Category: اوکاڑہ

اوکاڑہ (نامہ نگار ملک ظفر) لائیو سٹاک پروڈکشن ریسرچ انسٹی ٹیوٹ میں نیشنل ہارس اینڈ کیٹل شو پنجاب کے سلسلہ میں گائے و بھینس دودھ اور خوبصورتی مقابلہ جات کا انعقاد کیا گیا۔ ممبر صوبائی اسمبلی چوہدری غلام رضا ربیرہ، سیکرٹری لائیو سٹاک پنجاب ثاقب علی عطیل، کمشنر ساہیوال شعیب اقبال سید، ڈپٹی کمشنر احمد عثمان جاوید نے پروگرام میں بطور مہمان خصوصی اور مہمان اعزاز شرکت کی۔

اس موقع پر ڈائریکٹر جنرل لائیو سٹاک ریسرچ ڈاکٹر سجاد حسین، ڈی جی لائیو سٹاک ایکسٹینشن ڈاکٹر محمد اشرف، ایڈیشنل ڈائریکٹر لائیو سٹاک اوکاڑہ ڈاکٹر حق نواز علی سمیت بفلو بریڈرز ایسوسی ایشن کے نمائندوں سمیت کسانوں، مویشی پال اور شائقین کی بڑی تعداد موجود تھی۔

پروگرام کے شرکا نے جانوروں کی بہترین افزائش کے لیے خوراک، ونڈا اور علاج معالجہ کے لیے ادویات کے مختلف سٹالز کا تفصیلی وزٹ کیا۔ جانوروں کی خوبصورتی کے مقابلوں میں نیلی راوی، بہن چولستانی بیل، گائے، کجلی بھیڑ، راجن پوری، گجراتی، فیصل آبادی، مکھی چینی، ٹیڈی اور ناچی بیتل بکریوں کی پریڈ کا مظاہرہ پیش کیا گیا۔ پنجاب کے مختلف علاقوں کی گائے اور بھینسوں کے دودھ دینے کے بھی مقابلوں کا بھی شاندار انعقاد کیا گیا۔

ممبر صوبائی اسمبلی چوہدری غلام رضا ربیرہ نے کہا کہ مقابلہ جات میں شریک بریڈرز کا جوش و خروش واقعی دیدنی ہے۔ نئی ٹیکنالوجی کے ذریعے لائیو سٹاک ریسرچ انسٹیٹیوٹ کو جدید تقاضوں سے ہم آہنگ کیا جا رہا ہے۔ لائیو سٹاک کی ترقی اور فروغ کے لیے وزیراعلیٰ پنجاب کی کاوشیں انتہائی اہمیت کی حامل ہیں۔ وزیراعلیٰ کی قیادت میں محکمہ لائیو سٹاک میں انقلابی اقدامات کا سلسلہ جاری ہے۔ عوام اور شائقین کے لیے خوبصورت جانور دیکھنے کا بہترین موقع فراہم کیا گیا ہے۔

سیکرٹری لائیو سٹاک ثاقب علی عطیل نے کہا کہ وزیراعلیٰ پنجاب مریم نواز شریف کے احکامات پر ہارس اینڈ کیٹل شو عرصہ بعد دوبارہ انعقاد کیا گیا ہے۔ لائیو سٹاک ملکی معیشت کا بڑا ستون ہے۔ محکمہ لائیو سٹاک مویشی پال کو دودھ گوشت کی اضافی پیداوار کے ذریعے روزگار کے بہتر مواقع فراہم کر رہا ہے۔ جانوروں کے دودھ اور خوبصورتی مقابلہ جات کا پروگرام بھی اس سلسلہ کی اہم کڑی ہے۔

کمشنر ساہیوال شعیب اقبال سید نے کہا کہ وزیراعلیٰ پنجاب محکمہ لائیو سٹاک کی بہتری کی جانب خصوصی فوکس کیے ہوئے ہیں۔ شاندار پروگرام کے انعقاد پر سیکرٹری لائف سٹاک اور انسٹیٹیوٹ کی انتظامیہ مبارکباد کی مستحق ہے۔ ہمیں کسانوں اور مویشی پال کی بہتری کے لیے مل کر کام کرنا ہوگا۔

