Category: پشاور

کوہاٹ کے نواحی علاقے تحصیل لاچی میں شکردرہ روڈ پر دہشتگردوں نے پولیس موبائل کو نشانہ بنایا جس کے نتیجے میں ڈی ایس پی سمیت تین پولیس اہلکار شہید جبکہ متعدد زخمی ہوگئے۔ واقعہ عالم شہید چیک پوسٹ کے قریب پیش آیا جہاں نامعلوم مسلح افراد نے اچانک فائرنگ کر دی۔

پولیس ذرائع کے مطابق شہداء میں ڈی ایس پی اسد محمود اور دو پولیس جوان شامل ہیں۔ حملے میں دو پولیس اہلکار زخمی ہوئے جنہیں فوری طور پر قریبی اسپتال منتقل کر دیا گیڈی پی او کوہاٹ نے واقعے کی تصدیق کرتے ہوئے بتایا کہ شکردرہ روڈ پر پولیس موبائل معمول کی گشت پر تھی کہ دہشتگردوں نے گھات لگا کر فائرنگ شروع کر دی۔ شدید فائرنگ کے نتیجے میں پولیس موبائل کو بھی آگ لگا دی گئی۔ حملہ آور واردات کے بعد فرار ہونے میں کامیاب ہوگئے۔

ذرائع کے مطابق ابتدائی شواہد سے حملے میں افغان دہشتگردوں کے ملوث ہونے کا شبہ ظاہر کیا جا رہا ہے، تاہم حتمی بیان تحقیقات مکمل ہونے کے بعد جاری کیا جائے گا۔واقعے کے بعد علاقے میں سیکیورٹی ہائی الرٹ کر دی گئی ہے جبکہ شہداء کی نماز جنازہ سرکاری اعزاز کے ساتھ ادا کیے جانے کا امکان ہے۔ اعلیٰ حکام نے واقعے کا نوٹس لیتے ہوئے رپورٹ طلب کر لی ہے۔

‎کوہاٹ میں سرکاری ہسپتال میں خدمات انجام دینے والی خاتون ڈاکٹر مہوش کے قتل میں ملوث ملزم کی نشاندہی کر لی گئی ہے اور اس کی گرفتاری کے لیے چھاپے مارے جا رہے ہیں۔ ڈاکٹروں کی تنظیموں پراونشل ڈاکٹرز ایسو سی ایشن اور ینگ ڈاکٹرز ایسوسی ایشن نے اپنے مشترکہ مذمتی بیان میں بتایا کہ ڈاکٹر مہوش شام کو ہسپتال میں ڈیوٹی ختم کرنے کے بعد گھر جا رہی تھیں کہ راستے میں نامعلوم افراد نے انہیں قتل کر دیا۔
واقعے کے بعد کوہاٹ ہسپتال میں الیکٹو سروسز اور او پی ڈی کے بائیکاٹ کا اعلان کیا گیا اور شہر میں احتجاجی مظاہرہ بھی کیا گیا۔ تاہم کمشنر کوہاٹ معتصم باللہ کے مطابق ڈاکٹروں سے کامیاب مذاکرات کے بعد ایمرجنسی سروسز بحال کرنے پر اتفاق ہو گیا ہے۔
ضلعی پولیس سربراہ (ڈی پی او) کوہاٹ شہباز الٰہی نے بتایا کہ ملزم کی نشاندہی ہو چکی ہے اور گرفتاری کے لیے چھاپے مارے جا رہے ہیں۔ ان کا کہنا تھا کہ قتل کے محرکات کے بارے میں فی الحال کچھ کہنا قبل از وقت ہوگا۔
کوہاٹ پولیس کے ترجمان نعمان نے بتایا کہ قتل کا مقدمہ درج کر لیا گیا ہے اور تفتیش جاری ہے، تاہم اب تک کسی ملزم کی گرفتاری عمل میں نہیں آئی۔ مقدمہ ڈاکٹر مہوش کے شوہر کی مدعیت میں درج کیا گیا ہے، جس میں مؤقف اختیار کیا گیا کہ ان کی اہلیہ کو نامعلوم افراد نے گولی مار کر قتل کیا۔

