Category: پشاور

خیبر پختونخوا حکومت نے چند روز قبل حادثے کا شکار ہونے والے ہیلی کاپٹر کی جگہ نیا ہیلی کاپٹر خریدنے کا فیصلہ کیا ہے۔

نجی ٹی وی کے مطابق چیف سیکریٹری کے پی شہاب علی شاہ نے نیا ہیلی کاپٹر خریدنے کے فیصلے کی تصدیق کرتے ہوئے بتایا کہ قدرتی آفات سمیت دیگر کاموں میں ہیلی کاپٹر کی ضرورت ہوتی ہے۔شہاب علی شاہ نے کہا کہ مہمند میں ہیلی کاپٹر گرنے کے بعد حکومت کے پاس ایک ہیلی کاپٹر رہ گیا تھا اس لیے دوسرا ہیلی کاپٹر خریدنے کا فیصلہ کیا۔

وزیر اعلیٰ خیبر پختونخوا علی امین گنڈا پور کا کہنا ہے کہ ہیلی کاپٹر عملے نے دوسروں کیلئے اپنی جانیں قربان کیں، یہ ہمارے اصل ہیرو ہیں، ان کی قربانی سنہرے حروف میں لکھی جائےگی۔علی امین گنڈا پور نے بتایا کہ صوبائی حکومت نے شہداء کے لواحقین کو خصوصی پیکج دینے کی منظوری دی، صوبائی حکومت شہداء کے ورثا کو تنہا نہیں چھوڑے گی۔

ذرائع کا بتانا ہے کہ ہیلی کاپٹر حادثے کے شہدا کے لواحقین کو پولیس کے برابر کا شہدا پیکج دیا جائے گا۔سرکاری ذرائع کے مطابق ہیلی کاپٹر کے عملے کےپانچوں افراد کنٹریکٹ ملازمین تھے، ہیلی کاپٹر حادثے میں شہید ہونے والے دونوں پائلٹس کے ورثا کو اسکیل 19 پولیس افسرکے شہدا پیکج کے برابر پیکج دیا جائے گا، دونوں پائلٹس کے لواحقین کو 2، 2 کروڑ روپےکا پیکج دیا جائے گا۔ذرائع کا بتانا ہے کہ پائلٹس میں کرنل ریٹائرڈ شاہد سلطان اور آفتاب شامل ہیں جبکہ فلائٹ انجنیئر سلیم کے ورثا کو ڈیڑھ کروڑ روپے دیے جائیں گے اور دو کریو چیفس کے لواحقین کو ایک، ایک کروڑ روپے دیے جائیں گے۔

یاد رہے کہ 15 اگست کو باجوڑ ریلیف آپریشن کے دوران خیبر پختونخوا حکومت کا سرکاری ہیلی کاپٹر حادثے کا شکار ہوا تھا جس کے نتیجے میں 5 افراد جاں بحق ہوئے تھے۔

پاکستان مرکزی مسلم لیگ کے رہنماؤں نےکہا ہے کہ خیبر پختونخوا میں‌سیلاب سے نقصانات بہت زیادہ ہوئے،ہزاروں گھر تباہ ہوئے،خواتین وبچے اب بھی گھروں سے باہر کیونکہ گھر رہنے کے قابل نہیں رہے،بیماریاں پھیل رہی ہیں، خوراک،صاف پانی کی کمی ہے،مرکزی مسلم لیگ کے دو ہزار سے زائد رضاکار ریسکیو و ریلیف آپریشن میں مصروف ہیں، خشک راشن کی تقسیم اور مفت علاج معالجے کا سلسلہ بھی جاری ہے

