Category: اوکاڑہ

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر سیکرٹری ڈی آر ٹی اے واصف یاسین نے عید الفطر کے پیش نظر پبلک ٹرانسپورٹ کی چیکنگ کا سلسلہ شروع کر دیا۔ انہوں نے پرائیویٹ اڈا جات اور جی ٹی روڈ پر متعدد گاڑیوں کی چیکنگ کی اور اوور لوڈنگ کرنے والے ٹرانسپورٹرز پر جرمانے عائد کیے۔

سیکرٹری ڈی آر ٹی اے واصف یاسین نے اس موقع پر کہا کہ عید الفطر کے پیش نظر اپنے گھروں کو جانے والے مسافروں کو آرام دہ سفر کی سہولیات فراہم کی جائیں۔ انہوں نے ٹرانسپورٹرز کو ہدایت کی کہ وہ گاڑیوں میں کرایوں کی اوور چارجنگ اور مسافروں کی اوور لوڈنگ سے گریز کریں۔ خلاف ورزی کرنے والے ٹرانسپورٹرز کو بھاری جرمانے کیے جائیں گے۔

انہوں نے مزید کہا کہ ڈپٹی کمشنر احمد عثمان جاوید کی ہدایت پر مسافروں کو ہر ممکن سہولت فراہم کرنے کے لیے اقدامات کیے جا رہے ہیں۔ انہوں نے ٹرانسپورٹرز سے اپیل کی کہ وہ قانون کی پاسداری کریں اور مسافروں کو محفوظ اور آرام دہ سفر فراہم کریں۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید نے کسانوں کے مسائل کو ترجیحی بنیادوں پر حل کرنے کا عزم ظاہر کرتے ہوئے کہا ہے کہ ملک کی ترقی کسانوں کی خوشحالی سے جڑی ہے۔ انہوں نے یہ بات پاکستان کسان اتحاد کے نمائندوں اور واپڈا حکام کے درمیان ہونے والے ایک اجلاس میں کہی۔

اجلاس میں، کسان اتحاد کے نمائندوں نے واپڈا کی جانب سے بجلی کے میٹروں پر اوور بلنگ اور ناجائز جرمانے سمیت دیگر مسائل سے ڈپٹی کمشنر کو آگاہ کیا۔ انہوں نے بتایا کہ ان مسائل کی وجہ سے کسانوں کو شدید مشکلات کا سامنا ہے۔

ڈپٹی کمشنر احمد عثمان جاوید نے فوری طور پر واپڈا حکام کو ہدایت کی کہ وہ کسانوں کی شکایات کا ازالہ کریں اور اوور بلنگ اور ناجائز جرمانے سے گریز کریں۔ انہوں نے زور دیا کہ بلنگ درست ریڈنگ کے مطابق کی جائے اور کسانوں کو درپیش مسائل کو حل کرنے کے لیے ان سے باقاعدہ میٹنگز کی جائیں۔

ڈپٹی کمشنر نے واضح کیا کہ کسان خوشحال ہوں گے تو ملک بھی خوشحال ہوگا۔ انہوں نے متعلقہ حکام کو کسانوں کے مسائل کے حل کے لیے موثر اقدامات کرنے کی ہدایت کی۔

اوکاڑہ (نامہ نگار ملک ظفر) ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر کی زیر صدارت انسداد پولیو مہم کے جائزہ اجلاس کا انعقاد کیا گیا۔ اجلاس میں سی ای او ہیلتھ ڈاکٹر سیف اللہ وڑائچ، ڈبلیو ایچ او کے نمائندوں اور محکمہ صحت کے افسران نے شرکت کی۔

سی ای او ہیلتھ ڈاکٹر سیف اللہ وڑائچ نے انسداد پولیو مہم کے انتظامات کی تیاریوں کے بارے میں تفصیلی بریفنگ دی۔ ایڈیشنل ڈپٹی کمشنر نے ہدایات جاری کرتے ہوئے کہا کہ انسداد پولیو مہم کے سلسلے میں سٹاف کی ٹریننگ سمیت تمام انتظامات کے لیے تیاریاں کی جائیں۔

