Category: اوکاڑہ

اوکاڑہ (باغی ٹی وی، نامہ نگار ملک ظفر)ڈپٹی کمشنر احمد عثمان جاوید کی خصوصی ہدایت پر ضلع اوکاڑہ میں انسدادِ تجاوزات مہم میں شدت آگئی۔ سب ڈویژنل انفورسمنٹ آفیسر وسیم جاوید نے فیصل آباد روڈ پر کارروائی کرتے ہوئے دکانوں کی پختہ تجاوزات مسمار کر دیں اور گول چوک و صدر بازار میں دکانداروں کو وارننگ جاری کی۔

فیصل آباد روڈ پر کارروائی کے دوران سرکاری جگہ پر بنائی گئی مستقل تعمیرات کو گرا دیا گیا۔ وسیم جاوید نے واضح کیا کہ وزیراعلیٰ پنجاب مریم نواز شریف کی ہدایات پر ضلع بھر میں تجاوزات کے خلاف بلا تفریق مہم جاری ہے، جس کا مقصد شہریوں کو صاف، کشادہ، اور رکاوٹوں سے پاک راستے فراہم کرنا ہے۔

انہوں نے گول چوک اور صدر بازار میں موقع پر موجود دکانداروں کو خبردار کیا کہ آئندہ تجاوزات کی صورت میں سخت قانونی کارروائی عمل میں لائی جائے گی۔ دکانداروں کو تاکید کی گئی کہ وہ اپنی دکانوں کو مقررہ حدود میں رکھیں اور عوامی آمدورفت میں رکاوٹ بننے سے گریز کریں۔

وسیم جاوید نے کہا کہ عوامی مفاد کے پیش نظر انسدادِ تجاوزات مہم تسلسل کے ساتھ جاری رہے گی اور تجاوزات کے خلاف سخت ترین اقدامات کیے جائیں گے تاکہ شہریوں کو بہتر سہولیات اور صاف ماحول فراہم کیا جا سکے۔

عوامی حلقوں کی جانب سے تجاوزات کے خاتمے پر ضلعی انتظامیہ کے اقدامات کو سراہا گیا ہے۔

اوکاڑہ (باغی ٹی وی، نامہ نگار ملک ظفر)وزیراعلیٰ پنجاب مریم نواز شریف کی جانب سے محنت کش طبقے کے لیے ایک اور انقلابی قدم، ضلع اوکاڑہ میں 2600 فیکٹری ورکرز کو مریم نواز راشن کارڈز فراہم کر دیے گئے۔ اس کار خیر کے تحت مزدور طبقے کو نہ صرف راشن پر سبسڈی دی جائے گی بلکہ متعدد مالی اور فلاحی سہولیات بھی مہیا کی جائیں گی۔

راشن کارڈز کی تقسیم کی تقریب میں ممبر قومی اسمبلی چوہدری ریاض الحق جج اور ایم پی اے میاں محمد منیر نے خصوصی طور پر شرکت کی اور مستحق ورکرز میں کارڈز تقسیم کیے۔ اس موقع پر ڈائریکٹر سوشل سیکیورٹی ساہیوال میاں ذوالفقار علی، اسسٹنٹ کمشنر رب نواز چدھڑ، ڈپٹی ڈائریکٹر سوشل سیکیورٹی حسن اصغر سمیت دیگر افسران، فیکٹری ورکرز اور ان کے اہل خانہ کی بڑی تعداد موجود تھی۔

ڈائریکٹر سوشل سیکیورٹی میاں ذوالفقار علی نے تقریب سے خطاب کرتے ہوئے مریم نواز راشن کارڈ کی افادیت پر تفصیلی بریفنگ دی۔ انہوں نے بتایا کہ یہ کارڈ محنت کشوں کو نہ صرف راشن پر 20 فیصد رعایت فراہم کرے گا بلکہ ان کے معاشی بوجھ کو کم کرنے میں بھی مددگار ثابت ہوگا۔ راشن کارڈ استعمال کرنے والے ورکرز کو ماہانہ 3 ہزار روپے سبسڈی دی جائے گی۔

