Category: پشاور

‎پشاور کی ایک مقامی عدالت نے جھوٹی گواہی اور تفتیش میں سنگین غفلت برتنے پر تفتیشی افسر ہدایت اللہ کو 10 سال قید کی سزا سنا دی۔ عدالت نے سزا سنانے کے ساتھ ہی متعلقہ افسر کو فوری طور پر جیل منتقل کرنے کا حکم بھی جاری کر دیا۔
‎عدالت کے تحریری فیصلے کے مطابق تفتیشی افسر نے کیس میں موجود اہم ڈیجیٹل شواہد فرانزک تجزیے کے لیے لیبارٹری نہیں بھجوائے، جس کے باعث تحقیقات کا ایک اہم پہلو نظر انداز ہو گیا۔ فیصلے میں کہا گیا کہ ایسے شواہد کسی بھی مقدمے میں حقائق تک پہنچنے کے لیے انتہائی اہمیت رکھتے ہیں اور انہیں نظر انداز کرنا سنگین غفلت کے زمرے میں آتا ہے۔
‎عدالت نے مزید قرار دیا کہ تفتیشی افسر نے عینی شاہدین کے بیانات بھی ریکارڈ نہیں کیے، حالانکہ وہ مقدمے کے اہم گواہ تھے۔ فیصلے میں اس کو تفتیشی عمل میں بڑی کوتاہی قرار دیتے ہوئے کہا گیا کہ اس طرز عمل نے انصاف کے تقاضوں کو متاثر کیا۔
‎عدالت کے مطابق ایک تفتیشی افسر کی بنیادی ذمہ داری غیر جانبدارانہ، مکمل اور شفاف تحقیقات کو یقینی بنانا ہوتی ہے۔ اگر کوئی افسر جان بوجھ کر یا غفلت کے باعث اہم شواہد اور گواہوں کو نظر انداز کرے تو اس سے مقدمے کی ساکھ اور انصاف کی فراہمی دونوں متاثر ہوتے ہیں۔
‎عدالت نے کیس میں مبینہ غفلت برتنے پر پراسیکیوٹر عبید الرحمٰن اور ڈپٹی پبلک پراسیکیوٹر جاوید علی کو بھی نوٹس جاری کر دیے ہیں۔ دونوں افسران سے وضاحت طلب کی گئی ہے کہ مقدمے کے دوران ان کی جانب سے پیشہ ورانہ ذمہ داریوں کی ادائیگی میں کسی قسم کی کوتاہی تو نہیں ہوئی۔
‎قانونی ماہرین کے مطابق یہ فیصلہ اس بات کی اہم مثال ہے کہ عدالتیں تفتیش اور استغاثہ کے عمل میں غفلت یا بددیانتی کو سنجیدگی سے لیتی ہیں۔ ان کا کہنا ہے کہ شفاف تحقیقات اور مضبوط شواہد ہی منصفانہ عدالتی نظام کی بنیاد ہوتے ہیں۔
‎عدالتی فیصلے کے بعد قانونی حلقوں میں اس کیس پر خاصی توجہ دی جا رہی ہے، کیونکہ یہ فیصلہ قانون نافذ کرنے والے اداروں اور پراسیکیوشن حکام کے لیے احتساب اور ذمہ داری کا واضح پیغام سمجھا جا رہا ہے۔

وزیرستان میں نامعلوم مسلح افراد کی فائرنگ کے نتیجے میں ایک قبائلی رہنما کے دو بیٹے جاں بحق جبکہ ایک راہگیر زخمی ہوگیا۔

