Category: پشاور

خیبرپختونخوا کے سکولوں میں موبائل فون کے استعمال پر پابندی لگانے کا فیصلہ کر لیا گیا۔محکمہ تعلیم پشاور نے کہا کہ سکول کے اوقات میں موبائل فون کے استعمال پر پابندی عائد کی جائے، محکمہ تعلیم ڈائریکٹوریٹ نے تمام اضلاع کے ایجوکیشن افسران کو پابندی سے متعلق مراسلہ ارسال کردیا۔جاری کردہ مراسلہ میں کہا گیا سکول اوقات میں موبائل فون کا استعمال طلبہ کی پڑھائی پر منفی اثرات مرتب کرتا ہے، کلاس روم میں موبائل فون کے استعمال پر پابندی لگائی جائے، ادارے کے سربراہان تمام عملے سے صبح موبائل فون وصول کریں گے۔مراسلہ میں کہا گیا ایمرجنسی کی صورت میں عملہ پی ٹی سی ایل لینڈ لائن یا سکول ہیڈ سیل فون سے رابطہ کریں، عملہ صرف فارغ اوقات میں اپنے موبائل فون کا استعمال کر سکتا ہے، تصاویر یا ویڈیو بنانے کے لئے ادارے کے سربراہان سے اجازت لینا لازمی ہے۔

خیبرپختونخوا اسمبلی کا اجلاس 28 فروری صبح 11 بجے طلب کیا جاچکا ہے، اسمبلی اجلاس کے لئے تیاریاں مکمل کرلی گئی ہیں۔ پی ٹی آئی کے علی امین گنڈا پور نامزد وزیر اعلیٰ ہیں، جب کہ اپوزیشن لیڈر کےلئے ن لیگ اور جے یوآئی میں رسہ کشی جاری ہے، دونوں جماعتوں کے درمیان ڈیڈ لاک برقرار ہے۔صوبائی اسمبلی اجلاس کی تیاریاں مکمل کرتے ہوئے سیشن میں شرکت کے لئے کارڈز جاری کئے گئے ہیں۔نگراں وزیراعلیٰ اور اسپیکر کی ہدایت پر ہر ممبر کو 2، 2 مہمان لانے کی اجازت ہوگی۔خیبر پختونخوا اسمبلی کی 115 نشستوں میں سے 113 پر انتخابات ہوچکے ہیں۔دو نشستوں پر انتخابات ملتوی ہوچکے تھے۔ 113 میں سے 4 اراکین کے ابھی تک الیکشن کمیشن نے نوٹیفکیشن جاری نہیں کیے۔109 اراکین میں سے اب تک 80 اسمبلی میں رجسٹریشن کرا چکے ہیں۔ جب کہ منگل کو رجسٹریشن کا آخری دن ہے۔ مخصوص نشستوں پر منتخب 5 خواتین بھی حلف لیں گی۔
پی ٹی آئی کے علی امین گنڈا پور نامزد وزیر اعلیٰ خیبرپختونخوا ہیں، جب کہ اپوزیشن لیڈر کےلئے ن لیگ اور جے یو آئی میں رسہ کشی جاری ہے۔کےپی میں اپوزیشن لیڈر کے لئے دونوں جماعتوں کے درمیان ڈیڈ لاک برقرار ہے۔صوبائی اسمبلی میں ن لیگ اور جے یو آئی کی 9 ، 9 نشستیں ہیں۔دونوں جماعتوں نے پی پی، اے این پی اور پی ٹی آئی پی کی حمایت کے لئے رابطے تیز کردیے ہیں۔ن لیگ کا دعویٰ ہے کہ اپوزیش لیڈر ڈاکٹر عباد ہی ہوں گے۔

سابق ڈپٹی اسپیکر خیبرپختونخوا اسمبلی محمود جان نے دعویٰ کیا ہے کہ تین راتوں میں میرے گھر پر 300 راکٹ لانچر حملے ہوئے ہیں، شرپسندوں نے میرے خاندان کو نشانہ بنایا ہے۔محمود جان نے پشاور میں پریس کانفرنس کرتے ہوئے کہا کہ سپریم کورٹ نے ہماری جائیداد کا ہمارے حق میں فیصلہ کیا ہے۔انہوں نے آئی جی اور چیف جسٹس پشاور ہائیکورٹ سے مدد کی اپیل بھی کی۔محمود جان کا کہنا تھا کہ بحریہ کو ہمارے خاندان کے کچھ لوگوں نے زمینیں فروخت نہیں کیں، اس علاقے میں کھلے عام راکٹ لانچرز کا استعمال ہو رہا ہے، یہ لوگ کیسے اُٹھے اور ان کو کون سپورٹ کر رہا ہے کچھ نہیں پتا، ان شرپسندوں نے ہم پر حملہ کر کے کسانوں کو زخمی کر دیا۔محمود جان نے سوال اٹھایا کہ مخالف گروہ کے پاس راکٹ لانچرز اور کارتوس کہاں سے آئے؟سابق ڈپٹی اسپیکر محمود جان نے کہا کہ ہمارے خاندان کو مذاکرات منظور ہیں، آئی جی اور چیف جسٹس پشاور ہائیکورٹ سے اپیل کرتا ہوں کے ہماری مدد کی جائے۔واضح رہے کہ مضافاتی علاقے ریگی سفید سنگ میں سابق ڈپٹی اسپیکر کے پی اسمبلی محمود جان اورعیسیٰ خیل قوم کے درمیان جائیداد کا تنازع کچھ عرصے چلا آرہا ہے۔اسی معاملے میں محمود جان پر ایک قتل کا مقدمہ بھی درج ہوچکا ہے۔

