Category: پشاور

پشاور: خیبر پختونخوا میں 15 اگست سے 22 اگست کے دوران موسلادھار بارشوں اور شدید سیلاب نے صوبے کے مواصلاتی نظام کو بری طرح متاثر کیا ہے۔ محکمہ مواصلات و تعمیرات کی جاری کردہ رپورٹ کے مطابق مختلف اضلاع میں سڑکوں اور پلوں کو شدید نقصان پہنچا ہے، جس سے کئی راستے بند ہو گئے ہیں اور کئی علاقوں کی رابطہ کاری متاثر ہوئی ہے۔

رپورٹ کے مطابق سیلاب اور لینڈ سلائیڈنگ سے مجموعی طور پر 331 سڑکوں کو 336 مختلف مقامات پر نقصان پہنچا، جس کی کل لمبائی 493 کلومیٹر ہے۔ ان میں سے 57 سڑکیں تاحال مکمل بند ہیں۔ سڑکوں کی بحالی پر اندازاً 9 ارب 45 کروڑ روپے خرچ ہوں گے۔ اب تک 229 سڑکیں جزوی طور پر اور 50 سڑکیں مکمل طور پر بحال کی جا چکی ہیں۔پلوں کی صورتحال بھی تشویشناک ہے، جہاں 32 پل سیلاب کی نذر ہوگئے ہیں۔ ان میں سے ایک پل مکمل طور پر ٹریفک کے لیے کھول دیا گیا ہے، جبکہ 22 پل جزوی طور پر کھول دیے گئے ہیں۔ باقی 9 پل ابھی بھی بند ہیں۔ پلوں کی مرمت پر تقریباً ایک ارب 12 کروڑ روپے لاگت آئے گی۔

سوات: سب سے زیادہ نقصان سوات میں ہوا ہے جہاں 79 سڑکیں 80 مقامات پر متاثر ہوئیں۔ یہاں 43 کلومیٹر سڑکیں سیلاب میں بہہ گئیں۔ اب تک 3 سڑکیں مکمل اور 75 سڑکیں جزوی طور پر بحال ہو چکی ہیں، جبکہ 2 سڑکیں بند ہیں۔ سوات میں سڑکوں کی بحالی پر 45 کروڑ روپے سے زائد لاگت آئے گی۔

بونیر: بونیر میں 43 سڑکیں متاثر ہوئیں جن میں سے 39 سڑکیں جزوی طور پر بحال ہو چکی ہیں اور 4 سڑکیں مکمل بند ہیں۔ بونیر میں بحالی کے لیے ساڑھے 4 ارب روپے کی لاگت درکار ہے۔

صوابی: صوابی میں 41 سڑکیں متاثر ہوئی ہیں، جن میں سے 32 اب تک بحال نہیں ہو سکیں۔ یہاں سڑکوں کی بحالی پر 2 ارب 76 کروڑ روپے خرچ کیے جائیں گے۔

محکمہ مواصلات و تعمیرات کے سیکرٹری محمد اسرار نے جیو نیوز سے گفتگو میں بتایا کہ تیز بارشوں اور سیلاب کے باعث خاص طور پر بونیر، صوابی اور دیگر اضلاع میں شدید نقصان ہوا ہے۔ انہوں نے کہا کہ 15 اگست کو محکمہ خزانہ کو ڈیڑھ ارب روپے جاری کرنے کی درخواست کی گئی تھی، جس میں سے 70 کروڑ روپے فوری طور پر جاری کر دیے گئے ہیں۔ ان میں 40 کروڑ مالاکنڈ، 10 کروڑ ہزارہ ریجن، اور 20 کروڑ پختونخوا ہائی ویز اتھارٹی کو دیے گئے ہیں۔محمد اسرار نے مزید بتایا کہ 186 چھوٹی بڑی مشینریوں کے ذریعے سڑکوں کی بحالی کا کام تیزی سے جاری ہے تاکہ جلد از جلد رابطے بحال کیے جا سکیں اور متاثرہ علاقوں کی ترقیاتی سرگرمیاں معمول پر آ سکیں

خیبرپختونخوا آرمی فلڈ ریلیف آپریشن جاری ہے،پاک فوج کی کوششوں سے بونیر میں قادر نگر سے بھٹائی دارا جانے والی سڑک کھول دی گئی

