Category: ننکانہ

ننکانہ صاحب (باغی ٹی وی نامہ نگار احسان اللہ ایاز) ضلعی ہیڈ کوارٹرز پنجاب ایمرجنسی سروس ریسکیو 1122 ننکانہ صاحب میں سال 2025 کی سالانہ کارکردگی کے حوالے سے اجلاس منعقد ہوا، جس کی صدارت ڈسٹرکٹ ایمرجنسی آفیسر محمد اکرم پنوار نے کی۔ اجلاس میں ریسکیو سیفٹی آفیسر علی عمران، عمران شہزاد، کنٹرول روم انچارج محمد نوید، اسٹیشن کوآرڈینیٹرز محمد سعید، محمد نواز، شاہد یوسف، ریسکیو افسران اور میڈیا کوآرڈینیٹر علی اکبر نے شرکت کی۔

اجلاس کو بریفنگ دیتے ہوئے کنٹرول روم انچارج محمد نوید نے بتایا کہ سال 2025 کے دوران ریسکیو 1122 ننکانہ صاحب کو مجموعی طور پر 1 لاکھ 84 ہزار 269 کالز موصول ہوئیں، جن میں 43 ہزار 81 ایمرجنسی کالز شامل تھیں۔ ان ایمرجنسیز میں 54 ہزار 553 متاثرین کو ریسکیو کیا گیا، جن میں 8 ہزار 597 روڈ ٹریفک حادثات، 28 ہزار 145 میڈیکل ایمرجنسیز، 555 آتشزدگی کے واقعات، 889 لڑائی جھگڑوں و تشدد کے کیسز، پانی میں ڈوبنے کے 32، عمارتوں کے منہدم ہونے کے 73 اور 4 ہزار 790 دیگر نوعیت کی ایمرجنسیز شامل تھیں۔

ریسکیو 1122 نے اوسطاً 7 منٹ کا ریسپانس ٹائم برقرار رکھتے ہوئے 26 ہزار 776 زخمیوں کو موقع پر طبی امداد فراہم کی، جبکہ 26 ہزار 783 متاثرین کو ابتدائی طبی امداد کے بعد مختلف ہسپتالوں میں منتقل کیا گیا۔ سڑک حادثات اور میڈیکل ایمرجنسیز کے دوران 994 متاثرین جانبر نہ ہو سکے۔ ضلعی سطح پر سہولیات دستیاب نہ ہونے کے باعث 3 ہزار 895 مریضوں کو لاہور اور فیصل آباد کے ہسپتالوں میں پیشنٹ ٹرانسفر سروس کے ذریعے بلا معاوضہ منتقل کیا گیا۔

رپورٹ میں بتایا گیا کہ جنگی حالات کے دوران ریسکیو 1122 ہائی الرٹ رہی اور شاہ کوٹ کے علاقے دھارو والی میں ڈرون گرنے کے واقعے میں بروقت امدادی کارروائیاں کی گئیں۔ دریائے راوی میں شدید سیلاب کے دوران 6 ہزار 728 متاثرہ افراد اور 10 ہزار 368 جانوروں کو محفوظ مقامات پر منتقل کیا گیا جبکہ 2 ہزار 972 افراد کو ٹرانسپورٹ سہولت فراہم کی گئی۔ ریسکیو 1122 اور ضلعی انتظامیہ کے باہمی تعاون سے سیلاب کے دوران کسی جانی نقصان کی اطلاع موصول نہیں ہوئی۔

ڈسٹرکٹ ایمرجنسی آفیسر محمد اکرم پنوار نے ریسکیورز اور افسران کی شبانہ روز محنت کو سراہتے ہوئے کہا کہ ریسکیو 1122 کی سالانہ رپورٹ احساسِ ذمہ داری اور شاندار پیشہ ورانہ کارکردگی کی عکاس ہے۔ انہوں نے ہدایت کی کہ وقت کے تقاضوں کے مطابق ریسکیورز کی جسمانی فٹنس اور پیشہ ورانہ صلاحیتوں میں مزید بہتری لائی جائے۔ انہوں نے کہا کہ سال 2026 میں عوامی روابط، آگاہی مہمات اور بنیادی تربیت کو مزید فروغ دیا جائے گا تاکہ حادثات اور سانحات کی روک تھام ممکن بنائی جا سکے۔

