Category: اوکاڑہ

اوکاڑہ (نامہ نگار: ملک ظفر)جرنلسٹس ایسوسی ایشن آف پاکستان/یوکے (رجسٹرڈ) نے تنظیم کی مرکزی باڈی برائے سال 2026 کے قیام کا باضابطہ اعلان کر دیا ہے۔ یہ مرکزی باڈی دنیا بھر میں قائم تنظیم کے تمام چیپٹرز کی باہمی مشاورت، اعتماد اور متفقہ حمایت سے تشکیل دی گئی ہے۔

تنظیم کی نئی مرکزی قیادت میں میاں عامر علی (برطانیہ) کو مرکزی صدر، محمد آصف قائمی (پاکستان) کو مرکزی سیکرٹری جنرل اور سمیع اللہ عثمانی (پاکستان) کو مرکزی فنانس سیکرٹری منتخب کیا گیا ہے، جبکہ وومن ونگ کی مرکزی صدر کی ذمہ داریاں حمیرا ثناء (برطانیہ) کے سپرد کی گئی ہیں۔

مرکزی باڈی میں پاکستان اور بیرونِ ملک مقیم سینیئر، متحرک اور پیشہ ور صحافیوں کو شامل کیا گیا ہے تاکہ تنظیم کو قومی اور بین الاقوامی سطح پر مزید مضبوط، مؤثر اور فعال بنایا جا سکے۔

مرکزی باڈی کے دیگر عہدیداران میں چیف کوآرڈینیٹر شاہین بٹ (برطانیہ)، سینیئر نائب صدور امان اللہ کھوکھر اور محمد بلال قریشی (پاکستان)، نائب صدور نعیم خان (پاکستان)، رانا عظیم (سعودی عرب)، ممتاز منیر سہوترہ (اسپین) اور میر مختار میر (ہالینڈ) شامل ہیں۔ ڈپٹی سیکرٹری جنرل کی ذمہ داریاں عامر کفایت (پاکستان) کے سپرد کی گئی ہیں۔

اسی طرح انفارمیشن سیکرٹریز کے طور پر سید علی عمران نقوی اور گل محمد لغاری (پاکستان)، جوائنٹ سیکرٹریز کے طور پر شبیر احمد اعوان اور محمد اقبال قائم خانی (پاکستان)، ڈپٹی سیکرٹری ملک ظفر اقبال (پاکستان) اور آفس سیکرٹری عامر حیات (پاکستان) کو نامزد کیا گیا ہے۔ جبکہ ایگزیکٹیو ممبران میں محمد خرم قادری، سلمان جاوید چوہدری، رانا شاہد خلیل اور محمد شمعون نذیر کھوکھر (تمام پاکستان) شامل ہیں۔

مرکزی باڈی کے اراکین نے اس عزم کا اظہار کیا ہے کہ وہ صحافت کے فروغ، صحافیوں کے حقوق کے تحفظ، آزادیٔ اظہار کے دفاع اور فلاحی مقاصد کے لیے بھرپور اور مؤثر کردار ادا کریں گے۔

دنیا بھر میں قائم تنظیم کے تمام چیپٹرز، جن میں برطانیہ، یورپ، مشرقِ وسطیٰ اور پاکستان شامل ہیں، نے نئی مرکزی قیادت پر مکمل اعتماد کا اظہار کرتے ہوئے امید ظاہر کی ہے کہ یہ قیادت صحافی برادری کو درپیش مسائل کے حل، تنظیمی نظم و ضبط کے استحکام، بین الاقوامی روابط کے فروغ اور صحافیوں کے تحفظ کے لیے مؤثر اور عملی اقدامات کرے گی۔

مرکزی قیادت نے اس موقع پر اس عزم کا اعادہ کیا ہے کہ جرنلسٹس ایسوسی ایشن آف پاکستان/یوکے (رجسٹرڈ) کو ایک مضبوط، متحد اور عالمی سطح پر مؤثر صحافتی پلیٹ فارم بنایا جائے گا، جہاں صحافیوں کے حقوق، عزت اور وقار کا ہر صورت تحفظ یقینی بنایا جائے گا۔

اوکاڑہ (نامہ نگار ملک ظفر)شفاف ای۔ٹکٹنگ نظام کے نفاذ، ٹریفک قوانین کی یقینی عملداری اور دھند کے دوران ممکنہ ٹریفک حادثات سے بچاؤ کے لیے عوامی آگاہی فراہم کرنے کی غرض سے ریجنل آفیسر پنجاب ہائی وے پٹرول پولیس ساہیوال جمیل احمد ساجد فیلڈ میں متحرک نظر آئے۔

