Category: پشاور

سی سی پی او پشاور سید اشفاق انور کی خصوصی ہدایت پر ایس ایس پی آپریشنز ہارون الرشید خان کی نگرانی میں ضلع بھر میں پشاور پولیس کی گزشتہ ماہ جون کے دوران اشتہاری مجرمان کے خلاف کریک ڈاون کر دیا ہے، خصوصی کریک ڈاون کے دوران قتل، اقدام قتل، اغوا کے واقعات، راہزنی سمیت سنگین جرائم میں ملوث 623 اشتہاری مجرمان گرفتار کر لیا گیا ہے۔اشتہاریوں کے خلاف مہم کا کامیاب بنانے کی خاطر کاروائیوں کو مزید تیز کرنے کی ہدایت جاری کر دی ہے، اس ضمن میں اشتہاریوں کے بینک اکاونٹس منجمد کرنے، شناختی کارڈز اور پاسپورٹ بلاک کرنے کے عمل کو بھی مزید تیز کرنے کی ہدایت کی ہے۔
سی سی پی او پشاور سید اشفاق انور کے مطابق رواں ماہ جون کے دوران خطرناک اشتہاری مجرمان کو گرفتار کرنے سمیت مختلف مواقع پر مجرمان کو سہولیات اور پناہ دینے میں ملوث سہولت کاروں کے خلاف بھی گھیرا تنگ کیا گیا ہے، جن سے جدید خودکار اسلحہ بھی برآمد کرلیا گیا ہے
اسی طرح قتل، اقدام قتل، ڈکیتی، اغوائیگی اور دیگر سنگین جرائم میں ملوث دیگر ملزمان کی فہرستیں بھی مرتب کرتے ہوئے ڈویژنل ایس پیز کو ارسال کرتے ہوئے ان کو خصوصی ٹاسک حوالہ کیا گیا ہے۔سی سی پی او پشاور سید اشفاق انور نے جاری کریک ڈاون پر اطمینان کا اظہار کرتے ہوئے اس کو مزید موثر اور تیز کرنے کی ہدایت کی۔

خیبر باڑہ ڈوگرہ چوک کے قریب فلائنگ کوچ اور موٹر کار کے درمیان تصادم کے نتیجے میں 11 افراد زخمی ہو گئے،ریسکیو 1122 کے مطابق خیبر کنٹرول روم کو اطلاع موصول ہوتے ہی میڈیکل ٹیمیں موقعے پر پہنچ گئیں میڈیکل ٹیموں نے زخمیوں کو ابتدائی طبی امداد فراہم کرکے ڈوگرہ ہسپتال منتقل کردیا گیاجبکہ شدید زخمی افراد کو مزید علاج کیلئے پشاور حیات آباد میڈیکل کمپلیکس منتقل کر دیا گیا،حادثے میں زخمی افراد کے نام انس،سلیم،حارث،احتشام،کلیم اللہ ،مکرم،مدثر،نعمت،لعل بادشاہ ،شاہزیب،قدرت شامل ہیں۔

سی سی پی او پشاور سید اشفاق انور کی خصوصی ہدایت کی روشنی میں ایس پی ورسک ڈویژن کی نگرانی میں ہونے والی موک ایکسرسائز میں ڈی ایس پی ورسک سرکل کی زیر قیادت ایس ایچ او تھانہ متھرا سمیت دیگر پولیس افسران کیساتھ ساتھ البرق ٹیم، ایلیٹ فورس اور مقامی پولیس نے بھی حصہ لیا
پولیس نے کسی بھی ناخوشگوار واقعہ سے بروقت نمٹنے کا مشق کیا، جس کا مقصد کسی بھی ناخوشگوار واقعہ کی صورت میں بروقت ریسپانڈ کرنے کے ساتھ ساتھ پولیس کے استعداد کار میں اضافہ کرنا تھا مشق کے دوران حساس عمارت کی بلڈنگ کا محاصرہ کرکے عملہ کو بحفاظت منتقل کرنے کی مشق کے ساتھ ساتھ دہشت گردوں سے علاقہ کی صفائی کی مشق بھی کی گئی
اسی طرح زخمیوں کو بحفاظت قریبی ہسپتالوں تک پہنچانے اور عمارت کو دہشت گردوں سے پاک کرنے جبکہ گرفتار افراد کو بروقت تھانہ منتقلی کا بھی مشق بھی کیا گیا،

