Category: پشاور

شمالی وزیرستان کے علاقے شیوا میں قدرتی گیس کے ذخائر دریافت ہوئے ہیں۔ شمالی وزیرستان کے علاقے شیوا 1 اور شیوا 2 سے قدرتی گیس دریافت ہوئی ہے، ابتدائی طور پر 7 کروڑ مکعب فٹ یومیہ گیس سسٹم میں شامل ہوگی۔گیس کے نیشنل سسٹم میں شامل ہونے سے ملک میں انرجی کی کمی کو 5 فیصد تک پورا کیا جاسکے گا۔شیوا ذخائر سے حاصل ہونے والی گیس کو صاف کرکے ایس این جی پی ایل کو منتقل کرنے کے لیے پروسیسنگ پلانٹ بھی لگایا گیا ہے۔شمالی وزیرستان کا علاقہ شیوا میں ماڑی پیٹرولیم کمپنی نے 2 کنوؤں کی کھدائی کے بعد قدرتی گیس دریافت کی ہے ، یہ پاکستان کی کل ضروت کا 5فیصد ہے۔یہاں سے گیس پروسیس کر کے ایس این جی پی ایل کی پائپ لائن کو منتقل کی جاتی ہے۔

پشاور میں رمضان المبارک کا چاند دیکھنے کیلئے اجلاس کل ہوگا،غیر سرکاری مقامی رویت ہلال نے اجلاس طلب کر لیا۔ تفصیلات کے مطابق اجلاس نماز مغرب کے بعد جامع مسجد قاسم علی خان میں منعقد ہوگا،اجلاس کی صدارت مفتی شہاب الدین پوپلزئی کرینگے،اجلاس کیلئے تمام علاقائی علما کرام کو دعوت دے دی گئی ہے،صوبے بھر سے شہادتیں جمع ہونے تک اجلاس جاری رہے گا۔

لکی مروت: وانڈہ میر عالم چشمہ روڈ کے قریب چڑھائی سے اترتے ہوئے ٹریکٹر بریک فیل ہونے کے باعث حادثے کا شکار ہو گیا۔ لکی مروت حادثے میں 4 افراد جاں بحق جبکہ 20 سے زائد افراد زخمی ہو گئے۔ زخمیوں میں عورتیں اور بچے بھی شامل ہیں۔ ریسکیو آپریشن میں ریسکیو 1122 لکی مروت اور ریسکیو 1122 عیسیٰ خیل (پنجاب) کی ٹیموں نے حصہ لیا۔ ریسکیو 1122 لکی میڈیکل ٹیموں نے زخمیوں اور جسد خاکی کو تحصیل ہیڈکوارٹر ہسپتال عیسی خیل منتقل کردیا۔

مسلم لیگ ن خیبر پختونخوا اختیارولی خان نے وزیراعلیٰ کے پی علی امین گنڈاپور کی تقریر پر ردعمل ‏میں کہا کہ سائفر کا گم ہونا اور پھر میڈیا میں چھپنا ہی آپ کے لیڈر کی سازش تھی۔ اختیارولی خان ‏نے کہا کہ آپ کی گاڑی کی ڈگی سے باقاعدہ بلینک بیلٹ پیپرز بھی برآمد ہوئے، ویڈیو بڑی وائرل ہے، اگر حلقے کھل گئے تو نہ آپ وزیراعلیٰ رہیں گے نہ آپکی کابینہ، کیونکہ آپ کا مینڈیٹ جعلی ہے، اگر تحقیقات ہوئی تو قومی اسمبلی میں آپ 92 سے 29 پر آجائیں گے۔ترجمان مسلم لیگ ن خیبر پختونخوا اختیارولی ‏خان نے کہا کہ پختونخوا کو ایک ہزار ارب روپے مقروض کرنے کا جُرم آپ نے تسلیم کیا آپ کا شکریہ، ‏ ہمارا مؤقف ہے دھاندلی خیبرپختونخوا میں ہوئی ہے جہاں آپ جیتے ہیں۔انہوں نے مزید کہا کہ ‏یہ پاکستان ہے کوئی نیلام گھر نہیں، اپنے لیڈر کو رہا کرانے کیلئے عدالتوں سے رجوع کریں، ‏گنڈاپور صاحب آپ کے پاس تنخواہوں کے پیسے نہیں آپ صحت کارڈ کا ڈرامہ کیسے چلائیں گے؟اختیارولی نے کہا کہ ‏بدقسمتی سے آپ وزیراعلیٰ بن چکے اب سلطان راہی کے ڈائیلاگ چھوڑیں قوم کی خدمت کریں۔

