Category: پشاور

گورنر ہاؤس خیبر پختونخوا کے ترجمان کے مطابق آج دوپہر 2 بج کر 30 منٹ پر وزیراعلیٰ خیبر پختونخوا کا اپنے عہدے سے دست‌نویس استعفیٰ باقاعدہ طور پر گورنر ہاؤس کو موصول ہوا اور اس کی وصولی کی تصدیق بھی کر دی گئی ہے۔

گورنر خیبر پختون خواہ نے کہا کہ آئینِ پاکستان اور متعلقہ قوانین کے مطابق استعفے کی جانچ پڑتال اور قانونی تقاضوں کی تکمیل کے بعد، وزیراعلیٰ کا استعفیٰ آئینی طریقہ کار کے تحت عمل میں لایا جائے گا۔گورنر کے پی نے مزید کہا کہ گورنر ہاؤس تمام آئینی و قانونی تقاضوں کو مدنظر رکھتے ہوئے معاملے کو شفاف اور منظم انداز میں آگے بڑھائے گا۔فیصل کریم کنڈی کا کہنا ہے کہ علی امین گنڈاپور کے استعفیٰ پر 11 اکتوبر کی تاریخ درج ہے۔

خیبر پختونخوا کے صوبائی دارالحکومت پشاور کے نواحی علاقے حسن خیل میں خوارج نے پولیس اسٹیشن پر حملہ کر دیا۔ حملے کے دوران پولیس اور دہشتگردوں کے درمیان شدید فائرنگ کا تبادلہ ہوا

پولیس کے مطابق خوارج کے ایک گروہ نے رات گئے اچانک حسن خیل پولیس اسٹیشن کو نشانہ بنایا۔ اہلکاروں نے فوری طور پر جوابی کارروائی کرتے ہوئے مورچہ سنبھال لیا اور بھرپور انداز میں فائرنگ کا جواب دیا۔ پولیس کی بروقت اور مؤثر حکمتِ عملی کے نتیجے میں حملہ ناکام بنا دیا گیا۔فائرنگ کے تبادلے میں دو خوارج ہلاک جبکہ دو دیگر زخمی ہوگئے، جنہیں ان کے ساتھی اٹھاتے ہوئے علاقے سے لے کر فرار ہوگئے۔ پولیس نے علاقے کو گھیرے میں لے کر سرچ آپریشن شروع کر دیا ہے تاکہ باقی ماندہ دہشتگردوں کو گرفتار کیا جا سکے۔

سی سی پی او پشاور نے واقعے کی تصدیق کرتے ہوئے کہا کہ پولیس فورس نے بہادری اور پیشہ ورانہ مہارت کا مظاہرہ کرتے ہوئے ایک بڑے سانحے کو ٹال دیا۔ ان کے مطابق صورتحال پر مکمل قابو پا لیا گیا ہے اور مزید سیکیورٹی اقدامات کیے جا رہے ہیں تاکہ مستقبل میں اس نوعیت کی کسی کارروائی کو روکا جا سکے۔

تحریک انصاف کے رہنما سلمان اکرم راجہ نے کہا ہے کہ تحریک انصاف کے اندر سے تبدیلی کی وجہ سے صوبہ خیبرپختونخوا میں تبدیلی آ رہی ہے ہم سمجھتے ہیں کہ اس تبدیلی کو روکنے کی کوشش ہو گی

پشاور میں جنید اکبر ،اسد قیصرو دیگر کے ہمراہ پریس کانفرنس کرتے ہوئے سلمان اکرم راجہ کا کہنا تھا کہ یہ کہنا کہ تحریک انصاف دہشتگردوں کے لیے نرم گوشہ رکھتی ہے سرا سر الزام ہے بہتان ہے ہمارے لیے پاکستانی قوم کا خون مقدم ہے۔ ملک کے ہر کونے میں اپنی جان کا نذرانہ دینے والے ہم ہر سپاہی افسران کے ساتھ کھڑے ہیں یہ کہنا کہ ہم کسی کے خون کو کمتر سمجھتے ہیں یہ بہتان ہے ،سپاہی،افسر،پولیس کے اہلکار سب کے ساتھ کھڑے ہیں،ہم پاکستانی قوم کی آواز ہیں، ہم ہراس منفی طاقت کے خلاف کھڑے ہیں جو پاکستان کو میلی نظر سے دیکھتی ہے،ہم پر سہولت کاری کے الزامات لگائے گئے، ڈرانے کی کوشش کی گئی کہ آپ کو ریاست کے غیض و غضب کا سامنا کرنا پڑے گا۔ ہم شہداء کے ساتھ کھڑے ہیں،ہمیں مت دھتکاریئے، ایسا مت کیجئے، ہم پاکستان کو متحد رکھنے والی قوت ہیں، آج قوم عمران خان کے پیچھے کھڑی ہے،

جنید اکبر کا کہنا تھا کہ میں علی امین گنڈاپور کا شکریہ ادا کرتا ہوں کہ اس کو جیسے ہی حکم ملا اس نے ایک منٹ بھی ضائع نہیں کیا اور استعفٰی دے دیا،ہمارے تمام 92 امیدوار سہیل آفریدی کو ووٹ دیں گے ،ہم سہیل آفریدی کو یقینی طور پر وزیراعلیٰ بنائیں گے ۔

