Category: ننکانہ

ننکانہ صاحب (باغی ٹی وی،نامہ نگاراحسان اللہ ایاز)ڈپٹی کمشنر ننکانہ صاحب محمد تسلیم اختر راؤ صفائی ستھرائی کے معاملات کو بہتر بنانے کے لیے متحرک ہو گئے۔ انہوں نے تحصیل ننکانہ کے مختلف علاقوں، جن میں ننکانہ سٹی، موڑ کھنڈا، بچیکی اور منڈی فیض آباد شامل ہیں، کا دورہ کیا اور صفائی کی صورت حال کا تفصیلی جائزہ لیا۔

موڑ کھنڈا اور منڈی فیض آباد میں صفائی کے ناقص انتظامات پر شدید برہمی کا اظہار کرتے ہوئے ڈپٹی کمشنر نے صفائی کمپنی پر 10 لاکھ روپے جرمانہ عائد کر دیا۔ ساتھ ہی کمپنی کو ہدایت کی گئی کہ دو گھنٹوں کے اندر اندر صفائی کے معیاری انتظامات یقینی بنائے جائیں۔

بچیکی میں صفائی کے مثالی انتظامات پر ڈپٹی کمشنر نے عملے کو شاباش دی اور انہیں نقد انعامات سے بھی نوازا۔ اس موقع پر انہوں نے واضح کیا کہ صفائی آپریشن میں کسی قسم کی کوتاہی ہرگز برداشت نہیں کی جائے گی۔

ڈپٹی کمشنر محمد تسلیم اختر راؤ نے اعلان کیا کہ وہ عید کے موقع پر صفائی کے مثالی انتظامات کو ہر صورت ممکن بنائیں گے اور اس مقصد کے لیے ضلع کے تمام شہروں، قصبوں اور دیہاتوں کا خود دورہ کریں گے۔

انہوں نے شہریوں سے اپیل کی کہ صفائی ٹیموں سے مکمل تعاون کریں اور اگر کہیں صفائی نہ ہونے کی شکایت ہو تو فوری طور پر کنٹرول روم کو اطلاع دیں۔

ننکانہ صاحب (باغی ٹی وی، نامہ نگار احسان اللہ ایاز) عالمی یومِ ماحولیات کے موقع پر ضلعی انتظامیہ ننکانہ صاحب کی جانب سے مختلف تقریبات کا انعقاد کیا گیا جن میں شجرکاری، آگاہی ریلی اور سیمینار شامل تھے۔

ڈپٹی کمشنر محمد تسلیم اختر راو کی قیادت میں بچیانہ روڈ کے دونوں اطراف شجرکاری مہم کا آغاز کیا گیا، جس میں ضلعی افسران، طلبہ اور شہریوں نے بھرپور حصہ لیا۔ اسی سلسلے میں ضلع کونسل ہال میں ماحولیاتی تحفظ کے موضوع پر آگاہی سیمینار بھی منعقد کیا گیا۔

مزید برآں، ڈی سی آفس سے گوردوارہ جنم استھان تک ایک بڑی آگاہی ریلی نکالی گئی جس میں ایڈیشنل ڈپٹی کمشنر ریونیو رائے ذوالفقار علی، ایڈیشنل ڈپٹی کمشنر جنرل شاہد کھوکھر، اسسٹنٹ کمشنر عطیہ عنائیت، ڈپٹی ڈائریکٹر ماحولیات فوزیہ اکرم، تاجر برادری، طلبہ، سول سوسائٹی اور عام شہریوں کی بڑی تعداد شریک ہوئی۔

ڈپٹی کمشنر تسلیم اختر راو نے خطاب میں کہا کہ ماحولیات کا تحفظ قومی فریضہ ہے اور ہمیں گلی محلوں کی صفائی کے ساتھ ساتھ درخت لگانے کی بھی عادت اپنانا ہو گی۔ انہوں نے کہا کہ وزیر اعلیٰ پنجاب کی ہدایت پر زیرو پلاسٹک و زیرو پلوشن ڈے منایا جا رہا ہے تاکہ ماحولیاتی آلودگی پر قابو پایا جا سکے۔

انہوں نے شہریوں سے اپیل کی کہ وہ شاپر بیگز کا استعمال ترک کریں، دھواں چھوڑتی گاڑیوں کے خلاف کریک ڈاؤن میں انتظامیہ کا ساتھ دیں اور ماحول دوست طرز زندگی اپنائیں۔ قدرتی ماحول کے بغیر زندگی ممکن نہیں، اس لیے حکومت، انتظامیہ اور عوام کو مل کر ماحول کا تحفظ یقینی بنانا ہو گا۔