تقریب سے خطاب کرتے ہوئے چوہدری ریاض الحق جج نے کہا کہ وزیراعلیٰ مریم نواز کی قیادت میں عوامی خدمت کا سفر جاری ہے۔ انہوں نے بتایا کہ راشن کارڈ سے مستفید ہونے والے ورکرز کو کسی حادثے کی صورت میں 3 لاکھ روپے انشورنس جبکہ مستقل معذوری کی صورت میں 2 لاکھ روپے فراہم کیے جائیں گے۔ انہوں نے اس بات پر زور دیا کہ محنت کش طبقے کو یہ حق برسوں پہلے ملنا چاہیے تھا۔

ڈائریکٹر میاں ذوالفقار علی نے بتایا کہ صوبائی وزیر افرادی قوت فیصل ایوب کھوکھر ورکرز کی فلاح و بہبود کے لیے دن رات کوشاں ہیں، اور ان کی کاوشوں کو محنت کش طبقہ خراجِ تحسین پیش کرتا ہے۔

چوہدری ریاض الحق نے مزید اعلان کیا کہ محکمہ سوشل سیکیورٹی ورکرز کے بچوں کے لیے اسٹیٹ آف دی آرٹ اسکول قائم کرے گا، جہاں معیاری تعلیم کی سہولت دی جائے گی تاکہ یہ بچے بھی ایک روشن مستقبل کی جانب بڑھ سکیں۔

فیکٹری ورکرز اور ان کے اہل خانہ نے وزیراعلیٰ مریم نواز اور صوبائی وزیر فیصل ایوب کھوکھر کا تہہ دل سے شکریہ ادا کیا اور اس اقدام کو حقیقی عوامی فلاح کی جانب ایک قدم قرار دیا۔ راشن کارڈ سکیم کو محنت کشوں کی زندگی میں خوشحالی لانے کا ذریعہ قرار دیا جا رہا ہے۔

اوکاڑہ (نامہ نگار ملک ظفر) وزیراعلیٰ پنجاب کے فلیگ شپ پروگرام "زیادہ گندم اگاؤ” مہم کے تحت اوکاڑہ میں کسانوں میں مفت گرین ٹریکٹرز کی تقسیم کی تقریب منعقد ہوئی۔ تقریب میں صوبائی وزیر زراعت و لائیو اسٹاک سید عاشق حسین کرمانی نے قرعہ اندازی کے ذریعے کامیاب ہونے والے 26 کسانوں کو مفت ٹریکٹرز تقسیم کیے۔

تقریب میں ایم پی اے میاں محمد منیر، ایڈیشنل ڈپٹی کمشنر (ریونیو) محمد ابراہیم ارباب، لیگی رہنما راؤ محمد اجمل، ڈائریکٹر زراعت توسیع شہباز اختر، ڈپٹی ڈائریکٹر محمد اعجاز سمیت محکمہ زراعت کے افسران، کاشتکار اور کسان بڑی تعداد میں شریک ہوئے۔

ڈائریکٹر زراعت شہباز اختر نے کسان دوست پالیسیوں پر تفصیلی بریفنگ دی اور بتایا کہ ای بیلٹنگ کے ذریعے شفاف انداز میں پنجاب بھر کے کسانوں کو ٹریکٹرز فراہم کیے جا رہے ہیں۔ صوبائی وزیر زراعت عاشق کرمانی نے کہا کہ مریم نواز شریف کی قیادت میں شعبہ زراعت کو نئی زندگی دی جا رہی ہے، 123 ارب روپے مختص کیے گئے ہیں، جب کہ 10 ہزار کسانوں کو 10 لاکھ کی سبسڈی پر گرین ٹریکٹرز دیے گئے ہیں۔

