Category: لاہور

لاہور پریس کلب کے صدر ارشد انصاری کی قیادت میں سینئر صحافیوں کے وفد نے لاہور پریس کلب کی آرٹ کلچر اینڈ ٹیکنالوجی کمیٹی کے چیئرمین امجد عثمانی کی دعوت پر گزشتہ روز دربار صاحب کرتارپور کا خصوصی دورہ کیا، جہاں ان کا پی ایم یو انتظامیہ کی جانب سے استقبال کیا گیا۔

پراجیکٹ مینجمنٹ یونٹ کے افسر راجہ کامران نے دورے کے دوران وفد کو دربار صاحب کرتارپور کی تاریخ، تعمیراتی منصوبے اور بین المذاہب ہم آہنگی کے فروغ میں اس کی اہمیت پر تفصیلی بریفنگ دی اور دربار صاحب کے حوالے سے دستاویزی فلم بھی دکھائی گئی۔وفد نے بابا گورونانک کی سمادھی سمیت مختلف مقامات بھی دیکھے جبکہ اس موقع پر بین المذاہب ہم آہنگی اور امن کے فروغ میں کرتارپور راہداری کے کردار پر اظہارِ خیال بھی کیا گیا۔

وفد میں لاہور پریس کلب کے سینئر نائب صدر افضال طالب،پنجاب یونین آف جرنلسٹس کے سیکرٹری جنرل قمر الزمان بھٹی،سابق نائب صدر امجد عثمانی،سینئر صحافی محمد عبداللہ،ڈاکٹر خالد منہاس،عمران علی نومی،ظہیر شہزاد،عمر حفیظ، سید فرزند علی، فواد بشارت، رانا خالد قمر، محمد اکرم،ڈاکٹر عمران بھٹی اور کلب کے ڈپٹی منیجر محمد عقیل شامل تھے۔صدر لاہور پریس کلب ارشد انصاری نے اس موقع پر حکومتی اقدامات کو سراہتے ہوئے کہا کہ کرتارپور راہداری نا صرف مذہبی رواداری بلکہ خطے میں امن کی علامت ہے۔ لاہور پریس کلب کی جانب سے پی ایم یو انتظامیہ کو توصیفی سرٹیفیکٹس دیے گئے۔بعد ازاں، ارشد انصاری کی ستارہ امتیاز کیلئے نامزدگی کے سلسلے میں سر سید شکرگڑھ اور ضلع نارووال کے بڑے تعلیمی نیٹ ورک کے سربراہ ڈاکٹر حافظ شبیر احمد اور فیصل منظور تاج ایڈووکیٹ کی جانب سے شکرگڑھ میں تقریب کا اہتمام کیا گیا۔