ننکانہ صاحبٰ(باغی ٹی وی،نامہ نگاراحسان اللہ ایاز) بابا گورو نانک یونیورسٹی میں یومِ ماحولیات پر پلاسٹک آلودگی کے خاتمے کی مہم

بابا گورو نانک یونیورسٹی ننکانہ صاحب میں عالمی یوم ماحولیات جوش و خروش سے منایا گیا، جس کا مرکزی موضوع "پلاسٹک آلودگی کا خاتمہ” تھا۔ اس مناسبت سے یونیورسٹی میں سیمینار، پوسٹر نمائش، آگاہی واک اور طلبہ کی عملی سرگرمیوں کا انعقاد کیا گیا۔

تقریب میں ممتاز ماحولیاتی ماہرین نے شرکت کی، جن میں فوزیہ اکرم (ڈپٹی ڈائریکٹر، انوائرنمنٹل پروٹیکشن ایجنسی)، پروفیسر ڈاکٹر کفیل احمد، ڈاکٹر سمیرا نعیم، ڈاکٹر مدثر حسن، ڈاکٹر عدیل غفار اور ڈاکٹر عفیفہ یونس شامل تھے۔ مقررین نے ماحولیاتی آلودگی خصوصاً پلاسٹک کے نقصانات پر روشنی ڈالتے ہوئے پائیدار طرزِ زندگی کو اپنانے کی ضرورت پر زور دیا۔ انہوں نے ماحول دوست پالیسیوں، زمینی و فضائی آلودگی سے تحفظ، اور پاکستان کو درپیش ماحولیاتی چیلنجز پر تفصیلی خطاب کیا۔

سیمینار کے بعد طلبہ نے "پلاسٹک آلودگی کا خاتمہ” کے موضوع پر پوسٹر نمائش کا انعقاد کیا، جس میں تخلیقی انداز میں ماحولیاتی پیغامات کو اجاگر کیا گیا۔ نمائش کو مہمانانِ خصوصی نے خوب سراہا۔

ایک خصوصی سرگرمی میں طلبہ نے پلاسٹک کے متبادل ماحول دوست اشیاء کی ترویج کی اور سنگل یوز پلاسٹک کے خطرات سے آگاہی دی۔ یوم ماحولیات کی تقریبات کا اختتام ایک آگاہی واک پر ہوا، جس میں اساتذہ، طلبہ اور عملے نے بڑی تعداد میں شرکت کی۔ واک میں شریک افراد نے پلے کارڈز کے ذریعے ماحولیاتی تحفظ کا پیغام دیا اور سرسبز پاکستان کے عزم کا اعادہ کیا۔

ننکانہ صاحب (باغی ٹی وی، نامہ نگار احسان اللہ ایاز) عالمی یوم ماحولیات 2025 کی تقریبات کا ننکانہ صاحب میں باقاعدہ آغاز ہو گیا، جہاں ڈپٹی کمشنر محمد تسلیم اختر راؤ نے ماحولیاتی تحفظ کے لیے اپنے عزم کا اظہار "عزم کی دیوار” پر ہاتھ کا نشان لگا کر کیا۔ یہ اقدام صرف رسمی تقریب نہیں بلکہ ماحول دوست طرزِ زندگی کی جانب ایک علامتی اور عملی قدم بھی قرار دیا جا رہا ہے۔

تقریب میں شہریوں، سرکاری افسران اور مختلف شعبہ ہائے زندگی سے تعلق رکھنے والے افراد نے بھی بڑھ چڑھ کر شرکت کی اور پلاسٹک کے تھیلوں کے استعمال سے اجتناب کا حلف اٹھایا۔ سب نے "عزم کی دیوار” پر ہاتھ کے نشانات لگا کر ماحول دوست طرزِ عمل اپنانے کا عہد کیا۔

اس موقع پر محکمہ ماحولیات ننکانہ صاحب کے عملے نے عوام میں پمفلٹس تقسیم کیے جن میں پلاسٹک کے انسانی صحت اور ماحول پر مرتب ہونے والے منفی اثرات کی وضاحت کی گئی تھی۔ مہم کا مقصد ماحول سے متعلق شعور اجاگر کرنا اور عملی اقدامات کے لیے شہریوں کو ترغیب دینا ہے۔

ماحولیاتی ماہرین کے مطابق ایسے اقدامات اگر تسلسل سے جاری رکھے جائیں تو یہ نہ صرف مقامی سطح پر ماحول کے تحفظ میں مؤثر ثابت ہوں گے بلکہ ملک گیر سطح پر بھی ایک مثبت پیغام پہنچائیں گے۔