اس کے ساتھ ساتھ مہم کے لیے تمام سامان اور اشیاء ضروریہ سمیت ویکسین اور بچوں میں ای پی آئی کے تحت حفاظتی ٹیکہ جات کے دیے گئے ٹارگٹ کے انتظامات بھی مکمل کیے جائیں۔

اوکاڑہ (نامہ نگار ملک ظفر) ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے ایکسیڈنٹ ریویو کمیٹی کے اجلاس سے خطاب کرتے ہوئے کہا ہے کہ ٹریفک قوانین پر مکمل عمل درآمد سے جان لیوا ٹریفک حادثات سے بچاؤ ممکن ہے اور ان سے واقفیت کے لیے عوام الناس کو تمام احتیاطی تدابیر بارے آگاہی فراہم کی جائے۔

اجلاس میں سیکرٹری ڈی آر ٹی اے واصف یاسین، سول ڈیفنس آفیسر وقار اکبر، ٹریفک پولیس، ہائی وے پولیس اور ریسکیو 1122 کے حکام بھی موجود تھے۔ سیکرٹری ڈی آر ٹی اے واصف یاسین نے ماہانہ روڈ ایکسیڈنٹس کے بارے میں تفصیلی بریفنگ دی۔

ایڈیشنل ڈپٹی کمشنر نے ہدایات جاری کرتے ہوئے کہا کہ مختلف روڈز جہاں پر کٹس، سپیڈ بریکرز، یو ٹرنز بنانے کی ضرورت ہو، اس بارے میں چیکنگ کر کے تفصیلی رپورٹ پیش کی جائے تاکہ ان کی تعمیر کے لیے اقدامات اٹھائے جا سکیں۔ انہوں نے ریسکیو 1122 کے اہلکاروں کو ہدایت کی کہ وہ رسپانس ٹائم کی مکمل پابندی کرتے ہوئے حادثات میں زخمی ہونے والوں کو فوری طبی امداد مہیا کریں۔

انہوں نے مزید کہا کہ ایل پی جی فٹڈ گاڑیوں کے خلاف سخت کریک ڈاؤن کیا جائے اور عید کے ایام میں روڈز پر ٹرانسپورٹ کی چیکنگ کے لیے سٹاف کی ڈیوٹیاں بھی لگائی جائیں۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایت پر سیکرٹری ڈسٹرکٹ ریجنل ٹرانسپورٹ اتھارٹی وآصف یاسین نے ایل پی جی پر چلنے والے رکشوں کے خلاف کارروائیاں کیں۔ انہوں نے شہر کے مختلف مقامات پر متعدد رکشوں کی چیکنگ کی اور ایل پی جی پر چلنے والے 10 رکشوں کو قبضے میں لے کر ان کے سلنڈر اتار دیے۔

سیکرٹری ڈی آر ٹی اے نے ایل پی جی دکانوں کی بھی چیکنگ کی اور 2 غیر قانونی ایل پی جی دکانوں کو موقع پر سیل کر دیا۔ اس موقع پر انہوں نے کہا کہ ایل پی جی سے چلنے والے رکشے جان لیوا حادثات کا باعث بن سکتے ہیں۔ عوامی جان و مال کو محفوظ رکھنے کے لیے ان رکشوں کے خلاف تسلسل سے کارروائیاں کی جائیں گی۔

سیکرٹری ڈی آر ٹی اے وآصف یاسین نے مزید کہا کہ غیر قانونی ایل پی جی دکانوں کے مالکان انسانی جانوں سے کھیلنے سے باز رہیں۔ وہ قواعد و ضوابط کے تحت ہی گیس فروخت کریں۔ بصورت دیگر ان پر بھاری جرمانے عائد کرنے کے ساتھ ساتھ ان کی دکانیں سیل کر دی جائیں گی۔