اس کے علاوہ پاک فوج کی اربن سرچ اینڈ ریسکیو ٹیم ملبے سے لاشیں ڈھونڈنے میں مقامی انتظامیہ کی مدد کر رہی ہے،پاک فوج کا بونیر، سوات ، شانگلہ اور صوابی کے سیلاب زدہ علاقوں میں فلڈ ریلیف آپریشن آٹھویں روز بھی جاری ہے،پاک فوج کی کور آف انجینئرز کے دستے راستوں کو کھولنے اور ملبے کو ہٹانے میں مصروف ہیں،پاک فوج کے ہیلی کاپٹرز میں راشن اور دیگر سامان مہیا کیا جا رہا ہے اور سیلاب زدہ علاقوں سے لوگوں کو محفوظ مقامات پر منتقل کیا جا رہا ہے،پاک فوج کے ڈاکٹرز متاثرہ علاقوں میں کیمپس لگا کے مریضوں کے مفت علاج میں مصروف ہیں،پاک فوج سیلاب سمیت تمام قدرتی آفات میں اپنی عوام کی خدمت میں پیش پیش، سیلاب زدگان کی بحالی اور مکمل ریسیکیو تک پاک فوج کا ریسیکیو مشن جاری رہے گا

خیبر پختونخوا حکومت نے چند روز قبل حادثے کا شکار ہونے والے ہیلی کاپٹر کی جگہ نیا ہیلی کاپٹر خریدنے کا فیصلہ کیا ہے۔

نجی ٹی وی کے مطابق چیف سیکریٹری کے پی شہاب علی شاہ نے نیا ہیلی کاپٹر خریدنے کے فیصلے کی تصدیق کرتے ہوئے بتایا کہ قدرتی آفات سمیت دیگر کاموں میں ہیلی کاپٹر کی ضرورت ہوتی ہے۔شہاب علی شاہ نے کہا کہ مہمند میں ہیلی کاپٹر گرنے کے بعد حکومت کے پاس ایک ہیلی کاپٹر رہ گیا تھا اس لیے دوسرا ہیلی کاپٹر خریدنے کا فیصلہ کیا۔

وزیر اعلیٰ خیبر پختونخوا علی امین گنڈا پور کا کہنا ہے کہ ہیلی کاپٹر عملے نے دوسروں کیلئے اپنی جانیں قربان کیں، یہ ہمارے اصل ہیرو ہیں، ان کی قربانی سنہرے حروف میں لکھی جائےگی۔علی امین گنڈا پور نے بتایا کہ صوبائی حکومت نے شہداء کے لواحقین کو خصوصی پیکج دینے کی منظوری دی، صوبائی حکومت شہداء کے ورثا کو تنہا نہیں چھوڑے گی۔

ذرائع کا بتانا ہے کہ ہیلی کاپٹر حادثے کے شہدا کے لواحقین کو پولیس کے برابر کا شہدا پیکج دیا جائے گا۔سرکاری ذرائع کے مطابق ہیلی کاپٹر کے عملے کےپانچوں افراد کنٹریکٹ ملازمین تھے، ہیلی کاپٹر حادثے میں شہید ہونے والے دونوں پائلٹس کے ورثا کو اسکیل 19 پولیس افسرکے شہدا پیکج کے برابر پیکج دیا جائے گا، دونوں پائلٹس کے لواحقین کو 2، 2 کروڑ روپےکا پیکج دیا جائے گا۔ذرائع کا بتانا ہے کہ پائلٹس میں کرنل ریٹائرڈ شاہد سلطان اور آفتاب شامل ہیں جبکہ فلائٹ انجنیئر سلیم کے ورثا کو ڈیڑھ کروڑ روپے دیے جائیں گے اور دو کریو چیفس کے لواحقین کو ایک، ایک کروڑ روپے دیے جائیں گے۔

یاد رہے کہ 15 اگست کو باجوڑ ریلیف آپریشن کے دوران خیبر پختونخوا حکومت کا سرکاری ہیلی کاپٹر حادثے کا شکار ہوا تھا جس کے نتیجے میں 5 افراد جاں بحق ہوئے تھے۔

پاکستان مرکزی مسلم لیگ کے رہنماؤں نےکہا ہے کہ خیبر پختونخوا میں‌سیلاب سے نقصانات بہت زیادہ ہوئے،ہزاروں گھر تباہ ہوئے،خواتین وبچے اب بھی گھروں سے باہر کیونکہ گھر رہنے کے قابل نہیں رہے،بیماریاں پھیل رہی ہیں، خوراک،صاف پانی کی کمی ہے،مرکزی مسلم لیگ کے دو ہزار سے زائد رضاکار ریسکیو و ریلیف آپریشن میں مصروف ہیں، خشک راشن کی تقسیم اور مفت علاج معالجے کا سلسلہ بھی جاری ہے