وزیراعلیٰ خیبرپختونخوا علی امین گنڈاپور کے استعفے کے بعد صوبے میں سیاسی منظرنامہ تیزی سے بدلنے لگا ہے۔ اپوزیشن جماعتوں نے نئے وزیراعلیٰ کے انتخاب کے لیے سرگرم مشاورت شروع کر دی ہے اور اراکین اسمبلی کو پشاور میں قیام کی ہدایت جاری کر دی گئی ہے۔

ذرائع کے مطابق علی امین گنڈاپور کے مستعفی ہونے کے فوراً بعد اپوزیشن جماعتوں کے قائدین نے رابطے تیز کر دیے ہیں اور مشترکہ حکمتِ عملی کے لیے اجلاس منعقد کیا جا رہا ہے۔ اجلاس کے بعد اراکین اسمبلی کو اعتماد میں لیا جائے گا، جبکہ نئے وزیراعلیٰ کے لیے متفقہ امیدوار کے نام پر مشاورت جاری ہے۔ذرائع نے مزید بتایا کہ جمعیت علمائے اسلام (ف) کے سربراہ مولانا فضل الرحمان بھی پشاور میں موجود ہیں اور اپوزیشن قیادت سے مسلسل رابطے میں ہیں۔ ان کی قیادت میں اپوزیشن جماعتیں وزیراعلیٰ کے عہدے کے لیے مشترکہ امیدوار لانے پر متفق ہونے کی کوشش کر رہی ہیں۔

دوسری جانب وزیراعظم کے کوآرڈینیٹر برائے اطلاعات و نشریات اختیار ولی خان نے نجی ٹی وی سے گفتگو میں تصدیق کی کہ خیبرپختونخوا کی صورتحال پر متحدہ اپوزیشن میں تفصیلی مشاورت جاری ہے۔ انہوں نے کہا کہ اپوزیشن جماعتیں وزیراعلیٰ کے لیے مشترکہ امیدوار میدان میں اتارنے پر متفق ہیں تاکہ صوبے میں سیاسی استحکام پیدا کیا جا سکے۔ادھر پی ٹی آئی پارلیمنٹیرینز کے جنرل سیکرٹری ملک حبیب نور اورکزئی نے بھی گفتگو میں تصدیق کی کہ ان کی جماعت اپوزیشن کے ساتھ مشاورت کر رہی ہے۔ ان کا کہنا تھا کہ اگر اسمبلی میں اکثریت حاصل ہو گئی تو جے یو آئی (ف) کے امیدوار کو وزیراعلیٰ کے طور پر سامنے لایا جا سکتا ہے۔ پارٹی آزاد اراکین سے بھی رابطے میں ہے تاکہ اپوزیشن کے متفقہ امیدوار کو کامیابی دلانے کے لیے مطلوبہ حمایت حاصل کی جا سکے۔

سیاسی تجزیہ کاروں کے مطابق علی امین گنڈاپور کے استعفے کے بعد خیبرپختونخوا میں ایک نئی سیاسی صف بندی کا آغاز ہو گیا ہے، جہاں اپوزیشن جماعتیں برسراقتدار آنے کے لیے متحد ہونے کی کوششوں میں مصروف ہیں۔ آئندہ چند دنوں میں صوبائی سیاست میں اہم پیش رفت متوقع ہے۔

نیب نے 40 ارب روپے کے بڑے مالیاتی اسکینڈل میں ملوث ایک سابق ڈمپر ڈرائیور کو گرفتار کر لیا ہے، جس پر جعلی کمپنی کے ذریعے سرکاری خزانے سے براہ راست 3 ارب روپے سے زائد کی رقم وصول کرنے اور مختلف بینکوں میں اپنے اکاؤنٹس کے ذریعے 16 ارب روپے سے زائد کی ٹرانزیکشنز کرنے کے الزامات ہیں۔

نجی ٹی وی کے مطابق نیب حکام کے مطابق ملزم کی گرفتاری تاریخی اسکینڈل کی تحقیقات میں ایک بڑی پیشرفت ہے، تفتیش سے مزید ملزمان کے نام سامنے آئیں گے،گرفتار ملزم جو ایم/ایس ممتاز خان کنسٹرکشن کمپنی کے نام سے جعلی کمپنی کا مالک اور ڈائریکٹر تھا اسے نیب خیبر پختونخوا نے ایبٹ آباد سے گرفتار کیا، بعد ازاں اسے پشاور کی احتساب عدالت میں پیش کیا گیا جہاں عدالت نے نیب کو 8 روزہ جسمانی ریمانڈ دے دیا تاکہ مزید تفتیش اور شواہد کی برآمدگی ممکن ہو سکے۔

نیب کی ابتدائی تحقیقات کے مطابق ملزم ماضی میں ایک عام ڈمپر ڈرائیور تھا، تاہم اس نے دیگر شریک ملزمان کے ساتھ مل کر جعلی کمپنی قائم کی جس کے ذریعے سرکاری خزانے سے خطیر رقم خرد برد کی گئی،یہ رقم مبینہ طور پر ٹھیکیداروں کے سکیورٹی ڈپازٹ ہیڈ آف اکاؤنٹ (G-10113) سے نکالی گئی، جو دراصل سرکاری منصوبوں کی تکمیل کے لیے ضمانتی رقم کے طور پر رکھی جاتی ہے،تحقیقات میں انکشاف ہوا ہے کہ جعلی کمپنی اور اس کے بینک اکاؤنٹس خرد برد شدہ رقوم کی منتقلی کے مرکزی ذرائع کے طور پر استعمال ہوئے۔