تفصیلات کے مطابق ریجنل آفیسر پنجاب ہائی وے پٹرول پولیس جمیل احمد ساجد نے ضلع اوکاڑہ کی متعدد اہم شاہراہوں سمیت پٹرولنگ پولیس کے مختلف انفورسمنٹ ایریاز کا دورہ کیا۔ اس دوران سنیپ چیکنگ کے عمل کا جائزہ لیا گیا، جہاں پٹرولنگ پولیس کی جانب سے ٹریفک قوانین کی خلاف ورزی کرنے والوں کے خلاف ای۔ٹکٹنگ، مقدمات کے اندراج اور گاڑیوں کی ایمپاؤنڈنگ جیسے اقدامات کا معائنہ کیا گیا۔

ریجنل آفیسر کی زیر نگرانی پٹرولنگ پولیس افسران نے ٹریفک قوانین کی سنگین خلاف ورزیوں کے مرتکب روڈ یوزرز کے خلاف مؤثر تادیبی کارروائیاں عمل میں لائیں۔ اس موقع پر شہریوں کو دھند اور دیگر موسمی حالات کے دوران جان لیوا ٹریفک حادثات سے بچاؤ کے لیے اختیار کیے جانے والے حفاظتی اقدامات بارے تفصیلی بریفنگ بھی دی گئی۔

بریفنگ کے دوران واضح کیا گیا کہ پٹرولنگ پولیس کی اولین ترجیح عوام الناس کے جان و مال اور عزتِ نفس کا تحفظ ہے، جس کے لیے تمام دستیاب وسائل بروئے کار لائے جا رہے ہیں۔ ریجنل آفیسر نے پٹرولنگ پولیس افسران کو ہدایت کی کہ وہ پیشہ ورانہ ذمہ داریوں کو مزید مؤثر انداز میں انجام دیتے ہوئے شہریوں کو محفوظ اور سہل سفر کی سہولیات فراہم کریں۔

اوکاڑہ (نامہ نگار ملک ظفر)انسپکٹر جنرل پنجاب ڈاکٹر عثمان انور کے ویژن کے مطابق پولیس شہداء کے اہلِ خانہ کی فلاح و بہبود کے لیے عملی اقدامات کا سلسلہ جاری ہے۔ اسی تسلسل میں ڈسٹرکٹ پولیس آفیسر اوکاڑہ محمد راشد ہدایت کی جانب سے شہداء کے بچوں میں جدید تعلیمی سہولیات فراہم کرتے ہوئے لیپ ٹاپ تقسیم کیے گئے۔

اس موقع پر شہید ریاض احمد کی صاحبزادی آمنہ ریاض، جو فزکس میں ایم فل کی تعلیم حاصل کر رہی ہیں، کو ان کی ریسرچ کے لیے لیپ ٹاپ فراہم کیا گیا۔ اس کے علاوہ اشرف طاہر شہید اور محمد حسین شہید کے بچوں کو بھی تعلیمی معاونت کے تحت لیپ ٹاپ دیے گئے۔

ڈی پی او محمد راشد ہدایت نے اس موقع پر گفتگو کرتے ہوئے کہا کہ پولیس شہداء کے بچوں کے روشن مستقبل کو یقینی بنانے کے لیے ہر ممکن تعلیمی اور فلاحی سہولیات فراہم کر رہی ہے۔ انہوں نے کہا کہ شہداء ہماری قوم کا فخر ہیں اور ان کے اہلِ خانہ کی ویلفیئر پولیس کی اولین ترجیح ہے، جس کے لیے تمام ضروری اقدامات مستقبل میں بھی جاری رکھے جائیں گے۔

اوکاڑہ کی ڈائری

تحریر: ملک ظفر اقبال بھوہڑ
جس طرح موسم بدلتے ہیں، عین اسی طرح سیاست دانوں کی سوچ اور وعدے بھی بدلتے دکھائی دیتے ہیں۔ موسم کی تبدیلی کے ساتھ بہت کچھ دھل جاتا ہے، شاید اسی بہانے سیاست دان بھی اپنے علاقوں کی تعمیر و ترقی کے وعدے پسِ پشت ڈال دیتے ہیں۔ حقیقت یہ ہے کہ وقت گزرنے کے ساتھ عوامی مسائل وہیں کے وہیں رہتے ہیں، مگر وعدے فائلوں اور تقاریر تک محدود ہو کر رہ جاتے ہیں۔