ان خیالات کا اظہار مرکزی مسلم لیگ ،خدمت خلق کے چیئرمین شفیق الرحمان وڑائچ، خیبر پختونخوا کے صوبائی صدر عارف اللہ خٹک، مرکزی ترجمان تابش قیوم،مرکزی مسلم لیگ وسطی پنجاب کے صدر حمید الحسن،مرکزی مسلم لیگ راولپنڈی کے سیکرٹری جنرل انجنینئر مبین صدیقی,مرکزی مسلم لیگ فیصل آباد کے سیکرٹری جنرل احسن تارڑ نے مینگورہ بازار میں مرکزی مسلم لیگ کے امدادی کیمپ میں متاثرین میں سامان کی تقسیم کے موقع پر میڈیا سے گفتگو کرتے ہوئے کیا، اس موقع پر مینگورہ کے سیلاب متاثرین 350 خاندانوں میں خشک راشن سمیت دیگر امدادی سامان تقسیم کیا گیا،اس موقع پر مرکزی مسلم لیگ کے ڈپٹی سیکرٹری اطلاعات طہٰ منیب، ترجمان خیبر پختونخوا محمد عبداللہ بھی موجودتھے،شفیق الرحمان وڑائچ کاکہنا تھا کہ جمعہ کو سیلاب آیا اور شدید ترین سیلاب نے علاقوں کے علاقے ہلا ڈالے، کافی اموات ہوئیں، مالی نقصان کو تو اندازہ ہی نہیں ہو رہا،شانگلہ،مینگورہ،بونیر دیکھیں ،باجوڑ میں آپریشن کے متاثرین الگ ہیں اور سیلاب متاثرین الگ،گلگت ،سکردو میں بھی نقصان ہوا،کچھ علاقے جہاں شدید تباہی ہے وہ ابھی بھی نظر انداز ہیں، مینگورہ میں چھ ہزار سے زائد گھر متاثر ہوئے، گھر ختم،سیلاب بہہ گئے، ان حالات میں جمعہ کے دن سے فوری طور پر ریسکیو کا آپریشن شروع کیا، لاشیں نکالی،جنازے پڑھے،ہفتے سے ملک بھر سے میڈیکل ٹیمیں روانہ ہوئیں ،پکی پکائی خوراک تقسیم کی جا رہی ہے، دن رات ہمارے رضاکار کام کر رہے ہیں، ساڑھے تین ہزار افراد تک راشن پہنچایا گیا ہے،اگلے مرحلے میں ہم ملبہ اٹھانے کا کام کریں گے، کئی لوگوں کی ابھی تک لاشیں نہیں ملیں، گھروں، دکانوں کو تعمیر کریں گے،باجوڑ میں بھی امدادی کام جاری ہے،ہم سکردو سے بونیر ،باجوڑ تک کام کر رہے ہیں،مینگورہ میں ہمیں بھی یہ اندازہ نہیں تھا کہ اتنا نقصان ہوا،مینگورہ میں آج 350 سے زائد خاندانوں میں لاکھوں روپے مالیت کا راشن تقسیم کر رہے ہیں، مچھر دانیاں بھی تقسیم کر رہے ہیں

خیبر پختونخوا کے صوبائی صدر عارف اللہ خٹک کا کہنا تھا کہ خیبر پختونخوا میں سیلاب رب کی طرف سے آزمائش تھی ،ہزاروں خاندان بے گھر ہو گئے، قیمتی سامان،مال مویشی سب بہہ گیا، خواتین،بچے کھلے آسمان تلے زندگیاں گزار رہے ہیں، خیبر پختونخوا کا شمالی ریجن سیلاب سے متاثر ہوا ہے، باجوڑ،چترال،و دیگر علاقوں میں جو نقصان ہو اس کے بعد مرکزی مسلم لیگ فوری متحرک ہوئی، مینگورہ میں زیادہ نقصان ہوا ہے،شانگلہ میں بھی کوئی نہیں پہنچا،مرکزی مسلم لیگ پہنچی ہے، ریسکیو،ریلیف آپریشن جاری ہے.مرکزی مسلم لیگ کے دو ہزار سے زائد رضاکار ریسکیو وریلیف آپریشن میں مصروف ہیں،گھروں سے کیچڑ نکالا جا رہا،کئی مقامات سے ہمارے رضاکاروں نے لاشیں بھی نکالیں،ایک ایک گھر میں دس دس سے زیادہ اموات ہوئیں، بونیر،سوات،مینگورہ و دیگر علاقوں میں امدادی کیمپ لگائے گئے ہیں،مینگورہ میں تباہی زیادہ ہوئی،آدھا شہر ڈوب گیا،نقصانات بہت زیادہ ہیں لیکن نقصانات کم بتائے جا رہے،مینگورہ میں دس ہزار گھر متاثر،ہزاروں دکانیں ڈوب گئیں،گھروں میں دس دس فٹ پانی آیا،خواتین،بچوں نے چھتوں پر چڑھ کر جانیں بچائیں،

