Category: اوکاڑہ

اوکاڑہ (نامہ نگار ملک ظفر)پنجاب بھر کے اضلاع کے "کے پی آئیز” کی رینکنگ جاری کر دی گئی ہے، جس میں ضلع اوکاڑہ نے ڈپٹی کمشنر احمد عثمان جاوید کی قیادت میں شاندار کارکردگی کا مظاہرہ کرتے ہوئے دوسری پوزیشن حاصل کر لی۔ اس اعزاز کے ساتھ اوکاڑہ نے بورڈ آف ریونیو کے انڈیکٹرز میں پنجاب بھر کے اضلاع کو پیچھے چھوڑ دیا۔

ڈپٹی کمشنر احمد عثمان جاوید نے کہا کہ یہ کامیابی ضلع کی ٹیم کی انتھک محنت، مؤثر حکمت عملی اور عوامی مسائل کے بروقت حل کا نتیجہ ہے۔ انہوں نے مزید کہا کہ ضلعی ٹیم نے اہداف کے حصول کے لیے مسلسل رابطہ کاری، مانیٹرنگ اور عوامی شکایات کے فوری ازالے کو یقینی بنایا، جس کی بدولت اوکاڑہ کی کارکردگی نمایاں رہی۔

ایڈیشنل ڈپٹی کمشنر ریونیو محمد شعجین وسطرو، اسسٹنٹ کمشنرز اور دیگر افسران و فیلڈ اسٹاف کو اس شاندار کامیابی پر مبارکباد دیتے ہوئے کہا کہ ضلعی انتظامیہ مستقبل میں بھی عوامی فلاح و بہبود کے منصوبوں کو اسی جذبے اور لگن کے ساتھ کامیابی سے ہمکنار کرے گی۔ انہوں نے عزم ظاہر کیا کہ آئندہ کے پی آئی رینکنگ میں مزید بہتری لا کر پہلی پوزیشن کا حصول یقینی بنایا جائے گا۔

ڈپٹی کمشنر نے تمام متعلقہ افسران اور ٹیم کے ممبران کو مبارکباد پیش کی اور امید ظاہر کی کہ ضلع کی ٹیم مستقبل میں بھی عوامی خدمت کے جذبے کے تحت بہترین کارکردگی دکھاتی رہے گی۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی خصوصی ہدایت پر سموگ کی روک تھام اور شہریوں میں ماحولیاتی شعور پیدا کرنے کے لیے میونسپل کمیٹی کے زیرِ اہتمام آگاہی واک کا انعقاد کیا گیا۔ واک کی قیادت ایڈمنسٹریٹر میونسپل کمیٹی علیزہ ریحان نے کی، جس میں عملے سمیت شہریوں کی بڑی تعداد نے شرکت کی۔

چیف آفیسر میونسپل کمیٹی عمر نسیم نے اس موقع پر کہا کہ فصلوں کی باقیات جلانا سموگ کی بڑی وجوہات میں شامل ہے، لہٰذا کسان اس مضرِ صحت عمل سے گریز کریں۔ انہوں نے مزید کہا کہ گاڑیوں کا دھواں کم کرنے کے لیے انجن کی باقاعدہ ٹیوننگ کرائی جائے، ماسک کے استعمال کو یقینی بنایا جائے اور درخت لگانے میں بھرپور حصہ لیا جائے۔

عمر نسیم کے مطابق سموگ ایک سنگین ماحولیاتی مسئلہ ہے، جس سے نمٹنے کے لیے حکومتی کوششوں کے ساتھ ساتھ عوامی تعاون بھی لازمی ہے۔ انہوں نے بتایا کہ میونسپل کمیٹی روزانہ کی بنیاد پر صفائی، کچرا اٹھانے، آگ لگانے کی شکایات کے خلاف کارروائی اور مختلف آگاہی مہمات جاری رکھے ہوئے ہے۔

انہوں نے شہریوں سے اپیل کی کہ ماحول دوستی اپنائیں، قوانین پر عملدرآمد کریں اور شہر کو سموگ سے محفوظ بنانے میں اپنا کردار ادا کریں۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی خصوصی ہدایت پر شہر کی بیوٹیفکیشن مہم کے تحت محبوب عالم چوک میں جدید ’’پکسل ٹاور‘‘ نصب کر دیا گیا۔ ایڈمنسٹریٹر میونسپل کمیٹی علیزہ ریحان کی نگرانی میں اس منصوبے کی تکمیل سے شہر کی خوبصورتی میں نمایاں اضافہ ہوا ہے۔