حلقہ این اے 136 سے منتخب رکنِ قومی اسمبلی چوہدری ریاض الحق جج اور پی پی 190 سے رکنِ صوبائی اسمبلی میاں یاور زمان گزشتہ کئی برسوں سے اسی حلقے کی نمائندگی کرتے آ رہے ہیں۔ بلاشبہ اگر عوام اپنے نمائندوں کو پسند نہ کرتے تو وہ بار بار منتخب نہ ہوتے۔ وعدے بھی کیے جاتے ہیں اور بعض کام بھی ہوتے ہیں، مگر اگر مجموعی ترقیاتی تصویر دیکھی جائے تو فور۔ایل کا علاقہ آج بھی لاوارث نظر آتا ہے۔

اگر موجودہ دور سے چند سال پیچھے جا کر جائزہ لیا جائے تو فور۔ایل اور اس سے ملحقہ علاقوں میں ترقی کے آثار نہ ہونے کے برابر ہیں۔ یہاں کے لوگ اپنے محبوب قائدین کو ووٹ دینے کے بعد ان سے سوال نہیں کرتے، شاید اس خدشے کے تحت کہ کہیں ناراضی مول نہ لے لیں۔ یہی خاموشی اس علاقے کو ترقیاتی منصوبوں کی فہرست سے باہر رکھے ہوئے ہے، جس کی واضح مثال سڑکوں کی خستہ حالی ہے۔

یہ علاقہ مسلم لیگ (ن) کا مضبوط گڑھ سمجھا جاتا ہے، مگر بدقسمتی سے ترقیاتی سرگرمیوں کے فقدان نے اسے دیگر علاقوں کے مقابلے میں پیچھے دھکیل دیا ہے۔ فور۔ایل اور شاہبھور کے علاقوں کو فوری توجہ درکار ہے تاکہ یہاں کے باسی بھی بنیادی سہولیات سے مستفید ہو سکیں۔

اس حلقے کی اکثریت زراعت سے وابستہ ہے، مگر افسوس کہ بیشتر چکوک سیم و تھور جیسے سنگین مسئلے کا شکار ہیں۔ خصوصاً چک نمبر 22 فور ایل اور 23 فور ایل، جو آخری ٹیلوں پر واقع ہیں، نہری پانی کی چوری اور ناقص تقسیم کے باعث شدید زرعی بحران سے گزر رہے ہیں۔ نتیجتاً یہاں سے بڑی تعداد میں لوگ نقل مکانی پر مجبور ہو چکے ہیں۔ اس صورتحال کی بنیادی وجہ انتظامیہ اور سیاست دانوں کی مسلسل عدم دلچسپی ہے۔

تعلیم کے شعبے کی صورتحال یہ ہے کہ طلبہ کی بڑی تعداد بہتر مستقبل کی تلاش میں شہروں کا رخ کر چکی ہے۔ صحت کے شعبے میں سرکاری مراکز موجود ہونے کے باوجود عوام شہروں میں علاج کروانے پر مجبور ہیں، جو خود ایک بڑا سوالیہ نشان ہے۔ یہ سب اس امر کی نشاندہی کرتا ہے کہ محض عمارتیں کھڑی کر دینا کافی نہیں، جب تک نظام مؤثر اور فعال نہ ہو۔

سڑکوں کی تعمیر و بحالی بھی مسلسل نظرانداز کی جا رہی ہے۔ 22 فور ایل تا 31 فور ایل روڈ، طبروق روڈ اور غیاث چوک روڈ شدید ٹوٹ پھوٹ کا شکار ہیں، مگر متعلقہ اداروں کے کانوں پر جوں تک نہیں رینگتی۔

فور۔ایل میں کئی بااثر اور نامور شخصیات موجود ہیں، مگر افسوس کہ اجتماعی طور پر کسی نے علاقے کے لیے مضبوط آواز بلند نہیں کی۔ یہ حقیقت اپنی جگہ مسلم ہے کہ فور۔ایل کے لوگ اوکاڑہ کی سیاست میں انفرادی حیثیت میں اہم مقام رکھتے ہیں، مگر اجتماعی طاقت کا مظاہرہ کہیں دکھائی نہیں دیتا۔

اب وقت آ گیا ہے کہ انتظامیہ اور منتخب نمائندے اس علاقے کے بنیادی مسائل کو سنجیدگی سے لیں۔ اگر یہاں سڑکیں، صحت، تعلیم اور زرعی سہولیات بہتر بنا دی جائیں تو لوگ شہروں کی بجائے اپنے علاقوں میں رہ کر نہ صرف باعزت زندگی گزار سکتے ہیں بلکہ ملکی پیداوار میں بھی مؤثر کردار ادا کر سکتے ہیں۔