اوکاڑہ (نامہ نگار ملک ظفر) محکمہ سول ڈیفنس نے غیر قانونی ایل پی جی دکانوں کے خلاف کارروائی کرتے ہوئے رواں ماہ 85 دکانیں سیل کر دیں۔ حکومت پنجاب کی ہدایات کے مطابق، عوامی جان و مال کے تحفظ کے لیے کی گئی اس کارروائی میں، 2 دکانوں کے خلاف ایف آئی آر بھی درج کی گئیں۔

محکمہ سول ڈیفنس نے غیر قانونی ری فلنگ پر 85 ایل پی جی دکانوں کو سیل کیا، 2 کے خلاف ایف آئی آر درج کرائی، 60 ہزار 5 سو روپے کے جرمانے کیے اور فائر سیفٹی کے انتظامات مکمل نہ ہونے پر 11 ایل پی جی دکانوں کے چالان بنا کر اسپیشل جوڈیشل مجسٹریٹ رینالہ خورد کی عدالت میں بھجوائے۔

ڈسٹرکٹ سول ڈیفنس آفیسر نے ایل پی جی دکانوں کے مالکان پر زور دیا کہ وہ غیر قانونی ری فلنگ بند کریں اور آئل اینڈ گیس ریگولیٹری اتھارٹی کے ایس او پیز پر عمل کرتے ہوئے معیاری سیل بند سلنڈر فروخت کریں۔ انہوں نے خبردار کیا کہ غیر قانونی عمل کو برداشت نہیں کیا جائے گا کیونکہ اس سے پہلے بھی انسانی جانوں کا نقصان ہو چکا ہے۔

اوکاڑہ (نامہ نگار ملک ظفر) محکمہ تحفظ ماحولیات و موسمیاتی تبدیلی اور سول ڈیفنس ڈیپارٹمنٹ کے اشتراک سے آبی وسائل کے تحفظ کے عالمی دن کے حوالے سے ای لائبریری ڈسٹرکٹ کمپلیکس میں سیمینار منعقد کیا گیا۔ سیمینار میں این جی اوز، محکمہ تحفظ ماحولیات وموسمیاتی تبدیلی، محکمہ سول ڈیفنس، وکلا برادری اور انڈسٹری ڈیپارٹمنٹ کے سٹاف نے شرکت کی۔

سیمینار میں رواں سال بین الاقوامی پانی کے تحفظ کے دن کے موضوع "گلیشیر پریزرویشن” پر روشنی ڈالی گئی۔ مقررین نے آبی وسائل کے تحفظ کی اہمیت پر زور دیا اور پانی کے ضیاع کو روکنے کے لیے اقدامات کرنے کی ضرورت پر زور دیا۔

ڈیفنس آفیسر وقار اکبر نے کہا کہ آبی وسائل کے تحفظ کے لیے ہر ایک کو اپنا کردار ادا کرنا ہوگا۔ انہوں نے عوام میں شعور کی آگاہی کی ضرورت پر زور دیا۔ اس موقع پر اسٹنٹ ڈائریکٹر محکمہ تحفظ ماحولیات و موسمیاتی تبدیلی انجینئر جہانتاب، ڈسٹرکٹ سول ڈیفنس آفیسر وقار اکبر، چیف انسٹرکٹر سول ڈیفنس محمد اقبال جاوید اختر، سینئر وائس پریذیڈنٹ بار، میڈم سمعیہ بتول اور دیگر مقررین نے پانی کی اہمیت اور اس کے ضیاع کو روکنے کے لیے پوری دنیا میں ہونے والے اقدامات پر روشنی ڈالی۔

تقریب کے اختتام پر آگاہی واک اور شجرکاری مہم کے سلسلے میں پودے بھی لگائے گئے۔

اوکاڑہ (نامہ نگار ملک ظفر) ورلڈ فارسٹ ڈے کے موقع پر پپلی پہاڑ فارسٹ پارک میں محکمہ جنگلات کے زیر اہتمام "پلانٹ فار پاکستان” کی افتتاحی تقریب اور آگاہی واک کا انعقاد کیا گیا۔ ایڈیشنل ڈپٹی کمشنر ریونیو محمد ابراہیم ارباب نے پودا لگا کر اس مہم کا باضابطہ افتتاح کیا۔