تقریب کی صدارت نارووال پریس کلب کے چیئرمین ملک سعید الحق نے کی جبکہ اس موقع پر حافظ شبیر احمد موجود تھے جنھوں نے ارشد انصاری کو صحافیوں کا قائد قرار دیا اور کہا کہ علاقائی صحافیوں کو لاہور پریس کلب سے رہنمائی لینی چاہیے۔صدرارشد انصاری نے شکرگڑھ کے صحافیوں کو اتحاد کا پیغام دیا اور کہا کہ گوجرانوالہ کی طرح ایک ہو جاﺅ نارووال میں صحافی کالونی میں منظور کرکے دوں گا۔ تقریب میں شکرگڑھ کے صحافیوں، وکلا اور معزز شہریوں کی بڑی تعداد نے شرکت کی۔تقریب میں اعظم خاور، نامور شاعر حاجی صابر ناز اور ڈاکٹر محمد عارف،سماجی کارکن ملک قدیر احمد،شکرگڑھ کے صحافیوں شہزاد حنیف، رانا علی رضا، محمد رمضان، عرفان خان خالد،میاں شاہد اقبال،مرزا اسلام۔ حافظ عرفان رضا،غلام محی الدین چوہدری فہد یعقوب،سرمد یعقوب،زوہیب شیخ ،حسن شیخ ،محمد متاع قادری ،میاں شاہد ندیم ،رانا مہران الہی ، خالد سیف، محمد یاسین زمان،محمد آصف جمال ،طارق امین سلطانی اور حافظ ندیم نے خصوصی طور پر شریک ہوئے۔اس سے پہلے وفد کے نارووال اور شکرگڑھ پہنچنے پر یاران شکرگڑھ کے چیئرمین مرزا سرور بیگ نے وفد کا استقبال کیا وفد کو پاکستان کے معیاری وقت کی جگہ کا دورہ بھی کرایا گیا جہاں ہندوستان سے سورج کی پہلی کرن پاک سر زمین پر اجالا بکھیرتی ہے۔اس موقع پر پاکستان اور بھارت کے درمیان وقت میں آدھے گھنٹے کا فرق بھی دیکھاگیا۔وفد نے شکرگڑھ کی دھرتی پر آسودہ خاک صاحب کرامت صوفی بزرگ خواجہ عبدالسلام چشتی کے مزار پر بھی حاضری دی اور فاتحہ خوانی کی۔تقریب کے اختتام پر صدر ارشد انصاری نے ڈاکٹر حافظ شبیر احمد اور فیصل منظور تاج کو لاہور پریس کلب کی جانب سے شیلڈز پیش کیں جب کہ محمد عرفان سمیت مختلف شعبوں میں نمایاں کارکردگی دکھانے والے شہریوں میں سرٹیفکیٹس بھی تقسیم کیے گئے۔اس موقع پر شکرگڑھ کے صحافیوں کی جانب سے صدر ارشد انصاری کو تلوار سے مزین سویئنر کا نایاب تحفہ بھی دیا گیا۔صدر ارشد انصاری نے کامیاب مطالعاتی اور تفریحی دورے جبکہ تمغہ امتیاز کے حوالے سے تقریب پر لاہور پریس کلب کے سابق نائب صدر امجد عثمانی،سینئر صحافی محمد عبداللہ ،خالد منہاس اور عمران علی نومی کا بھی شکریہ ادا کیا۔

لاہور پولیس نے سوشل میڈیا پر کالعدم تحریک لبیک پاکستان (ٹی ایل پی) کی حمایت میں اور مریدکے آپریشن کے خلاف مواد شیئر کرنے کے الزام میں ڈولفن فورس کے ایک اہلکار کو گرفتار کر لیا ہے۔

پولیس ذرائع کے مطابق گرفتار اہلکار کی شناخت رحمان کے نام سے ہوئی ہے، جو ڈولفن اسکواڈ میں بطور اہلکار فرائض انجام دے رہا تھا۔ گجرپورہ پولیس نے کارروائی کرتے ہوئے اسے حراست میں لیا۔تحقیقات کے ابتدائی مرحلے میں معلوم ہوا ہے کہ رحمان نے اپنے سوشل میڈیا اکاؤنٹس پر کالعدم تنظیم کے حق میں متعدد پوسٹس اور ویڈیوز شیئر کی تھیں، جن میں مریدکے آپریشن کے خلاف اشتعال انگیز مواد بھی شامل تھا۔

پولیس کا کہنا ہے کہ اہلکار کے خلاف انسداد دہشت گردی ایکٹ اور پبلک سروس رولز کے تحت مقدمہ درج کر لیا گیا ہے، جب کہ اس کے موبائل فون اور دیگر ڈیجیٹل آلات تحویل میں لے کر فرانزک جانچ کے لیے بھیج دیے گئے ہیں۔ترجمان لاہور پولیس کے مطابق کسی بھی سرکاری اہلکار کی جانب سے کالعدم تنظیم یا غیر قانونی سرگرمی کی حمایت ناقابلِ برداشت ہے۔ محکمے کی ساکھ اور نظم و ضبط کے پیشِ نظر ایسے اقدامات کے خلاف زیرو ٹالرینس پالیسی اپنائی گئی ہے۔ذرائع کے مطابق اہلکار کو محکمانہ طور پر بھی معطل کر دیا گیا ہے، اور محکمانہ انکوائری کا آغاز کر دیا گیا ہے تاکہ اس کے ممکنہ روابط یا دیگر ساتھیوں کا بھی سراغ لگایا جا سکے۔پولیس حکام نے واضح کیا ہے کہ سوشل میڈیا پر نفرت انگیز یا اشتعال انگیز مواد پھیلانے والوں کے خلاف کارروائی جاری رہے گی، چاہے وہ کسی بھی ادارے یا عہدے سے وابستہ کیوں نہ ہوں۔

