لنڈی کوتل(باغی ٹی وی) تنظیم اساتذہ ضلع خیبر کے صدر شریف اللہ آفریدی نے اسلام آباد میں منعقدہ ایک تعلیمی کانفرنس کے دوران اپنے ساتھی اساتذہ سے گفتگو کرتے ہوئے ایک اہم پیغام دیا۔ انہوں نے کہا کہ اس نازک وقت میں جب ہمارے فلسطینی مسلمان بھائی ظلم و بربریت کا شکار ہیں، اسرائیلی مصنوعات کا مکمل بائیکاٹ کرنا ہر مسلمان کا ایک اہم دینی فریضہ ہے۔
شریف اللہ آفریدی نے زور دیتے ہوئے کہا کہ یہ بائیکاٹ نہ صرف قابض اسرائیلی ریاست کے وحشیانہ مظالم کے خلاف ایک پرامن اور مؤثر احتجاج ہے، بلکہ یہ عالمی دہشت گرد اسرائیل کی معیشت کو کمزور کرنے کا ایک طاقتور ہتھیار بھی ہے۔
انہوں نے اساتذہ کرام کی سماجی حیثیت اور نئی نسل پر ان کے اثر و رسوخ کو اجاگر کرتے ہوئے کہا کہ اساتذہ معاشرے کے رہنما اور معمار کی حیثیت رکھتے ہیں۔ اس لیے ان پر ایک بھاری ذمہ داری عائد ہوتی ہے کہ وہ نہ صرف خود ان اسرائیلی مصنوعات کا سختی سے بائیکاٹ کریں، بلکہ اپنے طلبہ کو بھی اس اہم مسئلے پر شعور و آگہی فراہم کریں۔ اس کے ساتھ ساتھ اساتذہ والدین اور پورے معاشرے کو بھی اس بائیکاٹ کی اہمیت سے روشناس کرائیں تاکہ یہ ایک اجتماعی اور مؤثر تحریک بن سکے۔
شریف اللہ آفریدی نے یقین ظاہر کیا کہ اساتذہ کی بروقت اور مؤثر رہنمائی اس بائیکاٹ مہم کو ایک مضبوط عوامی تحریک میں تبدیل کر سکتی ہے، جو فلسطینی مسلمانوں پر ہونے والے ظلم و ستم کے خلاف ایک توانا اور متحد آواز ثابت ہوگی۔ انہوں نے تمام اساتذہ سے اپیل کی کہ وہ اس قومی اور دینی فریضے کی ادائیگی میں پیش پیش رہیں۔