پروگرام کے اختتام پر سیکرٹری لائیو سٹاک ثاقب علی عطیل نے کمشنر ساہیوال شعیب اقبال سید، ایم پی اے چوہدری غلام رضا ربیرہ اور ڈپٹی کمشنر احمد عثمان جاوید کو یادگاری شیلڈز دیں۔ مہمانوں نے شجرکاری مہم کے تحت انسٹیٹیوٹ کے لان میں پودے بھی لگائے۔

اوکاڑہ (نامہ نگار ملک ظفر) لاہور ہائی کورٹ بار ایسوسی ایشن اور بزم غالب انٹرنیشنل کے زیر اہتمام لاہور ہائی کورٹ میں ایک تقریب کا انعقاد کیا گیا جس میں اوکاڑہ کی دو نامور شخصیات سمیت پاکستان کی مختلف معروف علمی و ادبی شخصیات کو سرٹیفیکیٹس، ایوارڈ اور میڈلز سے نوازا گیا۔

یہ تقریب اوکاڑہ میں علم و ادب سے دلچسپی رکھنے والوں کے لیے ایک بڑا اعزاز تھا۔ تقریب کے صدر، سابق ہیڈ آف اردو ڈیپارٹمنٹ، گورنمنٹ کالج لاہور پروفیسر ڈاکٹر سعادت سعید اور بانی چیئرمین بزم غالب، ایڈووکیٹ سپریم کورٹ آف پاکستان خالد نقاش نے اپنے دست مبارک سے اوکاڑہ کے معروف سینئر شاعر اور استاد، جنرل سیکرٹری انجمن ترقی پسند مصنفین پنجاب ڈاکٹر فضل احمد خسرو کو غالب ایوارڈ سے نوازا۔ جبکہ شاعر، صحافی اور کالم نگار، مرکزی صدر پاکستان فیڈرل کونسل آف کالمسٹ احتشام جمیل شامی کو تمغہ برائے حسن کارکردگی سے نوازا گیا۔

اوکاڑہ (نامہ نگار ملک ظفر) عوامی میڈیا کونسل اوکاڑہ کے بانی سرپرست اعلیٰ محمد آصف کھوکھر کی سالگرہ کا کیک عوامی میڈیا کونسل آفس میں کاٹا گیا۔ سالگرہ کی اس تقریب میں صحافیوں نے بھرپور شرکت کی اور نیک تمناؤں کا اظہار کیا۔

بانی عوامی میڈیا کونسل سینئر صحافی محمد آصف کھوکھر کی سالگرہ کی تقریب عوامی میڈیا کونسل اوکاڑہ کے آفس میں منعقد ہوئی۔ جنم دن کی مناسبت سے سالگرہ کا کیک کاٹا گیا اور دوستوں کی جانب سے نیک تمناؤں کا اظہار کیا گیا اور مبارک باد دی گئی۔ پھولوں کے گلدستے پیش کیے گئے۔ محمد آصف کھوکھر نے عوامی میڈیا کونسل کے ممبران کو صحافتی خدمات سرانجام دینے پر زور دیا اور کہا کہ علاقائی مسائل اجاگر کرنے میں اہم کردار ادا کرنا ہوگا تاکہ اس پلیٹ فارم سے لوگوں کی آواز کو ارباب اعلی اختیار تک پہنچایا جا سکے۔

سالگرہ کی تقریب میں عوامی میڈیا کونسل کے ممبران عمران علی بھٹی، چوہدری عمر فاروق، ڈاکٹر عبدالغنی ثاقب، رانا غلام فرید، منور حسین باجوہ، ڈاکٹر عثمان غنی، تنویر اختر، محمد یسین، فیض الرحمن چوہدری، ملک ظفر اقبال اور دیگر صحافیوں نے شرکت کی۔

