Category: اوکاڑہ

اوکاڑہ (نامہ نگار: ملک ظفر) کمشنر ساہیوال ڈویژن ڈاکٹر محمد آصف طفیل نے ضلع اوکاڑہ کا تفصیلی دورہ کیا اور مختلف جاری ترقیاتی منصوبوں کا جائزہ لیا۔ اس موقع پر ڈپٹی کمشنر احمد عثمان جاوید، ایڈیشنل ڈپٹی کمشنر جنرل احمد سلیم چشتی، اسسٹنٹ کمشنر احمد شیر گوندل، ایم ڈی واسا عبد الوحید سمیت متعلقہ افسران بھی ہمراہ تھے۔

کمشنر ساہیوال نے ڈسٹرکٹ ہیڈ کوارٹر ہسپتال سٹی، ہسپتال بازار، کچہری بازار، گول چوک، ریڑھی بازار، انڈر گراؤنڈ واٹر اسٹوریج ٹینک منصوبے اور بیوٹیفکیشن کے جاری کاموں کا معائنہ کیا۔ ڈپٹی کمشنر اور ایم ڈی واسا نے انڈر گراؤنڈ واٹر اسٹوریج ٹینک منصوبے سے متعلق تفصیلی بریفنگ دی، جس پر کمشنر نے کام کی رفتار اور معیار کا جائزہ لیا۔

کمشنر ساہیوال نے کہا کہ انڈر گراؤنڈ واٹر اسٹوریج ٹینک کی تعمیر سے شہر میں بارش کے پانی کی نکاسی کا مسئلہ حل ہو جائے گا اور حکومت پنجاب ضلع اوکاڑہ کی فلاح و بہبود کے لیے خطیر فنڈز فراہم کر رہی ہے۔ انہوں نے بیوٹیفکیشن منصوبوں میں استعمال ہونے والے مٹیریل اور معیار کو چیک کرتے ہوئے کنٹریکٹر کو مقررہ مدت میں کام مکمل کرنے اور دورانِ تعمیر ملبہ فوری اٹھانے کی ہدایات جاری کیں۔

محبوب عالم چوک میں قائم ریڑھی بازار کے دورے کے دوران کمشنر ساہیوال نے اشیائے ضروریہ کی قیمتیں اور کوالٹی چیک کی، جبکہ ریڑھیوں کی خستہ حالت پر ناراضگی کا اظہار کیا۔ انہوں نے کہا کہ پنجاب حکومت نے روزگار کی فراہمی کے لیے ریڑھی بانوں کو مفت ریڑھیاں فراہم کی ہیں، جن کی دیکھ بھال اور صفائی کی ذمہ داری ریڑھی بانوں پر عائد ہوتی ہے۔

بعد ازاں کمشنر ساہیوال نے ڈسٹرکٹ ہیڈ کوارٹر ہسپتال سٹی کا دورہ کیا، مختلف شعبہ جات، ادویات کے ریکارڈ اور صفائی کے انتظامات کا جائزہ لیا اور مریضوں کی عیادت بھی کی۔ انہوں نے کہا کہ وزیر اعلیٰ پنجاب مریم نواز کے ویژن کے مطابق ہسپتالوں میں مریضوں کو مفت ادویات اور علاج کی سہولیات فراہم کی جا رہی ہیں، جبکہ ڈاکٹرز اور عملہ مریضوں سے حسن سلوک کو یقینی بنائیں۔

آخر میں کمشنر ساہیوال نے ڈپٹی کمشنر آفس میں انتظامی افسران کے اجلاس کی صدارت کرتے ہوئے ہدایت کی کہ عوامی فلاحی منصوبوں کی ذاتی نگرانی کی جائے اور عوامی مسائل کے حل کے لیے تمام وسائل بروئے کار لائے جائیں۔

اوکاڑہ (نامہ نگار: ملک ظفر) ڈسٹرکٹ پولیس آفیسر اوکاڑہ محمد راشد ہدایت کی زیرِ نگرانی طیب سعید شہید پولیس لائنز اوکاڑہ میں محکمانہ ترقی (لسٹ اے) کے تحریری امتحان کا انعقاد کیا گیا، جس میں سیکیورٹی اور انتظامی امور کو مکمل طور پر یقینی بنایا گیا۔

امتحانی مرکز میں ایس پی انویسٹیگیشن، ڈی ایس پی لیگل، انسپکٹر اسٹیبلیشمنٹ، لائن آفیسر سمیت دیگر سینئر پولیس افسران موجود رہے اور امتحانی عمل کی نگرانی کی۔ یہ امتحان کانسٹیبل سے اگلے رینک میں ترقی کے لیے لیا جاتا ہے۔