پولیس کے مطابق یہ افسوسناک واقعہ وانا کے علاقے کڑیکوٹ بازار کے قریب پیش آیا، جہاں مسلح افراد نے اچانک فائرنگ کردی۔ فائرنگ کے نتیجے میں قبائلی رہنما کے دو بیٹے موقع پر ہی جان کی بازی ہار گئے۔واقعے میں ایک راہگیر بھی زخمی ہوا، جسے فوری طور پر طبی امداد کے لیے قریبی اسپتال منتقل کردیا گیا ہے، جہاں اس کا علاج جاری ہے۔ڈی ایس پی اصغر علی شاہ نے بتایا کہ واقعے کی تحقیقات کا آغاز کر دیا گیا ہے اور حملہ آوروں کی تلاش کے لیے کارروائیاں جاری ہیں۔ پولیس کا کہنا ہے کہ واقعے کے محرکات جاننے کے لیے مختلف پہلوؤں سے تفتیش کی جا رہی ہے۔

میرعلی: شمالی وزیرستان کی تحصیل میرعلی میں دہشت گردوں نے مختلف علاقوں میں تخریبی کارروائیاں کرتے ہوئے تین پل بارودی مواد سے اڑا دیے، جس کے باعث مقامی آبادی کی آمدورفت شدید متاثر ہو گئی۔

ذرائع کے مطابق پہلا واقعہ موسکی کے علاقے میں پیش آیا جہاں نظام روڈ پر واقع پل کو بارودی مواد نصب کرکے دھماکے سے تباہ کر دیا گیا۔ دھماکے کے نتیجے میں پل مکمل طور پر منہدم ہو گیا اور رابطہ سڑک متاثر ہوئی۔دوسری کارروائی خسوخیل کے علاقے میں کی گئی جہاں دہشت گردوں نے ایک اور پل کو نشانہ بنایا۔ دھماکے کے باعث پل کو شدید نقصان پہنچا اور علاقے میں نقل و حرکت متاثر ہوئی۔تیسرا واقعہ گاؤں ایپی میں اکبر علی کے گھر کے قریب پیش آیا، جہاں واقع پل کو بارودی مواد سے اڑا دیا گیا۔ دھماکے کے نتیجے میں پل مکمل طور پر تباہ ہو گیا۔مقامی ذرائع کا کہنا ہے کہ تینوں واقعات کے بعد متاثرہ علاقوں کے رہائشیوں کو آمدورفت میں مشکلات کا سامنا ہے، جبکہ سیکیورٹی فورسز اور متعلقہ حکام نے واقعات کی تحقیقات شروع کر دی ہیں۔

گورنر خیبرپختونخوا فیصل کریم کنڈی کی وفاقی وزیر ریلوے حنیف عباسی سے ملاقات ہوئی ہے

ملاقات میں سیاسی امور اور ایم ایل-1 ریلوے منصوبے پر تفصیلی تبادلۂ خیال کیا گیا۔ گورنر خیبرپختونخوا فیصل کریم کنڈی کا کہنا تھا کہ ایم ایل-1 ریلوے منصوبہ خیبرپختونخوا کے جنوبی اضلاع کی ترقی میں اہم سنگِ میل ثابت ہوگا، ایم ایل-1 ریلوے ٹریک سے جنوبی اضلاع میں تجارت، سرمایہ کاری اور روزگار کے نئے مواقع پیدا ہوں گے، ایم ایل-1 منصوبے کی تکمیل سے علاقے میں معاشی خوشحالی آئے گی ، گورنر خیبرپختونخوا نے منصوبے کی بروقت تکمیل کی اہمیت پر زور دیا،ملاقات میں خیبرپختونخوا میں پاکستان پیپلز پارٹی کے پارلیمانی لیڈر احمد کنڈی بھی شریک تھے۔

کنگ سلمان ریلیف نے خیبر پختونخوا کے ضم شدہ اضلاع میں 3,500 شیلٹر این ایف آئی کٹس کی تقسیم کامیابی سے مکمل کر لی۔
اسلام آباد۔کنگ سلمان ریلیف سینٹر نے خیبر پختونخوا کے ضم شدہ اضلاع میں شیلٹر این ایف آئی کٹس امدادی منصوبے کے پانچویں مرحلے کو کامیابی سے مکمل کر لیا ہے، جس کے تحت کمزور اور ضرورت مند کمیونٹیز کو اہم انسانی ہمدردی کی بنیاد پر معاونت فراہم کی گئی۔

