Category: ننکانہ

ننکانہ صاحب (باغی ٹی وی، نامہ نگار احسان اللہ ایاز)پنجاب ایمرجنسی سروس ریسکیو 1122 ننکانہ صاحب کے ضلعی ہیڈ کوارٹرز میں ماہ جون 2025 کی کارکردگی کا جائزہ اجلاس منعقد ہوا، جس کی صدارت ڈسٹرکٹ ایمرجنسی آفیسر محمد اکرم پنوار نے کی۔ اجلاس میں کنٹرول روم انچارج محمد نوید، ریسکیو سیفٹی آفیسر علی عمران، اسٹیشن کوارڈینیٹر محمد سعید، میڈیا کوارڈینیٹر علی اکبر اور دیگر افسران و انچارجز نے شرکت کی۔

کنٹرول روم انچارج محمد نوید نے اجلاس کو بریفنگ دیتے ہوئے بتایا کہ جون کے مہینے میں ریسکیو 1122 ننکانہ صاحب کو کل 17013 کالز موصول ہوئیں جن میں سے 3817 ایمرجنسی کالز تھیں۔ ان کالز پر بروقت کارروائی کرتے ہوئے ریسکیو اہلکاروں نے 3930 افراد کو امداد فراہم کی۔

تفصیلات کے مطابق 700 روڈ ٹریفک حادثات، 2460 میڈیکل ایمرجنسیز، 43 آگ لگنے کے واقعات، 101 لڑائی جھگڑے و تشدد، 4 پانی میں ڈوبنے اور 509 متفرق نوعیت کی ایمرجنسیز رپورٹ ہوئیں۔ مجموعی طور پر 1451 متاثرین کو موقع پر ابتدائی طبی امداد دی گئی، جبکہ 2371 مریضوں کو ہسپتال منتقل کیا گیا۔ بدقسمتی سے ان ایمرجنسیز کے دوران 108 افراد جانبر نہ ہو سکے۔

ڈاکٹروں کی سفارش پر 341 مریضوں کو ضلعی سطح پر علاج کی سہولت نہ ہونے کے باعث لاہور اور فیصل آباد کے بڑے ہسپتالوں میں ریسکیو 1122 کی پیشنٹ ٹرانسفر سروس کے ذریعے مفت اور محفوظ طریقے سے منتقل کیا گیا۔

ڈسٹرکٹ ایمرجنسی آفیسر محمد اکرم پنوار نے مون سون سیزن کے پیش نظر عوام سے خصوصی احتیاطی تدابیر اپنانے کی اپیل کی۔ انہوں نے کہا کہ والدین بچوں کو جوہڑوں اور سیلابی پانی میں جانے سے روکیں، چھتوں کی صفائی کا خاص خیال رکھیں، اور بجلی کے کھمبوں یا گیلی حالت میں سوئچ بورڈز سے دور رہیں تاکہ کسی بھی ناخوشگوار حادثے سے بچا جا سکے۔

ننکانہ صاحب(باغی ٹی وی، نامہ نگاراحسان اللہ ایاز) عدالتی احکامات کی خلاف ورزی، سی ای او ضلع کونسل نے سستے بازار زبردستی بند کروا دیے، دکاندار سراپا احتجاج

ننکانہ صاحب میں مہنگائی سے پریشان عوام کیلئے لگائے گئے سستے بازار بھی بیوروکریسی کی مبینہ رشوت خوری کی نذر ہوگئے۔ عدالت عالیہ کے حکم امتناعی کے باوجود سی ای او ضلع کونسل عامر اختر بٹ نے سیدوالہ اور موڑکھنڈا کے علاقوں میں قائم سستے بازار زبردستی بند کروا دیے، جس سے درجنوں دکاندار بے روزگار ہو گئے اور شہری سستے داموں اشیاء خریدنے کی سہولت سے محروم ہو گئے۔

ٹھیکیدار آصف اقبال نے مؤقف اختیار کیا کہ اُس نے عدالت عالیہ سے سٹے آرڈر حاصل کر رکھا ہے جس میں واضح طور پر ضلع کونسل کو سستے بازاروں میں مداخلت سے روکا گیا تھا۔ مگر اس عدالتی حکم کو نظر انداز کرتے ہوئے سی ای او ضلع کونسل عامر اختر بٹ نے بازاروں کو اُکھاڑ دیا۔ ٹھیکیدار کا الزام ہے کہ چیف آفیسر اور فنانس آفیسر اس سے مبینہ طور پر رشوت طلب کر رہے تھے اور انکار پر بازار بند کرنے کی دھمکیاں دی گئیں۔

بازار میں موجود دکانداروں نے شدید احتجاج کرتے ہوئے الزام لگایا کہ انہیں ناجائز طور پر ہراساں کیا جا رہا ہے اور روزگار چھینا جا رہا ہے۔ دکانداروں کا کہنا ہے کہ ہم مہنگائی کے مارے ہوئے عوام کو ریلیف دینے کے لیے بیٹھے ہیں، مگر ضلع کونسل کے افسران رشوت نہ دینے پر زبردستی کاروبار ختم کروا رہے ہیں۔

