Category: پشاور

خیبر(باغی ٹی وی رپورٹ) بابِ خیبر پر بھارتی جارحیت کے خلاف خیبر پولیس اور قبائلی عمائدین کا بھرپور احتجاج

قبائلی ضلع خیبر میں بھارتی جارحیت، کشمیریوں پر مظالم اور پاکستان کے خلاف اشتعال انگیزی کے خلاف ایک پرامن مگر پُرجوش احتجاجی مظاہرے کا انعقاد کیا گیا۔ مظاہرہ جمرود کے تاریخی مقام بابِ خیبر پر کیا گیا، جہاں خیبر پولیس، قبائلی مشران، سماجی رہنما اور شہریوں کی بڑی تعداد شریک ہوئی۔

مظاہرین نے بھارت مخالف بینرز اور پلے کارڈز اٹھا رکھے تھے جن پر بھارتی سرحدی خلاف ورزیوں اور کشمیری عوام پر مظالم کے خلاف شدید نعرے درج تھے۔ شرکاء نے اقوامِ متحدہ اور عالمی برادری سے مطالبہ کیا کہ وہ بھارتی جارحیت کا نوٹس لے اور خطے میں امن و استحکام کے لیے فوری اقدامات کرے۔

مظاہرے سے خطاب کرتے ہوئے تحصیل چیئرمین حاجی عظمت خان، عبدالمنان مدوخیل، حضرت ولی آفریدی، خالد اکبر، حاجی خان، زیور جان اور دیگر قبائلی مشران نے کہا کہ قبائلی عوام مادرِ وطن کے دفاع کے لیے ہر وقت تیار ہیں۔ انہوں نے کہا کہ بھارت کا جنگی جنون نہ صرف پاکستان بلکہ پورے خطے کے امن کے لیے سنگین خطرہ ہے۔

اس موقع پر ڈی ایس پی سرکل جمرود محمد نواز، ایس ایچ او نسیم خان، ایڈیشنل ایس ایچ او خالد خان، غفار خان، حسین زادہ اور رفیع اللہ نے بھی شرکت کی۔ پولیس افسران نے کہا کہ خیبر پولیس صرف داخلی سلامتی تک محدود نہیں بلکہ قومی دفاع کے ہر محاذ پر متحرک ہے۔ انہوں نے کہا کہ یہ مظاہرہ قبائلی عوام اور پولیس کے درمیان اتحاد اور یکجہتی کی علامت ہے۔

احتجاجی مظاہرہ پُرامن طور پر اختتام پذیر ہوا، اور آخر میں پاکستان کی سلامتی، کشمیری عوام کی آزادی اور خطے کے امن کے لیے خصوصی دعا کی گئی۔

لنڈی کوتل (باغی ٹی وی رپورٹ) میری خیل قوم کے مشران کی جانب سے لگائے گئے حالیہ الزامات کو بے بنیاد، من گھڑت اور گمراہ کن قرار دیتے ہوئے مولانا تاج علی شاہ نے اپنے رفقا کے ہمراہ ڈسٹرکٹ خیبر پریس کلب لنڈی کوتل (رجسٹرڈ) میں ہنگامی پریس کانفرنس سے خطاب کیا۔ پریس کانفرنس میں ان کے ہمراہ جاوید، حاجی ماسم، کتاب شاہ، عظمت شیر اور امتحان شاہ بھی موجود تھے۔

مولانا تاج علی شاہ نے وضاحت کی کہ ان پر واٹر سپلائی اسکیم کی منتقلی سے متعلق جو الزامات لگائے جا رہے ہیں ان میں کوئی صداقت نہیں، بلکہ یہ سب ان کی ساکھ کو مجروح کرنے کی منظم سازش کا حصہ ہیں۔ انہوں نے کہا کہ انہوں نے کبھی خود کو میری خیل قوم سے منسلک نہیں کیا، نہ ہی کسی قوم کی نمائندگی کا دعویٰ کیا ہے۔ ان کے علم میں کسی مبینہ لیٹر کی موجودگی بھی نہیں ہے۔

انہوں نے مزید کہا کہ علاقہ میں پینے کے صاف پانی کی قلت کے پیش نظر انہوں نے علامہ نور الحق قادری سے واٹر سپلائی اسکیم کے لیے درخواست کی تھی، جس کے بعد عدنان قادری کی قیادت میں اس منصوبے کی منظوری دی گئی۔ منصوبہ تمام قانونی تقاضوں، فزیبلٹی رپورٹ اور علاقہ مکینوں کی مشاورت سے شروع کیا گیا۔