انہوں نے مزید بتایا کہ کسان کارڈ کے ذریعے 75 ارب کے بلا سود قرضے دیے جا چکے ہیں۔ ایم پی اے میاں محمد منیر نے حکومت کی جانب سے گندم خریداری میں تاخیر کے باعث کسانوں کی مشکلات کا اعتراف کرتے ہوئے کہا کہ دیگر انقلابی اقدامات سے اس کا ازالہ کیا جا رہا ہے۔

اختتام پر کسانوں نے مفت ٹریکٹرز کی فراہمی پر وزیراعلیٰ مریم نواز شریف سے اظہار تشکر کیا اور حکومت کی کسان دوست پالیسیوں کو سراہا۔

اوکاڑہ (نامہ نگار ملک ظفر) اوکاڑہ میں 9 محرم الحرام کے موقع پر امن و امان کے قیام اور شہریوں میں احساسِ تحفظ پیدا کرنے کے لیے پولیس کی جانب سے فلیگ مارچ کا انعقاد کیا گیا۔ فلیگ مارچ کی قیادت ڈسٹرکٹ پولیس آفیسر (ڈی پی او) راشد ہدایت اور ڈپٹی کمشنر احمد عثمان جاوید نے کی، جب کہ رینجرز، ضلعی انتظامیہ، پی ای آر اے فورس، ایلیٹ فورس، ریسکیو 1122 اور ٹریفک پولیس کے دستے بھی شریک ہوئے۔

مارچ ضلع کونسل سے شروع ہو کر ایم اے جناح روڈ، تحصیل روڈ، بے نظیر روڈ، گول چوک اور مین بازار سمیت شہر کے مختلف علاقوں سے ہوتا ہوا ڈسٹرکٹ کمپلیکس پر اختتام پذیر ہوا۔ فلیگ مارچ کا مقصد 9 اور 10 محرم الحرام کے دوران شہریوں کو پرامن ماحول فراہم کرنا اور دہشت گردی یا شرپسندی کے کسی بھی خدشے کو ختم کرنا تھا۔

ڈی پی او راشد ہدایت نے کہا کہ محرم کے جلوسوں اور مجالس کے لیے سیکیورٹی کے فول پروف انتظامات کیے گئے ہیں۔ 9 محرم کو ضلع بھر میں 26 عزاداری کے جلوس اور 66 مجالس کا انعقاد متوقع ہے، جن کی سیکیورٹی کے لیے 1200 سے زائد پولیس افسران اور جوان تعینات کیے گئے ہیں۔ جلوس کے راستوں کو قناتیں اور خاردار تاریں لگا کر مکمل طور پر سیل کر دیا جائے گا، جب کہ ریزرو نفری اور کیو آر ایف (کِک رسپانس فورس) کو ہائی الرٹ پر رکھا گیا ہے۔

ڈی سی احمد عثمان جاوید کا کہنا تھا کہ ضابطہ اخلاق کی مکمل پابندی یقینی بنائی جائے گی، اور کسی بھی قسم کی خلاف ورزی کو برداشت نہیں کیا جائے گا۔ انہوں نے شہریوں سے تعاون کی اپیل کرتے ہوئے کہا کہ امن کے دشمنوں کو ناکام بنانے کے لیے انتظامیہ اور عوام کا اشتراک ضروری ہے۔

اوکاڑہ (باغی ٹی وی، نامہ نگار ملک ظفر)ایڈیشنل ڈپٹی کمشنر ریونیو محمد ابراہیم ارباب کی زیر صدارت ڈسٹرکٹ ایمرجنسی رسپانس کمیٹی کا اہم اجلاس منعقد ہوا، جس میں محکمہ صحت سمیت تمام متعلقہ اداروں کے افسران نے شرکت کی۔ اجلاس میں انسدادِ ڈینگی مہم کے تحت جاری اقدامات، ڈینگی سرویلنس، ہاٹ سپاٹس کی چیکنگ، اور انسپیکشن اہداف کے حوالے سے تفصیلی بریفنگ دی گئی۔