اس موقع پر ڈویژنل فارسٹ آفیسر مشتاق حسین چغتائی، سی ای او ایجوکیشن محمد یوسف، ڈی ای او سیکنڈری شکیل احمد رضوی، ریسکیو 1122 اور محکمہ جنگلات کے افسران و عملہ، اساتذہ کرام، طلباء اور شہریوں کی کثیر تعداد موجود تھی۔ تقریب میں ماس پلانٹیشن کے تحت محکموں کے افسران، ریسکیو اہلکاروں اور طلباء نے فارسٹ پارک میں 3 ہزار پودے لگائے۔

ایڈیشنل ڈپٹی کمشنر ریونیو محمد ابراہیم ارباب نے اس موقع پر گفتگو کرتے ہوئے کہا کہ صحت مند ماحول کے حامل ممالک کے کم از کم 25 فیصد حصے پر جنگلات ہونے چاہئیں، لیکن بدقسمتی سے پاکستان میں یہ شرح صرف 6 فیصد ہے۔ انہوں نے گلوبل وارمنگ اور موسمیاتی تبدیلیوں سے نمٹنے کے لیے زیادہ سے زیادہ شجرکاری کی ضرورت پر زور دیا۔

ڈویژنل فارسٹ آفیسر مشتاق حسین چغتائی نے کہا کہ ورلڈ فارسٹ ڈے پر سرکاری محکموں سمیت تمام اسٹیک ہولڈرز کو شجرکاری مہم کا حصہ بنانا حکومت پنجاب کا بہترین اقدام ہے۔ انہوں نے بتایا کہ ضلع بھر میں "پلانٹ فار پاکستان ڈے” کے موقع پر 91580 پودے لگائے جائیں گے۔ انہوں نے تمام شہریوں سے پاکستان کو سرسبز و شاداب بنانے کے مشن میں اپنا کردار ادا کرنے کی اپیل کی۔

تقریب کے اختتام پر ورلڈ فارسٹ ڈے کے سلسلے میں آگاہی واک بھی کی گئی۔

اوکاڑہ(نامہ نگارملک ظفر) غیر معیاری ادویات فروخت کرنے والوں کے خلاف کریک ڈاؤن

اوکاڑہ میں غیر معیاری ادویات کی فروخت کے خلاف سخت کارروائی کا آغاز کر دیا گیا ہے۔ ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر کی زیر صدارت ڈسٹرکٹ کوالٹی کنٹرول بورڈ کا اجلاس منعقد ہوا، جس میں سی ای او ہیلتھ ڈاکٹر سیف اللہ وڑائچ اور ڈرگ انسپکٹرز سمیت بورڈ کے دیگر ممبران نے شرکت کی۔

اجلاس میں میڈیکل سٹورز کے خلاف کارروائیوں کے 15 کیسز پیش کیے گئے، جن میں سے 5 کیسز ڈرگ کورٹ کو بھجوائے گئے۔ 7 کیسز میں میڈیکل سٹور مالکان کو وارننگ دی گئی جبکہ 3 کیسز ملتوی کر دیے گئے۔

ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے واضح کیا کہ خلاف قانون چلائے جانے والے میڈیکل سٹورز کو کسی صورت کام کرنے کی اجازت نہیں دی جائے گی۔ انہوں نے عوام کو بہترین طبی سہولیات کی فراہمی کے سلسلے میں ادویات کے معیار پر کوئی سمجھوتہ نہ کرنے کا عزم کیا۔

چوہدری عبدالجبار گجر نے مزید کہا کہ کوالیفائیڈ سٹاف کے بغیر کام کرنے والے میڈیکل سٹورز کے خلاف سخت کارروائی کی جائے گی۔ انہوں نے میڈیکل سٹور مالکان کو ہدایت کی کہ زائد المیعاد ادویات کو مخصوص کاؤنٹرز میں رکھیں اور اس سلسلے میں انتہائی احتیاط سے کام لیں۔

انہوں نے قواعد و ضوابط کے تحت عوام کو معیاری ادویات کی فراہمی کو یقینی بنانے پر زور دیا۔