مولانا تاج علی شاہ کا کہنا تھا کہ جس جگہ ٹیوب ویل نصب کیا جا رہا ہے وہ زمین انہوں نے ذاتی طور پر وقف کی ہے تاکہ عوام کو بلا تعطل صاف پانی کی فراہمی یقینی بنائی جا سکے۔ انہوں نے الزام لگایا کہ وہی افراد جو اس منصوبے کی منظوری پر مبارکباد دینے آئے تھے، اب سیاسی یا ذاتی مفادات کی بنا پر ان پر کیچڑ اچھال رہے ہیں۔

انہوں نے زور دے کر کہا کہ ان کا ہر قدم علاقہ کی خدمت کے جذبے سے اٹھایا گیا ہے اور وہ حلفاً کہتے ہیں کہ ان کی نیت اس منصوبے میں بالکل صاف ہے۔ مخالفین کے پاس الزامات کے کوئی شواہد موجود نہیں اور محض الزام تراشی سے حقائق تبدیل نہیں کیے جا سکتے۔

پشاور(باغی ٹی وی) گورنر خیبرپختونخوا فیصل کریم کنڈی سے پبلک ڈے کے موقع پر ضلع خیبر سے تعلق رکھنے والے قبائلی عمائدین، تاجر نمائندوں اور سیاسی راہنماؤں پر مشتمل وفد نے ملاقات کی۔ وفد کی قیادت پاکستان پیپلز پارٹی ضلع خیبر کے جنرل سیکریٹری شاہ رحمان شینواری نے کی، جبکہ وفد میں قبائلی عمائدین ملک ماصل، ملک تاج الدین، چیمبر آف کامرس اور انجمن تاجران کے عہدیداران بھی شامل تھے۔

ملاقات میں طورخم بارڈر پر ٹرمینل کی عدم فعالیت، کسٹم اہلکاروں کے رویے، بے نظیر انکم سپورٹ پروگرام کے مسائل، ضلع خیبر کے ہسپتال میں بجلی کی لوڈشیڈنگ، اور من پسند افراد کو چوری بجلی کی فراہمی جیسے سنگین عوامی مسائل پر تفصیلی گفتگو کی گئی۔

وفد نے گورنر کو طورخم بارڈر پر جاری مشکلات سے آگاہ کرتے ہوئے کہا کہ ٹرمینل کی غیر فعالیت کے باعث مقامی تاجروں اور عوام کو شدید مالی اور انتظامی دشواریوں کا سامنا ہے۔ کسٹم اہلکاروں کے نامناسب رویے پر بھی تشویش کا اظہار کیا گیا اور مطالبہ کیا گیا کہ خیبرپختونخوا سے تعلق رکھنے والے اہلکاروں کو تعینات کیا جائے تاکہ مقامی اقدار و روایات کا احترام یقینی بنایا جا سکے۔

قبائلی عمائدین نے ضلع خیبر میں بے نظیر انکم سپورٹ پروگرام میں بدانتظامی، اور ہسپتال میں بجلی کی مسلسل بندش جیسے مسائل کی بھی نشاندہی کی۔ انہوں نے صوبائی حکومت کی جانب سے ٹیکس کے نفاذ کو بھی مسترد کرتے ہوئے کہا کہ قبائلی عوام پہلے ہی معاشی دباؤ میں ہیں، ایسے اقدامات مسائل کو مزید سنگین کر رہے ہیں۔

گورنر فیصل کریم کنڈی نے وفد کے تحفظات کو سنجیدہ قرار دیتے ہوئے کہا کہ طورخم بارڈر خیبرپختونخوا کی معیشت میں ریڑھ کی ہڈی کی حیثیت رکھتا ہے۔ انہوں نے کہا کہ خیبر پاس اکنامک کوریڈور کے حوالے سے متعلقہ حکام سے بات کی جائے گی تاکہ سرحدی علاقے ترقی کی راہ پر گامزن ہو سکیں۔ انہوں نے اس بات پر افسوس کا اظہار کیا کہ دنیا بھر میں بارڈر ایریاز ترقی کے مراکز سمجھے جاتے ہیں، جبکہ ہمارے یہاں یہ بدامنی اور نظراندازی کا شکار ہیں۔