ننکانہ صاحب (باغی ٹی وی، نامہ نگار احسان اللہ ایاز) عیدالاضحیٰ کے موقع پر ممکنہ ہنگامی حالات سے نمٹنے کے لیے ریسکیو 1122 ننکانہ صاحب نے ایمرجنسی کور پلان کو حتمی شکل دے دی ہے۔ اس سلسلے میں ضلعی ہیڈکوارٹرز میں ڈسٹرکٹ ایمرجنسی آفیسر محمد اکرم پنوار کی زیر صدارت اجلاس منعقد ہوا، جس میں کنٹرول روم انچارج محمد نوید، ریسکیو سیفٹی آفیسر علی عمران، اسٹیشن کوآرڈینیٹر سعید احمد، میڈیا کوآرڈینیٹر علی اکبر اور دیگر افسران نے شرکت کی۔

اجلاس میں عیدالاضحیٰ کے دوران ریسکیو سروسز کی حکمت عملی کا جائزہ لیا گیا اور تمام انتظامات کو حتمی شکل دی گئی۔ ڈسٹرکٹ ایمرجنسی آفیسر محمد اکرم پنوار کے مطابق عید کے دنوں میں ریسکیو 1122 کا عملہ معمول کی ایمبولینس سروس اور پیشنٹ ٹرانسفر کے علاوہ جامع مساجد میں نماز عید کے دوران ریسکیو کور فراہم کرے گا۔ اس کے ساتھ ساتھ شہر کے اہم مقامات پر موٹر بائیک سروس، ایمبولینس، فائر وہیکلز اور موبائل ریسکیو پوسٹس بھی قائم کی جائیں گی۔

علاوہ ازیں، نہروں کے حساس مقامات پر واٹر ریسکیو ٹیمیں تعینات کی جائیں گی اور نہروں میں نہانے پر دفعہ 144 کی خلاف ورزی کرنے والوں کے خلاف قانونی کارروائی عمل میں لائی جائے گی۔ عوام سے اپیل کی گئی ہے کہ قربانی کے جانور ذبح کرتے وقت احتیاطی تدابیر اختیار کریں اور بچوں کو محفوظ فاصلے پر رکھیں تاکہ کسی بھی ناخوشگوار واقعے سے بچا جا سکے۔

ریسکیو 1122 کی جانب سے تمام اسٹاف کی چھٹیاں محدود کر دی گئی ہیں تاکہ عید کے دوران ہر قسم کی ایمرجنسی سے بروقت نمٹا جا سکے۔

ننکانہ صاحب (باغی ٹی وی نامہ نگار احسان اللہ ایاز) وزیراعلیٰ پنجاب مریم نواز شریف نے انسانی ہمدردی اور فلاح عامہ کی شاندار روایت کو آگے بڑھاتے ہوئے صحت عامہ کے شعبے میں ایک تاریخی قدم اٹھایا ہے۔ "وزیراعلیٰ انسولین کارڈ پروگرام” کے تحت اب ٹائپ ون ذیابیطس میں مبتلا بچوں کو نہ صرف مفت انسولین فراہم کی جا رہی ہے بلکہ یہ زندگی بچانے والی دوا اور اس سے منسلک ضروری طبی سامان براہ راست ان کے گھروں تک پہنچایا جا رہا ہے۔ اس عظیم الشان اقدام کا مقصد ان معصوم جانوں کو تکلیف دہ سفر، قطاروں، دھوپ اور انتظار کی اذیت سے بچا کر باعزت، باوقار اور بروقت علاج مہیا کرنا ہے۔

یہ صرف ایک منصوبہ نہیں، بلکہ ماں جیسے احساس سے جڑا وہ عمل ہے جو ریاستی سطح پر بچوں کی صحت کو اولین ترجیح دیتا ہے۔ اسی سلسلے میں ضلع ننکانہ صاحب میں بھی یہ مہم زور و شور سے جاری ہے، جہاں ڈپٹی کمشنر ننکانہ صاحب محمد تسلیم آختر راؤ کی ہدایات پر چیف ایگزیکٹو آفیسر ہیلتھ اینڈ پاپولیشن ڈیپارٹمنٹ ڈاکٹر طلحہ شیروانی نے ضلع بھر میں گھر گھر انسولین پہنچانے کے لیے خصوصی ٹیمیں تشکیل دے دی ہیں۔ ان ٹیموں کی نگرانی انچارج این سی ڈی اے ڈاکٹر راؤ سکندر اور فوکل پرسن نواز دیرتھ کر رہے ہیں، تاکہ کسی بھی بچے کا علاج کسی بھی لمحے متاثر نہ ہو اور وہ ایک محفوظ، خوشحال اور صحت مند زندگی کی طرف گامزن ہو سکے۔

