٹی ایل پی) کے خلاف درج متعدد سنگین نوعیت کے مقدمات کی تفتیش کو مؤثر اور منظم انداز میں آگے بڑھانے کے لیے 12 مشترکہ تحقیقاتی ٹیمیں (جے آئی ٹیز) قائم کر دی ہیں۔

محکمہ داخلہ کی جانب سے جاری کردہ نوٹیفکیشن کے مطابق 7 جے آئی ٹیز لاہور میں درج مقدمات کی تفتیش کریں گی جبکہ 5 جے آئی ٹیز شیخوپورہ میں قائم کیے گئے مقدمات پر کام کریں گی۔ یہ تمام مقدمات دہشتگردی اور دیگر سنگین قانونی دفعات کے تحت درج کیے گئے تھے۔محکمہ داخلہ کے مطابق تشکیل دی گئی جے آئی ٹیز میں پولیس، کاؤنٹر ٹیررازم ڈیپارٹمنٹ (سی ٹی ڈی) اور حساس اداروں کے نمائندے شامل ہوں گے تاکہ تحقیقات کو جامع، شفاف اور موثر بنایا جا سکے۔ذرائع کے مطابق ان جے آئی ٹیز کی تشکیل کی درخواست پنجاب پولیس نے دی تھی۔ پولیس حکام کے مطابق کالعدم ٹی ایل پی کے خلاف 75 سے زائد مقدمات درج کیے جا چکے ہیں، جن میں 2 ہزار سے زائد نامزد شرپسندوں کو گرفتار کیا جا چکا ہے۔ پولیس کا مؤقف ہے کہ جے آئی ٹیز کی تشکیل سے مقدمات کی پیش رفت مزید تیز اور مربوط ہو سکے گی۔

محکمہ داخلہ نے واضح کیا ہے کہ جے آئی ٹیز تحقیقات مکمل ہونے کے بعد اپنی رپورٹس متعلقہ حکام کو پیش کریں گی، جس کی روشنی میں آئندہ قانونی کارروائی عمل میں لائی جائے گی۔

تعلیمی اداروں میں بھرتی ہونے پر ملازمین کا جنسی جرائم کا ریکارڈ دیکھنے کی تجویز دی گئی ہے۔

نجی ٹی وی کے مطابق پراسیکیوٹر جنرل پنجاب نے تعلیمی اداروں میں بھرتی ہونے پر ملازمین کے سیکس آفینڈرز رجسٹرسے ویریفکیشن کے لیے سیکرٹری پراسیکیوشن کو 2 صفحات کا مراسلہ بھجوایا ہے،پراسیکیوٹر جنرل نے مراسلے میں کہا کہ تعلیمی اداروں میں بھرتی پرسیکس آفینڈر ریکارڈ دیکھنا ضروری ہے، نادرا سیکس آفینڈرز رجسٹر تعلیمی اداروں میں بچوں کی حفاظت کا مؤثر ذریعہ ہے، بچوں کی حفاظت کے لیے موجودہ بھرتی نظام میں بڑا خلا موجود ہے، موجودہ بیک گراؤنڈ چیکس سے جنسی جرائم کا سابقہ ریکارڈ سامنے نہیں آتا، جنسی مجرموں کی بھرتی پورے تعلیمی ادارےکے لیے خطرہ بن سکتی ہے، محکمہ قانون و انصاف سیکس آفینڈر رجسٹرتک رسائی کے لیے میکینزم بنائے،پراسیکیوٹر جنرل نے مراسلے میں درخواست کی کہ تمام تعلیمی اداروں کے لیے سیکس آفینڈر ویریفکیشن لازمی قراردی جائے، موجودہ ملازمین کی بھی نادرا سیکس آفینڈر رجسٹر سے تصدیق کی جائے، اس پالیسی سے تعلیمی اداروں میں بچوں کے تحفظ کویقینی بنایاجاسکےگا۔

ایکس، چیٹ جی پی ٹی اور مختلف ویب سائٹس اوپن نہیں ہو رہی، دنیا کے مختلف خطوں میں صارفین انٹرنیٹ صارفین ان سروسز تک رسائی حاصل نہیں کر پا رہے۔

