Category: پشاور

جے یوآئی مالاکنڈ کے امیر مفتی کفایت اللہ کے گھر پرفائر نگ ہوئی ہے

مفتی کفایت اللہ کا بیٹا اور بیٹی فائرنگ سے جاں بحق جبکہ مفتی کفایت اللہ اور دوسری بیٹی شدید زخمی ہو گئے،زخمیوں اور لاشوں کو ہسپتال منتقل کر دیا گیا ہے ،اطلاع پر پولیس موقع پر پہنچ گئی ،پولیس نے واقعہ کی تحقیقات کا آغاز کر دیا ہے،میڈیا رپورٹس کے مطابق جمعیت علماء اسلام ضلع مالاکنڈ کے امیر مفتی کفایت اللہ مبینہ طور پر اپنے بیٹے کی فائرنگ سے شدید زخمی ہوگئے۔ فائرنگ کے نتیجے میں ان کا دوسرا بیٹا (عصمت اللہ، جو لیویز فورس میں ملازم تھا) اپنی والدہ سمیت جاں بحق ہوگیا، جبکہ ایک بیٹی شدید زخمی ہے۔ملزم موقع سے فرار ہوگیا

بنوں: ضلع بنوں کی ولی نور اور سردی خیل چیک پوسٹوں پر دہشتگردوں نے رات گئے حملہ کیا، تاہم سکیورٹی فورسز کی فوری اور موثر جوابی کارروائی کے باعث حملہ ناکام بن گیا اور دہشتگرد فرار ہو گئے۔

پولیس حکام نے بتایا کہ دہشتگردوں نے اچانک چیک پوسٹوں پر فائرنگ اور دستی بم پھینکنے کی کوشش کی، مگر سکیورٹی اہلکاروں نے بھرپور مزاحمت کی اور علاقے کو محفوظ بنایا۔ اس کارروائی میں کسی سکیورٹی اہلکار یا عام شہری کے زخمی یا ہلاک ہونے کی اطلاع نہیں ہے۔پولیس نے کہا ہے کہ حملہ آوروں کی شناخت اور گرفتاری کے لیے سرچ آپریشن جاری ہے، اور علاقے میں چیک پوسٹوں کی سیکیورٹی مزید سخت کر دی گئی ہے تاکہ آئندہ کسی بھی حملے کی کوشش کو روکا جا سکے۔

سکیورٹی فورسز نے عوام سے اپیل کی ہے کہ وہ مشتبہ افراد کی موجودگی کی اطلاع فوراً متعلقہ حکام کو دیں تاکہ دہشتگردی کی وارداتوں کو مکمل طور پر ناکام بنایا جا سکے۔

پروونشل ڈیزاسٹر مینجمنٹ اتھارٹی (پی ڈی ایم اے) خیبر پختونخوا نے گزشتہ 48 گھنٹوں کے دوران بارشوں اور سیلاب سے ہونے والے جانی و مالی نقصان کی تفصیلات جاری کر دیں۔

پی ڈی ایم اے کی جانب سے جاری اعداد و شمار کے مطابق بارش اور سیلاب کے باعث حادثات میں اب تک 307 افراد جاں بحق ہوئے، جاں بحق افراد میں 279 مرد، 15 خواتین اور 13 بچے شامل ہیں۔اعداد و شمار کے مطابق مختلف حادثات میں 23 افراد زخمی بھی ہوئے، زخمیوں میں 17 مرد، 4 خواتین اور دو بچے شامل ہے۔

صوبائی ڈیزاسٹر مینجمنٹ اتھارٹی کے مطابق بارشوں اور سیلاب کے باعث مجموعی طور پر 74 گھروں کو نقصان پہنچا، 63 گھروں کو جزوی نقصان پہنچا جبکہ 11 گھر مکمل طور پر تباہ ہوئے۔پی ڈی ایم اے کا بتانا ہے کہ حادثات سوات، بونیر، باجوڑ، تورغر، مانسہرہ، شانگلہ اور بٹگرام میں پیش آئے۔پروونشل اتھارٹی کے مطابق متاثرہ اضلاع کیلئے مجموعی طور پر50 کروڑ روپے جاری کر دیے گئے ہیں، جس میں سے بونیر کیلئے 15 کروڑ روپے جاری کیےگئے جبکہ باجوڑ، بٹگرام اور مانسہرہ کے لیے 10، 10 کروڑ روپے اور اور سوات کے لیے 5 كروڑ روپے جاری کیے گئے۔

مشیر اطلاعات خیبر پختونخوا بیرسٹر محمد علی سیف کا اس حوالے سے بتانا ہے کہ صوبے کے 11 اضلاع کلاؤڈ برسٹ اور سیلاب سے متاثر ہوئے، سیلاب سے متاثرہ افراد کی مجموعی تعداد 3 ہزار817 ہے۔بیرسٹر سیف نے بتایا کہ متاثرہ علاقوں میں 32 افراد تاحال لاپتا ہیں جن کی تلاش جاری ہے، 545 ریسکیو اہلکار اور90 گاڑیاں اور کشتیاں امدادی سرگرمیوں میں حصہ لے رہے ہیں۔انہوں نے بتایا کہ سب سے زیادہ بونیر میں 159 افراد جاں بحق ہوئے جبکہ 100 افراد کو زندہ بچالیا گیا، باجوڑ میں 20 افراد جاں بحق جبکہ ایک شخص لاپتا ہے، بٹگرام میں 11 افراد کی لاشیں ملی ہیں جبکہ 10 افراد لاپتا ہیں۔

وزیرِ اعلیٰ خیبر پختونخوا علی امین گنڈاپور نے بارش و سیلاب سے صوبے میں ہونے والے جانی نقصان پر کل سوگ کا اعلان کر دیا۔

