Category: پشاور

خیبرپختونخوا کے مختلف اضلاع میں تیز بارشوں کے باعث حادثات کے نتیجے میں اب تک 63 افراد جاں بحق جبکہ 78 افراد زخمی ہو چکے ہیں۔صوبائی ڈیزاسٹر منیجمنٹ اتھارٹی (پی ڈی ایم اے) کی جانب سے جاری جانی و مالی نقصانات کی رپورٹ کے مطابق جاں بحق افراد میں 33 بچے 15 مرد اور 15 خواتین شامل ہیں، جبکہ زخمیوں میں 37 مرد، 24 بچے اور 17 خواتین شامل ہیں۔رپورٹ میں بتایا گیا ہے کہ مختلف اضلاع میں دیواریں اور چھتیں گرنے سے مجموعی طور 3 ہزار 202 مکانات کو نقصان پہنچا جس میں 477 گھر مکمل تباہ ہوگئے جبکہ 2 ہزار 725 گھروں کو جزوی نقصان پہنچا۔پی ڈی ایم اے کی رپورٹ کے مطابق موسلا دھار بارشوں کے باعث صوبے بھر میں 27 سکولوں کو بھی نقصان پہنچا جبکہ سیلاب اور بارش سے 355 جانور بھی متاثر ہوئے۔صوبائی ڈیزاسٹر منیجمنٹ اتھارٹی نے مزید بتایا کہ حکومت کی جانب سے متاثرین کیلئے 110 ملین روپے جاری کئے گئے ہیں جبکہ قبائلی اضلاع کیلئے 90 ملین روپے جاری کئے جا چکے ہیں۔

ڈیرہ اسماعیل خان میں نامعلوم افراد کی فائرنگ کے نیتجے میں 2 کسٹم اہلکار شہید جبکہ 4 زخمی ہوگئے۔ پولیس حکام کے مطابق کسٹم اہل کاروں پر فائرنگ کا واقعہ یارک ٹول پلازہ کے قریب پیش آیا۔ ناکے پر گاڑی میں بیٹھے کسٹم اہلکاروں پر نامعلوم حملہ آوروں نے فائرنگ کی اور فرار ہوگئے جس کے نتیجے میں 2 کسٹم اہلکار موقع پر ہی شہید جبکہ 4زخمی ہوگئے۔ پولیس حکام کا کہنا ہے کہ زخمی اہلکاروں کو ڈی ایچ کیو ہسپتال منتقل کر دیا گیا ہے۔ کہ 3 روز قبل بھی درابن روڈ پر کسٹم انٹیلیجنس کی گاڑی کو نامعلوم افراد نے نشانہ بنایا تھا جس میں انسپکٹر سمیت 5 کسٹم اہلکار جاں بحق ہوئے تھے۔

وزیر اعلیٰ خیبر پختونخوا کے مشیر برائے اطلاعات بیرسٹر محمد علی سیف نے کہا ہے کہ بشریٰ بی بی نے کہا ہے کہ انہیں زہر ملا ہوا کھانا دیا جا رہا ہے۔ انہوں نے خبردار کیا کہ اگر اسے کچھ ہوا تو اس کے بعد قانونی کارروائی کی جائے گی۔پشاور میں میڈیا سے بات کرتے ہوئے بیرسٹر سیف نے بتایا کہ خیبرپختونخوا کے وزیر صحت نے پنجاب کے چیف سیکرٹری کو بھی خط لکھا ہے جس میں پنجاب کے ڈاکٹروں کو بشریٰ بی بی کے طبی معائنے کی اجازت دینے کی درخواست کی گئی ہے۔ ڈاکٹر عاصم نے بشریٰ بی بی کا معائنہ کیا اور بتایا کہ مزید ٹیسٹ کی ضرورت ہے۔ بیرسٹر سیف نے مزید کہا کہ اس پر ابھی تک عمل درآمد نہیں ہوا ہے، جج صاحب نے بھی آرڈر جاری کیا کہ ان کا معائنہ کیا جائے، عدالتی حکم کے باوجود سپرنٹنڈنٹ اڈیالہ جیل نے معائنے سے انکار کیا کہ اجازت نہیں۔انہوں نے مزید کہا کہ ہمارا پھر مطالبہ ہے کہ بشریٰ بی بی کے ٹیسٹ شوکت خانم اسپتال کی لیبارٹری میں کروائے جائیں، ہمیں تسلی ہوگی کہ بشریٰ بی بی کی صحت کو خطرہ نہیں۔بیرسٹر سیف نے کہا کہ فیض آباد دھرنا کمیشن رپورٹ پر وفاقی حکومت کو عمل درآمد کرنا چاہیے، کارروائی کے بعد پتہ لگے گا کہ کون کتنا ملوث تھا۔