اس کی وجہ کلاؤڈ فلیئر کے سسٹم میں مسائل کے باعث ایکس سمیت متعدد ویب سائٹس تک رسائی ممکن نہیں ہو رہی۔کلاؤڈ فلیئر ایسی انٹرنیٹ انفرا اسٹرکچر کمپنی ہے جو کانٹینٹ ڈیلیوری نیٹ ورک کے طور پر کام کرتی ہے۔یعنی ویب سائٹس کے مواد کو تیزی سے ایک سے دوسری جگہ منتقل کرتی ہے اور اب اس کے سسٹم میں نامعلوم خرابی ہوئی ہے۔

میڈیا رپورٹس کے مطابق کمپنی کی جانب سے جاری بیان میں بتایا گیا کہ ہم مسئلے سے آگاہ ہیں اور اس کے بارے میں جاننے کے لیے کام کر رہے ہیں۔ڈاؤن ڈیٹیکٹر کے مطابق کلاؤڈ فلیئر کے سسٹم میں خرابی کے باعث ایکس ٹریفک بھی متاثر ہوا ہے۔کلاؤڈ فلیئر کے باعث بیشتر ویب سائٹس لوڈ نہیں ہو رہیں مگر جو لوڈ ہو رہی ہیں ان میں بھی کانٹینٹ اور تازہ ڈیٹا غائب ہے۔زیادہ تر متاثرہ ویب سائٹس میں انٹرنل سرور ایرر نظر آرہا ہے۔

لاہور ہائیکورٹ نے اسلام قبول کرنے کے بعد شیخوپورہ کے رہائشی ناصر حسین سے نکاح کرنے والی بھارتی سکھ یاتری سربجیت کور (نور بی بی) کو ہراساں کرنے سے روک دیا۔

لاہور ہائی کورٹ کے جسٹس فاروق حیدر نے نور بی بی (سربجیت کور) اور اس کے شوہر کو ہراسانی سے روکنے کی درخواست پر سماعت کی،درخواست گزار نے عدالت میں موقف اپنایا کہ مذہبی رسومات کےلیے آئی بھارتی سکھ خاتون نے قبول اسلام کے بعد ناصر سے نکاح کیا ہے۔درخواست میں الزام عائد کیا گیا کہ 8 نومبر کو پولیس نے درخواست گزار کے گھر پر غیرقانونی چھاپہ مارا اور خاتون پر شادی ختم کرنے کےلیے دباؤ ڈالا۔

درخواست کے مطابق خاتون نے اپنی مرضی سے اسلام قبول کیا اور نکاح کیا ہے، پولیس حکام کے پاس درخواست گزار کے گھر چھاپہ مارنے کا اختیار نہیں،سماعت کے بعد لاہور ہائیکورٹ نے پولیس کو نور بی بی کو ہراساں کرنے سے روک دیا

وزیراعلیٰ پنجاب مریم نواز شریف نے بچوں کے جنسی استحصال، بدسلوکی اور تشدد کی روک تھام و بحالی کے عالمی دن پر اپنے پیغام میں کہا ہے کہ بچوں کے ساتھ جنسی استحصال، بدسلوکی اور تشدد صرف جرم نہیں بلکہ انسانیت کے خلاف بغاوت ہے۔بچے ان کی ریڈ لائن ہیں، سب ہی پیارے ہیں اور سب کی حفاظت حکومت کی ذمہ داری ہے۔

وزیراعلیٰ پنجاب مریم نواز کا کہنا تھا کہ بچوں کے خلاف جرائم میں ملوث افراد سماج کے ناسور ہیں اور پنجاب سے انہیں جڑ سے اکھاڑ پھینکا جائے گا۔ پنجاب میں بچوں کو تحفظ دینے کے لیے پاکستان کا پہلا ورچوئل سینٹر برائے چائلڈ سیفٹی قائم کیا گیا ہے، جہاں ڈیجیٹل ٹیکنالوجی اور مستحکم گورننس کو ملا کر بچوں اور شہریوں کی حفاظت کا جدید نظام تشکیل دیا گیا ہے، پنجاب کا ورچوئل سینٹر برائے چائلڈ سیفٹی ہزاروں بچھڑے ہوئے بچوں اور بزرگوں کو ان کی فیملیز سے ملا چکا ہے۔ انہوں نے ہدایت کی کہ پنجاب میں کسی بچے کے لاپتہ ہونے کی صورت میں فوری طور پر ورچوئل سینٹر برائے چائلڈ سیفٹی سے رابطہ کیا جائے۔