مرکزی مسلم لیگ کے ترجمان تابش قیوم کا کہنا تھا کہ مرکزی مسلم لیگ کی سیاست خدمت انسانیت ہے،سیلاب کےفوری بعد ملک بھر سے مرکزی مسلم لیگ کے رضاکار متاثرہ علاقوں میں پہنچے اور ریسکیو ،ریلیف آپریشن شروع کر دیا،بونیر ،مینگورہ،باجوڑ ، گلگت ، سکردو میں امدادی سرگرمیاں جاری ہیں،مرکزی مسلم لیگ روزانہ 2500متاثرین میں پکی پکائی خوراک تقسیم کر رہی ہے،مینگورہ بازار میں امدادی کیمپ قائم کیا ہے،3500 سے زائد خاندانوں میں خشک راشن تقسیم کر چکے،350 خاندانوں میں آ ج راشن اور امدادی سامان تقسیم کیا،مرکزی مسلم لیگ کی 32میڈیکل ٹیمیں متاثرہ علاقوں میں میڈیکل کیمپ لگا رہی ہیں،اب تک تقریبا ایک لاکھ سے زائد مریضوں کا علاج معالجہ کر چکے،مفت ادویات دی جا رہی ہیں،12 ہزار افراد میں صاف پانی تقسیم کیا گیا ہے جبکہ 18 سو بستر بھی تقسیم کیے گئے ہیں،،متاثرہ گھروں کا بھی ٹیمیں سروے کر رہی ہیں، مرکزی مسلم لیگ گھر بنا کر دے گی،گھروں میں کیچڑ کی صفائی کی وجہ سے رہنے کے قابل نہیں،مزید افرادی قوت کی ضرورت ہے،مشکل کی گھڑی میں قوم خدمت کے جذبے کے ساتھ متاثرین کی مدد کرے،مرکزی مسلم لیگ متاثرین کی بحالی تک امدادی سرگرمیاں جاری رکھے گی،

صوابی: خیبر پختونخوا کے ضلع صوابی میں موسمی صورتحال انتہائی خراب ہونے کے باعث شدید بارشوں اور کلاؤڈ برسٹ کے نتیجے میں 42 افراد جان سے ہاتھ دھو بیٹھے ہیں۔ چند روز قبل گاؤں دالوڑی بالا میں آنے والے کلاؤڈ برسٹ نے 17 گھروں کو مکمل طور پر تباہ کر دیا، جس کے باعث 40 افراد ملبے تلے دب گئے تھے۔

ڈپٹی کمشنر صوابی نصراللہ نے بتایا کہ متاثرہ علاقے میں ریسکیو آپریشن مکمل کر لیا گیا ہے۔ ریسکیو ٹیموں نے ملبے تلے سے 40 افراد کو نکالا، جن میں سے 37 افراد جاں بحق اور 3 زخمی ہیں۔انہوں نے مزید بتایا کہ صوابی کے دیگر علاقوں میں بھی کلاؤڈ برسٹ کی شدت برقرار رہی، جس سے کئی گھر متاثر ہوئے اور کئی مکینوں کی جانیں بھی گئیں۔ خاص طور پر سرکوئی پایاں میں کلاؤڈ برسٹ کی وجہ سے 4 افراد جاں بحق ہوئے، جب کہ کرنل شیر ندی کے مقام پر سیلابی ریلے میں بہنے والے ایک نوجوان کی لاش گزشتہ روز ریسکیو ٹیموں نے نکالی۔