سوات کے علاقوں مٹہ اور بحرین میں شدید بارشوں کے بعد منکیال سے کالام جانے والی سڑک لینڈ سلائیڈنگ کی وجہ سے بند ہو گئی۔ پاک فوج کے دستوں نے سول انتظامیہ کے ساتھ مل کر فوری طور پر ریسکیو آپریشن شروع کیا۔ چترال میں بھی مختلف مقامات پر لینڈ سلائیڈنگ کے بعد پاک فوج کا ریسکیو آپریشن جاری ہے پاک فوج نے مسافروں کے لئے خصوصی میڈیکل کیمپ لگایا جس میں مسافروں کا مفت طبی معائنہ کیا گیا اور مفت ادوایات فراہم کیں۔لینڈ سلائیڈنگ کی وجہ سے کئی سیاح پھنس گئے اور انہیں مشکلات کا سامنا کرنا پڑا۔ پاک فوج نے نہ صرف سیاحوں کو کھانے پینے کی اشیاء فراہم کیں بلکہ انہیں ریسکیو بھی کیا۔ جس پر سیاحوں نے خوشی کا اظہار کرتے ہوئے پاک فوج کا شکریہ ادا کیا۔چترال میں ریسکیو آپریشن کے بعد رابطہ سڑکوں کو بحال کر دیا گیا ہے، جبکہ ضلع خیبر کے علاقہ شلمان میں بھی لینڈ سلائیڈنگ کے بعد پاک فوج نے ایمرجنسی بنیادوں پر کام کرتے ہوئے رابطہ سڑک بحال کر دی۔آئی ایس پی آر کا کہنا ہے کہ پاک فوج مشکل کہ ہر گھڑی میں قوم کی خدمت کے لئے متحرک رہے گی۔

مشیر خزانہ خیبرپختونخوا مزمل اسلم نے پریس کانفرنس کرتے ہوئے کہا کہ اس وقت سب مایوس ہیں کہ پاکستان کا مستقبل کیا ہوگا، مزمل اسلم کا کہنا تھا کہ وفاق کی طرف سےجان بوجھ کرپیسے نہیں دیئےجارہے ہیں، اگلےسال کا بجٹ آرہا ہےبجٹ سےپہلےپیسےدیئےجائیں۔انہوں نے الزام لگاتے ہوئے کہا کہ وزیراعلیٰ پنجاب سےدرخواست کروں گا اس مسئلےکوحل کرائیں، خیبرپختونخوا کی گاڑیوں کوچیک پوسٹوں پرروک کربلاوجہ تنگ کیا جاتا ہے۔ انہوں نے کہا کہ ضمنی الیکشن میں صرف پنجاب میں دفعہ144 نافذ اور سیاسی ورکرز کی گرفتاریاں ہورہی ہیں، خیبرپختونخوا میں توکوئی پکڑدھکڑنہیں ہورہی،سب کوبرابری کےحقوق دیئےجائیں،ویزے لگانےنہ شروع کریں۔مشیر خزانہ خیبرپختونخوا نے کہا کہ دوسال سےوفاق سے آئی ایم ایف والا معاملہ نہیں نمٹ رہا، کل آئی ایم ایف نےڈومورکی بات کردی ہے، آئی ایم ایف کےڈومورکا مطلب بجلی،گیس کی قیمتیں دگنا ہوں گی۔مزمل اسلم نے کہا کہ اب ہم سبسڈیزکوکٹ لگانےجارہےہیں، آئندہ مالی سال کے بجٹ میں خیبرپختونخوا واحد صوبہ ہوگا جوسرپلس میں ہوگا۔
مشیر خزانہ خیبرپختونخوا کا مزید کہنا تھا کہ وفاقی حکومت اپنےدوستوں کی آئی پی پیزکواربوں روپےجاری کردیتی ہے، ہم امید کرتےہیں وفاقی حکومت خیبرپختونخوا حکومت سےتعاون کرےگی، ہم پختونخوا میں ہرخاندان کوہیلتھ کارڈ کی سہولت دے رہے ہیں۔مشیر خزانہ خیبرپختونخوا نے کہا کہ این ایف سی ایوارڈ کےتحت آبادی کےحساب سےپیسےنہیں دیئےجارہے، خیبرپختونخوا صوبہ آدھی سےزیادہ گیس باقی صوبوں کودے رہا ہے، اس حوالےسےلوگوں کی شکایات آرہی ہے، خیبرپختونخوا کےلوگوں کوحقیرنظروں سےنہ دیکھا جائے۔مزمل اسلم کا کہنا تھا کہ ہمیں صوبائی حکومت میں آئے 45 دن ہوئے ہیں ، ان دنوں میں ہم نے ڈونرکانفرنس کا انعقاد کیا، کانفرنس میں 1.8 ارب ڈالرز دینے کے وعدے کئے گئے، ایک ارب ڈالر ایشین بینک نے دینے کا وعدہ کیا، یہ پیسے قبائلی اضلاع اور چترال پر خرچ ہوں گے،انہوں نے کہا کہ خیبر پختونخوا نے ڈونر کانفرنس کا انعقاد کیا یو ایس ایڈ، یو ایم ڈی پی اورجی آئی زیڈ اس کانفرنس کے ڈونرز تھے، پشاور کی سرزمین پر بیرونی ممالک سے لوگ آئے، بڑے ایونٹ کو اس لئے خراب کیا گیا کہ پی ٹی آئی کی تعریف نہ ہوجائے۔