آخر میں بس اتنا ہی کہنا ہے کہ:
امید کا دامن تھامے رکھو، مگر سوال اٹھانا مت چھوڑو — آخر کب تک؟

اوکاڑہ (نامہ نگار ملک ظفر) عوام کو ان کی دہلیز پر انصاف کی فراہمی کے لیے ریجنل پولیس آفیسر ساہیوال محمد ایاز سلیم نے ڈی پی او اوکاڑہ محمد راشد ہدایت کے ہمراہ ایک ہی روز دو مقامات، تھانہ حویلی لکھا اور چورستہ میاں خاں میں کھلی کچہریوں کا انعقاد کیا۔

تفصیلات کے مطابق کھلی کچہریوں میں خواتین اور مرد شہریوں کی بڑی تعداد نے شرکت کی اور اپنے مسائل براہِ راست آر پی او کے سامنے پیش کیے۔ ریجنل پولیس آفیسر محمد ایاز سلیم نے شکایات سن کر موقع پر ہی متعلقہ افسران کو قانونی اور فوری ازالے کے احکامات جاری کیے۔

اس موقع پر آر پی او محمد ایاز سلیم کا کہنا تھا کہ عوام کو بروقت اور بلا امتیاز انصاف کی فراہمی پولیس کی اولین ترجیح ہے۔ انہوں نے مزید کہا کہ کھلی کچہریوں جیسے اقدامات سے پولیس اور عوام کے درمیان اعتماد کا رشتہ مضبوط ہو رہا ہے، جس کے نتیجے میں پولیس کارکردگی اور معیار میں نمایاں بہتری آئی ہے۔

اوکاڑہ (نامہ نگار ملک ظفر) ایڈیشنل ڈپٹی کمشنر ریونیو کی زیر صدارت سرکاری واجبات کی وصولی اور ریونیو سہولیات سے متعلق اجلاس منعقد ہوا، جس میں واجبات کی وصولی اور عوامی سروس ڈلیوری کے حوالے سے کارکردگی کا جائزہ لیا گیا۔

اجلاس کے دوران ایڈیشنل ڈپٹی کمشنر نے سرکاری واجبات کی وصولی کے لیے اقدامات تیز کرنے کی ہدایات دیتے ہوئے کہا کہ آبیانہ، زرعی ٹیکس اور سٹیمپ ڈیوٹی کی وصولی پر خصوصی توجہ دی جائے اور نادہندگان کے خلاف مؤثر کارروائی عمل میں لائی جائے۔ انہوں نے واضح کیا کہ مقررہ مدت میں وصولی کے اہداف مکمل کرنے کے لیے فیلڈ افسران بھرپور کردار ادا کریں۔

ایڈیشنل ڈپٹی کمشنر کا کہنا تھا کہ ریونیو سہولیات کے حوالے سے پبلک سروس ڈلیوری میں بہتری لانا انتظامیہ کی اولین ذمہ داری ہے۔ انہوں نے ہدایت کی کہ فرد اور انتقال کے معاملات کو کمپیوٹرائزڈ سسٹم کے ذریعے کم سے کم وقت میں نمٹایا جائے اور عوامی شکایات کے فوری ازالے کو یقینی بنایا جائے۔

اوکاڑہ (نامہ نگار ملک ظفر) اسسٹنٹ کمشنر فیصل شہزاد چیمہ نے ٹی ایچ کیو ہسپتال اوکاڑہ کا اچانک دورہ کیا اور مریضوں کو فراہم کی جانے والی طبی سہولیات کا تفصیلی جائزہ لیا۔ دورے کے دوران انہوں نے ایمرجنسی، ان ڈور وارڈز، لیبارٹری اور فارمیسی سمیت مختلف شعبوں کا معائنہ کیا۔

اسسٹنٹ کمشنر نے زیر علاج مریضوں کی خیریت دریافت کی اور ان سے ہسپتال عملے کے رویے اور علاج کے معیار بارے بھی استفسار کیا۔ انہوں نے ادویات کی دستیابی، صفائی ستھرائی کے انتظامات، ہسپتال کے اسٹاک رجسٹر اور عملے کے حاضری رجسٹر کی بھی پڑتال کی۔

فارمیسی میں مریضوں کو حکومت کی جانب سے فراہم کی جانے والی مفت ادویات کی بروقت فراہمی یقینی بنانے کے لیے متعلقہ عملے کو ہدایات جاری کی گئیں۔ اس موقع پر اسسٹنٹ کمشنر فیصل شہزاد چیمہ کا کہنا تھا کہ حکومتِ پنجاب کی اولین ترجیح عوام کو ان کی دہلیز پر معیاری طبی سہولیات فراہم کرنا ہے، ہسپتالوں میں مریضوں کی دیکھ بھال میں کسی قسم کی غفلت برداشت نہیں کی جائے گی۔ انہوں نے کوالٹی میڈیکل سروسز کے تسلسل کے لیے تواتر سے مانیٹرنگ پر بھی زور دیا۔