وزیراعلیٰ خیبرپختونخوا علی امین گنڈا پور نے کہا کہ ہ افسوس شہبازشریف نے منی لانڈرنگ کی وہ آج ملک کا وزیراعظم ہے، بانی پی ٹی آئی کا فیئر ٹرائل اور جلد رہا کیا جائے، سائفر بانی پی ٹی آئی حکومت کے خلاف سازش تھی، سائفر سازش کے پیچھے آلہ کار ایک دن سامنے آئیں گے۔ علی امین گنڈا پور نے مطالبہ کیا کہ سائفر کی تحقیقات کے لئے جوڈیشل کمیشن بنایا جائے۔ وزیراعلیٰ خیبرپختونخوا علی امین گنڈا پور نے کارکنوں سے خطاب کرتے ہوئے کہا کہ حق کا ساتھ دینے والے کارکنوں کو سلام پیش کرتا ہوں، بانی پی ٹی آئی کے خلاف غیرقانونی مقدمات بنائے گئے، آصف علی زرداری نے توشہ خانہ سے غیرقانونی طریقے سے گاڑیاں لیں، افسوس آصف علی زرداری ملک کا صدر بن گیا۔
وزیراعلیٰ خیبرپختونخوا نے مزید کہا کہ چیف جسٹس آف پاکستان سائفرکیس پرجوڈیشل کمیشن بنائیں، مینڈیٹ چوری کے خلاف ایک کمیشن بنایا جائے، ہمارا مطالبہ ہے تحریک انصاف کا مینڈیٹ واپس دیا جائے، چیف الیکشن کمشنر کو آئین توڑنے والے نظر نہیں آرہے؟انہوں نے کہا کہ افسوس ڈھٹائی کے ساتھ ہماری مخصوص نشستیں دوسری جماعتوں کو دی گئیں، ہمیں مجبور نہ کیا جائے، اپنا حق ملنے، بانی پی ٹی آئی کی رہائی تک ہم پیچھے نہیں ہٹیں گے، ہم ایک ٹیم بن کر کرپشن، ظلم اور ناانصافی کے خلاف جہاد کریں گے۔علی امین گنڈا پور نے مزید کہا کہ ہم خیبرپختونخوا کوایک مثالی صوبہ بنائیں گے، خیبرپختونخوا میں امن لائیں گے، اسی جنون کے ساتھ ہم اپنا حق بھی لیں گے، وزیراعلیٰ نے ’’ساڈا حق ایتھے رکھ‘‘ کے نعرے بازی بھی کی۔

خیبر پختونخوا کا وزیر اعلی علی امین گنڈا پور اور سابقہ وزیر خزانہ تیمور جھگڑا آمنے سامنے، حکومت ابتداء ہی میں اختلافات کا شکار ہوگئی۔

تیمور جھگڑا کا کہنا ہے کہ کابینہ علی امین گنڈاپور کی مرضی سے بنائی، بانی پی ٹی آئی نے مجھے مشیر خزانہ کی ذمہ داری دینے کا کہا تھا۔ ہ بانی پی ٹی آئی نے عمر ایوب کی موجودگی میں مجھے خزانہ کی وزارت دینے کا کہا تھا۔ بیرسٹر سیف نے میرے کابینہ میں شامل ہونے سے متعلق اعلان بھی کیا تھا۔

تیمور جھگڑا کا کہنا تھا کہ عمران خان نے میرا نام خیبر پختونخواہ وزیرخزانہ کے لئے فائنل کیا تھا مگر 20 کروڑ دینے سے انکار کرنے پر علی آمین گنڈا پور نے میرا نام فائنل لسٹ سے نکال دیا ،وزارت دینے کے بدلے مجھ سے 20 کروڑ روپے کا مطالبہ کیا گیا 24 گھنٹے کا وقت دیا تھا۔ صاف صاف کہا گیا پارٹی فنڈ میں 20کروڑ جمع کرو۔ یا ڈی لسٹ ہونے کے لئے تیار ہو جاو ،میں نے انکار کیا تو میرا نام لسٹ سے باہر کردیا۔ سمجھ سے بالاتر ہے اتنی تکالیف برداشت کرنے کے باوجود بھی مجھ سے پیسے مانگے گئے۔اب تو زبان زد عام ہے کہ خیبر پختونخواہ میں 10کروڑ کے کر وزارت حاصل کرو۔ پارٹی فنڈ اور عمران خان کے قانونی معاملات کے نام پر تمام وزرا سے چندا لیا گیا۔ جس نے چندہ نہیں دیا اسکا نام فائینل نہیں ہوا ،کچھ دوستوں نے بتایا 10 کروڑ کے بدلے وزارت کی مدت ایک سال جبکہ 15 کروڑ کے بدلے 2 سال ہوگی۔ ہر دوسال بعد پارٹی فنڈ میں چندہ دے کر ری نیول کروانا ہوگا افسوس ہوا خیبر پختونخواہ میں حکومت بھتہ خوروں کے ہاتھوں میں دیا گیا۔ یہ حکومت چھ مہینوں کی مہمان ہے۔ زیادہ نہیں چلے گی۔

دوسری جانب مشیر اطلاعات بیرسٹر محمد علی سیف نے نجی ٹی وی سے گفتگو کرتے ہوئے کہا کہ بانی پی ٹی آئی نے مشیر خزانہ کیلئے تیمور جھگڑا کو حتمی طور پر نامزد نہیں کیا تھا۔ تیمور جھگڑا کا نام بانی پی ٹی آئی اور دیگر رہنماؤں کی جانب سے زیرغور لایا گیا تھا۔ واضح رہے کہ علی امین گنڈا پور نے تیمور جھگڑا پر الزام لگایا تھا کہ اسکی نااہلی کی وجہ سے صوبہ قر ضوں تلے دب گیا ہے،