پنجاب بھر میں دفعہ 144 کے نفاذ میں 7 یوم کی توسیع کر دی گئی۔

محکمہ داخلہ پنجاب نے 8 نومبر تک دفعہ 144 کے نفاذ میں توسیع کا نوٹیفکیشن بھی جاری کر دیا ہے،ترجمان محکمہ داخلہ پنجاب کی جانب سے جاری اعلامیے میں بتایا گیا ہے کہ صوبے میں ہر قسم کے احتجاج، جلسے جلوس، ریلیوں، دھرنوں، اجتماع اور ایسی تمام سرگرمیوں پر پابندی برقرار ہے، دفعہ 144 کے تحت 4 یا زائد افراد کے عوامی مقامات پر جمع ہونے پرمکمل پابندی ہو گی، دفعہ 144 کے دوران اسلحے کی نمائش، لاؤڈ اسپیکر کے استعمال پر بھی مکمل پابندی ہے، اشتعال انگیز، نفرت آمیز یا فرقہ وارانہ مواد کی اشاعت و تقسیم پر مکمل پابندی ہے، دفعہ 144 کے نفاذ میں توسیع کا فیصلہ امن وامان کے قیام، انسانی جانوں اور املاک کے تحفظ کیلئے کیا گیا۔

محکمہ داخلہ پنجاب کے ترجمان کا کہنا ہے کہ پابندی کا اطلاق شادی کی تقریبات، جنازوں اور تدفین پر نہیں ہوگا، سرکاری فرائض کی انجام دہی پر موجود افسران و اہلکار اور عدالتیں پابندی سے مستثنیٰ ہوں گی جبکہ لاؤڈ اسپیکر صرف اذان اور جمعہ کے خطبہ کے لیے استعمال کیے جاسکتے ہیں۔

ملک کے مختلف شہروں میں چینی کی فی کلو قیمت 220 روپے تک پہنچ گئی ہے۔

ادارہ شماریات کی دستاویزات کے مطابق ایک ہفتےمیں سرگودھامیں چینی کی فی کلو قیمت میں23 روپے تک جبکہ کراچی اور حیدرآباد میں چینی کی فی کلو قیمت میں 5 روپے تک اضافہ ہوگیا جس کے بعد ملک میں چینی کی زیادہ سے زیادہ فی کلو قیمت 220 روپے ہوگئی، دستاویزات کے مطابق راولپنڈی، کراچی اور سرگودھا میں چینی کی فی کلو قیمت بڑھ کر 200 روپے تک پہنچ گئی جبکہ حیدرآباد میں چینی کی زیادہ سے زیادہ فی کلو قیمت 190سےبڑھ کر 195روپے ہوگئی ہے۔

ادارہ شماریات کے مطابق گزشتہ ایک ہفتے میں چینی کی اوسط فی کلو قیمت میں 12پیسے کی کمی ہوئی، ملک میں چینی کی اوسط فی کلو قیمت 188روپے 69 پیسے پر آگئی ہے۔دستاویز کے مطابق گزشتہ ہفتےتک ملک میں چینی کی اوسط فی کلو قیمت 188 روپے 81 پیسے تھی جبکہ ایک سال قبل ملک میں چینی کی اوسط فی کلو قیمت 132روپے47پیسے تھی۔،دوسری جانب مارکیٹ ذرائع کا کہنا ہے کہ لاہور میں چینی کی قیمت میں ہوشربا اضافہ دیکھا جارہا ہے اور فی کلو چینی 200 سے 220 روپے کلو میں فروخت ہو رہی ہے۔