ننکانہ صاحب (باغی ٹی وی ،نامہ نگار احسان اللہ ایاز) ضلعی انتظامیہ کے زیر اہتمام نئے سال کی آمد کے موقع پر ریلوے اسٹیشن ننکانہ صاحب پر شاندار آتشبازی کا اہتمام کیا گیا۔ تقریب میں ڈپٹی کمشنر محمد تسلیم اختر راؤ اور ڈی پی او فراز احمد نے خصوصی شرکت کی، جبکہ ایڈیشنل ڈپٹی کمشنرز، اسسٹنٹ کمشنرز، ضلعی افسران اور میڈیا نمائندگان بھی موجود تھے۔

آتشبازی دیکھنے کے لیے شہریوں کی بڑی تعداد ریلوے اسٹیشن پہنچ گئی۔ اس موقع پر نوجوانوں نے ڈھول کی تھاپ پر بھنگڑے ڈالے اور نئے سال کی خوشیاں منائیں۔ ڈپٹی کمشنر محمد تسلیم اختر راؤ نے شہریوں کو نئے سال کی مبارکباد دیتے ہوئے کہا کہ دعا ہے نیا سال اہلِ پاکستان کے لیے خوشیوں، ترقی اور خوشحالی کا پیامبر ثابت ہو۔ انہوں نے اس عزم کا بھی اظہار کیا کہ ہم سب مل کر ملکی تعمیر و ترقی میں اپنا کردار ادا کریں گے اور نئے سال میں اپنے شہر کو مزید خوبصورت بنانے کے لیے متحد ہو کر کام کریں گے۔

ننکانہ صاحب (باغی ٹی وی، نامہ نگار احسان اللہ ایاز):ڈپٹی کمشنر ننکانہ صاحب محمد تسلیم اختر راو نے ضلع میں پتنگ بازی اور مینوفیکچرنگ پر مکمل پابندی کا اعلان کیا ہے۔ انہوں نے کہا کہ پنجاب ریگولیشن آف کائٹ فلائنگ آرڈیننس 2025 کے تحت خلاف ورزی کرنے والے افراد کو 50 لاکھ روپے جرمانہ اور 7 سال تک کی سزا ہوسکتی ہے۔

ڈپٹی کمشنر نے واضح کیا کہ ضلعی انتظامیہ کی جانب سے کسی کو پتنگ اڑانے یا بنانے کا لائسنس جاری نہیں کیا گیا اور قانون کی خلاف ورزی کرنے والوں کے خلاف سخت کارروائی ہوگی۔ والدین کو بھی اپنے بچوں پر گہری نظر رکھنے کی ہدایت کی گئی ہے، اور اگر کوئی بچہ پتنگ اڑاتے پکڑا گیا تو والدین کو بھی سزا یا جرمانہ ہو سکتا ہے۔

شہری انتظامیہ سے اپیل کرتے ہوئے پتنگ، ڈور بنانے یا اڑانے والوں کی اطلاع متعلقہ اسسٹنٹ کمشنرز، ضلعی انتظامیہ کے کنٹرول روم نمبرز 056-9201046، 056-9201157، پولیس 15 یا متعلقہ ایس ایچ او کو دینے کی ہدایت کی گئی ہے۔ اطلاع دینے والے شہریوں کا نام رازداری کے ساتھ رکھا جائے گا اور ضلعی انتظامیہ کی جانب سے 5 ہزار روپے انعام بھی دیا جائے گا۔

واربرٹن (باغی ٹی وی ،نامہ نگارعبدالغفارچوہدری) سٹی پریس کلب رجسٹرڈ واربرٹن کے صدر شیخ خلیل الرحمن چاولہ نے بانی پاکستان قائداعظم محمد علی جناح کے یومِ ولادت کے سلسلے میں اپنے ایک خصوصی بیان میں کہا ہے کہ پاکستان محض ایک اتفاق نہیں بلکہ قائداعظم کی قائدانہ صلاحیتوں، بے مثال اصول پسندی اور انتھک جدوجہد کا ثمر ہے۔ انہوں نے زور دیا کہ قائداعظم کے افکار اور فرمودات آج بھی قوم کے لیے مشعلِ راہ ہیں اور ان کے بتائے ہوئے رہنما اصول ہی قومی ترقی اور خوشحالی کی اصل بنیاد سمجھے جاتے ہیں۔ شیخ خلیل الرحمن چاولہ کا کہنا تھا کہ قائداعظم نے ایمان، اتحاد اور تنظیم کا جو سنہری سبق قوم کو دیا، وہ محض ایک نعرہ نہیں بلکہ ایک مکمل فلسفہ ہے جس پر خلوصِ دل سے عمل پیرا ہو کر ہی پاکستان کو درپیش موجودہ اندرونی اور بیرونی مشکلات کے گرداب سے نکالا جا سکتا ہے۔