انہوں نے وزیر اعلیٰ پنجاب مریم نواز سے فوری نوٹس لینے اور متعلقہ افسران کے خلاف سخت قانونی کارروائی کا مطالبہ کیا ہے۔

دوسری جانب سی ای او ضلع کونسل عامر اختر بٹ کا کہنا ہے کہ یہ کارروائی ڈپٹی کمشنر ننکانہ صاحب کے احکامات پر کی گئی ہے، تاہم اس مؤقف پر شہریوں اور متاثرہ دکانداروں نے شکوک کا اظہار کرتے ہوئے عدالتی حکم کی خلاف ورزی کی مکمل انکوائری کا مطالبہ کیا ہے۔

واربرٹن (نامہ نگار) پولیس اور صحافت کا چولی دامن کا ساتھ ہے، ایس ایچ او آغا حسین.عوامی خدمت اور امن و امان کے قیام میں میڈیا کا کردار قابلِ تحسین ہے، مہر عبدالغفور

تفصیلات کے مطابق ایس ایچ او منڈی فیض آباد آغا حسین نے کہا ہے کہ پولیس اور صحافت کا چولی دامن کا ساتھ ہے، عوام کو بروقت اور درست معلومات کی فراہمی میں میڈیا کا کردار قابلِ تحسین ہے۔ وہ سٹی پریس کلب رجسٹرڈ واربرٹن کے صحافیوں سے گفتگو کر رہے تھے۔ ان کا کہنا تھا کہ پولیس عوام کی جان و مال کے تحفظ کے لیے ہر ممکن اقدامات کر رہی ہے اور میڈیا کے تعمیری کردار کو ہمیشہ قدر کی نگاہ سے دیکھا جاتا ہے۔

اس موقع پر سینئر صحافی مہر عبدالغفور نے کہا کہ ایس ایچ او آغا حسین نہ صرف ایک فرض شناس اور باصلاحیت پولیس آفیسر ہیں بلکہ خوش اخلاق، نرم گو اور عوام دوست شخصیت کے حامل انسان ہیں۔ ان کی عوامی خدمت، انصاف پسندی اور خوش اخلاقی کے باعث علاقے کے لوگ ان سے دلی محبت اور اعتماد رکھتے ہیں۔

مہر عبدالغفور نے امن و امان کے قیام کے لیے آغا حسین کی کوششوں کو سراہتے ہوئے جرائم کے خاتمے میں بھرپور تعاون کی یقین دہانی کروائی۔ آخر میں انہوں نے کہا کہ آئندہ بھی پولیس اور میڈیا باہمی رابطے اور تعاون کے ساتھ عوام کی خدمت کرتے رہیں گے۔

ننکانہ صاحب (باغی ٹی وی، نامہ نگار احسان اللہ ایاز)پاکستان مرکزی مسلم لیگ کے صدر شعبہ خدمت خلق چوہدری شفیق الرحمن وڑائچ نے کہا ہے کہ ہماری جماعت کی سیاست اقتدار نہیں، بلکہ انسانیت کی خدمت کے اصول پر استوار ہے۔ وہ ضلع ننکانہ صاحب میں شعبہ خدمت خلق اور تاجر برادری کے تحصیلی ذمہ داران سے ایک خصوصی ملاقات میں گفتگو کر رہے تھے، جس میں پارٹی کے جنرل سیکرٹری ضلع ننکانہ ڈاکٹر ثاقب مجید بھی شریک تھے۔

اس موقع پر چوہدری شفیق الرحمن وڑائچ نے "نیکی فاؤنڈیشن” کا تعارف پیش کرتے ہوئے کہا کہ مرکزی مسلم لیگ کا وژن ہر گاؤں، ہر تحصیل اور ہر ضلع میں منظم، شفاف اور دیرپا فلاحی نیٹ ورک قائم کرنا ہے تاکہ دکھی انسانیت کی بلا تفریق خدمت کی جا سکے۔

انہوں نے کہا کہ ننکانہ صاحب میں تھلیسیمیا کے مریض بچوں کے لیے بلڈ سپورٹ پروگرامز، ڈائیلاسز سینٹرز اور روزانہ بنیاد پر عوام کے لیے مفت دسترخوان جیسے منصوبے جلد شروع کیے جا سکتے ہیں بشرطیکہ خلوص، اتحاد اور مسلسل جدوجہد کو اپنایا جائے۔

چوہدری شفیق الرحمن نے پارٹی کارکنوں اور سماجی خدمت کے جذبے سے سرشار افراد سے اپیل کی کہ وہ آگے بڑھ کر ان منصوبوں میں عملی کردار ادا کریں تاکہ فوری ریلیف کے ساتھ ساتھ دیرپا سماجی تبدیلی کی بنیاد رکھی جا سکے۔