وزیرِاعلیٰ پنجاب مریم نواز شریف سے جرمن پارلیمنٹ کی رکن دِریا تُرک نَخباؤر (DERYA TÜRK-NACHBAUR) نے ملاقات کی، جس میں دوطرفہ تعلقات، پارلیمانی تعاون، ویمن ایمپاورمنٹ، تعلیم، یوتھ ایکسچینج پروگرام، ماحولیات اور کلین انرجی کے منصوبوں پر تفصیلی تبادلہ خیال کیا گیا۔

وزیرِاعلیٰ مریم نواز شریف نے مہمان پارلیمنٹیرین کا پرتپاک خیرمقدم کرتے ہوئے کہا کہ پنجاب کے تاریخی اور ثقافتی دل لاہور میں جرمنی کے معزز مہمانوں کا خیرمقدم کرنا میرے لیے باعثِ اعزاز ہے۔ انہوں نے فریڈرک ایبرٹ فاؤنڈیشن کی 100 ویں سالگرہ پر مبارکباد دی اور پاکستان میں اس کی 35 سالہ خدمات کو سراہتے ہوئے کہا کہ فاؤنڈیشن نے پاکستان اور جرمنی میں جمہوریت، سماجی انصاف اور مکالمے کے فروغ میں نمایاں کردار ادا کیا ہے،مریم نواز شریف نے کہا کہ پاکستان اور جرمنی جمہوریت، برداشت اور پارلیمانی طرزِ حکمرانی پر یقین رکھتے ہیں جو ترقی و امن کی بنیاد ہیں۔ انہوں نے فلڈ کے دوران جرمنی کی جانب سے اظہارِ ہمدردی و یکجہتی کو دونوں ممالک کی دیرینہ دوستی کی علامت قرار دیا۔وزیرِاعلیٰ نے کہا کہ پنجاب جرمنی کی رینیو ایبل انرجی، زرعی ٹیکنالوجی، آئی ٹی سروسز اور کلین مینوفیکچرنگ کے شعبوں میں سرمایہ کاری کا خیرمقدم کرتا ہے،انہوں نے نوجوانوں کی روزگار صلاحیت بڑھانے کے لیے جرمنی کے ڈوال ووکیشنل ٹریننگ ماڈل کو اپنانے کی خواہش ظاہر کی۔ مریم نواز شریف نے کہا کہ تعلیم حکومتِ پنجاب کے اصلاحاتی ایجنڈے کا بنیادی ستون ہے، نصاب کی جدت، ڈیجیٹل لرننگ اور عالمی تحقیقی روابط کے فروغ پر بھرپور کام کیا جا رہا ہے۔ انہوں نے بتایا کہ دس ہزار سے زائد پاکستانی طلبہ جرمن جامعات میں زیرِ تعلیم ہیں،خواتین کے حوالے سے گفتگو کرتے ہوئے انہوں نے کہا کہ خواتین کی بااختیاری پنجاب کی سماجی پالیسی کا مرکزی جزو ہے، ای بائیک سکیم، ہونہار سکالرشپ پروگرام اور ویمن اینکلیوز منصوبے خواتین کی محفوظ اور باعزت معاشی شرکت کو یقینی بنا رہے ہیں۔وزیرِاعلیٰ نے کہا کہ پنجاب کے تاریخی ورثے جیسے بادشاہی مسجد، لاہور قلعہ، شالامار گارڈن اور داتا دربار مشترکہ تہذیبی سرمائے کی علامت ہیں۔ ثقافتی تعاون مؤثر سفارت کاری ہے اور ہم جرمن اداروں کے ساتھ مشترکہ فن و ثقافت منصوبوں کا خیرمقدم کرتے ہیں۔انہوں نے کہا کہ پاکستان اور جرمنی امن، ترقی اور انسانی وقار کی مشترکہ اقدار کے حامل ہیں، ہم پارلیمانی روابط، پائیدار ترقی اور تعاون کے ذریعے پاک جرمن دوستی کو مزید مضبوط بنانے کے لیے پُرعزم ہیں۔

