Category: اوکاڑہ

اوکاڑہ (نامہ نگار ملک ظفر) تھانہ سٹی دیپالپور پولیس نے اہم کارروائی کرتے ہوئے جعلی میڈیکل سرٹیفکیٹ بنانے کے لیے استعمال ہونے والا نجی آپریشن تھیٹر بے نقاب کر دیا ہے۔ ایس ایچ او فخر وٹو نے ٹیم کے ہمراہ چھاپہ مار کر مرکزی ملزم سمیت دو افراد کو گرفتار کر کے سازو سامان بھی تحویل میں لے لیا ہے۔

تفصیلات کے مطابق پولیس کو اطلاع ملی کہ ایک شہری اپنے مخالفین کو پھنسانے کی نیت سے جھوٹے میڈیکل سرٹیفکیٹ حاصل کرنے کے لیے خودساختہ زخم لگوا رہا ہے۔ ایس ایچ او فخر وٹو نے فوری کارروائی کرتے ہوئے رتہ کھنہ روڈ پر واقع ایک رہائشی مکان پر قائم جعلی آپریشن تھیٹر پر چھاپہ مارا۔ پولیس کے مطابق مرکزی ملزم ندیم خان نے اپنے ڈرائیور کو جان بوجھ کر زخمی کروایا تاکہ سرکاری اسپتال سے جعلی میڈیکل حاصل کیا جا سکے۔ ملزم نے اپنے ڈرائیور کو علاج کے بہانے نجی مقام پر لے جا کر بازو پر گہرا زخم لگایا۔ یہ کام سرکاری اسپتال کے درجہ چہارم ملازم آصف کی مدد سے انجام دیا گیا۔

پولیس نے جعلی آپریشن تھیٹر میں موجود طبی آلات، پٹیاں، سرنجیں اور دیگر مواد قبضے میں لے کر دونوں ملزمان کے خلاف مقدمہ درج کر کے تفتیش کا آغاز کر دیا ہے۔ ڈسٹرکٹ پولیس آفیسر راشد ہدایت نے اس کامیاب کارروائی پر ایس ایچ او فخر وٹو اور ان کی پوری ٹیم کو سراہتے ہوئے تعریفی اسناد دینے کا اعلان کیا ہے۔

یاد رہے کہ ضلع اوکاڑہ میں محکمہ صحت کے کئی درجہ چہارم ملازمین اپنے طور پر غیر قانونی کلینکس چلا رہے ہیں، جہاں نہ صرف علاج کے نام پر جعلسازی کی جاتی ہے بلکہ قانون اور اخلاقیات کی دھجیاں اڑائی جاتی ہیں۔ اس کارروائی نے ایسے عناصر کے خلاف کریک ڈاؤن کا آغاز کر دیا ہے، جسے شہریوں نے خوش آئند قرار دیا ہے۔

اوکاڑہ (نامہ نگار ملک ظفر)سابق صدر پاکستان میڈیکل ایسوسی ایشن ضلع اوکاڑہ اور معروف سماجی شخصیت ڈاکٹر افتخار امجد نے کہا ہے کہ دو روز قبل ہونے والے المناک ٹریفک حادثے میں محمد ندیم اور اس کے تین بچوں کی ہلاکت نے ضلع بھر کی فضاء کو سوگوار کر دیا ہے۔ شہری حدود میں بڑھتے ہوئے ٹریفک حادثات ضلعی پولیس اور ٹریفک حکام کی کارکردگی پر سوالیہ نشان بن چکے ہیں۔

صحافیوں سے خصوصی گفتگو کرتے ہوئے ڈاکٹر افتخار امجد نے کہا کہ اوکاڑہ شہر میں ہیوی ٹریفک کی بلا روک ٹوک آمد و رفت انسانی جانوں کے ضیاع کا سبب بن رہی ہے، جس کے سدباب کے لیے فوری اور موثر اقدامات ناگزیر ہو چکے ہیں۔ انہوں نے ڈسٹرکٹ پولیس آفیسر اور ٹریفک پولیس افسر سے مطالبہ کیا کہ شہری اور تعلیمی اداروں کی حدود میں ہیوی گاڑیوں کے داخلے پر مکمل پابندی عائد کی جائے، اور ان گاڑیوں کے لیے کوئی مخصوص وقت مقرر کیا جائے تاکہ ایسے اندوہناک حادثات سے بچا جا سکے۔

ڈاکٹر افتخار امجد نے زور دیا کہ ٹریفک کے بگڑتے ہوئے نظام کو قابو میں لانے کے لیے جدید ٹیکنالوجی، جیسے اسپیڈ کیمرے، مانیٹرنگ سسٹمز، اور خودکار چالاننگ کا استعمال کیا جائے تاکہ تیز رفتاری، بے ہنگم ڈرائیونگ اور غلط اوور ٹیکنگ جیسے عوامل پر قابو پایا جا سکے۔