ڈپٹی کمشنر نصراللہ نے کہا کہ مجموعی طور پر صوابی میں بارشوں اور کلاؤڈ برسٹ کی وجہ سے 42 افراد اپنی جانیں کھو چکے ہیں۔ دالوڑی بالا میں 17 گھر، سرکوئی میں ایک گھر مکمل طور پر تباہ ہوا ہے، جبکہ مجموعی طور پر 27 گھروں کو مختلف سطح پر نقصان پہنچا ہے۔ متاثرہ علاقے میں بحالی کے کام بھی جاری ہیں تاکہ متاثرین کو جلد از جلد سہولیات فراہم کی جا سکیں۔انتظامیہ اور ریسکیو ادارے متاثرہ علاقوں میں امدادی کارروائیاں جاری رکھے ہوئے ہیں اور حکومت نے متاثرہ خاندانوں کے لئے خصوصی امداد کا اعلان کیا ہے۔ شہریوں سے اپیل کی گئی ہے کہ وہ حکومتی ہدایات پر عمل کریں اور موسمی صورتحال کا خاص خیال رکھیں۔

خیبر پختونخوا کے سیلاب متاثرہ علاقوں میں مرکزی مسلم لیگ کی امدادی سرگرمیوں کا سلسلہ جاری ہے،مینگورہ میں تباہی ،10 ہزار گھر ڈوب گئے، مکین کھلے آسمان تلے زندگیاں گزارنے پر مجبور ہیں، مرکزی مسلم لیگ نے مینگورہ میں بھی ریلیف و ریسکیو آپریشن کے لئے کیمپ قائم کر دیا، دو ہزار افرادمیں مستقل بنیادوں پر روزانہ پکی پکائی خوراک تقسیم کی جا رہی ہے، میڈیکل کیمپ میں ہزاروں افراد کا علاج معالجہ کیا جا چکا ہے، مرکزی مسلم لیگ کے ڈپٹی سیکرٹری جنرل انجینئر حارث ڈار،مرکزی ترجمان تابش قیوم امدادی کاموں کی نگرانی کر رہے ہیں.

