Category: پشاور

خیبر پختونخوا میں دوایوں کی شدت قلت سامنے آگئی جس کی وجہ سے عوام مشکلات کا شکار ہے اس حوالے سے ڈی جی ہیلتھ نے سیکریٹری ہیلتھ کو اسپتالوں کے مالی مشکلات سے آگاہ کر دیا ہے، ڈی جی ہیلتھ کی جانب سے بھیجے گئے دستاویز کے مطابق اسپتالوں میں امیونوگلوبولینز، اینٹی ریبیز ویکسین اور ایمرجنسی ادویات کی کمی ہے، فنڈز نہ ہونے کے باعث ادویات کی خریداری کے لیے تاحال کوئی آرڈر نہیں دیا گیا۔ لہذا ادویات کی قلت دور کرنے کے لیے 9 ارب روپے فوری درکار ہیں، ادویات کی خریداری کی مد میں 2.67 ارب روپے کے بقایاجات ہیں، بقایات اور اضافی 6 ارب روپے جاری کیے جانے کی درخواست کی گئی ہے۔دستاویز میں کہا گیا ہے کہ محکمۂ خزانہ نے 2022-23 میں 99 کروڑ 77 لاکھ روپے کا بجٹ دیا، 99 کروڑ 77 لاکھ روپے کے بجٹ سے ادویات کی قلت ختم نہیں ہو سکتی۔سیکریٹری ہیلتھ خیبر پختون خوا محمود اسلم نے مقامی ٹی وی سے بات چیت کرتے ہوئے بتایا کہ صوبہ مالی مشکلات کا شکار ہے، فنڈز کی کمی کا سامنا ہے۔ محمود اسلم کا یہ بھی کہنا ہے کہ ادویات اور طبی آلات کے لیے خیبر پختون خوا حکومت سے پیسے مانگے ہیں، حکومت نے کہا ہے کہ وفاق سے فنڈز ملتے ہی رقم جاری کر دیں گے۔

نوشہرہ میں جلسے سے خطاب میں چیئرمین پی ٹی آئی پی نے کہا کہ پاکستان کا مستقبل بانی پی ٹی آئی کے بغیر روشن ہے، ن لیگ،پی پی پی نے باریاں بانٹ کر ملکی معیشت کوکمزور کیا۔ پرویز خٹک نے مزید کہا کہ بانی پی ٹی آئی جس حال میں ہیں اس کے ذمے دار وہ خود ہیں، آٹھ فروری کو ہونے والے انتخابات میں مخالفین کو اپنی حیثیت کا اندازہ ہوجائے گا۔ انہوں نے کہا کہ کرپٹ حکمرانوں کی وجہ سے پاکستان کو نقصان اٹھانا پڑا ہے، بانی پی ٹی آئی نے ہمیشہ جھوٹ پر جھوٹ بولا۔ چیئرمین پاکستان تحریک انصاف پارلیمنٹرین (پی ٹی آئی پی) اور سابق وفاقی وزیر دفاع پرویز خٹک نے کہا ہے کہ کرپٹ حکمرانوں نے پاکستان کو ناقابل تلافی نقصان پہنچایا۔

مولانا فضل الرحمان نے کہا کہ نوازشریف اور ان کے خاندان کے ساتھ بھی مظالم کیے گئے، پی ٹی آئی نے لفاظی کے سوا کوئی کام نہیں کیا۔ نجی ٹی وی سے گفتگو کرتے ہوئے مولانا فضل الرحمن نے کہ مغرب میں یہودی لابی اب بھی بانی پی ٹی آئی کو سپورٹ کر رہی ہے، پی ٹی آئی کو سرے سے پاکستان میں ہونا ہی نہیں چاہیے تھا، مغرب کی نوکری کرو لیکن پاکستان کے مفادات تو نہ بیچو۔جھوٹ بولتے ہیں کہ یہ پاکستان کے لیےکھڑا ہے،یہ پاکستان کے خلاف کھڑا ہے۔مولانا فضل الرحمان نے یہ بھی کہا کہ بانی تحریک انصاف کہتا تھا ووٹ بعد میں ہے قانون کی اہمیت پہلے ہے۔ اور اب ووٹ کی اہمیت پہلے اور قانون کی اہمیت بعد میں کیسے ہوگئی۔ انہوں نے کہا کہ ایران پاکستان پڑوسی ہیں،اب بھی وقت ہےہم کوئی منفی اقدامات نہ کریں۔

پاکستان مسلم لیگ ن کے ناراض رہنما سابق وزیر اعلی مہتاب احمد خان نے این اے 17 میں اپنے 35 سال کے حریف سابق وفاقی وزیر امان اللہ خان جدون کے بیٹے پاکستان تحریک انصاف کے حمایت یافتہ امیدوار علی خان جدون کی حمایت کا اعلان کر دیا۔ ایبٹ آباد کے حلقہ این اے 17 کی سیاست میں بڑا اپ سیٹ ہوگیا، مسلم لیگ (ن) کے ناراض رہنما سابق وزیراعلی سردار مہتاب احمد خان نے پاکستان تحریک انصاف کے حمایت یافتہ امیدوار علی خان جدون کی حمایت کردی۔سردار مہتاب احمد خان این اے 16 ایبٹ آباد 1 سے آزاد حیثیت سے الیکشن لڑ رہے ہیں جبکہ ایبٹ آباد کے صوبائی حلقوں سے بھی مسلم لیگ ن کے امیدواروں کے خلاف آزاد حیثیت سے بھی اپنے امیدوار کھڑے کیے ہوئے ہیں۔سردار مہتاب احمد خان حلقہ این اے 16 سے سابق ڈپٹی سپیکر مرتضی جاوید عباسی جو پاکستان مسلم لیگ ن کے صوبائی جنرل سیکرٹری ہیں کا مقابلہ کر رہے ہیں۔سردار مہتاب احمد خان کی وجہ سے مسلم لیگ نون کے امیدواروں کو کافی نقصان ہوگا۔