Category: پشاور

پشاور: محکمہ انسداد دہشتگردی (سی ٹی ڈی) پشاور نے کرم میں ہونے والے دہشت گردی کے حملوں میں ملوث 14 دہشت گردوں کے نام اور تصاویر جاری کر دی ہیں۔ سی ٹی ڈی کے مطابق، یہ دہشت گرد کرم میں 200 سے زائد افراد کے قتل میں ملوث ہیں اور ان کے سروں کی قیمتیں 30 لاکھ روپے سے لے کر 3 کروڑ روپے تک مقرر کی گئی ہیں۔

سی ٹی ڈی کا کہنا ہے کہ ان دہشت گردوں کا تعلق کالعدم تحریک طالبان پاکستان (ٹی ٹی پی) سے ہے، اور یہ دہشت گرد غیر ملکی آقاؤں کے ایماء پر کرم میں فرقہ وارانہ فسادات کو ہوا دے رہے ہیں۔ سی ٹی ڈی نے مزید بتایا کہ یہ دہشت گرد لوٹ مار، جلاؤ گھیراؤ، اور نہتے بچوں و خواتین کے قتل میں بھی ملوث ہیں۔محکمہ انسداد دہشتگردی نے عوام سے درخواست کی ہے کہ وہ ان دہشت گردوں کے بارے میں کسی بھی قسم کی معلومات فراہم کریں، تاکہ انہیں قانون کی گرفت میں لایا جا سکے۔ اطلاع دینے والوں کو انعامات سے نوازا جائے گا۔سی ٹی ڈی نے عوام سے تعاون کی اپیل کرتے ہوئے کہا کہ دہشت گردوں کے خاتمے کے لیے ان کی معلومات بہت اہم ہیں، اور اس طرح کی دہشت گردی کا خاتمہ ملک کی سلامتی کے لیے ضروری ہے۔

مرکزی مسلم لیگ کے رہنماؤں نے کہا ہے کہ رمضان المبارک کے مقدس مہینے میں عوام کی خدمت کا سلسلہ جاری رہے گا۔ پاکستان کے تمام چھوٹے بڑے شہروں میں سحر و افطار کے لیے خصوصی دسترخوان لگائے جائیں گے، ماہ رمضان ہمیں قرب الٰہی کا بہترین موقع فراہم کرتا ہے۔دعا ہے رمضان المبارک پوری قوم کے لیے رحمت، برکت اور مغفرت کا ذریعہ بنے اور ملک میں خوشحالی و استحکام کا باعث ہو۔

رمضان المبارک کی آمد کے موقع پر مرکزی مسلم لیگ کے سیکرٹری جنرل سیف اللہ قصوری، نائب صدر حافظ طلحہ سعید، ڈپٹی سیکرٹری جنرل حافظ خالد نیک نے مشترکہ بیان میں کہا کہ رمضان المبارک برکتوں اور رحمتوں کا مہینہ ہے.مرکزی مسلم لیگ ہمیشہ سے عوامی فلاح و بہبود کے منصوبوں میں پیش پیش رہی ہے اور رمضان کے دوران بھی یہ سلسلہ جاری رہے گا۔ مرکزی مسلم لیگ کے زیر اہتمام ملک بھر میں لگائے جانے والے سحر و افطار دسترخوانوں میں معیاری کھانے کی فراہمی یقینی بنائی جائے گی، تاکہ روزہ داروں کو عزت و وقار کے ساتھ افطار اور سحری کی سہولت میسر ہو۔ خدمتِ خلق کا یہ جذبہ ہی حقیقی طور پر رمضان کی روح کو اجاگر کرتا ہے اور ہمیں نیکی کے اس موقع سے بھرپور فائدہ اٹھانا چاہیے۔ سحر و افطار دسترخوان مساجد، مدارس، عوامی مقامات پر لگائے جائیں گے، تاکہ زیادہ سے زیادہ مستحق افراد ان سہولیات سے مستفید ہو سکیں۔

سیف اللہ خالد کا مزید کہنا تھا کہ رمضان المبارک رحمتوں، برکتوں او رسعادتوں والامہینہ ہے۔ہر شخص کو چاہیے کہ وہ اپنے عقائد و اعمال کی اصلاح کرے ۔ زیادہ سے زیادہ توبہ و استغفارکرنے کو اپنا معمول بنایاجائے .ماہ رمضان میں قرآن مجید نازل ہوا، جو تمام انسانوں کی لیے ہدایت کی کتاب ہے۔ قرآن اپنے ماننے والوں کے اندر یہ صلاحیت پیدا کرتا ہے کہ وہ حق اور باطل کو پہچان سکیں اور دنیا میں اس کے عادلانہ نظام کے قیام کے لیے راہ ہموار کریں۔

گزشتہ روز دارالعلوم حقانیہ اکوڑہ خٹک کی جامع مسجد میں ہونے والے دہشت گردی کے حملے کے نتیجے میں شہید ہونے والے معروف عالم دین مولانا حامد الحق کی نماز جنازہ آج ادا کردی گئی۔ نماز جنازہ میں علاقے کی سیاسی، مذہبی، اور سماجی شخصیات سمیت لوگوں کی بڑی تعداد نے شرکت کی۔ مولانا حامد الحق کے جنازے کے ساتھ ساتھ دیگر شہداء کی تدفین بھی کی گئی۔

گزشتہ روز جامع مسجد میں نماز جمعہ کے دوران ایک دھماکہ ہوا جس کے نتیجے میں مولانا حامد الحق سمیت 4 افراد شہید ہوگئے تھے اور متعدد افراد زخمی ہوئے تھے۔ دھماکہ دارالعلوم حقانیہ کے اندر ہوا تھا، جس کے فوراً بعد مولانا حامد الحق اور دیگر زخمیوں کو علاج کے لیے نوشہرہ اور پشاور کے ہسپتالوں میں منتقل کیا گیا تھا۔ تاہم، مولانا حامد الحق اپنے شدید زخمیوں کی تاب نہ لاتے ہوئے شہید ہوگئے۔مقامی پولیس حکام کا کہنا ہے کہ یہ دھماکہ ایک ٹارگٹ کلنگ کی صورت میں کیا گیا تھا اور اس میں مولانا حامد الحق کو خاص طور پر نشانہ بنایا گیا تھا۔ پولیس کے مطابق، دھماکہ جامعہ کے ملحقہ احاطے میں کیا گیا، جہاں مولانا حامد الحق موجود تھے۔

شہادت کے بعد، اکوڑہ خٹک اور اردگرد کے علاقے میں سوگ کی فضا ہے اور عوامی سطح پر مولانا حامد الحق کی خدمات اور ان کی علم و عمل کو خراج تحسین پیش کیا جا رہا ہے۔اس دہشت گردی کے واقعے کی تحقیقات جاری ہیں، اور پولیس حکام نے اس حملے میں ملوث عناصر کی گرفتاری کے لیے خصوصی ٹیمیں تشکیل دے دی ہیں۔

مقامی عوام اور مذہبی حلقے اس دھماکے کی شدید مذمت کر رہے ہیں اور حکومت سے مطالبہ کر رہے ہیں کہ ایسے حملوں میں ملوث افراد کو جلد از جلد قانون کی گرفت میں لایا جائے۔