اوکاڑہ (نامہ نگار ملک ظفر) اوکاڑہ ڈی ایس پی ٹریفک محمد دانش محمود کے حکم پر ٹریفک ایجوکیشن یونٹ انچارج رفعت اللہ خان جتوئی نے ڈی پی ایس سکول کے طلبہ کو ٹریفک قوانین کے بارے میں آگاہی دینے کے لیے تھیم پارک میں مدعو کیا۔

تفصیلات کے مطابق، طلبہ کو پارک میں لگائے گئے بورڈز کی اہمیت کے بارے میں بتایا گیا اور سڑک کے استعمال اور ٹریفک قوانین سے متعلق معلومات فراہم کی گئیں۔ انہیں ٹریفک کے اشاروں اور سگنلز کی اہمیت، ایڈمٹ اور لائسنس کی اہمیت سے بھی آگاہ کیا گیا۔

اس کے علاوہ، طلبہ کو بتایا گیا کہ پتنگ بازی ایک جان لیوا کھیل ہے اور اس سے بچنا چاہیے، ساتھ ہی موٹر سائیکل چلانے کے دوران سیفٹی وائر کا استعمال ضروری ہے تاکہ دھاتی تاروں سے ہونے والے نقصانات سے بچا جا سکے۔ ہیلمٹ کی اہمیت اور ٹریفک قوانین کی پابندی کی ضرورت پر بھی زور دیا گیا۔

اوکاڑہ ،باغی ٹی وی(نامہ نگارملک ظفر) گورنمنٹ گریجویٹ کالج اوکاڑہ میں کیریئر کونسلنگ، میڈیا سینٹر اور دفترِ معلومات کا افتتاح مسلم لیگ (ن) کے رہنما چوہدری فیاض ظفر نے کر دیا۔ اس موقع پر کالج کے پرنسپل پروفیسر عبدالرؤف، اساتذہ کرام، طلبہ اور معزز مہمانانِ گرامی بھی شریک تھے۔

افتتاحی تقریب کے دوران پرنسپل عبدالرؤف اور کالج اسٹاف نے چوہدری فیاض ظفر کو خوش آمدید کہا اور کالج میں جاری نصابی و غیر نصابی سرگرمیوں سے متعلق بریفنگ دی۔ طلبہ نے بھی اس اقدام کو سراہا اور اپنی خوشی کا اظہار کیا۔

تقریب سے خطاب کرتے ہوئے چوہدری فیاض ظفر نے ان سہولتوں کی اہمیت پر روشنی ڈالتے ہوئے کہا کہ یہ اقدامات طلبہ کو جدید دور کے تقاضوں سے ہم آہنگ کرنے میں مددگار ثابت ہوں گے۔ انہوں نے کالج کی مسجد کی تزئین و آرائش کا بھی جائزہ لیا اور اس پر اطمینان کا اظہار کیا۔

یہ تقریب کالج کی تعلیمی ترقی میں سنگِ میل ثابت ہوگی اور طلبہ کے لیے نئے مواقع پیدا کرے گی۔

اوکاڑہ،باغی ٹی وی (نامہ نگارملک ظفر) کمشنر ساہیوال شعیب اقبال سید، ڈپٹی کمشنر ڈاکٹر عثمان احمد اور ڈویژنل ایمرجنسی آفیسر ڈاکٹر ارشاد الحق نے سنٹرل اسٹیشن اوکاڑہ کا دورہ کیا، جہاں انہوں نے سی ایم انٹرن شپ پروگرام کے انٹرنیز اور کمیونٹی ایمرجنسی ریسپانس ٹیمز کی کارکردگی کا جائزہ لیا۔

سنٹرل اسٹیشن پہنچنے پر ڈسٹرکٹ ایمرجنسی آفیسر انجینئر احتشام نے معزز افسران کا استقبال کیا اور ریسکیو 1122 کے چاق و چوبند دستے نے سلامی پیش کی۔ دورے کے دوران کمشنر ساہیوال نے اوکاڑہ کمانڈ اینڈ کنٹرول روم کا بھی معائنہ کیا۔

