Category: اوکاڑہ

اوکاڑہ (نامہ نگار ملک ظفر) ڈی پی او اوکاڑہ محمد راشد ہدایت اور ڈپٹی کمشنر احمد عثمان جاوید نے مرکزی امام بارگاہ ایوانِ حسین ایف بلاک کا دورہ کیا، جہاں انہوں نے اہل تشیع وفد، منتظمین جلوس، ممبران امن کمیٹی اور تاجر برادری سے ملاقات کی۔ اس موقع پر ایم پی اے میاں منیر احمد بھی موجود تھے۔

پولیس ترجمان کے مطابق محرم الحرام کے پرامن انعقاد کے لیے ضابطہ اخلاق اور تمام ایس او پیز پر مکمل عملدرآمد کو یقینی بنایا جائے گا۔ ڈی پی او نے کہا کہ تمام اسٹیک ہولڈرز، علماء و مشائخ، منتظمین اور شہریوں کے تعاون سے شہر میں امن و امان کی فضا برقرار رکھنے کے لیے پولیس ٹیمیں شب و روز متحرک ہیں۔

اوکاڑہ (نامہ نگار ملک ظفر) پولیس اور فوڈ ونڈو ریسٹورنٹ کے درمیان مفاہمتی یادداشت (ایم او یو) پر دستخط ہو گئے۔ ڈی پی او اوکاڑہ راشد ہدایت اور چیئرمین فوڈ ونڈو ریسٹورنٹ سلمان چوہدری نے معاہدے پر دستخط کیے۔

اس معاہدے کے تحت پولیس شہداء اور فوت شدہ ملازمین کے اہل خانہ کو 25 فیصد رعایت دی جائے گی، جبکہ حاضر سروس ملازمین بھی 25 فیصد رعایت کے مستحق ہوں گے۔

ایم او یو کا مقصد پولیس شہداء کے خاندانوں، حاضر سروس پولیس اہلکاروں اور ان کے اہل خانہ کو معیاری اور رعایتی سہولیات فراہم کرنا ہے۔

اوکاڑہ( نامہ نگار ملک ظفر)وزیراعلیٰ پنجاب مریم نواز شریف کے فلیگ شپ پروگرام کے تحت خصوصی افراد میں معاون آلات کی تقسیم کے لیے گورنمنٹ ایم سی ہائی اسکول اوکاڑہ میں ایک پُروقار تقریب کا انعقاد کیا گیا۔ یہ تقریب محکمہ سوشل ویلفیئر اینڈ بیت المال کے زیر اہتمام منعقد ہوئی، جس میں 73 معذور افراد میں معاون آلات تقسیم کیے گئے۔

تقریب کے مہمانانِ خصوصی ایم پی اے چوہدری غلام رضا ربیرہ اور ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر تھے، جنہوں نے معاون آلات خصوصی افراد میں تقسیم کیے۔ اس موقع پر لیگی رہنما چوہدری فیاض ظفر، ڈپٹی ڈائریکٹر سوشل ویلفیئر محمد اشتیاق خاں، دیگر محکموں کے افسران، اور خصوصی افراد کے اہل خانہ بھی موجود تھے۔

ڈپٹی ڈائریکٹر محمد اشتیاق خاں نے خصوصی افراد کی فلاح و بہبود سے متعلق حکومتی اقدامات پر بریفنگ دی۔ ایم پی اے غلام رضا ربیرہ نے کہا کہ وزیراعلیٰ پنجاب خصوصی افراد کی سہولیات کو اولین ترجیح دے رہی ہیں، تاکہ انہیں معاشرے کا مفید شہری بنایا جا سکے۔ انہوں نے بتایا کہ پروگرام کے دوسرے مرحلے میں 73 اہل افراد میں معاون آلات تقسیم کیے جا رہے ہیں، جو ان کی روزمرہ زندگی میں آسانی پیدا کریں گے۔

ایڈیشنل ڈپٹی کمشنر چوہدری عبدالجبار گجر نے اس اقدام کو سراہتے ہوئے کہا کہ حکومت پنجاب کی یہ کاوش معذور افراد کی خودمختاری اور بہتر زندگی کی جانب ایک مثبت قدم ہے۔ معاون آلات حاصل کرنے والے افراد اور ان کے اہل خانہ نے وزیراعلیٰ پنجاب مریم نواز شریف کا خصوصی شکریہ ادا کیا۔