تحریری امتحان میں مجموعی طور پر 310 پولیس اہلکاروں نے شرکت کی۔ اس موقع پر ڈی پی او محمد راشد ہدایت نے کہا کہ محکمانہ امتحانات میں میرٹ اور شفافیت اولین ترجیح ہے اور تمام امیدواروں کو یکساں اور منصفانہ مواقع فراہم کیے گئے ہیں۔

انہوں نے مزید کہا کہ ہر امیدوار اپنی محنت، قابلیت اور لگن کی بنیاد پر ترقی حاصل کر سکتا ہے۔

اوکاڑہ (نامہ نگار: ملک ظفر)ڈائریکٹوریٹ جنرل پاپولیشن ویلفیئر، محکمہ صحت و آبادی پنجاب کی ہدایات کی روشنی میں رکنِ صوبائی اسمبلی میاں محمد منیر کی سرپرستی میں پنجاب فیملی پلاننگ پروگرام کے تحت 22 جنوری بروز جمعرات ایک روزہ ایجوکیشن فیملی میلہ گرینڈ سیزن میرج ہال اوکاڑہ میں منعقد کیا جائے گا۔

میلے میں صحت مند بچوں اور بہترین شادی شدہ جوڑوں کے مقابلے، کوئز شو، پوسٹر ڈیزائننگ، روایتی علاقائی جھومر، میجک شو، میوزیکل چیئر، محفلِ سماع سمیت دیگر رنگا رنگ تفریحی سرگرمیوں کا اہتمام کیا جائے گا۔

میلے کے انعقاد کا بنیادی مقصد عوام الناس بالخصوص فیملیز کو تفریحی مواقع فراہم کرنے کے ساتھ ساتھ بڑھتی ہوئی آبادی کے مسائل کو اجاگر کرنا، ماں اور بچے کی صحت، بچوں کی پیدائش میں مناسب وقفے کی اہمیت اور جدید مانع حمل طریقوں سے متعلق آگاہی فراہم کرنا ہے۔

ڈسٹرکٹ پاپولیشن ویلفیئر آفیسر چوہدری عاصم ہدایت کی جانب سے میلے کے انتظامات کو حتمی شکل دے دی گئی ہے۔ میلے میں خواتین کے لیے دستکاری، مہندی اور بیوٹی پروڈکٹس کے اسٹالز کے علاوہ میڈیکل کیمپ اور ہیلتھ سکریننگ کی سہولیات بھی دستیاب ہوں گی۔

یہ ایجوکیشن فیملی میلہ دوپہر 1 بجے سے شام 4 بجے تک جاری رہے گا، جس میں ضلع بھر کی فیملیز کو بھرپور شرکت کی دعوت دی گئی ہے۔

اوکاڑہ (نامہ نگار: ملک ظفر)33ویں نیشنل ٹین شن کان کراٹے چیمپئن شپ میں اوکاڑہ کی معروف ٹیم دی ماسٹرز کراٹے نیشنل ہیروز نے شاندار کارکردگی کا مظاہرہ کرتے ہوئے تاریخ رقم کر دی۔ پنجاب وائٹ کی نمائندگی کرتے ہوئے دی ماسٹرز کی ٹیم نے میڈلز کی دوڑ میں سب کو پیچھے چھوڑ دیا اور 6 گولڈ، 8 سلور اور 5 برانز میڈلز اپنے نام کر کے اوکاڑہ کا نام روشن کر دیا۔

اس تاریخی کامیابی پر سول ڈیفنس ڈیپارٹمنٹ کی جانب سے دی ماسٹرز کراٹے نیشنل ہیروز کے اعزاز میں ایک پروقار تقریب کا انعقاد کیا گیا، جس میں کھلاڑیوں اور کوچز کی خدمات کو سراہا گیا۔ تقریب کے دوران سول ڈیفنس ڈیپارٹمنٹ کی جانب سے نیشنل ہیروز کو اعزازی ممبر شپ اور تعریفی اسناد بھی پیش کی گئیں۔

واضح رہے کہ یہ نیشنل کراٹے چیمپئن شپ گزشتہ دنوں لاہور میں منعقد ہوئی، جس میں پاکستان بھر سے ٹیموں نے شرکت کی۔ دی ماسٹرز کے کھلاڑیوں نے جارحانہ اور بااعتماد کھیل پیش کرتے ہوئے مختلف کیٹیگریز میں نمایاں پوزیشنز حاصل کیں اور کئی مقابلوں میں گولڈ میڈلز جیتے۔

تقریب سے خطاب کرتے ہوئے سول ڈیفنس آفیسر جاوید اختر نے دی ماسٹرز کے کھلاڑیوں اور انسٹرکٹرز نعیم اختر اور وسیم طارق کی محنت، لگن اور پیشہ ورانہ تربیت کو خراجِ تحسین پیش کیا۔ اس موقع پر کھلاڑیوں میں تعریفی سرٹیفکیٹس تقسیم کیے گئے جبکہ ان کے اعزاز میں پرتکلف ظہرانے کا بھی اہتمام کیا گیا۔