اس انسان دوست پروگرام کا باقاعدہ افتتاح سٹی ننکانہ کے تین بچوں، ابو ہریرہ، عائشہ اور فاطمہ کے گھروں سے کیا گیا، جہاں سی ای او ہیلتھ ڈاکٹر طلحہ شیروانی نے خود ان کے دروازے پر انسولین پہنچا کر اس مشن کا عملی مظاہرہ کیا۔ یہ مناظر صرف دوا کی فراہمی نہیں تھے بلکہ ایک ریاستی عزم کا مظہر تھے جو ثابت کر رہے ہیں کہ پنجاب میں اب علاج عزت سے، بغیر سفارش اور گھر کی دہلیز پر دستیاب ہے۔ یہ وہ قدم ہے جسے تاریخ ہمیشہ یاد رکھے گی جب پنجاب کی بیٹی نے پنجاب کے بچوں کو اپنے بچوں کی طرح سمجھا اور ان کی صحت کا ذمہ اٹھایا۔

ننکانہ صاحب (باغی ٹی وی، نامہ نگار احسان اللہ ایاز) کمشنر لاہور ڈویژن زید بن مقصود کی زیر صدارت ریجنل اور ضلعی امن کمیٹیوں کا اہم اجلاس منعقد ہوا، جس میں آر پی او شیخوپورہ اطہر اسماعیل، ڈپٹی کمشنر محمد تسلیم اختر راؤ، ڈی پی او سید ندیم عباس، اسسٹنٹ کمشنرز، اے ڈی سیز، ضلعی امن کمیٹی ممبران، علماء کرام اور سکھ برادری کے نمائندوں نے شرکت کی۔

اجلاس میں عیدالاضحیٰ کے موقع پر امن و امان، صفائی، قربانی کے جانوروں کی آلائشوں کی مناسب تلفی، کھالوں کے جمع کرنے کے ضابطے اور بین المذاہب ہم آہنگی کے فروغ جیسے اہم نکات پر غور کیا گیا۔ کمشنر لاہور زید بن مقصود نے کہا کہ ننکانہ صاحب بھائی چارے اور رواداری کی سرزمین ہے، اور اسی روایت کو برقرار رکھتے ہوئے تمام مذاہب اور مکاتب فکر کو ساتھ لے کر امن کے ماحول کو مزید مضبوط بنایا جائے گا۔

علماء کرام سے اپیل کی گئی کہ وہ خطبات کے ذریعے عوام میں صفائی، قانون کی پاسداری اور مذہبی رواداری کا پیغام دیں۔ قربانی کے جانوروں کی آلائشیں شاپر میں ڈال کر مقررہ مقامات پر پہنچانے کی ترغیب دی جائے تاکہ صفائی کا معیار بہتر ہو۔

ضلعی انتظامیہ کی جانب سے اعلان کیا گیا کہ بغیر اجازت کھالیں جمع کرنے والوں کے خلاف کریک ڈاؤن کیا جائے گا اور ضلعی کنٹرول روم عید کے ایام میں فعال رہے گا تاکہ صفائی اور دیگر عوامی شکایات کا فوری ازالہ کیا جا سکے۔

عید کے موقع پر پولیس کی جانب سے ضلع بھر میں سخت سیکیورٹی اقدامات، مساجد و عید گاہوں پر نفری کی تعیناتی، لاوڈ اسپیکر، ون ویلنگ اور ہلڑ بازی کے خلاف کارروائی کا بھی اعلان کیا گیا۔

اجلاس کے اختتام پر ملک و قوم کی سلامتی اور خوشحالی کے لیے خصوصی دعا کی گئی۔ بعد ازاں کمشنر لاہور زید بن مقصود نے ننکانہ صاحب میں مویشی منڈیوں اور سیل پوائنٹس کا دورہ کیا، جہاں شہریوں اور بیوپاریوں کے لیے فراہم کی گئی سہولیات کا جائزہ لیا اور ضلعی انتظامیہ کو مزید بہتری کی ہدایات جاری کیں۔