کل صوبے میں قومی پرچم سرنگوں رہے گا.وزیرِ اعلیٰ خیبر پختونخوا علی امین گنڈاپور نے بتایا ہے کہ باجوڑ میں امدادی سامان لے جانے والا صوبائی حکومت کا ہیلی کاپٹر خراب موسم کے باعث کریش ہوا۔ ہیلی کاپٹر حادثے میں 2 پائلٹس سمیت عملے کے 5 افراد شہید ہوئے، حادثے کی جگہ پر امدادی ٹیمیں روانہ کر دی گئی ہیں۔وزیرِ اعلیٰ خیبر پختونخوا علی امین گنڈاپور کا یہ بھی کہنا ہے کہ شہداء کو سرکاری اعزاز کے ساتھ سپردِ خاک کیا جائے گا۔

وزیراعظم شہباز شریف نے خیبر پختونخوا، گلگت بلتستان اور آزاد کشمیر میں بڑے پیمانے پر ہونے والی تباہی پر چیئرمین نیشنل ڈیزاسٹر مینجمنٹ اتھارٹی (این ڈی ایم اے) سے رابطہ کیا ہے،وزیراعظم نے چیئرمین این ڈی اے ایم لیفٹیننٹ جنرل انعام حیدر کو ہدایت کی کہ خیبر پختونخوا میں بھرپور امدادی کارروائیاں کی جائیں،شہباز شریف نے مزید کہا کہ این ڈی ایم اے خیبر پختونخوا میں امدادی سرگرمیوں کے لئے تمام وسائل بروئے کار لائے جائیں،وزیراعظم نے چیئرمین این ڈی ایم اے کو ہدایت کی کہ خیبر پختونخوا حکومت سے امدادی سرگرمیوں کے لیے رابطے میں رہیں۔

خیبر پختون خوا میں حالیہ بارشوں اور سیلاب کے باعث ہونے والے جانی و مالی نقصانات کی ابتدائی تفصیلات جاری کر دی گئیں۔

پرونشل ڈیزاسٹر مینجمنٹ اتھارٹی (پی ڈی ایم اے) خیبر پختونخوا کے مطابق گزشتہ 24 گھنٹوں میں بارشوں کے باعث مختلف حادثات میں 43 افراد جاں بحق اور 14 افراد زخمی ہوئے۔پی ڈی ایم اے (کے پی) کی جانب سے جاری اعداد و شمار کے مطابق جاں بحق افراد میں 33 مرد، 2 خواتین اور 8 بچے شامل ہیں جبکہ زخمیوں میں 11 مرد، 2 خواتین اور1 بچہ شامل ہے۔اعداد و شمار کے مطابق بارشوں کے باعث مجموعی طور پر 30 گھروں کو نقصان پہنچا، 25 گھروں کو جزوی نقصان پہنچا جبکہ 5 گھر مکمل تباہ ہوئے۔پی ڈی ایم اے کی جانب سے بتایا گیا ہے کہ حادثات سوات، بونیر، باجوڑ، تورغر، مانسہرہ، شانگلہ اور بٹگرام میں پیش آئے، سب سے زیادہ متاثرہ اضلاع باجوڑ اور بٹگرام ہیں جہاں ریسکیو آپریشن جاری ہے۔صوبائی ادارے کا کہنا ہے کہ شدید بارشوں کا سلسلہ 21 اگست تک وقفے وقفے سے جاری رہنے کا امکان ہے۔

خیال رہے کہ خیبر پختونخوا کے علاوہ آزاد کشمیر اور گلگت بلتستان میں بھی کلاؤڈ برسٹ اور بارشوں کے باعث بڑے پیمانے پر جانی و مالی نقصان ہوا۔

خیبرپختونخوا میں گزشتہ تین دنوں کے دوران دہشتگردوں نے 10 مختلف مقامات پر پولیس اور سیکیورٹی فورسز پر حملے کیے ہیں۔ پولیس کے مطابق یہ حملے پشاور، دیر اپر، دیر لوئر، شانگلہ اور بنوں میں کیے گئے، جن میں متعدد سیکیورٹی اہلکار شہید اور زخمی ہوئے ہیں۔

پولیس حکام کا کہنا ہے کہ 14 اگست کی رات پشاور کے تین مختلف مقامات پر دہشتگردوں نے منظم حملے کیے، جن میں پولیس چوکیوں اور تھانہ حسن خیل کو نشانہ بنایا گیا۔ ان حملوں میں پولیس کی جانی و مالی حفاظت کو خاص نقصان پہنچا۔اسی دوران 15 اگست کی صبح ناصر باغ روڈ پر ایک پولیس وین پر دھماکے سے بھی سیکیورٹی فورسز کو نقصان پہنچا۔ پولیس کا کہنا ہے کہ دھماکے میں وین کو شدید نقصان پہنچا اور اہلکار زخمی ہوئے۔خیبرپختونخوا پولیس نے تصدیق کی ہے کہ ان دہشتگرد حملوں کے نتیجے میں 5 پولیس اہلکار شہید اور 5 دیگر زخمی ہوئے ہیں۔ سیکیورٹی ادارے علاقے میں دہشتگردوں کی کارروائیوں کو روکنے اور صورتحال کو قابو میں رکھنے کے لیے بھرپور کوششیں کر رہے ہیں۔حکام کا کہنا ہے کہ علاقے میں مزید سیکورٹی اقدامات کیے جا رہے ہیں اور دہشتگردوں کے خلاف آپریشنز کو تیز کر دیا گیا ہے تاکہ عوام کو محفوظ بنایا جا سکے۔