اوکاڑہ (نامہ نگار: ملک ظفر)ڈسٹرکٹ پولیس آفیسر اوکاڑہ محمد راشد ہدایت کی خصوصی ہدایات پر پنجاب فوڈ اتھارٹی ایکٹ کے تحت درج مقدمات میں تفتیش کے معیار کو بہتر بنانے اور ملزمان کو قانون کے مطابق سخت سزائیں دلوانے کے لیے کمیونٹی لائنز ہال میں دو روزہ تربیتی کورس کا آغاز کر دیا گیا ہے۔

تربیتی کورس میں پنجاب فوڈ سیفٹی اتھارٹی کے افسران اور پولیس کے تفتیشی افسران شریک ہو رہے ہیں۔ کورس کا بنیادی مقصد فوڈ سیفٹی قوانین سے مکمل آگاہی، تفتیشی صلاحیتوں میں اضافہ اور فوڈ سیفٹی سے متعلق مقدمات میں مؤثر اور مضبوط چالان نویسی کو یقینی بنانا ہے۔

کورس کے دوران اسسٹنٹ ڈسٹرکٹ پبلک پراسیکیوٹر نعمان علی، ڈی ایس پی لیگل کلیم اللہ، انسپکٹر مشتاق احمد شاہد اور سب انسپکٹر محمد اکرم نے تفصیلی لیکچرز دیے۔ مقررین نے شواہد کے درست اندراج، قانونی تقاضوں کی مکمل پاسداری اور مضبوط پراسیکیوشن کی اہمیت پر روشنی ڈالی۔

مقررین کا کہنا تھا کہ معیاری تفتیش اور مؤثر کیس فائلنگ کے ذریعے فوڈ سیفٹی قوانین کی خلاف ورزی کرنے والوں کو مثال بننے والی سزائیں دلوانا ممکن ہے، جس سے عوامی صحت کے تحفظ میں مدد ملے گی۔

یہ تربیتی اقدام اوکاڑہ پولیس کے اس عزم کا عملی اظہار ہے کہ عوامی صحت کے تحفظ کے لیے متعلقہ اداروں کے ساتھ قریبی تعاون کے ذریعے فوڈ سیفٹی قوانین کا سختی سے نفاذ یقینی بنایا جائے گا۔

اوکاڑہ (نامہ نگار: ملک ظفر)ڈپٹی کمشنر اوکاڑہ احمد عثمان جاوید کی زیر صدارت ضلعی افسران کا اہم اجلاس منعقد ہوا، جس میں ایڈیشنل ڈپٹی کمشنرز، ضلع کی تینوں تحصیلوں کے اسسٹنٹ کمشنرز سمیت دیگر ضلعی افسران نے شرکت کی۔

اجلاس میں ڈپٹی کمشنر احمد عثمان جاوید کو پرائس کنٹرول میکانزم، ستھرا پنجاب مہم، آوارہ کتوں کی تلفی، بیوٹیفکیشن پلان، ڈویلپمنٹ سکیمز میں پیش رفت اور مفادِ عامہ سے متعلق دیگر اقدامات پر تفصیلی بریفنگ دی گئی۔

اجلاس سے خطاب کرتے ہوئے ڈپٹی کمشنر احمد عثمان جاوید نے ہدایات جاری کیں کہ عوام کو حقیقی ریلیف فراہم کرنے کے لیے تمام افسران محنت، دیانت داری اور لگن کے ساتھ کام کریں، عوامی مسائل کے حل اور شکایات کے بروقت ازالے کے لیے فیلڈ میں اپنی موجودگی یقینی بنائیں۔

انہوں نے مزید کہا کہ حکومت کی عوام دوست پالیسیوں پر مؤثر عملدرآمد کو ہر صورت یقینی بنایا جائے اور عوامی مسائل کے فوری حل کے لیے مربوط اور عملی حکمتِ عملی اپنائی جائے۔ ڈپٹی کمشنر نے واضح کیا کہ مفادِ عامہ کے منصوبوں میں کسی قسم کی کوتاہی برداشت نہیں کی جائے گی اور تمام محکمے باہمی تعاون کے ساتھ خدمات کی فراہمی کو مزید بہتر بنائیں۔