ان خیالات کا اظہار مرکزی مسلم لیگ ،خدمت خلق کے چیئرمین شفیق الرحمان وڑائچ، خیبر پختونخوا کے صوبائی صدر عارف اللہ خٹک، مرکزی ترجمان تابش قیوم،مرکزی مسلم لیگ وسطی پنجاب کے صدر حمید الحسن،مرکزی مسلم لیگ راولپنڈی کے سیکرٹری جنرل انجنینئر مبین صدیقی,مرکزی مسلم لیگ فیصل آباد کے سیکرٹری جنرل احسن تارڑ نے مینگورہ بازار میں مرکزی مسلم لیگ کے امدادی کیمپ میں متاثرین میں سامان کی تقسیم کے موقع پر میڈیا سے گفتگو کرتے ہوئے کیا، اس موقع پر مینگورہ کے سیلاب متاثرین 350 خاندانوں میں خشک راشن سمیت دیگر امدادی سامان تقسیم کیا گیا،اس موقع پر مرکزی مسلم لیگ کے ڈپٹی سیکرٹری اطلاعات طہٰ منیب، ترجمان خیبر پختونخوا محمد عبداللہ بھی موجودتھے،شفیق الرحمان وڑائچ کاکہنا تھا کہ جمعہ کو سیلاب آیا اور شدید ترین سیلاب نے علاقوں کے علاقے ہلا ڈالے، کافی اموات ہوئیں، مالی نقصان کو تو اندازہ ہی نہیں ہو رہا،شانگلہ،مینگورہ،بونیر دیکھیں ،باجوڑ میں آپریشن کے متاثرین الگ ہیں اور سیلاب متاثرین الگ،گلگت ،سکردو میں بھی نقصان ہوا،کچھ علاقے جہاں شدید تباہی ہے وہ ابھی بھی نظر انداز ہیں، مینگورہ میں چھ ہزار سے زائد گھر متاثر ہوئے، گھر ختم،سیلاب بہہ گئے، ان حالات میں جمعہ کے دن سے فوری طور پر ریسکیو کا آپریشن شروع کیا، لاشیں نکالی،جنازے پڑھے،ہفتے سے ملک بھر سے میڈیکل ٹیمیں روانہ ہوئیں ،پکی پکائی خوراک تقسیم کی جا رہی ہے، دن رات ہمارے رضاکار کام کر رہے ہیں، ساڑھے تین ہزار افراد تک راشن پہنچایا گیا ہے،اگلے مرحلے میں ہم ملبہ اٹھانے کا کام کریں گے، کئی لوگوں کی ابھی تک لاشیں نہیں ملیں، گھروں، دکانوں کو تعمیر کریں گے،باجوڑ میں بھی امدادی کام جاری ہے،ہم سکردو سے بونیر ،باجوڑ تک کام کر رہے ہیں،مینگورہ میں ہمیں بھی یہ اندازہ نہیں تھا کہ اتنا نقصان ہوا،مینگورہ میں آج 350 سے زائد خاندانوں میں لاکھوں روپے مالیت کا راشن تقسیم کر رہے ہیں، مچھر دانیاں بھی تقسیم کر رہے ہیں

خیبر پختونخوا کے صوبائی صدر عارف اللہ خٹک کا کہنا تھا کہ خیبر پختونخوا میں سیلاب رب کی طرف سے آزمائش تھی ،ہزاروں خاندان بے گھر ہو گئے، قیمتی سامان،مال مویشی سب بہہ گیا، خواتین،بچے کھلے آسمان تلے زندگیاں گزار رہے ہیں، خیبر پختونخوا کا شمالی ریجن سیلاب سے متاثر ہوا ہے، باجوڑ،چترال،و دیگر علاقوں میں جو نقصان ہو اس کے بعد مرکزی مسلم لیگ فوری متحرک ہوئی، مینگورہ میں زیادہ نقصان ہوا ہے،شانگلہ میں بھی کوئی نہیں پہنچا،مرکزی مسلم لیگ پہنچی ہے، ریسکیو،ریلیف آپریشن جاری ہے.مرکزی مسلم لیگ کے دو ہزار سے زائد رضاکار ریسکیو وریلیف آپریشن میں مصروف ہیں،گھروں سے کیچڑ نکالا جا رہا،کئی مقامات سے ہمارے رضاکاروں نے لاشیں بھی نکالیں،ایک ایک گھر میں دس دس سے زیادہ اموات ہوئیں، بونیر،سوات،مینگورہ و دیگر علاقوں میں امدادی کیمپ لگائے گئے ہیں،مینگورہ میں تباہی زیادہ ہوئی،آدھا شہر ڈوب گیا،نقصانات بہت زیادہ ہیں لیکن نقصانات کم بتائے جا رہے،مینگورہ میں دس ہزار گھر متاثر،ہزاروں دکانیں ڈوب گئیں،گھروں میں دس دس فٹ پانی آیا،خواتین،بچوں نے چھتوں پر چڑھ کر جانیں بچائیں،