ننکانہ صاحب (باغی ٹی وی، نامہ نگار احسان اللہ ایاز) وزیراعلیٰ پنجاب مریم نواز شریف کے محفوظ پنجاب ویژن کے تحت ننکانہ صاحب میں ٹریفک قوانین سے متعلق شعور اجاگر کرنے کے لیے بھرپور آگاہی مہم جاری ہے۔ اس سلسلے میں ضلع بھر میں ریلیاں نکالی گئیں، جن کی قیادت سٹی ننکانہ میں ڈسٹرکٹ پولیس آفیسر (ڈی پی او) سید ندیم عباس نے ڈی ایس پی ٹریفک کے ہمراہ کی۔

ریلیوں میں انجمن تاجران، ڈی ایس پیز، طلباء، سول سوسائٹی اور میڈیا نمائندگان نے بھرپور شرکت کی۔ اس مہم کا مقصد شہریوں میں ٹریفک قوانین کی اہمیت اجاگر کرنا اور سڑکوں کو محفوظ بنانا ہے۔

ڈی پی او سید ندیم عباس نے شہریوں سے اپیل کی کہ وہ کم عمر بچوں کو ڈرائیونگ نہ کرنے دیں۔ انہوں نے کہا کہ ٹریفک قوانین کی خلاف ورزی پر سخت کارروائیاں جاری ہیں اور عوامی تعاون ہی ٹریفک نظام کو بہتر بنا سکتا ہے۔

تاجر برادری نے بھی پولیس کے ساتھ تعاون کا اعلان کرتے ہوئے کہا کہ وہ اس مہم میں ضلعی پولیس کے شانہ بشانہ کھڑے ہیں تاکہ ننکانہ صاحب کو ایک محفوظ اور قانون پسند شہر بنایا جا سکے۔

ننکانہ صاحب (باغی ٹی وی، نامہ نگاراحسان اللہ ایاز) ضلعی انتظامیہ ننکانہ صاحب کے زیر اہتمام ضلع کونسل ہال میں یومِ تکبیر کی مناسبت سے ایک پروقار تقریب کا انعقاد کیا گیا جس میں طلبہ، افسران، سکھ برادری، اقلیتوں، تاجر تنظیموں اور میڈیا نمائندگان نے بھرپور شرکت کی۔

تقریب میں ایڈیشنل ڈپٹی کمشنر جنرل شاہد کھوکھر، اسسٹنٹ کمشنر عطیہ عنائیت، سی او ایجوکیشن شازیہ بانو سمیت متعدد اہم شخصیات شریک ہوئیں۔ اسکول کے بچوں نے وطن سے محبت پر مبنی تقاریر اور خوبصورت ٹیبلو پیش کیے جنہیں شرکاء نے سراہا۔

تقریب سے خطاب کرتے ہوئے ڈپٹی کمشنر محمد تسلیم اختر راؤ نے کہا کہ یومِ تکبیر پاکستان کی خودمختاری، مسلسل جدوجہد اور قربانی کے جذبے کا مظہر ہے۔ 28 مئی 1998 کا دن پاکستان کے دفاعی استحکام کی تاریخ میں سنگ میل کی حیثیت رکھتا ہے۔ اُنہوں نے کہا کہ ہماری افواج اور سائنسدانوں نے دنیا کو یہ پیغام دیا کہ پاکستان ایک پرامن مگر ناقابلِ تسخیر ایٹمی طاقت ہے۔

ڈپٹی کمشنر نے کہا کہ یومِ تکبیر قوم کے اتحاد اور قومی سلامتی کے عزم کا دن ہے۔ پاکستان کی ایٹمی صلاحیت کا مقصد کسی پر حملہ نہیں بلکہ اپنی خودمختاری اور سالمیت کا تحفظ ہے۔ انہوں نے کہا کہ اب ہمیں معاشی استحکام، سائنسی ترقی اور قومی اتحاد کے سفر کو بھی جاری رکھنا ہوگا۔

تقریب کے اختتام پر ڈی سی آفس سے گوردوارہ جنم استھان تک یومِ تکبیر ریلی نکالی گئی جس کی قیادت خود ڈپٹی کمشنر محمد تسلیم اختر راؤ نے کی۔ اس ریلی میں ضلعی افسران، سکھ کمیونٹی، علما کرام، تاجر برادری اور شہریوں کی بڑی تعداد نے شرکت کی۔ ریلی کے شرکاء نے “افواج پاکستان زندہ باد” اور “پاکستان زندہ باد” کے فلک شگاف نعرے لگا کر قومی جوش و جذبے کا اظہار کیا۔

یومِ تکبیر کی یہ تقریب قومی یکجہتی، بین المذاہب ہم آہنگی اور پاکستان کی دفاعی خودمختاری کے عزم کی علامت بن گئی۔