Category: لاڑکانہ

صدر مملکت آصف علی زرداری نے 27 دسمبر کو گڑھی خدا بخش، لاڑکانہ میں شہید محترمہ بے نظیر بھٹو کی برسی کے موقع پر ایک عظیم الشان جلسے سے خطاب کیا۔ بینظیر بھٹو کی 17ویں برسی کے موقع پر چیئرمین پاکستان پیپلز پارٹی بلاول بھٹو زرداری، خاتون اول آصفہ بھٹو زرداری اور صنم بھٹو کی گڑھی خدا بخش تقریب میں آمد ہوئی،کارکنان نے بھر پور استقبال کیا،

صدر مملکت آصف زرداری کا کہنا تھا کہ پیپلز پارٹی ہمیشہ عوام کی طاقت سے اقتدار میں آئی،آج میں صدر ہوں تو یہ عوام کی طاقت سے ہے،ہم نے 45سال بعد بھی بھٹوقتل کیس کا فیصلہ ریورس کیا، ذوالفقار علی بھٹو کا قتل ایک عدالتی قتل تھا،ہم نے یہاں دفن ہونا ہے،دھرتی اور پاکستان کے ساتھ وفا ہے،ہم نےپاکستان کو بچانا ہے،ایک زمانے میں کہتے تھے کہ نادر آرہا ہے نادر آرہا ہے،ہمارے بزرگوں نے کہا کہ قادر بھی قادرہ ہے،اگر کوئی سپر پاور پاور ہے تو مولا بھی پاور ہے،ہم مشکل حالات سے پاکستان کو نکالیں گے،ہم آپ کو خوشخبریاں دیں گے، یہ ہمارا کچھ نہیں بگاڑ سکتے ، مشکلات ہیں،تکالیف ہیں جو میرے لیے کوئی نئی بات نہیں، آپ دوستوں سےکہتا ہوں کوئی پروا کرنے کی ضرورت نہیں، ان سب کو میں دیکھوں گا،آپ کا پانی کہیں نہیں جائے گا اور نہ آپ کی گیس کہیں جائے گی، جو آپ کا حق ہے وہ آپ کو ملے گا ،جو دوسروں کا حق ہے وہ ان کو ملے گا، دنیا بد ل ضرور رہی ہے مگر وہ سب انسان کو فائدہ دے گی،ہمیں پاکستان کو بچاتا ہے، ملک کو مشکل حالات سے نکالیں گے

https://x.com/MediaCellPPP/status/1872638593182978471

بینظیر بھٹو نے شہادت قبول کی لیکن نظریے پر سودا نہیں کیا ،بلاول

بینظیر بھٹو ہمیشہ ہمارے ساتھ رہیں گی، ان کی روح کو سلام،سحر کامران

لاڑکانہ: سابق وزیرِ اعظم محترمہ بینظیر بھٹو شہید کی 17 ویں برسی کی مناسبت سے گڑھی خدا بخش میں پیپلز پارٹی کے کارکنوں اور عوام کا آنا جاری ہے۔ 27 دسمبر کو بینظیر بھٹو کی برسی کے موقع پر گڑھی خدا بخش میں استقبالیہ کیمپس بھی لگائے گئے ہیں، جہاں کارکنان اور عوام کی بڑی تعداد میں آمد متوقع ہے۔

انتظامیہ کی جانب سے گڑھی خدا بخش میں 50 سے زائد کیمپس قائم کیے گئے ہیں تاکہ پیپلز پارٹی کے کارکنوں اور عوام کو بہترین سہولتیں فراہم کی جا سکیں۔ ان کیمپس میں کھانے پینے کی اشیاء، پانی اور دیگر ضروری سامان فراہم کیا جائے گا تاکہ کارکنوں کو کسی قسم کی مشکل پیش نہ آئے۔ اس کے علاوہ محکمۂ صحت نے ہنگامی طبی امداد کے لیے 3 میڈیکل کیمپس بھی قائم کیے ہیں، تاکہ کسی بھی ایمرجنسی صورتحال میں فوری علاج معالجہ کی سہولت دستیاب ہو سکے۔

بینظیر بھٹو کی برسی کے موقع پر سیکیورٹی کے خصوصی انتظامات بھی کیے گئے ہیں۔ گڑھی خدا بخش کے پنڈال اور مزار کے ارد گرد 8500 پولیس اہلکار تعینات کیے گئے ہیں تاکہ کسی بھی ناخوشگوار واقعے سے بچا جا سکے اور عوام کی حفاظت کو یقینی بنایا جا سکے۔ پولیس کی خصوصی ٹیمیں مزار کے داخلی اور خارجی راستوں پر بھی تعینات ہیں۔ اس کے علاوہ، ڈی آئی جی، کمشنر اور ایس ایس پی گڑھی خدا بخش نے سیکیورٹی انتظامات کا جائزہ بھی لیا ہے اور اس بات کو یقینی بنایا ہے کہ ہر چیز مناسب طریقے سے چل رہی ہو۔

صدر پیپلز پارٹی وسطی پنجاب سابق وزیراعظم راجہ پرویز اشرف 27 دسمبر بی بی شہید کی برسی میں شرکت کے لٸے سفر پہ روانہ ہو گئے ہیں،

پیپلز پارٹی کی رہنما ناہید خان نے میڈیا سے بات کرتے ہوئے کہا کہ "شہید محترمہ بینظیر بھٹو کی شہادت کے بعد پاکستان میں قیادت کا خلا پیدا ہو چکا ہے، اور ملک لیڈر لیس ہو گیا ہے۔” انہوں نے مزید کہا کہ "بینظیر بھٹو شہید نے اپنی زندگی کی پرواہ کیے بغیر عوام کی خدمت کی اور دہشت گردی کے خلاف آواز اٹھائی۔ وہ عوام کی امیدوں کا مرکز تھیں اور ان کی شہادت سے جو نقصان پاکستان کو پہنچا ہے، وہ ناقابلِ تلافی ہے۔”

ناہید خان اور پیپلز پارٹی کے رہنما صفدر عباسی نے گڑھی خدا بخش میں بینظیر بھٹو کے مزار پر حاضری دی اور فاتحہ خوانی کے بعد میڈیا سے گفتگو کی۔ ناہید خان نے کہا کہ محترمہ بینظیر بھٹو نے عوامی حقوق کے لیے ہمیشہ لڑائی لڑی اور اپنی جان کی قربانی دی۔ ان کے قتل کے بعد پاکستان میں جو سیاسی بحران آیا، وہ آج تک برقرار ہے۔

بینظیر بھٹو کی شہادت کے بعد 17 برس گزر جانے کے باوجود عوام کے دلوں میں ان کی محبت اور احترام قائم ہے۔ ہر سال ان کی برسی کے موقع پر گڑھی خدا بخش میں ہزاروں افراد آ کر ان کی رہنمائی اور قربانیوں کو یاد کرتے ہیں۔ پیپلز پارٹی کی قیادت نے ان کی تعلیمات کو آگے بڑھانے کے عزم کا اظہار کیا ہے اور پارٹی کارکنوں کو ان کے مشن پر چلنے کی ترغیب دی ہے۔بینظیر بھٹو شہید کی برسی ایک اہم موقع ہے جس پر پیپلز پارٹی کے کارکن اپنے قائد کو خراجِ عقیدت پیش کرتے ہیں اور اس عہد کا اعادہ کرتے ہیں کہ وہ ان کے مشن کو پورا کریں گے۔