میر علی کے علاقے پٹسے اڈہ میں سیکیورٹی فورسز نے خفیہ اطلاعات کی بنیاد پر کارروائی کرتے ہوئے کالعدم تنظیم تحریک طالبان پاکستان سے وابستہ ایک انتہائی مطلوب دہشت گرد کو فائرنگ کے تبادلے میں ہلاک کر دیا۔ابتدائی سیکیورٹی ذرائع کے مطابق ہلاک دہشت گرد کی شناخت سعدیق کے نام سے ہوئی، جو فورسز پر متعدد حملوں اور دہشت گردانہ کارروائیوں میں ملوث تھا۔واقعے کے بعد علاقے کو گھیرے میں لے کر سرچ آپریشن شروع کر دیا گیا۔ سیکیورٹی اہلکاروں کی جانب سے کسی جانی نقصان کی اطلاع نہیں ملی۔ تحقیقات جاری ہیں تاکہ دہشت گرد کے معاون نیٹ ورک کا سراغ لگایا جا سکے۔

ٹانک میں نامعلوم حملہ آوروں نے دو ٹی ٹی پی کمانڈروں طور بیتنی اور شاہ زیب بیتنی کے گھر کو آگ لگا دی۔مقامی ذرائع کے مطابق آگ اتنی شدید تھی کہ پورا گھر راکھ کا ڈھیر بن گیا، تاہم کوئی جانی نقصان رپورٹ نہیں ہوا۔پولیس نے علاقے کو گھیرے میں لے کر حملہ آوروں کی تلاش شروع کر دی ہے اور اس واقعے کی وجوہات جاننے کے لیے مختلف پہلوؤں سے تفتیش جاری ہے، جن میں داخلی دشمنیاں اور شدت پسندوں کے آپسی اختلافات بھی شامل ہیں۔

لکی مروت کے علاقے شہباز خیل میں دہشت گردوں نے گیس پائپ لائن کو بارودی مواد سے نشانہ بنایا، جس سے پائپ لائن کو شدید نقصان پہنچا اور پنجاب کی جانب جانے والی سپلائی متاثر ہوئی۔پولیس اور سیکیورٹی فورسز نے جائے وقوعہ کو محفوظ بنا کر علاقے میں سرچ آپریشن شروع کر دیا۔ تکنیکی ٹیموں نے مرمت کا کام شروع کر دیا ہے۔

بنوں کے لُنڈی ڈک علاقے میں عوام اور پولیس کے مشترکہ آپریشن کے دوران ایک مشتبہ دہشت گرد نواب کو گرفتار کر لیا گیا۔پولیس کے مطابق عوامی تعاون نے کارروائی کو کامیاب بنایا۔ ملزم کو مزید تحقیقات کے لیے شیخ لُنڈی ڈک پولیس پوسٹ منتقل کر دیا گیا ہے۔

کلاچی تحصیل میں سیکیورٹی فورسز نے بڑی خفیہ کارروائی کرتے ہوئے 10 سے زائد دہشت گردوں کو ہلاک کر دیا، جن میں انتہائی مطلوب کمانڈر عالم محسود بھی شامل تھا۔هلاک ہونے والوں میں افغان شہری بھی شامل ہیں۔ کارروائی کے دوران بھاری مقدار میں بارودی مواد، خودکش جیکٹس، آئی ای ڈیز اور جدید اسلحہ برآمد ہوا۔ذرائع کے مطابق عالم محسود 2008 کے نواز کوٹ حملے، 2010 کے بنوں جیل حملے اور 2014 کے فوجی پوسٹ حملے میں ملوث تھا۔