انجینئرامیرمقام نےکہاہےکہ ن لیگ خیبرپختونخواکی عوام کےحقوق کی آوازبلندکریگی۔خیبرپختونخواکےصوبائی صدرانجینئرامیرمقام کی زیرصدارت ن لیگ کی پارلیمانی پارٹی کااجلاس ہوا،جس میں تمام نومنتخب9ارکان نےشرکت کی ۔ انجینئرامیرمقام نے کامیابی پراپنےاور پارٹی لیڈر شپ کی طرف سے مبارکباد دی اس موقع پرممبران اسمبلی نےکہاکہ ن لیگ دوسری اپوزیشن جماعتوں کےساتھ مل کرخیبرپختونخوااسمبلی میں بھر پوراپوزیشن کاکرداراداکریگی،اورکےپی کے کی عوام کے مسائل کو اجاگرکریگی۔
انجینئرامیرمقام نے انہیں یقین دلایاکہ مرکز میں ن لیگ کے ارکان صوبے کی بھرپور نمائندگی کرینگے اور صوبے کے حقوق کےلئے آوازبلند کرینگے۔

نامزد وزیراعلیٰ خیبرپختونخوا علی امین گنڈا پور نے کہا ہے کہ گڈ گورننس کے ذریعے خود کو ثابت کریں گے۔ نامزد وزیراعلیٰ خیبرپختونخوا علی امین گنڈا پور نے مقامی ٹی وی سے خصوصی گفتگو کرتے ہوئے کہا کہ ممبران اسمبلی کے حلف لینے کے بعد بانی پی ٹی آئی سے وزراء کے ناموں کی حتمی منظوری لی جائے گی۔علی امین گنڈاپورکا کہنا تھا کہ بانی پی ٹی آئی نے پہلے بھی اپنی مرضی سے ایسی ٹیم کا انتخاب کیا تھا جو ورلڈکپ جیت چکی تھی اس بار بھی کارکردگی کی بنیاد پر بانی پی ٹی آئی ارکان کو ذمہ داریاں دیں گے۔
انہوں نے کہا کہ حالیہ الیکشن جیتنے والے پی ٹی آئی کے 55 فیصد نئے ممبران اسمبلی میں پہنچے ہیں اور ان انتخابات نے پارٹی کے ساتھ مخلص رہنے والوں اور مفاد پرستوں کی شناخت کرائی۔نامزد وزیر اعلیٰ خیبر پختونخوا نے کہا کہ باتوں پر نہیں عملی کام پر یقین رکھتے ہیں، گڈ گورننس سے خود کو ثابت کریں گےاوراپنے ویژن کے مطابق عوامی بجٹ دیں گے۔انہوں نے مزید کہا کہ میرا مشن عوام کو زیادہ سے زیادہ ریلیف دینے کی کوشش ہے، صوبے میں امن و امان کے قیام، صحت کارڈ کی بحالی اور تعلیمی نظام کی بہتری پر توجہ دیں گے، ہم اپنے پلان کو کو عملی طور پر لاگو کرکے دوربارہ میدان میں اتریں گے۔

خیبر پختون خوا کے ضلع ڈیرہ اسماعیل خان میں پولیس اسٹیشن پر حملے میں ملوث 2 دہشتگرد گرفتار کر لیے گئے۔سی ٹی ڈی کے ذرائع کے مطابق ڈی آئی خان کے واقعے میں ملوث دہشت گردوں کے مکمل نیٹ ورک کی نشاندہی کر لی گئی ہے۔سی ٹی ڈی حکام نے بتایا ہے کہ ڈی آئی خان واقعے میں ملوث باقی 13 دہشت گردوں کی تلاش جاری ہے۔حملے کی منصوبہ بندی کہاں پر ہوئی، سی ٹی ڈی حکام معاملے کی تہہ تک پہنچ گئے، گرفتار دہشت گردوں کا تعلق کالعدم تنظیم سے ہے۔
سی ٹی ڈی حکام کا کہنا ہے کہ ملوث دہشت گردوں کی گرفتاری کے لیے حکمتِ عملی تیار کر لی ہے۔واضح رہے کہ ڈی آئی خان کے چوہدوان پولیس اسٹیشن پر حملے میں 10 پولیس اہلکار شہید ہوئے تھے۔