پاکستان مرکزی مسلم لیگ خیبر پختونخوا کے سیلاب سے متاثرہ علاقوں میں امدادی کاموں میں متحرک ہے،خالد مسعود سندھو کی ہدایت پر مرکزی مسلم لیگ نے بونیر ،سوات،مینگورہ و دیگر علاقوں میں امدادی کیمپ قائم کر دیئے ہیں،مرکزی مسلم لیگ کے ترجمان تابش قیوم و دیگر مینگورہ پہنچ چکے ہیں،انجینئر حارث ڈار،تابش قیوم نے مشترکہ پریس کانفرنس کرتے ہوئے بتایا کہ سیلاب نے علاقوں میں کچھ نہیں چھوڑا، جانی و مالی نقصان بہت زیادہ ہوئے ہیں، مینگورہ میں تباہی بہت زیادہ ہوئی ہے، 10 ہزار سے زائد گھر سیلاب میں ڈوبے، ہزاروں دکانیں پانی میں ڈوب گئی ہیں،دس دس فٹ پانی گھروں ،دکانوں میں آیا جس کے بعد وہاں مٹی اور کیچڑ ہے، گھروں کے مکین کھلے آسمان تلے زندگیاں بسر کر کرنے پر مجبور ہیں، ایسے میں مرکزی مسلم لیگ متاثرین میں روزانہ پکی پکائی خوراک تقسیم کر رہی ہے، دو ہزار سے زائد افراد میں کھانا تقسیم کیا جارہا ہے، میڈیکل کیمپ میں متاثرین کا مفت طبی معائنہ کیا جا رہا ہے، علاقے میں الرجی پھیل چکی ہے،جلدی بیماریاں زیادہ پھیل رہی ہیں، مرکزی مسلم لیگ کے مختلف شہروں سے طبی عملے کی ٹیمیں پہنچ چکی ہیں، ہزاروں نوجوان متحرک ہیں مگر افرادی قوت کی مزید ضرورت ہے کیونکہ گھروں سے کیچڑ نکال کر انہیں مکینوں کے لئے بحال کرنا ہے، مرکزی مسلم لیگ کے رضاکار رب کی رضا کے لئے خدمت کے عمل میں مصروف عمل ہیں،مزید بارش سے بچاؤ کے لئے متاثرین میں پلاسٹک کی چادریں بھی تقسیم کی جا رہی ہیں،ملک بھر سے مرکزی مسلم لیگ کے امدادی قافلے اضلاع کی سطح پر متاثرہ علاقوں میں امدادی سامان کے ہمراہ پہنچ رہے ہیں،اب تک مرکزی مسلم لیگ پانچ سو سے زائد خاندانوں میں خشک راشن بھی تقسیم کر چکی ہے ،ضرورت اس امر کی ہے کہ قوم مشکل کی اس گھڑی میں پیچھے نہ رہے بلکہ اخوت کے جذبے کو زندہ کرتے ہوئے اپنے متاثرہ بھائیوں کی مدد کریں.

پشاور: خیبرپختونخوا حکومت نے صوبے میں حالیہ کلاؤڈ برسٹ اور موسمیاتی تبدیلی کے اثرات کی تحقیقات کے لیے ایک تحقیقاتی ٹیم قائم کرنے کا فیصلہ کیا ہے۔ حکومتی ذرائع کے مطابق یہ ٹیم موسمیاتی تبدیلی کی وجوہات اور سیلاب زدہ علاقوں میں سیلاب کی شدت کے پیچھے عوامل کی تفصیلی جانچ کرے گی۔

سرکاری ذرائع کا کہنا ہے کہ تحقیقاتی ٹیم وفاقی وزارت ماحولیات، سپارکو (پاکستان اسپیس اینڈ اپلیکیشن سینٹر) اور پاکستان فارسٹ انسٹیٹیوٹ کے ماہرین پر مشتمل ہوگی۔ ٹیم خاص طور پر بونیر، صوابی اور دیگر سیلاب زدہ علاقوں کا دیگر علاقوں کے ساتھ موسمیاتی موازنہ کرے گی تاکہ موسمیاتی تبدیلی کے اثرات کی جامع سمجھ حاصل کی جا سکے۔ذرائع نے بتایا کہ تحقیقاتی ٹیم موسمیاتی تبدیلیوں کے اثرات، موسمیاتی ریکارڈ کا 20 سالہ جائزہ لے کر ایک مفصل رپورٹ مرتب کرے گی۔ رپورٹ میں سیلاب کی وجوہات اور مستقبل میں ایسے حادثات سے محفوظ رہنے کے لیے حفاظتی اقدامات کی تجاویز بھی شامل ہوں گی۔