اس اقدام کے تحت مجموعی طور پر 3,500 شیلٹر این ایف آئی کٹس مستحق خاندانوں میں سات اضلاع جن میں اپر کرم میں (500 کٹس)، لوئر کرم میں (500 کٹس)، مہمند میں (500 کٹس)، اورکزئی میں (500 کٹس)، شمالی وزیرستان میں (500 کٹس)، لوئر جنوبی وزیرستان میں (500 کٹس) اور اپر جنوبی وزیرستان میں (500 کٹس) میں تقسیم کی گئیں۔ہر شیلٹر این ایف آئی کٹ میں ایک خیمہ، سولر پینل بمع لائٹس ، دو تھرمل کمبل، پلاسٹک میٹس، کچن سیٹ، واٹر کولر اور اینٹی بیکٹیریل صابن شامل تھے۔ ان اشیاء کا انتخاب ضرورت مند خاندانوں کی فوری ضروریات کو مدنظر رکھتے ہوئے کیا گیا۔ اس منصوبے پر نیشنل ڈیزاسٹر مینجمنٹ اتھارٹی اور حیات فاؤنڈیشن کے قریبی تعاون سے عمل درآمد کیا گیا، جس کے نتیجے میں مؤثر رابطہ کاری، شفافیت اور ہدف شدہ مستحقین تک بروقت انسانی امداد کی فراہمی یقینی بنائی گئی

اس مشترکہ کاوش کے ذریعے یہ اقدام کامیابی سے 24,129 سے زائد افراد تک پہنچا اور انہیں براہِ راست فائدہ پہنچایا، جو کمزور اور ضرورت مند کمیونٹیز کی معاونت اور ان کے معیارِ زندگی میں بہتری کے لیے کنگ سلمان ریلیف کے غیر متزلزل عزم کا مظہر ہے۔ یہ منصوبہ بحرانوں اور آفات سے متاثرہ افراد کی خدمت کے لیے مملکتِ سعودی عرب اور پاکستان کے درمیان مضبوط انسانی ہمدردی پر مبنی شراکت داری اور باہمی یکجہتی کی بھی عکاسی کرتا ہے

ڈیرہ اسماعیل خان ائیرپورٹ سے کمرشل فلا ئٹس آپریشن کے لیئے گورنر خیبرپختونخوا متحرک ہو گئے

ساؤتھ ایئر نے ڈیرہ اسماعیل خان کے لیے باقاعدہ پروازیں شروع کرنے کا اعلان کر دیا، ساؤتھ ایئر کے وفد کی کنور محمد طارق کی سربراھی میں گورنر فیصل کریم کنڈی سے ملاقات ہوئی،گورنر فیصل کریم کنڈی نے ڈی آئی خان اور چترال پروازوں کے لیے ہر ممکن تعاون کی یقین دہانی کروائی اور کہا کہ خیبر پختونخوا میں ساؤتھ ایئر کو خوش آمدید کہتے ہیں، ساؤتھ ایئر کی پروازیں خیبر پختونخوا میں کامیاب ثابت ہوں گی،صوبے میں سیاحت اور کاروبار کے فروغ کے لیے فضائی رابطے ناگزیر ہیں،خیبر پختونخوا پاکستان کی سیاحت کا مرکز ہے،خیبر پختونخوا کے کئی اہم علاقے اب بھی فضائی سہولیات سے محروم ہیں، پشاور سے کراچی، لاہور اور کوئٹہ کی پروازیں صوبے میں معاشی سرگرمیوں میں تیزی لائیں گے، نئی ایئرلائنز کے فلائٹس سے خیبر پختونخواہ میں روزگار، سیاحت اور تجارتی سرگرمیوں میں اضافہ ہو گا،