پشاور ریڈزون میں جدید کمانڈ اینڈ کنٹرول سسٹم فعال کرنے کے بعد اسے قلعہ بالاحصار اور امن چوک تک بھی پھیلانے کی منصوبہ بندی کی جارہی ہے تاہم اس کی مزیدتوسیع فنڈز سے مشروط کی گئی ہے ،پشاورریڈزون کو محفوظ بنانے کیلئے اس منصوبے پر اب تک تقریباً 10کروڑ روپے کی لاگت آچکی ہے جسے مرحلہ وار دوسرے علاقوں تک پھیلانے کی منصوبہ بندی کی جارہی ہے ۔ واضح رہے کہ ریڈزون پشاور میں 350سٹیٹ آف دی آرٹ سی سی ٹی وی کیمرے نصب کئے گئے ہیں جسکے بعد ریڈ زون میں روزانہ داخل ہونے والی ہزاروں گاڑیوں کی خودکارطریقہ سے مانیٹرنگ ہورہی ہے جبکہ خودکارسکیورٹی سسٹم کے ذریعے مشکوک و مطلوب افرادکا داخلہ بھی روکا جاسکے گا۔
ریڈ زون کی سکیورٹی کیلئے دوماہ کے قلیل عرصہ میں قائم ”کمانڈ اینڈ کنٹرول سنٹر”کا افتتاح کور کمانڈر پشاور لیفٹیننٹ جنرل حسن اظہر حیات اور آئی جی پی خیبرپختونخوا اخترحیات خان نے کیاتھا۔ اس جدید سکیورٹی سسٹم کو قلعہ بالاحصار اور امن چوک تک بھی توسیع دینے کی منصوبہ بندی کی جارہی ہے۔اس حوالے سے محکمہ پولیس کے ایک اعلیٰ افسر نے بتایا کہ منصوبے کی توسیع پر کم لاگت آئے گی کیونکہ سنٹرل پولیس آفس میں ایک سسٹم پہلے ہی سے انسٹال ہوچکا ہے اور توسیع کی منظوری کی صورت میں صرف سی سی ٹی وی کیمرے،کیبل وغیرہ کی خریداری کرنا ہوگی۔ انہوں نے بتایا کہ یہ ملک میں اپنی نوعیت کا پہلاجدیدخودکارشناخت وسکیورٹی نظام ہے اوراس سے ریڈزون میں واقع حساس تنصیبات وعمارتوں سنٹرل جیل ،سی پی او، پولیس لائنز، گورنرہاوس، وزیراعلیٰ ہاوس،سیکرٹریٹ سمیت دیگرعمارتوں و دفاتر کی سکیورٹی کو یقینی بنانا اور رجسٹرڈ ملازمین کے داخلے کے نظام کو خود کار بنایاگیا ہے۔
انہوں نے بتایا کہ ہماری پوری توجہ جدید ٹیکنالوجی کے ذریعے جرائم اور تخریب کاری کی وارداتوں کا تدارک کرنا ہے۔ اس سسٹم کے ذریعے پیدل چلنے والے افراد کی شناخت، گاڑیوں کی نمبر پلیٹس کی خود کار شناخت، گاڑیوں کی چیکنگ اورڈی ٹیکشن کی جارہی ہے جبکہ مطلوب یا مشکوک افرادکے داخلے پر الارم جنریٹ ہوگاجس سے ایسے عناصر اور گاڑی کوفوری پکڑنے میں آسانی ہوگی۔ریڈ زون میں زبردستی داخلے کو روکنے کیلئے روڈ بلاکرز، ٹائرز برسٹ اور ٹرن سٹائل گیٹ کی تنصیب اس منصوبے کا حصہ ہے جبکہ اس نظام کو نادرا اور ایکسائز ڈیپارٹمنٹ کیساتھ بھی منسلک کیا جارہاہے ۔منصوبے کی توسیع سے قلعہ بالاحصار سمیت دیگر علاقوں کو بھی محفوظ بنایاجاسکے گا۔

بجلی کی بچت کے لئے پشاور میں پیر کے دن سے تجارتی مراکز رات آٹھ بجے بند کرنے کے فیصلے پر عمل درآمد شروع کرنے کی منصوبہ بندی کر لی گئی ہے اس سلسلے میں ضلعی انتظامیہ پشاور کو تجارتی مراکز بند نہ کرنے والوں کے خلاف کریک ڈاؤن کرنے کی ہدایت بھی کردی گئی ہے واضح رہے کہ وفاقی حکومت نے بجلی بچت کے لئے ملک بھر میں تجارتی مراکزکو رمضان کے مہینے میں رات آٹھ بجے کے بعد بند کرنے کا حکم جاری کیا تھا جس کے بعد مزید دومرتبہ یہ احکامات جاری کئے گئے لیکن اس پر کسی قسم کا عملدر آمد نہیں ہوا جس کی روشنی میں یکم جولائی سے رات آٹھ بجے بند کرنے کے فیصلے کو نافذ کرنے کا فیصلہ کیا گیا ہے
عید کی چھٹیوں کی وجہ سے چونکہ بازار بند پڑے ہیں اس لئے ضلعی انتظامیہ پشاور بھر میں تجارتی مراکز رات آٹھ بجے بند کرنے کے حوالے سے پیر کے روزتین جولائی سے حرکت میں آئے گی رات آٹھ بجے کے بعد صرف ہوٹلز اور میڈیسن سٹورز کو کھلا رکھا جائے گا اور باقی تمام کاروبار بند رہے گااس فیصلہ پر عملدر آمد میں تاجروں کی جانب سے مزاحمت کا امکان ہے جس کیلئے متعلقہ تمام تھانہ جات کو بھی ضلعی انتظامیہ کے ساتھ تعاون کرنے کی ہدایت کی گئی ہے۔

خیبر لنڈی کوتل کے مقام پر دو فریقین کے درمیان ہونے والی خونخوار لڑائی میں 14 افراد زخمی ہوگئےہے،
پولیس ذرائع کے مطابق یہ ہولناک واقعہ زمین کے تنازع پر پیش آیا، معمولی تنازع دیکھتے ہی دیکھتے دو فریقین کے درمیان شدید لڑائی جھگڑے کا باعث بن گیا جس میں 14 افراد زخمی ہوگئے۔
پولیس نے موقع پر پہنچ کر زخمی افراد کو لنڈی کوتل ہیڈ کوارٹر ہسپتال منتقل کر دیا، 5 زخمیوں کی حالت تشویشناک ہونے پر پشاور منتقل کیا گیا ہے جبکہ پولیس نے ابتدائی کارروائی میں دونوں فریقین کے 4 افراد کو گرفتار کر لیا۔