انہوں نے مزید کہا کہ آج کے دور میں اس امر کی اشد ضرورت ہے کہ ہم تمام تر ذاتی مفادات سے بالاتر ہو کر صرف قومی مفادات کو ملحوظِ خاطر رکھیں اور اپنی نئی نسل کو قائداعظم کے نظریات سے روشناس کروائیں۔ صدر سٹی پریس کلب نے اس بات پر بھی زور دیا کہ ملک کی تعمیر و ترقی میں نوجوانوں کا کردار کلیدی ہے، اور اگر ہم اپنی نسل کی فکری آبیاری قائداعظم کے اصولوں کے مطابق کریں گے تو وہ ملک و قوم کی خوشحالی میں اپنا مثبت اور مؤثر کردار ادا کرنے کے قابل ہو سکیں گے۔ ان کا کہنا تھا کہ قائداعظم کے نقشِ قدم پر چل کر ہی ہم ایک مضبوط اور مستحکم پاکستان کا خواب شرمندہ تعبیر کر سکتے ہیں جس کا خواب بانیِ پاکستان نے دیکھا تھا۔

ننکانہ صاحب (باغی ٹی وی نامہ نگار احسان اللہ ایاز)میونسپل کمیٹی ننکانہ صاحب کے دفتر میں مالیوں اور دیگر ملازمین کو اعزازیہ دینے کی تقریب منعقد ہوئی، جس میں ڈپٹی کمشنر ننکانہ صاحب محمد تسلیم اختر راو اور ایڈیشنل ڈپٹی کمشنر جنرل شاہد کھوکھر نے خصوصی شرکت کی۔

تقریب میں ڈپٹی ڈائریکٹر ڈویلپمنٹ، ڈسٹرکٹ انفارمیشن آفیسر، ایکسین ہائی وے اور چیف آفیسر بلدیہ بھی موجود تھے۔ ڈپٹی کمشنر محمد تسلیم اختر راو نے ملازمین سے ملاقات کی اور شہر کی خوبصورتی اور صفائی کے لیے بہترین کارکردگی دکھانے پر ان کی حوصلہ افزائی کی۔

ڈپٹی کمشنر اور دیگر افسران نے مجموعی طور پر 31 ملازمین میں فی کس 10 ہزار روپے اعزازیہ تقسیم کیا۔ یہ اعزازیہ گرین بیلٹس، پبلک پارکس کی بحالی اور سٹریٹ لائٹس کی بہتری پر نمایاں خدمات انجام دینے والے ملازمین کو دیا گیا۔

اس موقع پر افسران نے کہا کہ ننکانہ صاحب کی بیوٹیفکیشن کو یقینی بنانے کے لیے ملازمین دن رات محنت کر رہے ہیں۔ گرین بیلٹس اور پبلک پارکس کی بحالی پر مامور ملازمین روزانہ 14 گھنٹے سے زائد کام کر رہے ہیں، جبکہ شہر کو خوبصورت بنانے کے لیے کام ترجیحی بنیادوں پر جاری ہے۔

ننکانہ صاحب (باغی ٹی وی ،نامہ نگاراحسان اللہ ایاز): ایل ڈبلیو ایم سی میں نوکریاں فروخت ہونے کا انکشاف، غریب ورکرز کا استحصال اور جبری برطرفیوں پر دہائیاں

لاہور ویسٹ مینجمنٹ کمپنی (ایل ڈبلیو ایم سی) ضلع ننکانہ صاحب میں مبینہ طور پر روزگار کی فراہمی کے بجائے نوکریوں کی خرید و فروخت کا کاروبار شروع ہونے کا انکشاف ہوا ہے، جہاں دورانِ ڈیوٹی بغیر کسی نوٹس کے ورکرز کی برطرفیاں اور غریب ملازمین سے رشوت طلبی کے سنگین الزامات سامنے آئے ہیں۔ متاثرہ شہری محمد یعقوب نے ڈپٹی کمشنر ننکانہ صاحب کو دی گئی اپنی تحریری درخواست میں موقف اختیار کیا ہے کہ اسے اور اس کے بیٹے کو چالیس ہزار روپے رشوت کے عوض بھرتی کیا گیا تھا، تاہم ایک سال کی بلا تعطل ملازمت کے بعد اب کسی بھی شکایت یا وجہ کے بغیر انہیں نوکری سے نکال دیا گیا ہے۔ درخواست گزار کے مطابق کمپنی میں بھرتیوں کے نام پر سنگین بے ضابطگیوں، اقربا پروری اور رشوت ستانی کا بازار گرم ہے، جہاں غریب اور محنت کش طبقے کو بلیک میل کر کے ان کا استحصال کیا جا رہا ہے۔

