Category: اوکاڑہ

اوکاڑہ (نامہ نگار ملک ظفر) شہر بھر میں صفائی ستھرائی اور بیوٹیفیکیشن کے عمل کو مزید فعال بنایا گیا ہے۔ ڈپٹی کمشنر احمد عثمان جاوید کی ہدایت پر میونسپل کمیٹی اور ضلع کونسل کے اہلکار شہر کے مختلف مقامات پر صفائی اور بیوٹیفیکیشن کا عمل جاری رکھے ہوئے ہیں۔ اس کا مقصد عوام کو صاف ستھرا اور خوبصورت ماحول فراہم کرنا ہے تاکہ ان کے لیے زندگی آسان بنائی جا سکے۔

ضلعی انتظامیہ کے افسران صفائی اور بیوٹیفیکیشن کی نگرانی کر رہے ہیں اور شہر کو مزید خوبصورت بنانے کے لیے سرگرم ہیں۔ اس کے علاوہ، روڈز کے فٹ پاتھ اور مختلف پوائنٹس پر زیبرا کراسنگ بھی بنائی جا رہی ہے تاکہ پیدل چلنے والوں کو سڑک پار کرنے میں آسانی ہو۔ عوام نے شہر کی صفائی اور خوبصورتی کے حوالے سے ڈپٹی کمشنر احمد عثمان جاوید کی کوششوں کو سراہا ہے اور انہیں شہر کے بہتر مستقبل کے لیے ایک اہم قدم قرار دیا ہے۔

اوکاڑہ،باغی ٹی وی (نامہ نگار ملک ظفر) ڈسٹرکٹ بار ایسوسی ایشن اوکاڑہ کے سالانہ انتخابات میں اصغر خان 906 ووٹ لے کر 349 ووٹوں کی برتری سے صدر منتخب ہو گئے۔ جنرل سیکرٹری کی نشست پر میاں نعمان انور نے 731 ووٹ لے کر صرف ایک ووٹ کی برتری سے کامیابی حاصل کی۔

تمام دیگر عہدیداران بھی کامیاب ہو گئے۔ انتخابات کے بعد ملک اسد وقاص ایڈووکیٹ نے اصغر خان اور میاں نعمان انور کو مبارکباد پیش کی اور بار ایسوسی ایشن کی ترقی و خوشحالی کے لیے مل کر کام کرنے کے عزم کا اظہار کیا۔

اوکاڑہ ،باغی ٹی وی (نامہ نگارملک ظفر) ایڈیشنل ڈپٹی کمشنر ریونیو محمد ابراہیم ارباب کی زیر نگرانی فیصل آباد روڈ اور ستگھرہ موڑ پر تجاوزات کے خلاف گرینڈ آپریشن جاری ہے۔ ضلعی انتظامیہ کی اینٹی انکروچمنٹ ٹیموں کی قیادت ملک مدثر نزیر نے کی، جس میں بھاری مشینری کا استعمال کرتے ہوئے روڈ کے اطراف عارضی اور پختہ تجاوزات کا خاتمہ کیا گیا۔

اس موقع پر ایڈیشنل ڈپٹی کمشنر ریونیو نے کہا کہ تجاوزات شہر کی خوبصورتی پر بد نما داغ ہیں اور ان کا مکمل خاتمہ کر کے عوام کے لیے سہولت فراہم کی جا رہی ہے۔ انہوں نے مزید کہا کہ تجاوزات کے خلاف کارروائی شہر بھر میں تسلسل سے جاری رہے گی اور یہ ضلعی انتظامیہ کی اولین ترجیح ہے۔

اوکاڑہ،باغی ٹی وی (نامہ نگارملک ظفر)ڈپٹی کمشنر احمد عثمان جاوید نے ڈسٹرکٹ پولیس آفیسر محمد راشد ہدایت کے ہمراہ جامعہ مسجد ریاض العثمانیہ گلشن اقبال ٹاؤن میں کھلی کچہری کا انعقاد کیا۔ اس موقع پر ایڈیشنل ڈپٹی کمشنر جنرل حافظ محمد عمر طیب، اسسٹنٹ کمشنر احسن ممتاز، چیف آفیسر ضلع کونسل رانا نوید، پولیس حکام اور اہل علاقہ کی بڑی تعداد بھی موجود تھی۔

ڈپٹی کمشنر اور ڈسٹرکٹ پولیس آفیسر نے نماز جمعہ کے بعد عوام کے مسائل سنے اور ان کے فوری حل کے لیے متعلقہ محکموں کو احکامات جاری کیے۔ ڈپٹی کمشنر احمد عثمان جاوید نے کہا کہ مساجد میں عوامی مسائل کی سنوائی اسلامی تعلیمات کا حصہ ہیں اور عوام کے مسائل کے حل کے لیے ڈپٹی کمشنر آفس کے دروازے ہمہ وقت کھلے ہیں۔

ڈسٹرکٹ پولیس آفیسر محمد راشد ہدایت نے جرائم کی شرح میں 50 فیصد کمی کی اطلاع دی اور عوام سے اپیل کی کہ وہ امن کے قیام کے لیے پولیس کا ساتھ دیں اور مشکوک سرگرمیوں کی اطلاع فوراً دیں۔

اوکاڑہ،باغی ٹی وی (نامہ نگار ، ملک ظفر) چیئرمین سپریم کونسل تحریک منہاج القرآن انٹرنیشنل فرزند شیخ الاسلام پروفیسر ڈاکٹر محمد طاہرالقادری، صاحبزادہ ڈاکٹر حسن محی الدین قادری 31 دسمبر 2024ء بروز منگل دوپہر ایک بجے اوکاڑہ تشریف لائیں گے۔ ان کی آمد کے حوالے سے استقبال کی تیاریاں مکمل ہو چکی ہیں۔