انتظامیہ کے مطابق پکسل ٹاور کی تنصیب کا مقصد شہری ماحول کو جدید طرز پر ہم آہنگ کرنا اور شہریوں کو ایک پُرکشش اور دلکش منظر فراہم کرنا ہے۔ ایڈمنسٹریٹر علیزہ ریحان نے کہا کہ پکسل ٹاور جدید شہری ترقی کی علامت ہے جو شہر کی شناخت اور حسن میں اضافہ کرے گا۔

انہوں نے بتایا کہ بیوٹیفکیشن مہم کے سلسلے میں شہر کے مختلف مقامات پر بھی اس نوعیت کے جدید ڈیزائنز اور ماڈلز نصب کیے جائیں گے۔ پکسل ٹاور میں نصب روشنیاں اور رنگین ڈیزائن رات کے وقت علاقے کو منفرد دلکشی بخشتے ہیں۔

شہری حلقوں نے ضلعی انتظامیہ کے اس اقدام کو خوب سراہا ہے اور شہر کی خوبصورتی کے لیے اسے ایک مثبت پیش رفت قرار دیا ہے۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر محکمہ جنگلات کی جانب سے ایل بی ڈی سی کینال کے اطراف شجرکاری مہم جاری ہے۔ ڈویژنل فارسٹ آفیسر مشتاق حسین چغتائی کی نگرانی میں اربن فارسٹری کے تحت شہری علاقوں میں ماحول دوست سرگرمیوں کے فروغ اور فضائی آلودگی میں کمی کیلئے سینکڑوں پودے لگائے گئے۔

ڈی ایف او مشتاق حسین چغتائی نے کہا کہ اربن فارسٹری وقت کی اہم ضرورت ہے، جو نہ صرف ماحول کو بہتر بناتی ہے بلکہ شہری درجہ حرارت کم کرنے، آلودگی میں کمی اور خوبصورتی بڑھانے میں بھی مددگار ہے۔ ان کے مطابق مہم کے دوران سایہ دار اور آکسیجن پیدا کرنے والے مقامی موسم کے مطابق صحت مند پودے لگائے جا رہے ہیں۔

محکمہ جنگلات نے شجرکاری کے بعد پودوں کی نگہداشت کا خصوصی پلان بھی تشکیل دیا ہے، جس میں پانی، باڑ اور دیکھ بھال کی ذمہ داریاں متعلقہ ٹیموں کو سونپی گئی ہیں تاکہ ہر پودا بہتر نشوونما پا سکے۔
ڈی ایف او نے عوام اور اداروں سے اپیل کی ہے کہ شجرکاری مہم میں بھرپور حصہ لیں اور لگائے گئے پودوں کی حفاظت کو اپنی سماجی ذمہ داری سمجھیں۔

اوکاڑہ (نامہ نگار ملک ظفر) وزیراعلیٰ پنجاب کے عوامی ریلیف اقدامات پر عمل درآمد کے سلسلے میں ڈسپیوٹ ریزولوشن کمیٹی کا اہم اجلاس ہوا جس کی صدارت ایڈیشنل ڈپٹی کمشنر ریونیو محمد شعجین وسطرو اور ڈی پی او محمد راشد ہدایت نے مشترکہ طور پر کی۔ اجلاس میں ضلع کی تینوں تحصیلوں کے اسسٹنٹ کمشنرز اور ایس ڈی پی اوز نے شرکت کی۔

اجلاس کے دوران تحفظِ ملکیتی جائیداد ایکٹ کے تحت فریقین کی سنوائی کی گئی اور مختلف جائیدادی تنازعات کے کیسز کی مفصل سماعت کی گئی۔ ضلعی سربراہان نے ریونیو ریکارڈ کی روشنی میں سائلین کی شکایات کے فوری ازالے کے احکامات جاری کیے اور تمام اسسٹنٹ کمشنرز و ایس ڈی پی اوز کو شفافیت، میرٹ اور درست حقائق پر مبنی رپورٹس پیش کرنے کی خصوصی ہدایات دیں۔