متاثرہ ورکرز نے انکشاف کیا ہے کہ انتظامیہ کی جانب سے سرکاری گاڑیوں اور رکشوں کی مرمت کا خرچہ بھی ورکرز کی جیب سے کروانے پر مجبور کیا جاتا ہے اور مطالبہ تسلیم نہ کرنے کی صورت میں نوکری سے نکالنے کی دھمکیاں دی جاتی ہیں۔ محمد یعقوب کا کہنا ہے کہ معمولی تنخواہ لینے والا مزدور طبقہ پہلے ہی شدید مہنگائی اور مالی مشکلات کا شکار ہے، ایسے میں رکشوں کی مرمت کا اضافی مالی بوجھ ڈالنا ظلم کے مترادف ہے۔ انہوں نے مزید بتایا کہ وہ کرائے کے مکان میں رہائش پذیر ہیں اور ملازمت ختم ہونے سے ان کے گھر کے چولہے ٹھنڈے پڑ گئے ہیں۔ متاثرہ شہریوں نے ڈپٹی کمشنر ننکانہ صاحب سے اپیل کی ہے کہ ایل ڈبلیو ایم سی میں ہونے والی غیر قانونی بھرتیوں، مبینہ کرپشن اور ورکرز کی جبری برطرفیوں کے خلاف فوری طور پر شفاف انکوائری کا حکم دیا جائے تاکہ ذمہ داران کا تعین ہو سکے اور غریب محنت کشوں کو انصاف مل سکے۔

ننکانہ صاحب (باغی ٹی وی نامہ نگار احسان اللہ ایاز)ڈی پی او ننکانہ فراز احمد کی ہدایت پر ڈی پی او دفتر میں یومِ قائد کے موقع پر ایک پروقار اور باوقار تقریب کا انعقاد کیا گیا، جس کا مقصد بانیٔ پاکستان قائداعظم محمد علی جناحؒ کو خراجِ تحسین پیش کرنا اور ان کی جدوجہد و قربانیوں کو یاد کرنا تھا۔

تقریب سے خطاب کرتے ہوئے ایس پی انویسٹی گیشن حنا نیک بخت نے کہا کہ قائداعظم محمد علی جناحؒ کی بدولت آج ہم ایک آزاد ملک میں سانس لے رہے ہیں اور ان کی قائدانہ صلاحیتیں ہمارے لیے مشعلِ راہ ہیں۔ انہوں نے کہا کہ یومِ قائد منانے کا مقصد محض ایک رسمی تقریب نہیں بلکہ اپنے عظیم قائد کی قربانیوں اور افکار کو یاد رکھنا ہے۔

تقریب میں ڈی ایس پی لیگل محمد نعیم، حرا ایجوکیشن سسٹم کے طلباء و طالبات، پولیس افسران اور ملازمان نے شرکت کی۔ طلباء و طالبات نے قومی ترانہ، ملی نغمے پیش کیے اور قائداعظم کو شاندار انداز میں سلامی دی۔ شرکاء نے قائداعظم کی زندگی، جدوجہد اور پاکستان کے قیام میں ان کے کردار پر اظہارِ خیال کیا۔

ایس پی انویسٹی گیشن نے اپنے خطاب میں کہا کہ آزادی کی قدر ان مظلوموں سے پوچھی جائے جو آج غزہ اور کشمیر میں ظلم و جبر کا شکار ہیں۔ انہوں نے زور دیا کہ ہمیں بطور قوم ایمان، اتحاد اور تنظیم کے اصولوں پر عمل کرتے ہوئے اپنے قائد کے فرمودات کو مشعلِ راہ بنانا چاہیے۔

تقریب کے اختتام پر ملکی سلامتی، استحکام اور ترقی کے لیے خصوصی دعا کی گئی، جبکہ ایس پی انویسٹی گیشن اور دیگر شرکاء نے مل کر کیک کاٹا۔ بعد ازاں ڈی پی او فراز احمد نے تقریب میں شریک طلباء و طالبات میں تحائف بھی تقسیم کیے۔

واربرٹن (نامہ نگارعبدالغفارچوہدری) خیرالبشر فاؤنڈیشن پاکستان کے زیرِ اہتمام فیروز وٹواں کے عوام کے لیے صاف پانی کی فراہمی کے ایک اہم منصوبے کا آغاز کر دیا گیا۔ اس سلسلے میں ساجد حفیظ واٹر فلٹریشن پلانٹ کا باقاعدہ سنگِ بنیاد رکھ دیا گیا ہے۔