بھارت سے آنے والی آلودہ مشرقی ہواؤں کے سبب پنجاب کے وسطی علاقوں میں فضائی آلودگی خطرناک حد تک بڑھ گئی۔

محکمہ ماحولیات پنجاب کے مطابق بھارت سے آنےوالی آلودہ مشرقی ہوائیں لاہور کے فضائی معیار پر اثر انداز ہو رہی ہیں، اس دوران لاہور کا اوسط اے کیو آئی 320 تا 360 تک رہنے کا امکان ہے،محکمہ ماحولیات پنجاب کا بتانا ہے کہ پاکستان کے آلودہ ترین شہروں میں لاہور تیسرے نمبر پر ہے، لاہور کا ائیر کوالٹی انڈیکس 450 ریکارڈ کیا گیا ہے ، فضا میں آلودگی کی شرح بلند مگر قابو میں ہے تاہم لاہور میں دوپہر ایک بجے سے 5 بجے تک فضائی معیار میں بہتری کا امکان ہے، فضائی معیار کی نگرانی کرنے والی بین الاقوامی ویب سائٹ کے مطابق، لاہور سیکرٹریٹ میں 1018، ساندہ روڈ پر 997 اور راوی روڈ پر 820 پارٹیکولیٹ میٹر ریکارڈ کیے گئے ہیں، لاہور کے مختلف علاقوں میں فضا انتہائی مضر صحت ہے جس کے پیش نظر ماہرین نے شہریوں کو ماسک کے استعمال اور بغیر ضرورت گھروں سے باہر نہ نکلنے کی ہدایت جاری کی ہے،دوسری جانب برکی روڈ، شاہدرہ، ملتان روڈ، جی ٹی روڈ، ایجرٹن روڈ پر اے کیو آئی 500 ریکارڈ کیا گیا گیا، اسی طرح ڈیرہ غازی خان اور قصور بھی ملک کے آلودہ ترین شہروں میں شامل ہیں، ڈی جی خان اور قصور میں ائیرکوالٹی انڈیکس 500 ریکارڈ کیا گیا، قصور میں 286 ، رائے ونڈ میں 601، گوجرانوالہ میں 442، لاہور میں 398، فیصل آباد میں 337 اور شیخوپورہ میں 358پارٹیکولیٹ میٹر ریکارڈ کیا گیا۔

سیشن عدالت نے صوبائی وزیر کی جعلی ویڈیو اپ لوڈ کرنے کے مقدمے میں سوشل میڈیا ایکٹوسٹ فلک جاوید کی ضمانت کی درخواست مسترد کردی ۔

ایڈیشنل سیشن جج ڈاکٹر ساجدہ احمد چودھری نے محفوظ کیا گیا فیصلہ سنایا دیا ، درخواست میں موقف اختیار کیا گیا کہ این سی سی آئی اے نے حقائق کے برعکس مقدمہ درج کیا ، جعلی ویڈیو اپ لوڈ کرنے میں ملوث نہیں ، جسمانی ریمانڈ میں بھی کوئی چیز برآمد نہیں ہوئی ، سیاسی بنیادوں پر مقدمے میں نامزد کیاگیا ۔ عدالت ضمانت بعدازگرفتاری منظور کرے ،پراسکیوٹر نے دلائل دیتے ہوئے عدالت کو بتایا کہ ملزمہ نے صوبائی وزیر کی جعلی ویڈیو اپ لوڈ کرکے کردار کشی کی ہے ، صوبائی وزیر کو ذہنی کوفت کا سامنا کرنا پڑا ، ملزمہ کے خلاف ٹھوس ثبوت موجود ہیں۔ نیشنل سائبر کرائم انوسٹی گیشن ایجنسی نے ملزمہ کے خلاف مقدمہ درج کررکھا ہے۔