اس حوالے سے سیکریٹری محکمہ جنگلات، شاہد زمان نے جیو نیوز سے گفتگو کرتے ہوئے کہا کہ موسمیاتی تبدیلی اور کلاؤڈ برسٹ جیسے واقعات کی وجوہات جاننے کے لیے ایک کمیٹی قائم کی جائے گی۔ ان کا کہنا تھا کہ ملک بھر خاص طور پر خیبرپختونخوا میں موسمیاتی تبدیلی کی بڑی وجہ ترقی یافتہ ممالک کی صنعتی سرگرمیاں ہیں، جن سے خارج ہونے والی گرین ہاؤس گیسز موسم پر گہرے اثرات ڈال رہی ہیں۔شاہد زمان نے مزید کہا کہ موسمیاتی تبدیلی کے منفی اثرات سے بچنے کے لیے شجرکاری پر خصوصی توجہ دی جا رہی ہے تاکہ فطرت کو محفوظ بنایا جا سکے اور آلودگی کم کی جا سکے۔

وزیر اعلیٰ خیبر پختونخوا علی امین گنڈا پور نے سیلاب زدگان کی مدد کے لیے اہم اعلان کر دیا ہے۔

انہوں نے اپنے اور کابینہ ارکان کی تنخواہوں کا حصہ سیلاب متاثرین کو دینے کا فیصلہ کیا ہے۔ وزیر اعلیٰ نے کہا ہے کہ وہ خود ایک ماہ کی تنخواہ سیلاب متاثرین کو دیں گے، جبکہ کابینہ کے دیگر ارکان اپنی 15 دن کی تنخواہ عطیہ کریں گے۔مزید برآں، صوبائی اسمبلی کے ارکان کی 7 دن کی تنخواہ، اسکیل 17 اور اس سے اوپر کے ملازمین کی دو دن کی تنخواہ اور اسکیل 1 سے 16 تک کے ملازمین کی ایک دن کی تنخواہ بھی سیلاب زدگان کی مدد کے لیے مختص کی جائے گی۔ یہ اقدام متاثرین کی فوری مدد اور ریلیف کے لیے کیا جا رہا ہے۔

وزیر اعلیٰ علی امین گنڈا پور نے عطیات کے شفاف استعمال کو یقینی بنانے کے لیے پی ڈی ایم اے (پبلک ڈیزاسٹر مینجمنٹ اتھارٹی) میں خصوصی اکاؤنٹ کھولنے کا اعلان کیا ہے، جس میں فنڈ کی ایک ایک پائی کا مکمل حساب رکھا جائے گا۔ عوام کو اس فنڈ کی تفصیلات سے مکمل آگاہ رکھا جائے گا تاکہ شفافیت برقرار رہے۔اسی سلسلے میں، وزیر اعلیٰ نے کمشنر مردان ڈویژن اور دیگر حکام سے رابطہ کیا ہے تاکہ ریسکیو اور ریلیف آپریشنز کو تیز کیا جا سکے۔ انہوں نے ڈپٹی کمشنر صوابی کو متاثرہ علاقوں کا دورہ کر کے ریسکیو سرگرمیوں کی نگرانی کرنے کی خصوصی ہدایت بھی دی ہے۔

خیبر پختونخوا کے مختلف شہروں میں حالیہ بارشوں اور سیلابی ریلوں کی وجہ سے زبردست تباہی ہوئی ہے۔ خاص طور پر پشاور، مردان، صوابی اور ایبٹ آباد میں شدید بارش اور لینڈ سلائیڈنگ نے کئی گھروں کو نقصان پہنچایا ہے۔ صوابی میں کلاؤڈ برسٹ کے باعث 15 افراد سیلابی ریلے میں بہہ گئے جبکہ لینڈ سلائیڈنگ کی وجہ سے کئی راستے بند ہو چکے ہیں۔ کرنل شیر ندی میں دو افراد کی تلاش جاری ہے۔

مردان میں بارشوں کی وجہ سے متعدد علاقے زیر آب آ گئے ہیں، اور سیلابی ریلے نے گاڑیاں بھی بہا لے جانے کے علاوہ گھروں میں پانی داخل کر دیا ہے۔ حکام نے عوام کو ہدایت کی ہے کہ وہ محفوظ مقامات پر منتقل ہو جائیں اور کسی بھی ہنگامی صورتحال کے لیے تیار رہیں۔