واٹر فلٹریشن پلانٹ کا بنیادی مقصد عوام کو آلودہ پانی اور اس سے پھیلنے والی بیماریوں سے محفوظ رکھنا اور معیاری صاف پانی کی فراہمی کو یقینی بنانا ہے۔ اس منصوبے سے علاقے کے 500 سے زائد گھرانے مستفید ہوں گے، جس سے اہلِ علاقہ کا صاف پانی کا دیرینہ مسئلہ حل ہو جائے گا۔

سنگِ بنیاد کی تقریب میں خیرالبشر فاؤنڈیشن پاکستان کے رہنما قاری صفی الرحمان، میڈیا کوآرڈینیٹر وقاص علی بھٹی اور صدر قومی امن کمیٹی و بین المذاہب ہم آہنگی ملک غلام فرید نے خصوصی شرکت کی۔
اس کے علاوہ سینئر تاجر رہنما اور چیئرمین اسٹینڈنگ کمیٹی لاہور چیمبر آف کامرس اینڈ انڈسٹری محمد رفیق چوہان، عابد چوہان، مرکزی صدر انٹر فیتھ آرگنائزیشن فار پیس پاکستان چوہدری سمیع الرحمن منگول، یاسر اقبال، افتخار بھٹی سمیت سول سوسائٹی کے نمائندوں اور علاقہ معززین کی بڑی تعداد نے شرکت کی۔

تقریب سے خطاب کرتے ہوئے مرکزی رہنما خیرالبشر فاؤنڈیشن پاکستان خواجہ عاطف حفیظ نے منصوبے اور ادارے کے جاری فلاحی پروگرامز پر تفصیلی بریفنگ دی۔
قاری صفی الرحمان نے قرآن و حدیث کی روشنی میں پانی کے صدقے کی اہمیت اور اس کے سماجی فوائد پر روشنی ڈالی۔

تقریب کے اختتام پر معزز مہمانوں نے ساجد حفیظ واٹر فلٹریشن پلانٹ کا سنگِ بنیاد اپنے ہاتھوں سے اینٹیں رکھ کر کیا اور منصوبے کی کامیابی کے لیے دعائے خیر کی۔

ننکانہ صاحب (باغی ٹی وی، نامہ نگار احسان اللہ ایاز)بابا گورو نانک یونیورسٹی ننکانہ صاحب کے وائس چانسلر پروفیسر ڈاکٹر شاہد عمران نے منصب سنبھالنے کے بعد پنجاب ہائر ایجوکیشن کمیشن (پی ایچ ای سی) کے چیئرمین پروفیسر ڈاکٹر اقرار احمد خان سے ملاقات کی۔ ملاقات میں اعلیٰ تعلیم کے فروغ، تعلیمی معیار میں بہتری، ادارہ جاتی ترقی اور باہمی تعاون کے امور پر تفصیلی تبادلۂ خیال کیا گیا۔

اس موقع پر وائس چانسلر پروفیسر ڈاکٹر شاہد عمران نے چیئرمین پی ایچ ای سی کو یونیورسٹی کے تعلیمی وژن سے آگاہ کرتے ہوئے کہا کہ تدریسی و تحقیقی معیار کو مزید بہتر بنانا، تحقیق کے کلچر کو فروغ دینا اور ادارے کو صوبائی اعلیٰ تعلیمی پالیسیوں سے ہم آہنگ کرنا ان کی اولین ترجیحات ہیں۔ انہوں نے اس عزم کا اظہار کیا کہ بابا گورو نانک یونیورسٹی پی ایچ ای سی کے تمام ضوابط اور معیارات پر مکمل عمل درآمد کرتے ہوئے صوبے کے تعلیمی نظام میں مؤثر کردار ادا کرے گی۔

چیئرمین پی ایچ ای سی پروفیسر ڈاکٹر اقرار احمد خان نے وائس چانسلر کو منصب سنبھالنے پر مبارکباد دیتے ہوئے کمیشن کی جانب سے مکمل تعاون کی یقین دہانی کرائی۔ انہوں نے کہا کہ پی ایچ ای سی اعلیٰ تعلیمی اداروں میں معیارِ تعلیم، فیکلٹی ڈویلپمنٹ اور ادارہ جاتی صلاحیتوں کے فروغ کے لیے اپنا کردار جاری رکھے گا۔

ملاقات کے اختتام پر بابا گورو نانک یونیورسٹی اور پنجاب ہائر ایجوکیشن کمیشن کے درمیان تعاون کو مزید مضبوط بنانے کے عزم کا اعادہ کیا گیا، تاکہ تعلیمی معیار، تحقیق اور بہتر انتظامی ڈھانچے کے ذریعے پنجاب میں اعلیٰ تعلیم کے نظام کو مزید مستحکم کیا جا سکے۔