ایڈیشنل ڈپٹی کمشنر ریونیو محمد شعجین وسطرو نے کہا کہ ڈسپیوٹ ریزولوشن کمیٹی متاثرین کے حقوق کے تحفظ کے لیے ایک مؤثر فورم ہے، جہاں ریونیو معاملات سے متعلق تنازعات کے شفاف حل کو یقینی بنایا جا رہا ہے۔ انہوں نے کہا کہ حکومت پنجاب کی ہدایات کے مطابق عوام کی فوری سنوائی اور شکایات کے حل کو اولین ترجیح بنایا گیا ہے۔

ڈی پی او محمد راشد ہدایت نے کہا کہ پولیس اور ضلعی انتظامیہ باہمی تعاون کے ساتھ غیر قانونی طور پر جائیدادوں پر قابض عناصر کے خلاف سخت کارروائیاں جاری رکھے ہوئے ہیں۔ انہوں نے واضح کیا کہ قانون کی بالادستی کو ہر صورت برقرار رکھا جائے گا اور جائیدادی حقوق تلف کرنے والے افراد سے آہنی ہاتھوں سے نمٹا جائے گا۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر محکمہ سول ڈیفنس کے زیر اہتمام گورنمنٹ ستلج ہائی سکول میں ریزیلینس کور کے حوالے سے آگاہی سیمینار کا انعقاد کیا گیا، جس میں طلبہ کی آن لائن رجسٹریشن بھی کی گئی۔

سیمینار سے خطاب کرتے ہوئے سول ڈیفنس آفیسر جاوید اختر کھچی نے ریزیلینس کور میں بطور رضا کار شامل ہونے کے اغراض و مقاصد اور اہمیت سے متعلق تفصیلی بریفنگ دی۔ انہوں نے بتایا کہ ریزیلینس کور کیلئے آن لائن رجسٹریشن کا طریقہ کار انتہائی آسان ہے اور اب تک ضلع بھر سے 7 ہزار افراد بلا معاوضہ رجسٹرڈ ہو چکے ہیں۔

جاوید اختر کھچی نے کہا کہ ریزیلینس کور کا بنیادی مقصد ہنگامی حالات، قدرتی آفات، حادثات اور ریسکیو آپریشنز کے دوران عوام کو فوری معاونت فراہم کرنا ہے۔ انہوں نے نوجوانوں کو مخاطب کرتے ہوئے کہا کہ ملک کو ایسے باہمت، ذمہ دار اور باشعور نوجوانوں کی ضرورت ہے جو مشکل وقت میں قوم کے ساتھ کھڑے ہو سکیں۔

انہوں نے مزید بتایا کہ کور میں شامل ہونے والے رضا کاروں کو فرسٹ ایڈ، فائر فائٹنگ، سرچ اینڈ ریسکیو، ایمرجنسی مینجمنٹ اور ڈیزاسٹر رسک ریڈکشن کی خصوصی تربیت فراہم کی جائے گی۔
سیمینار کے اختتام پر محکمہ سول ڈیفنس کے اہلکاروں نے اسکول کے طلبہ کی آن لائن رجسٹریشن بھی کی۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر فیصل آباد روڈ پر قائم ورکشاپس اور کاروباری مراکز میں کنورژن فیس کی ادائیگی کی صورتحال چیک کی گئی۔ اس سلسلے میں ایڈمنسٹریٹر میونسپل کمیٹی علیزہ ریحان کی زیر نگرانی خصوصی ٹیموں نے مختلف ورکشاپس کا معائنہ کیا۔

چیکنگ کے دوران متعدد مالکان کی جانب سے کنورژن فیس ادا نہ کیے جانے پر نوٹسز جاری کر دیے گئے۔ ٹیم نے تمام مالکان کو متنبہ کیا کہ حکومتی قواعد و ضوابط پر عمل درآمد ہر صورت یقینی بنایا جائے۔

ایڈمنسٹریٹر میونسپل کمیٹی علیزہ ریحان نے واضح کیا کہ تمام ورکشاپ مالکان بروقت کنورژن فیس ادا کریں، بصورت دیگر غفلت برتنے والوں کے خلاف سخت کارروائی عمل میں لائی جائے گی اور ورکشاپس کو سیل بھی کیا جا سکتا ہے۔