خطاب میں کمشنر ساہیوال کا کہنا تھا کہ ریسکیو 1122 ایک بہترین ادارہ ہے، اور انٹرن شپ کرنے والے خوش قسمت ہیں کہ انہیں ایمرجنسی میں جان و مال بچانے کا موقع مل رہا ہے۔ انہوں نے انٹرنیز پر زور دیا کہ وہ گلی محلوں میں آگاہی مہم چلائیں اور حادثات کے دوران فوری مدد کی تکنیکوں پر تربیت دیں تاکہ معاشرہ مزید محفوظ بنایا جا سکے۔

اس موقع پر کمشنر ساہیوال نے انٹرنیز سے تربیت کے مختلف پہلوؤں پر سوالات کیے، جبکہ رضاکاروں نے سی پی آر، بلڈنگ کنٹرول، آگ پر قابو پانے اور پانی سے متاثرہ افراد کو نکالنے کے عملی مظاہرے بھی کیے۔

اوکاڑہ،باغی ٹی وی(نامہ نگارملک ظفر) آئی جی پنجاب ڈاکٹر عثمان انور اچانک سیف سٹیز اتھارٹی اوکاڑہ پہنچ گئے، جہاں انہوں نے انٹیگریٹڈ کمانڈ اینڈ کنٹرول روم کا معائنہ کیا۔ آر پی او ساہیوال محبوب رشید، ڈی آئی جی ویلفیئر اینڈ فنانس غازی محمد صلاح الدین اور ڈی پی او اوکاڑہ محمد راشد ہدایت سمیت سینئر افسران بھی ان کے ہمراہ تھے۔

دورے کے دوران ڈی پی او اوکاڑہ نے آئی جی پنجاب کو سیف سٹی کی ورکنگ اور مانیٹرنگ میکانزم پر بریفنگ دی۔ ڈاکٹر عثمان انور نے سیف سٹی کیمروں کے ذریعے مختلف مقامات کی نگرانی کے عمل کا جائزہ لیا اور عملے سے گفتگو کرتے ہوئے ان کے ورکنگ انوائرمنٹ اور سہولیات سے متعلق استفسار کیا۔

انہوں نے کہا کہ سیف سٹی پروجیکٹ انسداد دہشت گردی، ہنگامی ردعمل، ٹریفک مینجمنٹ اور جرائم میں کمی کے لیے مؤثر ثابت ہوگا، جبکہ انویسٹی گیشن پولیس کو مقدمات کی جلد تحقیقات کے لیے ویڈیو شواہد میسر آئیں گے۔ ڈی پی او راشد ہدایت کا کہنا تھا کہ سیف سٹی سے پولیس کی کارکردگی میں بہتری آئے گی اور جرائم پیشہ عناصر کے عزائم ناکام بنانے میں مدد ملے گی۔

اوکاڑہ،باغی ٹی وی(نامہ نگارملک ظفر) ڈپٹی کمشنر کا احسن اقدام، قبرستانوں میں صفائی مہم جاری

اوکاڑہ میں ڈپٹی کمشنر و ایڈمنسٹریٹر ضلع کونسل احمد عثمان جاوید کی ہدایت پر ضلع بھر کے قبرستانوں میں صفائی مہم جاری ہے۔ تینوں تحصیلوں میں عملہ قبرستانوں کی صفائی، کوڑا کرکٹ ٹھکانے لگانے اور ماحول کو بہتر بنانے میں مصروف ہے۔

ترجمان ضلعی انتظامیہ کے مطابق صاف ستھرا ماحول صحت مند زندگی کی ضمانت ہے، اور اس مہم کے تحت شہریوں کو گلی، محلوں، پارکوں کے ساتھ ساتھ قبرستانوں میں بھی بہتر سہولیات فراہم کی جا رہی ہیں تاکہ تدفین اور فاتحہ خوانی کے لیے آنے والوں کو کسی دشواری کا سامنا نہ ہو۔