دی ماسٹرز کی اس شاندار اور تاریخی فتح پر اوکاڑہ سمیت مختلف سیاسی و سماجی حلقوں کی جانب سے ٹیم کو بھرپور خراجِ تحسین پیش کیا جا رہا ہے۔

اوکاڑہ (نامہ نگار: ملک ظفر)ڈپٹی کمشنر اوکاڑہ احمد عثمان جاوید کی زیر صدارت ڈسٹرکٹ ڈیویلپمنٹ کمیٹی کا اجلاس منعقد ہوا، جس میں ڈپٹی ڈائریکٹر ڈویلپمنٹ مرغوب حسین ڈوگر نے سسٹین ایبل ایکشن پروگرام (SAP) کے تحت محکمہ پبلک ہیلتھ انجینئرنگ اور ہائی وے کے ترقیاتی منصوبوں کے بارے میں تفصیلی بریفنگ دی۔

ڈپٹی کمشنر احمد عثمان جاوید نے اجلاس سے خطاب کرتے ہوئے کہا کہ ترقیاتی منصوبوں کی بروقت اور معیاری تکمیل انتہائی اہم ہے۔ انہوں نے افسران کو ہدایت کی کہ ترقیاتی کاموں میں شفافیت کو یقینی بنایا جائے اور عوامی فلاح و بہبود کو مدنظر رکھتے ہوئے منصوبوں پر تیزی سے کام مکمل کیا جائے۔

انہوں نے کہا کہ تمام ترقیاتی منصوبے جدت، شفافیت اور پائیداری کے آئینہ دار ہونے چاہیں اور اس سلسلے میں کام کے معیار پر کسی قسم کا سمجھوتہ ہرگز برداشت نہیں کیا جائے گا۔

اوکاڑہ (نامہ نگار، ملک ظفر)ڈپٹی کمشنر اوکاڑہ احمد عثمان جاوید کی زیر صدارت ڈسٹرکٹ کوآرڈینیشن کمیٹی برائے نیشنل ایکشن پلان کا اجلاس منعقد ہوا، جس میں ڈی پی او محمد راشد ہدایت، صوبائی و وفاقی محکموں کے افسران، آرمی افسران اور ضلعی انتظامیہ کے متعلقہ حکام نے شرکت کی۔

اجلاس میں ٹریفک قوانین پر عملدرآمد، نان کسٹم پیڈ گاڑیوں، سمگلنگ اور تجاوزات کے خلاف اقدامات، غیر قانونی ایل پی جی شاپس اور پٹرول پمپس، گداگری، بجلی چوری کے خلاف کارروائیوں، مدارس کی رجسٹریشن، تعلیمی اداروں میں مثبت رویوں کے فروغ اور سیکیورٹی ایڈوائزری پر عملدرآمد سے متعلق امور کا تفصیلی جائزہ لیا گیا۔

ڈپٹی کمشنر احمد عثمان جاوید نے اجلاس سے خطاب کرتے ہوئے کہا کہ عوام کے حقوق کے تحفظ کے لیے قانون کے نفاذ کے سلسلے میں تمام متعلقہ محکمے باہمی ربط و رابطہ کو مزید مؤثر بنائیں۔ انہوں نے واضح کیا کہ تمام شعبہ جات میں قانون کی خلاف ورزی کرنے والوں کے خلاف زیرو ٹالرنس پالیسی اپنائی جائے۔

ڈپٹی کمشنر نے ہدایات جاری کرتے ہوئے کہا کہ حکومتی پالیسیوں اور وضع شدہ قواعد و ضوابط کی خلاف ورزی کسی صورت برداشت نہیں کی جائے گی اور قانون توڑنے والے عناصر کے خلاف بلا امتیاز سخت قانونی کارروائی عمل میں لائی جائے گی۔ انہوں نے افسران کو ہدایت کی کہ وہ اپنے فرائض دیانتداری، پیشہ ورانہ صلاحیت اور ذمہ داری کے ساتھ انجام دیں اور حکومتی پالیسیوں پر مکمل عملدرآمد کو یقینی بنائیں۔

ڈپٹی کمشنر احمد عثمان جاوید نے اس بات پر زور دیا کہ قانون کا نفاذ محض کاغذی کارروائی تک محدود نہیں ہونا چاہیے بلکہ عملی اور مؤثر اقدامات کے ذریعے عوامی مفاد، شفافیت اور قانون کی بالادستی کو یقینی بنایا جائے تاکہ عوام کو حقیقی معنوں میں اس کے ثمرات مل سکیں۔