تحریک منہاج القرآن اوکاڑہ کے ضلعی صدر خالد محمود قادری اور ضلعی ناظم فرید احمد چوہدری نے صحافیوں سے گفتگو کرتے ہوئے کہا کہ ڈاکٹر حسن محی الدین قادری کا استقبال ایک مثالی استقبال ہوگا، جو فیصل آباد روڈ نہر کے پل پر کیا جائے گا۔ اس استقبال میں تحریک منہاج القرآن اور پاکستان عوامی تحریک سمیت تمام فورمز کے کارکنان بھرپور حصہ لے رہے ہیں۔

انہوں نے مزید کہا کہ ڈاکٹر حسن محی الدین قادری فیضانِ کرمانوالا رائس ملز، برلبِ نہر 2 فور ایل میں ایک خصوصی نشست سے خطاب کریں گے۔ اس نشست میں تمام اہلِ اسلام اور اہلِ اوکاڑہ کو دعوت دی جاتی ہے۔ تمام دوست احباب کو اس شاندار استقبال اور خصوصی نشست میں شرکت کی دعوت دی جاتی ہے تاکہ ان کے اذہان کو منور کیا جا سکے۔

اوکاڑہ،باغی ٹی وی ( نامہ نگار ملک ظفر ) مویشی پال افراد کے لیے بلا سود قرضوں کا منفرد منصوبہ، لائیو سٹاک کارڈز کی تقسیم

وزیراعلیٰ پنجاب مریم نواز شریف کے ویژن کے تحت مویشی پال افراد کی مالی معاونت کے لیے بلا سود قرضوں کی فراہمی کا منفرد اقدام کیا گیا۔ اس سلسلے میں ایک تقریب منعقد کی گئی، جہاں ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر اور ایڈیشنل ڈائریکٹر لائیو سٹاک محمد حق نواز نے مویشی پال افراد میں لائیو سٹاک کارڈز تقسیم کیے۔

تقریب میں خطاب کرتے ہوئے چوہدری عبدالجبار گجر نے کہا کہ لائیو سٹاک کارڈز کا یہ منصوبہ گوشت کی اضافی پیداوار میں معاونت اور مویشی پال جانوروں کی دیکھ بھال کے لیے بے حد مفید ثابت ہوگا۔ خودکار نظام پر مبنی یہ منصوبہ شفافیت کی بنیاد پر تشکیل دیا گیا ہے، جو اپنی نوعیت کا بے مثال اقدام ہے۔

ایڈیشنل ڈائریکٹر لائیو سٹاک محمد حق نواز نے بتایا کہ اس پروگرام کے پہلے مرحلے میں ضلع بھر کے 129 مویشی پال افراد کو لائیو سٹاک کارڈز دیے جا رہے ہیں۔ اس منصوبے کے تحت فی جانور 27 ہزار روپے بلا سود قرض فراہم کیا جا رہا ہے۔ ایک مویشی پال زیادہ سے زیادہ 10 جانور رکھ سکتا ہے اور اس کے مطابق 2 لاکھ 70 ہزار روپے تک قرض حاصل کر سکتا ہے۔

قرض کی یہ رقم مویشی پال افراد 4 ماہ تک استعمال کر سکتے ہیں اور خوراک خریدنے کے لیے رجسٹرڈ ٹریڈرز سے استفادہ کریں گے۔ قرض کی واپسی کا عمل 1 ماہ کی مدت میں مکمل ہوگا۔ اس اقدام کو عوامی اور کسان حلقوں نے سراہتے ہوئے اسے دیہی معیشت کی ترقی اور مویشی پال حضرات کے لیے معاون قرار دیا ہے۔

اوکاڑہ، باغی ٹی وی (نامہ نگار: ملک ظفر)تحصیل اوکاڑہ میں زیادہ گندم اگاؤ مہم کے تحت چک نمبر 48/3R نیامی میں کسانوں کے ایک بڑے اجتماع کا انعقاد کیا گیا، جس میں کسانوں کی بڑی تعداد نے شرکت کی۔

تقریب کے مہمان خصوصی ایم پی اے میاں یاور زمان نے کہا کہ وزیراعلیٰ پنجاب مریم نواز شریف شعبہ زراعت میں انقلابی اقدامات کر رہی ہیں۔ زیادہ گندم اگانے والے کسانوں کو قرعہ اندازی کے ذریعے ٹریکٹرز اور زرعی آلات فراہم کیے جائیں گے، جبکہ کسان کارڈ کے ذریعے مزید مراعات بھی دی جا رہی ہیں۔

محکمہ زراعت کے ماہرین نے گندم کی پیداواری ٹیکنالوجی اور سموگ پر قابو پانے کی اہمیت پر روشنی ڈالی۔ ڈائریکٹر زراعت توسیع ساہیوال، چوہدری شہباز اختر نے 25 ایکڑ سے زائد گندم کاشت کرنے والوں کے لیے مفت ٹریکٹرز اور 12.5 ایکڑ سے زائد کاشت کرنے والوں کے لیے لیزر لینڈ لیولر کی قرعہ اندازی کے بارے میں آگاہ کیا۔

اجتماع میں کسانوں کو جدید زراعت اور حکومتی اقدامات کے بارے میں آگاہی فراہم کی گئی، جسے زراعت کی ترقی کے لیے اہم قدم قرار دیا جا رہا ہے۔