انہوں نے ضلعی انتظامیہ پر زور دیا کہ وہ اس سنگین مسئلے پر سنجیدگی سے توجہ دے، تاکہ شہریوں کی جان و مال کا تحفظ یقینی بنایا جا سکے۔ اس موقع پر ٹریفک حادثے میں جاں بحق ہونے والے محمد ندیم اور ان کے بچوں کے لیے دعائے مغفرت بھی کی گئی۔

اوکاڑہ (نامہ نگار ملک ظفر) سی سی ڈی پولیس اور ڈاکوؤں کے درمیان کراس فائرنگ کے تبادلے میں دو ڈاکو گرفتار کر لیے گئے جبکہ ایک ڈاکو موقع سے فرار ہوگیا۔ ترجمان سی سی ڈی کے مطابق، سی سی ڈی ٹیم اشتہاری ملزمان کی گرفتاری کے لیے دیا رام پل پر موجود تھی کہ اسی دوران لکڑانوالہ کی جانب سے تین موٹر سائیکل سوار مشتبہ افراد نمودار ہوئے۔

سی سی ڈی ٹیم نے رکنے کا اشارہ کیا تو ڈاکوؤں نے سیدھی فائرنگ شروع کر دی۔ موٹر سائیکل تیزی سے موڑتے ہوئے پھسل گئی، جس کے نتیجے میں ایک ڈاکو زخمی ہو کر زمین پر گر پڑا، جسے فوراً گرفتار کر لیا گیا۔ گرفتار زخمی ڈاکو کی شناخت محمد ارشد عرف صدی، سکنہ لکڑانوالہ کے نام سے ہوئی ہے۔

سی سی ڈی ٹیم نے بہادری کا مظاہرہ کرتے ہوئے اس کے دوسرے ساتھی کو بھی تعاقب کر کے گرفتار کر لیا، جس کی شناخت احمد شہزاد، سکنہ 56 ڈی پاکپتن کے طور پر ہوئی ہے۔ دونوں گرفتار ملزمان کے قبضے سے اسلحہ اور موٹر سائیکل برآمد کر لیا گیا ہے، جو بعد ازاں چیکنگ پر چوری شدہ نکلا۔

فرار ہونے والے تیسرے ڈاکو کی تلاش کے لیے سی سی ڈی اور مقامی پولیس کا مشترکہ سرچ آپریشن جاری ہے، جبکہ سی سی ڈی پولیس کی ایک خصوصی ٹیم بھی تشکیل دے دی گئی ہے۔ زخمی ڈاکو کو علاج معالجے کے لیے اسپتال منتقل کر دیا گیا ہے۔

ترجمان سی سی ڈی کا کہنا ہے کہ شہریوں کے جان و مال کے تحفظ کے لیے تمام ممکنہ اقدامات کیے جا رہے ہیں، اور جرائم پیشہ عناصر کے خلاف بلا امتیاز کارروائیاں جاری رہیں گی۔

اوکاڑہ (نامہ نگار ملک ظفر) قومی شاہراہ پر اڈہ کسان کے قریب افسوسناک ٹریفک حادثے میں ایک نوجوان جاں بحق جبکہ دوسرا شدید زخمی ہو گیا۔ حادثہ اس وقت پیش آیا جب ایک نامعلوم تیز رفتار کار نے موٹر سائیکل کو ٹکر مار دی اور موٹرسائیکل سواروں کو کچلتے ہوئے موقع سے فرار ہو گئی۔

تفصیلات کے مطابق موٹر سائیکل نمبری AYA-8328 پر سوار 32 سالہ محمد شہزاد اور 33 سالہ محمد وسیم قومی شاہراہ پر سفر کر رہے تھے کہ اچانک ایک بے قابو کار نے اڈہ کسان کے قریب ان کی موٹر سائیکل کو ٹکر مار دی۔ تصادم کے نتیجے میں محمد شہزاد موقع پر ہی جاں بحق ہو گیا جبکہ محمد وسیم شدید زخمی ہو گیا۔

دونوں افراد کا تعلق دبئی ٹاؤن لاہور سے بتایا گیا ہے۔ واقعے کی اطلاع ملتے ہی ریسکیو 1122 اور پولیس کی ٹیمیں جائے وقوعہ پر پہنچ گئیں۔ ریسکیو اہلکاروں نے جاں بحق نوجوان کی لاش اور زخمی کو فوری طور پر قریبی ہسپتال منتقل کیا، جبکہ پولیس نے نامعلوم کار اور ڈرائیور کی تلاش شروع کر دی ہے۔

پولیس نے شواہد اکٹھے کر کے حادثے کی جامع تحقیقات کا آغاز کر دیا ہے، جبکہ علاقے میں واقعہ پر شدید افسوس کا اظہار کیا جا رہا ہے۔

