Category: پشاور

پی ٹی آئی رہنما اور سابق صوبائی وزیر تیمور سلیم جھگڑا نے پریس کانفرنس میں الیکشن کمیشن آف پاکستان جانے کا ارادہ ظاہر کر دیا ہے ، تیمور جھگرا نے کہا ہے کہ میرے مقابلے میں پانچویں نمبر کے امیدوار کو پہلے نمبر پر لاکر جتوایا گیا، کامران بنگش کی نشست پر ساتویں نمبر کے امیدوار کو جتوایا گیا۔ سابق صوبائی وزیر نے مزید کہا کہ آر اوز 8 فروری سے غائب ہیں، فارم 45 اور 47 کسی کے سامنے نہیں بنایا گیا، ڈی سی پشاور، سی سی پی اور ایس ایس پی پولنگ روم میں رہے، ان کو جواب دینا ہوگا یہ پبلک سرونٹ ہیں، آر اوز کے پاس ہم نے کیس کئے ہیں۔تیمور سلیم جھگڑا نے کہا کہ ساجد نواز کے مقابلے میں نور عالم کو جتوایا گیا، پشاور کا ٹرن آؤٹ سب سے کم لیکن نور عالم کے حلقے میں ٹرن آؤٹ 62 فیصد تھا، چیف سیکرٹری، آئی جی کو کہہ رہا ہوں یہ دھاندلی چھپائی نہیں جاسکتی۔ تیمور سلیم جھگڑا نے کہا کہ کسی نے عیدگاہ میں دیکھا کہ کیا ایک امیدوار بھی اندر تھا، سی سی پی او، ایس ایس پی اور ڈی سی کو وضاحت دینی پڑے گی۔پی ٹی آئی کے رہنما اور سابق صوبائی وزیر تیمور سلیم جھگڑا نے کہا کہ اب کسی بھی صورت میں دھاندلی چھپائی نہیں جا سکتی۔

ترجمان مسلم لیگ ن نے پی ٹی آئی رہنما عمر ایوب کی پریس کانفرنس پر ردعمل دیتے ہوئے کہا کہ تحریک انصاف والے شیخ چلی اور الف لیلوی داستانوں سے باہر نکل نہیں پارہے ہیں، پی ٹی آئی خیبر پختونخوا کے الیکشن کو فراڈ کیوں تسلیم نہیں کرتی؟ جس کو تمام جماعتیں فراڈقرار دے چکے ہیں۔ ترجمان مسلم لیگ ن اختیار ولی خان نے کہا کہ پی ٹی آئی کے پاس اگر 180 سیٹ ہے تو مرکز میں حکومت بنانے سے کون روک رہا ہے؟ اختیارولی کا مزید کہنا تھا کہ پی ٹی آئی نے اپنے حکومت میں اگر کوئی کارنامہ کیا ہو تو ہمت کرکے اس کارنامے کا نام لیکر بتائیں، پی ٹی آئی کی چار سالہ حکومتی تاریخ ناکامیوں، بربادیوں، بے حیائی اور عیاشیوں سے بھری پڑی ہے۔انہوں نے کہا کہ خیبر پختونخوا کے الیکشن میں پی ٹی آئی نے ڈکیتیاں ڈالی ہیں، پی ٹی آئی ہر الیکشن ہارنے کے بعد پنکچروں کا بیانیہ لیکر میڈیا پر محلے کی ماصیوں کی طرح رونا دھونا شروع کردیتے ہیں۔تحریک انصاف پر انٹرا پارٹی انتخابات میں فراڈ کا الزام ہے، ان کو کسی پر فراڈ کا الزام زیب نہیں دیتا، کمشنر راولپنڈی کی فلاپ فلم دو گھنٹے میں پردے سے اتر گئی، کمشنر راولپنڈی کے پیچھے 190 ملین پاونڈ کا زور تھا، ملک ریاض کا وار خطا گیا۔

الیکشن کمیشن آف پاکستان نے خیبرپختونخوا سے قومی اسمبلی کی 45 نشستوں پر کامیاب امیدواروں کے نوٹیفکیشن جاری کردیے ہیں جبکہ نامزد وزیراعلیٰ خیبرپختونخوا علی امین گنڈا پور کا نوٹیفکیشن روک دیا گیا ہے۔ تاہم، ان میں علی امین گنڈاپور کا نام کہیں شامل نہیں کیا گیا۔ الیکشن کمیشن نے پی کے113 پر علی امین گنڈا پور کی کامیابی کا نتیجہ روک دیا ہے، جبکہ ڈیرہ اسماعیل خان سے کامیاب باقی چار امیدواروں کے نتائج جاری کردیے گئے ہیں۔
الیکشن کمیشن کی جانب سے خیبرپختونخوا میں قومی اسمبلی کی 45 نشستوں پر کامیاب امیدواروں کے نوٹیفکیشن جاری کیے گئے۔خیبرپختونخوا سے قومی اسمبلی کی 42 نشستوں پر آزاد امیدواروں کو کامیاب قرار دیتے ہوئے نوٹیفکیشن جاری کیا گیا۔نوٹیفکیشن کے مطابق خیبرپختونخوا سے آزاد امیدواروں میں این اے 4 اپر دیر سے صبغت اللہ اور این اے 10 بونیر سے گوہر علی خان کامیاب ہوئے جبکہ این اے 18 ہری پور سے عمر ایوب کامیاب ہوئے۔یاد رہے کہ پاکستان تحریک انصاف کی جانب سے عمر ایوب کو وزیر اعظم کا امیدوار نامزد کیا گیا ہے۔نوٹیفکیشن کے مطابق این اے 19 صوابی سے اسد قیصر، این اے 30 پشاور سے شاندانہ گلزار ، این اے 35 کوہاٹ سے شہریار آفریدی اور این اے 41 لکی مروت سے شیر افضل مروت کامیاب ہوئے۔