مرکزی مسلم لیگ کے ترجمان تابش قیوم کا کہنا تھا کہ مرکزی مسلم لیگ کی سیاست خدمت انسانیت ہے،سیلاب کےفوری بعد ملک بھر سے مرکزی مسلم لیگ کے رضاکار متاثرہ علاقوں میں پہنچے اور ریسکیو ،ریلیف آپریشن شروع کر دیا،بونیر ،مینگورہ،باجوڑ ، گلگت ، سکردو میں امدادی سرگرمیاں جاری ہیں،مرکزی مسلم لیگ روزانہ 2500متاثرین میں پکی پکائی خوراک تقسیم کر رہی ہے،مینگورہ بازار میں امدادی کیمپ قائم کیا ہے،3500 سے زائد خاندانوں میں خشک راشن تقسیم کر چکے،350 خاندانوں میں آ ج راشن اور امدادی سامان تقسیم کیا،مرکزی مسلم لیگ کی 32میڈیکل ٹیمیں متاثرہ علاقوں میں میڈیکل کیمپ لگا رہی ہیں،اب تک تقریبا ایک لاکھ سے زائد مریضوں کا علاج معالجہ کر چکے،مفت ادویات دی جا رہی ہیں،12 ہزار افراد میں صاف پانی تقسیم کیا گیا ہے جبکہ 18 سو بستر بھی تقسیم کیے گئے ہیں،،متاثرہ گھروں کا بھی ٹیمیں سروے کر رہی ہیں، مرکزی مسلم لیگ گھر بنا کر دے گی،گھروں میں کیچڑ کی صفائی کی وجہ سے رہنے کے قابل نہیں،مزید افرادی قوت کی ضرورت ہے،مشکل کی گھڑی میں قوم خدمت کے جذبے کے ساتھ متاثرین کی مدد کرے،مرکزی مسلم لیگ متاثرین کی بحالی تک امدادی سرگرمیاں جاری رکھے گی،

صوابی: خیبر پختونخوا کے ضلع صوابی میں موسمی صورتحال انتہائی خراب ہونے کے باعث شدید بارشوں اور کلاؤڈ برسٹ کے نتیجے میں 42 افراد جان سے ہاتھ دھو بیٹھے ہیں۔ چند روز قبل گاؤں دالوڑی بالا میں آنے والے کلاؤڈ برسٹ نے 17 گھروں کو مکمل طور پر تباہ کر دیا، جس کے باعث 40 افراد ملبے تلے دب گئے تھے۔

ڈپٹی کمشنر صوابی نصراللہ نے بتایا کہ متاثرہ علاقے میں ریسکیو آپریشن مکمل کر لیا گیا ہے۔ ریسکیو ٹیموں نے ملبے تلے سے 40 افراد کو نکالا، جن میں سے 37 افراد جاں بحق اور 3 زخمی ہیں۔انہوں نے مزید بتایا کہ صوابی کے دیگر علاقوں میں بھی کلاؤڈ برسٹ کی شدت برقرار رہی، جس سے کئی گھر متاثر ہوئے اور کئی مکینوں کی جانیں بھی گئیں۔ خاص طور پر سرکوئی پایاں میں کلاؤڈ برسٹ کی وجہ سے 4 افراد جاں بحق ہوئے، جب کہ کرنل شیر ندی کے مقام پر سیلابی ریلے میں بہنے والے ایک نوجوان کی لاش گزشتہ روز ریسکیو ٹیموں نے نکالی۔

ڈپٹی کمشنر نصراللہ نے کہا کہ مجموعی طور پر صوابی میں بارشوں اور کلاؤڈ برسٹ کی وجہ سے 42 افراد اپنی جانیں کھو چکے ہیں۔ دالوڑی بالا میں 17 گھر، سرکوئی میں ایک گھر مکمل طور پر تباہ ہوا ہے، جبکہ مجموعی طور پر 27 گھروں کو مختلف سطح پر نقصان پہنچا ہے۔ متاثرہ علاقے میں بحالی کے کام بھی جاری ہیں تاکہ متاثرین کو جلد از جلد سہولیات فراہم کی جا سکیں۔انتظامیہ اور ریسکیو ادارے متاثرہ علاقوں میں امدادی کارروائیاں جاری رکھے ہوئے ہیں اور حکومت نے متاثرہ خاندانوں کے لئے خصوصی امداد کا اعلان کیا ہے۔ شہریوں سے اپیل کی گئی ہے کہ وہ حکومتی ہدایات پر عمل کریں اور موسمی صورتحال کا خاص خیال رکھیں۔