گورنر نے بے نظیر انکم سپورٹ پروگرام کی شفافیت اور ضم اضلاع میں مستحقین کے لیے خصوصی اقدامات کی یقین دہانی کراتے ہوئے وفد کو ہدایت دی کہ وہ اپنے تحفظات پر مشتمل ایک جامع رپورٹ تیار کریں، جس کی روشنی میں اسلام آباد میں متعلقہ وفاقی اداروں سے بات چیت کی جائے گی تاکہ عملی اقدامات یقینی بنائے جا سکیں۔

لنڈی کوتل (باغی ٹی وی رپورٹ) ضلع خیبر کی تحصیل لنڈی کوتل سے تعلق رکھنے والے شینواری قبیلے کے باہمت نوجوان ڈاکٹر نذر جان شینواری نے کمپیوٹر سائنس کے شعبے میں مصنوعی ذہانت (Artificial Intelligence) کے موضوع پر پی ایچ ڈی مکمل کر کے علاقے کا نام روشن کر دیا۔ وہ ضلع خیبر سے اس جدید اور اہم مضمون میں ڈاکٹریٹ مکمل کرنے والے پہلے سکالر بن گئے ہیں۔

ڈاکٹر نذر جان ولد حاجی عالم خان سکنہ فاطمی خیل لنڈی کوتل نے یونیورسٹی آف انجینئرنگ اینڈ ٹیکنالوجی (UET) پشاور کے شعبہ کمپیوٹر سائنس سے "Artificial Intelligence Based Minerals Recognition and Mapping Using Special Remote Sensing” کے عنوان سے کامیابی کے ساتھ اپنا تھیسز مکمل کیا اور کامیابی سے دفاع بھی کیا۔ ان کے سپروائزر پروفیسر ڈاکٹر نصر من اللہ تھے جبکہ تھیسز پر ممتحن حضرات نے اطمینان کا اظہار کیا۔

ڈاکٹر نذر جان کی اس شاندار کامیابی پر نہ صرف شینواری قبیلہ بلکہ پورے پشتون قبائل میں خوشی کی لہر دوڑ گئی ہے اور مختلف سیاسی و سماجی حلقوں نے انہیں مبارکباد پیش کی ہے۔

واضح رہے کہ قبائلی اضلاع میں اعلیٰ تعلیم کی شرح مایوس کن حد تک کم ہے اور ایسے حالات میں ایک نوجوان کا مصنوعی ذہانت جیسے جدید ترین مضمون میں پی ایچ ڈی مکمل کرنا نہ صرف شینواری قبیلے بلکہ پورے ضلع خیبر کے لیے ایک نمایاں اعزاز ہے۔

خیبر (باغی ٹی وی مہد شاہ شینواری) خیبر ضلع کی تحصیل جمرود میں تاریخی بابِ خیبر کے مقام پر قبائلی عوام نے بھارت کے خلاف اور افواجِ پاکستان کے حق میں زبردست یکجہتی ریلی نکالی۔ ریلی میں قومی مشران، بلدیاتی نمائندگان، جمرود پولیس اور مختلف مکاتبِ فکر سے تعلق رکھنے والے سینکڑوں افراد نے شرکت کی۔

ریلی کے شرکاء نے "مودی مردہ باد” کے فلک شگاف نعرے لگائے اور افواجِ پاکستان کے ساتھ مکمل یکجہتی اور دفاع وطن میں ہر اول دستہ بننے کے عزم کا اعادہ کیا۔ مظاہرین نے واضح کیا کہ پاکستان کے پانی پر کسی قسم کی بھارتی جارحیت کو کسی صورت برداشت نہیں کیا جائے گا۔

مظاہرے سے خطاب کرتے ہوئے مشران اور بلدیاتی نمائندوں نے کہا کہ بھارت بین الاقوامی قوانین کی خلاف ورزی کا مسلسل مرتکب ہو رہا ہے اور پلوامہ جیسے خود ساختہ ڈراموں کے ذریعے اپنی ناکامیوں پر پردہ ڈالنے کی کوشش کر رہا ہے۔ مقررین نے خبردار کیا کہ اگر بھارت نے پاکستان کے خلاف کسی بھی قسم کا جارحانہ اقدام اٹھانے کی کوشش کی تو پاکستانی قوم اور افواج متحد ہو کر منہ توڑ جواب دیں گے۔

انہوں نے کہا کہ پاکستانی قوم کا ہر فرد اپنے ملک کی سرحدوں اور وسائل کا محافظ ہے، اور بھارت اگر کوئی مہم جوئی کرنا چاہتا ہے تو اسے پہلے ہزار بار سوچنا ہوگا۔