باجوڑ میں سرحدی علاقوں میں کیے گئے خفیہ آپریشنز میں متعدد دہشت گردوں کو ہلاک کیا گیا، جن میں افغان شہری بھی شامل ہیں۔آپریشن میں ہلاک ہونے والوں میں محمد بلال عرف ابو بکر مہاجر کوچائی شامل ہے، جو ممنوعہ گروہ کاروان سیف العمر سے وابستہ تھا۔ وہ کابل کے علاقے قرہ باغ کا رہائشی اور سوشل میڈیا پر پروپیگنڈا میں سرگرم تھا۔

پشاور کے بالا حصار فورٹ میں فرنٹیئر کور خیبر پختونخوا نارتھ نے خیبر ڈسٹرکٹ کے عمائدین کا اہم جرگہ طلب کیا، جس میں علاقائی سیکیورٹی، امن و امان اور مستقبل کی حکمت عملی پر تفصیلی تبادلہ خیال کیا گیا۔جرگے نے اس بات پر زور دیا کہ عوام اور فورسز کے باہمی تعاون سے ہی پائیدار امن ممکن ہے۔

پاکستان نے بڑھتی ہوئی کشیدگی اور سیکیورٹی خدشات کے باعث افغانستان کے ساتھ سرحدی گزرگاہوں کو غیر معینہ مدت کے لیے بند رکھنے کا فیصلہ برقرار رکھا ہے۔حکومت کا کہنا ہے کہ سرحدیں اسی وقت کھولی جائیں گی جب افغان حکام ٹی ٹی پی اور دیگر دہشت گرد گروہوں کے خلاف ٹھوس اقدامات کریں گے۔سرحد بندش سے ہزاروں گاڑیاں دونوں جانب پھنس چکی ہیں، تاہم انسانیت کی بنیاد پر محدود آمدورفت جاری ہے۔

نوشہرہ کے علاقے بینظیر گڑھی پبی میں ایک خواجہ سرا سلمان عرف کھکولا اور اس کے ساتھی کو گولیاں مار کر قتل کر دیا گیا۔
پولیس کے مطابق دونوں لاشوں پر متعدد گولیوں کے نشانات تھے۔ دونوں کو رات گئے گھر سے نکال کر لے جایا گیا تھا۔
پولیس موبائل ڈیٹا اور دیگر شواہد کی مدد سے تحقیقات کر رہی ہے۔

روجھان جمالی کے علاقے میر ہزار میں 36 انچ گیس پائپ لائن پر دھماکے سے پنجاب جانے والی سپلائی متاثر ہوئی۔
سیکیورٹی فورسز اور تکنیکی ٹیموں نے علاقے کو سیل کر کے مرمت کا آغاز کر دیا ہے۔

شیپچہار کے پہاڑی علاقے میں مبینہ طور پر بی ایل ایف کے حملہ آوروں نے سیکیورٹی چیک پوسٹ کو نشانہ بنایا۔
واقعے کے بعد سرچ آپریشن شروع کر دیا گیا ہے، دشت کے علاقے میں مبینہ بی ایل ایف نے فوجی قافلے پر حملہ کیا۔ہیلی کاپٹرز کو طلب کر کے علاقے کو سیل کر دیا گیا، تاہم سرکاری سطح پر دعویٰ کی تصدیق نہیں ہوئی۔ڈیرہ مراد جمالی کے قریب نامعلوم مسلح افراد نے ایک تعمیراتی کمپنی پر حملہ کر کے املاک کو نقصان پہنچایا۔کوئی جانی نقصان نہیں ہوا۔ پولیس نے سرچ آپریشن شروع کر دیا ہے۔ڈیرہ بگٹی میں ایک گھر کے باہر نصب بارودی مواد پھٹنے سے املاک کو نقصان پہنچا، مگر کوئی جانی نقصان نہیں ہوا۔پولیس نے علاقے کو گھیرے میں لے کر تحقیقات شروع کر دی ہیں۔

فیصل آباد پولیس نے خفیہ اطلاعات کی بنیاد پر کارروائی کرتے ہوئے سابق ریاست مخالف عنصر محمد آصف جٹ کو مقابلے کے دوران ہلاک کر دیا۔علاقے کو گھیرے میں لے کر آپریشن مکمل کیا گیا،محمد آصف جٹ کا تعلق کالعدم تنظیم سے تھا اور اسکی ریاست کو دھمکیوں کی ویڈیو سوشل میڈیا پر وائرل تھیں.