اوکاڑہ (نامہ نگار ملک ظفر) ڈسٹرکٹ ایجوکیشن آفیسر ایلمنٹری فرزانہ انور بلوچ نے کہا ہے کہ صاف ستھرا اور صحت مند ماحول برقرار رکھنے کے لیے کثیر تعداد میں شجرکاری وقت کی اہم ضرورت ہے۔ ماحولیاتی تبدیلیوں اور گلوبل وارمنگ جیسے چیلنجز سے نمٹنے کے لیے سرکاری سکولوں میں شجرکاری مہم کو مؤثر بنایا جائے، اور پودوں کی مناسب آبیاری کے ذریعے ان کی حفاظت کو یقینی بنایا جائے تاکہ آنے والی نسلوں کو بہتر ماحول فراہم کیا جا سکے۔

یہ بات انہوں نے گورنمنٹ گرلز ایلیمنٹری سکول 35/2-RA میں شجرکاری مہم کے افتتاح کے موقع پر کہی۔ اس موقع پر ڈپٹی ڈسٹرکٹ ایجوکیشن آفیسرز، سکول پرنسپل، اساتذہ اور دیگر عملہ بھی موجود تھا۔

ڈسٹرکٹ ایجوکیشن آفیسر نے بتایا کہ 15 فروری کو شجرکاری کا دن منایا جا رہا ہے، جس کے تحت سرکاری سکولوں میں طلبہ کو شجرکاری کی اہمیت سے آگاہ کرنے کے لیے خصوصی آگاہی سیشنز بھی منعقد کیے جائیں گے۔ اس مہم کے دوران نہ صرف پودے لگائے جائیں گے بلکہ طلبہ کو شجرکاری کا پیغام دوسروں تک پہنچانے کی بھی تلقین کی جائے گی۔

مہم کے دوران شرکا نے سکول میں پودے لگا کر عملی شجرکاری کا آغاز کیا۔

اوکاڑہ (نامہ نگار ملک ظفر) ممبر قومی اسمبلی چوہدری ریاض الحق جج کی زیر صدارت ڈسٹرکٹ کوآرڈینیشن کمیٹی کا اجلاس منعقد ہوا، جس میں ممبران صوبائی اسمبلی ملک علی عباس کھوکھر، نورالامین ناصر، غلام رضا بیرا، چوہدری افتخار حسین چچھر، ڈپٹی کمشنر احمد عثمان جاوید، ڈی پی او راشد ہدایت سمیت ضلعی انتظامیہ اور وفاقی و صوبائی محکموں کے افسران نے شرکت کی۔

اجلاس میں وزیراعلیٰ پنجاب کی ستھرا پنجاب مہم کے تحت صفائی ستھرائی اور سولڈ ویسٹ مینجمنٹ کے آؤٹ سورسنگ پلان پر تفصیلی بریفنگ دی گئی۔ ساہیوال واٹر اینڈ سینی ٹیشن سروسز کمپنی کے پروکیورمنٹ مینجر رضوان احمد نے بتایا کہ ضلع اوکاڑہ کی تینوں تحصیلوں میں صفائی، عارضی ڈمپنگ پوائنٹس، کچرا کلیکشن، رقوم کی ادائیگی اور ملازمین کی حاضری کے نظام پر کام تیزی سے جاری ہے اور جلد کمپنی باقاعدہ طور پر کام کا آغاز کرے گی۔

اراکین اسمبلی نے کمپنی کے ورکنگ پلان کی فیزیبلٹی کے حوالے سے اگلے اجلاس میں مکمل تیاری کی ضرورت پر زور دیا۔ ممبر قومی اسمبلی چوہدری ریاض الحق جج نے کہا کہ ستھرا پنجاب مہم ایک بے مثال منصوبہ ہے، جس کے تحت ضلع بھر کو زیرو ویسٹ بنانے کے لیے تمام ممکنہ اقدامات کیے جائیں گے۔ ڈپٹی کمشنر احمد عثمان جاوید نے اعلان کیا کہ تحصیل سطح پر عوامی نمائندوں، ضلعی انتظامیہ اور ساہیوال واٹر اینڈ سینی ٹیشن سروسز کمپنی کے افسران پر مشتمل کمیٹیاں تشکیل دی جائیں گی تاکہ صفائی ستھرائی کے مثالی اقدامات کو یقینی بنایا جا سکے۔