اوکاڑہ( نامہ نگار ملک ظفر)سابق ناظم خان نور نبی خان نے ایران پر امریکہ کی جانب سے ہونے والے حملے کو عالمی امن کے لیے سنگین خطرہ قرار دیتے ہوئے شدید مذمت کی ہے۔ اخبار نویسوں سے گفتگو کرتے ہوئے انہوں نے کہا کہ یہ حملہ بین الاقوامی قوانین کی صریح خلاف ورزی اور امریکہ کی مسلسل جارحانہ پالیسیوں کا تسلسل ہے، جو دنیا کے مختلف خطوں میں بدامنی کو ہوا دے رہا ہے۔

خان نور نبی خان نے واضح کیا کہ ہر خودمختار ریاست کو اپنے دفاع کا حق حاصل ہے اور ایران پر کسی بھی قسم کی جارحیت ناقابل برداشت ہے۔ انہوں نے عالمی برادری پر زور دیا کہ وہ اس غیر قانونی اقدام کا فوری نوٹس لے اور امریکہ کو اس کے نتائج سے آگاہ کرے۔

انہوں نے امت مسلمہ سے بھی اپیل کی کہ وہ اتحاد کا مظاہرہ کرتے ہوئے ایسے جارحانہ اقدامات کے خلاف مشترکہ مؤقف اختیار کرے، کیونکہ اگر آج ایک اسلامی ملک نشانہ بنا ہے تو کل دیگر اسلامی ممالک بھی نشانہ بن سکتے ہیں۔

خان نور نبی نے اقوام متحدہ اور او آئی سی سے مطالبہ کیا کہ وہ امریکہ کی اس کھلی جارحیت کے خلاف مؤثر اور عملی قدم اٹھائیں۔ انہوں نے حکومتِ پاکستان سے بھی مطالبہ کیا کہ ایران کے ساتھ کھل کر یکجہتی کا اظہار کرے اور عالمی فورمز پر امریکہ کی اس کارروائی کی شدید مخالفت کرے۔

دیپال پور (باغی ٹی وی، نامہ نگار امتیاز شاہین چوہدری) پاکستان کی پہلی خاتون وزیر اعظم شہید محترمہ بے نظیر بھٹو کی 72 ویں سالگرہ اور سٹی دیپال پور کے نومنتخب عہدیداران کی تقریب ضیافت فیملی ریسٹورنٹ کچہری چوک میں پروقار انداز میں منعقد ہوئی۔ تقریب کا آغاز تلاوت قرآن پاک اور نعت رسول مقبول ﷺ سے ہوا، جس کی سعادت بالترتیب شفیق جٹ اور سردار کھوکھر نے حاصل کی، جبکہ نظامت کے فرائض میاں آفتاب سعید خاں وٹو ایڈووکیٹ نے انجام دیے۔

سالگرہ کی تقریب میں محترمہ بے نظیر بھٹو کی جمہوری خدمات پر روشنی ڈالتے ہوئے میاں ریاض احمد وٹو ایڈووکیٹ، سید جعفر حسین شاہ بخاری ایڈووکیٹ، چودھری طارق رفیق ایڈووکیٹ، میاں ذوالفقار علی وٹو ایڈووکیٹ، میاں محمد جہانگیر خاں وٹو ایڈووکیٹ، پیرزادہ شاھد محمود ایڈووکیٹ، اور دیگر مقررین نے انہیں زبردست خراج عقیدت پیش کیا۔ میاں ریاض وٹو نے خطاب میں کہا کہ محترمہ بے نظیر بھٹو نے اپنی جان دے کر جمہوریت کی شمع روشن رکھی اور وہ ہر مظلوم کی آواز تھیں، ان کے مشن کو جاری رکھا جائے گا۔

چودھری سجاد الحسن سابق وزیر مملکت و ضلعی صدر پیپلز پارٹی اوکاڑا نے کہا کہ محترمہ کی خدمات عوام کے دلوں میں آج بھی زندہ ہیں، وہ پسماندہ طبقات کی امید تھیں۔ میڈم شازمہ اعزاز رامے صدر پیپلز لائر فورم دیپالپور نے کہا کہ محترمہ بے نظیر بھٹو نے مشکل حالات میں بھی عوامی خدمت کو شعار بنایا اور آج بھی ان کا وژن "بینظیر انکم سپورٹ پروگرام” کے ذریعے زندہ ہے۔

تقریب کے اختتام پر نومنتخب عہدیداران کو مبارکباد دی گئی، شرکاء کیلئے ظہرانے کا اہتمام کیا گیا، اور ملکی سلامتی و خوشحالی کیلئے دعا کی گئی۔