‎خیبرپختونخوا حکومت نے بھکاری مافیا کے خاتمے کے لیے انسداد گداگدی بل صوبائی کابینہ کو منظوری کے لیے بھیجا، جس میں جبری بھیک میں ملوث عناصر کو 3 سال قید اور 4 لاکھ روپے جرمانے کی سزا دی جائے گی—جعلی معذوری یا فریب پر مبنی بھیک اب سنگین جرم ہوگا، جس کی سزا 1 سے 2 سال قید تجویز کی گئی۔
بل کے تحت پہلی بار بھیک پر وارننگ یا 1 ماہ قید اور 1 ہزار روپے
جرمانہ، بار بار گداگری پر 1 سال قید اور 50 ہزار روپے جرمانہ ہوگا ملوث افراد کا بایومیٹرک ڈیٹا جمع، شناختی کارڈ بلاک، بینک اکاؤنٹ منجمد اور نام ECL میں شامل کرنے کی سفارشات شامل ہیں۔
یہ بل وزیراعلیٰ سہیل آفریدی کی ہدایت پر تیار ہوا، جو بچوں اور معذوروں سے جبری بھیک اور منظم نیٹ ورکس کا خاتمہ کرے گا بحالی مراکز، ہنر سکھانے اور روزگار سے بھیک کے ناسور کو جڑ سے اکھاڑنے کا عزم ہے۔

کوہاٹ: کوہاٹ کے علاقے کے ڈی اے ڈبل روڈ پر نامعلوم مسلح افراد کی فائرنگ سے ایک لیڈی ڈاکٹر جاں بحق ہو گئیں، واقعے کے بعد شہر بھر میں خوف و ہراس پھیل گیا جبکہ طبی برادری نے شدید احتجاج کرتے ہوئے ملزمان کی فوری گرفتاری کا مطالبہ کیا ہے۔

پولیس کے مطابق مقتولہ لیڈی ڈاکٹر ڈیوٹی مکمل کرنے کے بعد رکشہ کے ذریعے گھر واپس جا رہی تھیں کہ کے ڈی اے ڈبل روڈ پر پہلے سے گھات لگائے مسلح افراد نے ان پر اندھا دھند فائرنگ کر دی۔ فائرنگ کے نتیجے میں وہ شدید زخمی ہو گئیں اور موقع پر ہی دم توڑ گئیں۔ ملزمان واردات کے بعد فرار ہونے میں کامیاب ہو گئے۔اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر شواہد اکٹھے کیے۔ لاش کو ضابطے کی کارروائی کے لیے قریبی اسپتال منتقل کر دیا گیا۔ پولیس حکام کا کہنا ہے کہ واقعے کی مختلف پہلوؤں سے تحقیقات شروع کر دی گئی ہیں اور جائے وقوعہ کے اطراف نصب سی سی ٹی وی کیمروں کی فوٹیج حاصل کی جا رہی ہے تاکہ ملزمان کا سراغ لگایا جا سکے۔

دوسری جانب واقعے کے خلاف ڈاکٹرز برادری سراپا احتجاج بن گئی۔ سرکاری اسپتالوں میں ڈاکٹرز نے بازوؤں پر سیاہ پٹیاں باندھ کر احتجاج ریکارڈ کرایا جبکہ بعض مقامات پر او پی ڈیز کی جزوی بندش بھی دیکھنے میں آئی۔ مظاہرین کا کہنا تھا کہ طبی عملہ پہلے ہی سیکیورٹی خدشات کا شکار ہے اور اس طرح کے واقعات ان کے لیے شدید تشویش کا باعث ہیں۔ینگ ڈاکٹرز ایسوسی ایشن کے صدر نے میڈیا سے گفتگو کرتے ہوئے کہا کہ لیڈی ڈاکٹر کے قتل میں ملوث ملزمان کی فوری گرفتاری تک احتجاج جاری رہے گا۔ ان کا کہنا تھا کہ اگر حکومت اور قانون نافذ کرنے والے ادارے سیکیورٹی کی فراہمی میں ناکام رہے تو احتجاج کا دائرہ کار صوبہ بھر تک بڑھایا جا سکتا ہے،ڈاکٹرز رہنماؤں نے مطالبہ کیا کہ اسپتالوں اور طبی عملے کو فول پروف سیکیورٹی فراہم کی جائے اور اس افسوسناک واقعے میں ملوث عناصر کو کیفر کردار تک پہنچایا جائے تاکہ آئندہ ایسے واقعات کی روک تھام ممکن ہو سکے۔

ضلع جنوبی وزیرستان اپر میں دہشت گردوں کی جانب سے ڈپٹی کمشنر (ڈی سی) کمپاؤنڈ کے اندر قائم ججز کی رہائش گاہ کو ڈرون حملے کا نشانہ بنایا گیا۔