پی ٹی آئی کے نامزد وزیرِ اعلیٰ خیبر پختون خوا علی امین گنڈا پور نے پشاور میں صحافیوں سے ملاقات کے موقع پر گفتگو کرتے ہوئے کہا ہم خیرات نہیں مانگ رہے لیکن حقوق ضرور لیں گے، خاموش رہنے کی وجہ سے صوبے کا یہ حال ہوا ہے، تمام پارٹیوں کو آن بورڈ کروں گا، 9 مئی ہم نے نہیں کیا اس پر انکوائری ہونی چاہیے۔ پی ٹی آئی رہنما کا کہنا ہے کہ ہم نے ان باتوں کو چھوڑ کر اب آگے بڑھنا ہے، اداروں کی اصلاح کرنی ہے، ایسا قوانین لائیں گے کہ کوئی غیر قانونی کام نہ کر سکے۔انہوں نے کہا کہ پی ایم پورٹل سیل کی طرح صوبائی کمپلینٹ سیل بنا رہے ہیں، صوبے کے حقوق کے لیے ضرور بات کریں، سب کو میرا ساتھ دینا ہو گا۔ انہوں نے کہا کہ کچھ پی ٹی آئی کے سپورٹر گئے تو انہیں کیوں نہیں روکا گیا، رانا ثناء اللّٰہ کے گھر تو نہیں جانے دیا تھا، جس نے پریس کانفرنس نہیں کی اسے پکڑا جا رہا ہے، میرے خلاف لاہور، میانوالی سمیت 9 اضلاع میں ایف آئی آرز ہیں۔علی امین گنڈا پور نے مزید کہا کہ ہم کوئی انتقامی کارروائی نہیں کریں گے، بانیٔ پی ٹی آئی نے کہا ہے کہ فوج اور پولیس سمیت تمام ادارے ہمارے ہیں، عدالت میں درخواست دے رہے ہیں کہ ہم اپنی پارٹی میں ہی چلے جائیں۔ان کا یہ بھی کہنا ہے کہ صوبے کی سطح پر ہماری لیگل ٹیم بنی ہوئی ہے، کابینہ بنانے پر کام شروع کر دیا ہے، حتمی فیصلہ بانی پی ٹی آئی کریں گے، مختلف پارٹیوں سے سیاسی الحاق کی بات چل رہی ہے۔

قومی وطن پارٹی کے سربراہ آفتاب احمد خان شیر پاؤ نے کہا ہے کہ مبینہ دھاندلی کے خلاف پی ٹی آئی کے احتجاج کا فی الحال حصہ نہیں بن رہے۔آفتاب شیرپاؤ نے یہ بھی کہا ہے کہ پارٹی رہنماؤں سے مشاورت کے بعد پارٹی کی سطح پر احتجاج کریں گے۔واضح رہے کہ پی ٹی آئی وفد نے آفتاب شیر پاؤ کو احتجاجی تحریک میں شامل ہونے کی دعوت دی تھی۔دوسری جانب مبینہ انتخابی دھاندلی پر بلوچستان میں 4 جماعتی اتحاد کی پہیہ جام ہڑتال جاری ہے۔چار جماعتی اتحاد میں بلوچستان نیشنل پارٹی، پشتون خوا میپ، نیشنل پارٹی اور ہزارہ ڈیموکریٹک پارٹی شامل ہیں۔

پشاور کے علاقہ تھانہ داودزئی کی حدود وزیر قلعہ میں جائیداد کے تنازعہ پر فائرنگ کے تبادلے میں 4افراد جاں بحق ہو گئے ۔ پولیس کے مطابق فریق اول حیدر حاجی اور فریق دوم جمیل وغیرہ نے جائیداد کے تنازعے پر ایک دوسرے پر اندھا دھند فائرنگ کی ، فائرنگ کی زد میں آکر نواز خان ولد سکندر خان، حیدر ، صالح ، واحد پسران حیدر حاجی اور آزاد ولد اکبر خان لگ کر موقع پر جاں بحق ہو گئے ہیں ۔اطلاع ملتے ہی مقامی پولیس اور تفتیشی افسران نے فوری فوری موقع پر پہنچ کر نعشوں کو پوسٹ مارٹم کیلئے ہسپتال منتقل کردیا ۔پولیس نے جائے وقوعہ سے شواہد اکٹھا کرکے ملوث ملزمان کی گرفتاری کیلئے ان کے ممکنہ ٹھکانوں پر چھاپہ زنی کا سلسلہ شروع کردیا ہے ۔