ایڈیشنل ڈپٹی کمشنر محمد ابراہیم ارباب نے ہدایت کی کہ مون سون کے دوران ڈینگی سرویلنس کو مزید مؤثر اور مربوط بنایا جائے۔ انہوں نے کہا کہ بارشی پانی کے جمع ہونے سے ڈینگی مچھر کی افزائش ہوتی ہے، اس لیے نکاسی آب کو یقینی بنایا جائے اور کسی بھی مقام پر پانی کھڑا نہ ہونے دیا جائے۔

انہوں نے متعلقہ اداروں کو تاکید کی کہ حکومت پنجاب کی جانب سے طے کردہ انسپیکشن ٹارگٹس کو ہر صورت مکمل کیا جائے اور کارروائیوں کا ریکارڈ باقاعدگی سے ڈیش بورڈ پر اپلوڈ کیا جائے۔ ڈینگی سکواڈ کو متحرک کرنے اور موذوں مقامات پر مسلسل چیکنگ کو یقینی بنانے کی ہدایت بھی دی گئی تاکہ ڈینگی لاروا کو پنپنے کا موقع نہ ملے۔

ایڈیشنل ڈپٹی کمشنر نے انسداد ڈینگی مہم میں تھرڈ پارٹی ویلیڈیشن کے عمل کو بھی تسلسل سے جاری رکھنے پر زور دیا تاکہ شفافیت اور کارکردگی کا درست اندازہ لگایا جا سکے۔ اجلاس میں انسداد ڈینگی کے لیے تمام محکموں کے مابین بھرپور تعاون کی ضرورت پر بھی اتفاق کیا گیا۔

اوکاڑہ (باغی ٹی وی، نامہ نگار ملک ظفر)ڈپٹی کمشنر احمد عثمان جاوید کی زیر صدارت ڈسٹرکٹ کوآرڈینیشن کمیٹی برائے نیشنل ایکشن پلان کا اہم اجلاس منعقد ہوا، جس میں ڈی پی او راشد ہدایت، پاک آرمی کے افسران اور وفاقی و صوبائی محکموں کے نمائندہ افسران نے شرکت کی۔ اجلاس کا مقصد ضلع میں نیشنل ایکشن پلان کے مختلف نکات پر عملدرآمد کا جائزہ لینا تھا۔

اجلاس میں غیر قانونی پیٹرول پمپس اور ایل پی جی شاپس کے خلاف کارروائیاں، ہیومن ٹریفکنگ کی روک تھام، بجلی چوری کے خلاف کریک ڈاؤن، نان کسٹم پیڈ گاڑیوں کے خلاف آپریشن، ٹریفک قوانین کی خلاف ورزیوں پر ٹرانسپورٹرز کے خلاف اقدامات، گداگری کے خاتمے، انسداد تجاوزات مہم، مدارس کی رجسٹریشن اور اوورسیز پاکستانیوں کے مسائل کے حل جیسے اہم امور پر تفصیلی بریفنگ دی گئی۔

ڈپٹی کمشنر احمد عثمان جاوید نے تمام محکموں کو ہدایت کی کہ عوامی مفاد کو مقدم رکھتے ہوئے ذمہ داریوں کی ادائیگی میں کوئی کوتاہی نہ برتی جائے۔ انہوں نے زور دیا کہ حکومت پنجاب کے احکامات پر مؤثر عملدرآمد یقینی بنایا جائے اور قانون شکنی کے مرتکب افراد سے آہنی ہاتھوں سے نمٹا جائے۔ اجلاس میں طے پایا کہ ضلعی سطح پر بین المحکماتی رابطے کو مزید مؤثر بنایا جائے گا تاکہ نیشنل ایکشن پلان کے تمام اہداف بروقت اور مکمل طور پر حاصل کیے جا سکیں۔