ابتدائی اطلاعات کے مطابق واقعے میں کوئی جانی نقصان نہیں ہوا تاہم عمارت اور وہاں کھڑی سرکاری گاڑیوں کو جزوی نقصان پہنچا ہے۔سرکاری ذرائع کے مطابق حملہ رات گئے کیا گیا، جس کے دوران ایک دھماکے کی آواز سنی گئی۔ دھماکے کے فوراً بعد سیکیورٹی فورسز اور قانون نافذ کرنے والے اداروں نے علاقے کو گھیرے میں لے کر سرچ آپریشن شروع کر دیا۔ واقعے کے بعد ڈی سی کمپاؤنڈ اور اطراف کے علاقوں میں سیکیورٹی مزید سخت کر دی گئی ہے۔انتظامیہ کا کہنا ہے کہ ڈرون حملے کے نتیجے میں ججز رہائش گاہ کی بیرونی دیواروں اور کھڑکیوں کو نقصان پہنچا جبکہ کمپاؤنڈ میں کھڑی چند گاڑیوں کے شیشے ٹوٹ گئے۔ خوش قسمتی سے حملے کے وقت رہائش گاہ میں موجود افراد محفوظ رہے۔

ضلعی انتظامیہ اور پولیس حکام نے واقعے کی تحقیقات شروع کر دی ہیں جبکہ شواہد اکٹھے کیے جا رہے ہیں تاکہ حملے میں ملوث عناصر کا سراغ لگایا جا سکے۔ سیکیورٹی ذرائع کے مطابق یہ حملہ علاقے میں امن و امان کی صورتحال خراب کرنے کی کوشش ہو سکتی ہے۔یاد رہے کہ قبائلی اضلاع میں سیکیورٹی فورسز کی جانب سے دہشت گردوں کے خلاف کارروائیاں جاری ہیں، اور حالیہ مہینوں میں متعدد دہشت گردوں کو ہلاک یا گرفتار کیا جا چکا ہے۔ حکام کا کہنا ہے کہ ایسے بزدلانہ حملے سیکیورٹی اداروں کے عزم کو کمزور نہیں کر سکتے۔

سابق وزیراعلیٰ خیبرپختونخوا علی امین گنڈاپور نے کہا ہے کہ میرے غصے سے کسی کا دل دکھا ہے تو معذرت خواہ ہوں، مگر میرا غصہ جائز ہے، ابھی تک چھوٹی سی جائز ڈیمانڈ بھی پوری نہیں کروا سکے کہ پاکستان تحریک انصاف کے بانی عمران خان کو ان کا ذاتی معالج دیا جائے۔

اپنے ویڈیو بیان میں علی امین گنڈاپور کا کہنا تھاکہ عمران خان کی آنکھ اورصحت کے حوالے سے ہمارے تحفظات بدستور برقرارہیں، جس نے عوام کو صحت کی مفت سہولتیں فراہم کیں، آج اپنی صحت کے معاملے میں مشکلات کا شکار ہے،ہماری حکومت آئی تو ہم نے یونیورسل ہیلتھ کارڈ دیا اورہرطرح کی بیماری کو اس میں کور کرتے گئے، جب بانی پی ٹی آئی وزیراعظم بنے تو انہوں نے پورے ملک کے عوام کو صحت کارڈ کی سہولت دی لیکن افسوس ہے آج بانی پی ٹی آئی کو ان کے ذاتی معالج تک سے ملنےنہیں دیا جا رہا، میرے غصے سے کسی کا دل دکھا ہے تو معذرت خواہ ہوں، مگر میرا غصہ جائز ہے، ابھی تک چھوٹی سی جائز ڈیمانڈ بھی پوری نہیں کروا سکے کہ بانی پی ٹی آئی کو ان کا ذاتی معالج دیا جائے، اگر اس معاملے پر کسی کو غصہ نہیں آ رہا تو میرے خیال میں اس میں انسانیت نہیں ہے۔

انہوں نے مزید کہاکہ ہم سب کو اپنے مقصد پر فوکس کرنا چاہیے اور بھرپور انداز میں آواز اٹھانی چاہیے، ہم اکثر مقصد سے ہٹ کر دیگرمسئلوں میں الجھ جاتے ہیں اور اصل مقصد حاصل نہیں کر پاتے،مطالبہ ہے کہ بانی پی ٹی آئی کے ذاتی معالج کو ان تک رسائی دی جائے۔