مجلس میں شامل تاجر برادری اور دیگر ذمہ داران نے اس فلاحی ویژن کو سراہتے ہوئے اپنے بھرپور تعاون کا یقین دلایا۔ شرکاء نے اس عزم کا اظہار کیا کہ پاکستان مرکزی مسلم لیگ کا خدمت خلق کا شعبہ حقیقی معنوں میں عوام کی امیدوں کا مرکز بنے گا۔

ملاقات کے اختتام پر ملک و ملت کی سلامتی، خدمت خلق کے جذبے کی کامیابی، اور معاشرے میں یکساں فلاحی نظام کے قیام کے لیے خصوصی دعا کی گئی۔

ننکانہ صاحب (باغی ٹی وی، نامہ نگار احسان اللہ ایاز)مون سون کی پہلی بارش نے ننکانہ صاحب کو یورپ کے "وینس” کا منظر تو دے دیا، مگر یہ منظر خوبصورتی نہیں، اذیت اور غفلت کی داستان لیے ہوئے ہے۔ شہر کی گلیاں، بازار اور سڑکیں ندی نالوں میں تبدیل ہو گئیں، شہری پانی میں گھِر کر رہ گئے، جبکہ میونسپل کمیٹی کے دعوے اور منصوبے بہہ گئے۔ ڈپٹی کمشنر محمد تسلیم اختر راؤ کی تمام کوششیں، نیک نیتی اور وژن محض کاغذی دکھائی دینے لگیں، کیونکہ میدانِ عمل میں افسران کی لاپرواہی اور نااہلی نے سب کچھ خاک کر دیا۔

ذرائع کے مطابق، میونسپل کمیٹی کے قائم مقام چیف آفیسر راؤ انوار اور سروسز آفیسر صدام حسین کے درمیان اختیارات کی جنگ اور ذاتی چپقلش نے پورے نظام کو مفلوج کر دیا ہے۔ شہر کی صفائی، نکاسیِ آب اور سیوریج نظام پر ان دونوں افسران کے جھگڑے کی چھاپ صاف نظر آ رہی ہے۔ یہ اندرونی لڑائی اس حد تک بڑھ چکی ہے کہ عوام کا سکون برباد ہو چکا ہے۔ دفتر کی جنگ نے شہر کو پانی میں ڈبو دیا ہے۔

مزید براں، سیوریج نظام کی بہتری کے لیے درکار سکرمشین، جیٹرمشین اور دیگر ضروری مشینری گزشتہ کئی برسوں سے ناکارہ پڑی تھی، جنہیں حالیہ دنوں میں ایڈمنسٹریٹر و ایڈیشنل ڈپٹی کمشنر جنرل شہزاد کھوکھر نے مرمت کے لیے بیرون شہر بھجوا تو دیا ہے، مگر نتائج آنے سے پہلے ہی بارش نے سب کچھ بےنقاب کر دیا۔ شہر کی سڑکوں پر گٹر ابلنے لگے، بازاروں میں دکاندار اپنے سامان کو بچاتے رہے، اور شہری کیچڑ، تعفن اور گندے پانی سے بچنے کی تگ و دو کرتے رہے۔

یہی صورتحال اسمبلی اجلاس میں بھی زیرِ بحث آئی، جہاں ایم پی اے مہر کاشف رنگ الٰہی پڈھیار نے حکومت سے سخت مطالبہ کیا کہ ننکانہ صاحب کے لیے ہنگامی بنیادوں پر سیوریج کی خصوصی گرانٹ دی جائے۔ انہوں نے کہا: "اب ننکانہ کو سڑکیں نہیں، کشتیاں درکار ہیں۔”

شہری حلقوں میں سخت غم و غصہ پایا جا رہا ہے۔ شہریوں کا کہنا ہے کہ اگر مون سون سے قبل مشینری کو ٹھیک کر لیا جاتا، افسران ذاتی رنجشوں کو بالا رکھ کر کام کرتے، اور پیشگی انتظامات کر لیے جاتے، تو آج پورا شہر پانی میں نہ ڈوبا ہوتا۔ ہر سال مون سون آتا ہے، مگر ہر سال یہی تماشہ ہوتا ہے۔ ستم ظریفی یہ ہے کہ فنڈز موجود ہیں، افسران موجود ہیں، مگر کام کرنے کا جذبہ ندارد۔

شہر کی عوام نے اعلیٰ حکام، وزیر اعلیٰ پنجاب مریم نواز شریف اور وزیر بلدیات سے فوری نوٹس لینے کا مطالبہ کیا ہے، تاکہ عوامی مسائل کا مستقل اور عملی حل نکالا جا سکے۔ بصورت دیگر، ہر سال ننکانہ "وینس” بنتا رہے گا، اور عوام مشکلات کی دلدل میں دھنسے رہیں گے۔