اوکاڑہ (نامہ نگار ملک ظفر) اوکاڑہ میں جی ٹی روڈ پر افسوسناک اور دل دہلا دینے والا حادثہ پیش آیا جہاں ایک باپ اپنے تین معصوم بچوں کو اسکول چھوڑنے جا رہا تھا کہ تیز رفتار ٹرالر کی ٹکر نے سب کچھ ختم کر دیا۔ حادثے میں باپ سمیت دو بیٹے اور ایک بیٹی موقع پر ہی جاں بحق ہو گئے، واقعے نے علاقے کو سوگ میں مبتلا کر دیا۔

تفصیلات کے مطابق چک نمبر 24 ٹو آر کا رہائشی 43 سالہ محمد ندیم اپنے تین بچوں 10 سالہ آریان، 8 سالہ ایان اور 6 سالہ عائزہ فاطمہ کو موٹر سائیکل پر اسکول چھوڑنے جا رہا تھا۔ جب وہ جی ٹی روڈ پر پنجاب کالج اوکاڑہ کے قریب پہنچا تو تیز رفتار اور بے قابو ٹرالر (نمبری EA-7170) نے ان کی موٹر سائیکل کو زور دار ٹکر مار دی۔ تصادم اتنا شدید تھا کہ موٹر سائیکل سوار زمین پر گر گئے اور ٹرالر ان پر چڑھ دوڑا، جس کے نتیجے میں چاروں افراد موقع پر ہی دم توڑ گئے۔

حادثے کی اطلاع ملتے ہی ریسکیو 1122 اور پولیس موقع پر پہنچ گئی۔ ریسکیو ٹیموں نے لاشوں کو ضلعی ہسپتال منتقل کیا جبکہ پولیس نے جائے وقوعہ سے شواہد اکٹھے کرتے ہوئے ٹرالر کو اپنی تحویل میں لے لیا۔ ابتدائی اطلاعات کے مطابق، ٹرالر ڈرائیور موقع سے فرار ہو گیا جس کی تلاش جاری ہے۔

جاں بحق ہونے والے افراد کی اطلاع ملتے ہی پورے گاؤں میں کہرام مچ گیا۔ مقتول بچوں کے اسکول میں بھی سوگ کی فضا چھا گئی۔ اہل علاقہ اور عزیز و اقارب کی آنکھیں اشکبار ہیں اور ہر طرف غم و اندوہ کا سماں ہے۔ شہریوں نے حکومت سے مطالبہ کیا ہے کہ ایسے حادثات کی روک تھام کے لیے سخت قوانین نافذ کیے جائیں اور غفلت کے مرتکب ڈرائیور کو جلد گرفتار کر کے قرار واقعی سزا دی جائے۔

اوکاڑہ (نامہ نگار ملک ظفر) بلوچستان کے علاقے خضدار میں دہشت گردی کا نشانہ بننے والی مسافر بس میں اوکاڑہ کے نواحی گاؤں 52/2-ایل کے رہائشی دو بہن بھائی بھی سوار تھے۔ افسوسناک واقعے میں ساتویں جماعت کی طالبہ، سات سالہ حفضہ کوثر افتخار موقع پر شہید ہوگئی، جبکہ اس کا چھوٹا بھائی، چھٹی جماعت کا طالبعلم محمد حذیفہ افتخار شدید زخمی ہوگیا جسے فوری طور پر سی ایم ایچ کوئٹہ منتقل کر دیا گیا۔

دونوں بچے حصولِ تعلیم کے سلسلے میں اپنے والد، پاک آرمی کے حوالدار افتخار کے ساتھ خضدار میں مقیم تھے۔ حملے کے بعد شہید بچی کا جسد خاکی اس کے والد آبائی گاؤں اوکاڑہ لے کر پہنچے، جہاں نمازِ جنازہ میں اہلِ علاقہ کی بڑی تعداد نے شرکت کی اور شہداء کو خراجِ عقیدت پیش کیا۔

ورثاء نے واقعے پر شدید غم و غصے کا اظہار کرتے ہوئے کہا کہ معصوم بچوں کے خون کا بدلہ ضرور لیا جائے گا، وہ دہشتگردی کے خلاف اپنی افواجِ پاکستان کے شانہ بشانہ کھڑے ہیں۔ انہوں نے واضح پیغام دیا کہ اس قسم کی بزدلانہ کارروائیاں قوم کے حوصلے پست نہیں کر سکتیں۔

یہ افسوسناک واقعہ نہ صرف متاثرہ خاندان بلکہ پوری قوم کے لیے دکھ اور صدمے کا باعث بنا ہے۔ عوامی حلقوں اور سوشل میڈیا پر بھی معصوم شہید بچی کے لیے دعاؤں اور اظہارِ افسوس کا سلسلہ جاری ہے، جبکہ دہشتگردوں کے خلاف سخت ترین کارروائی کا مطالبہ زور پکڑ رہا ہے۔