Category: پشاور

خیبر ایجنسی (باغی ٹی وی) فاٹا لویہ جرگہ کی جانب سے 9 مارچ بروز ہفتہ صبح 10 بجے تختہ بیگ سے بابِ خیبر تک ایک بڑے احتجاجی مظاہرے کا اعلان کیا گیا ہے۔ اس مظاہرے کا عنوان "قبائل کو انصاف دو” رکھا گیا ہے، جس میں تمام قبائلی مشران و نوجوانوں سے بھرپور شرکت کی اپیل کی گئی ہے۔

یہ احتجاج 9 مارچ 2022 کو دیے گئے اس عدالتی وعدے کی یاددہانی کے طور پر کیا جا رہا ہے، جس میں سپریم کورٹ کے چیف جسٹس نے فاٹا انضمام کے خلاف دائر کیس کی سماعت کے لیے لارجر بینچ یا فل بینچ تشکیل دینے کا عندیہ دیا تھا۔ تاہم، بدقسمتی سے دو سال گزرنے کے باوجود اس کیس کی سماعت کے لیے کوئی تاریخ مقرر نہیں کی گئی، جس پر قبائلی عوام شدید مایوسی اور ناراضگی کا شکار ہیں۔

فاٹا لویہ جرگہ کے مرکزی کابینہ، سپریم کونسل اور ایگزیکٹو کمیٹی کے تمام اراکین کو ہدایت کی گئی ہے کہ وہ اپنے ہمراہ زیادہ سے زیادہ قبائلی عوام کو لے کر آئیں۔ اسی طرح، قبائلی یوتھ کے صدر نجیب مجبور اور قبائلی طلبہ کے صدر ریحان قبائل سے بھی اپیل کی گئی ہے کہ وہ نوجوانوں اور طلبہ کے قافلوں کے ساتھ مظاہرے میں شریک ہوں، تاکہ حکومت اور حکومتی ادارے یہ دیکھ سکیں کہ قبائل اپنی رائے کے خلاف کوئی فیصلہ قبول کرنے کے لیے تیار نہیں ہیں۔

لنڈی کوتل(باغی ٹی وی رپورٹ)جمرود میں فاٹا لویہ جرگہ کی سپریم کونسل کا چوتھا اجلاس جمرود شاہ کس میں حاجی بسم اللہ خان قبائلی کے حجرے میں منعقد ہوا، جس میں ساتوں قبائلی ایجنسیوں اور چھ ایف آرز کے مشران و سپریم کونسل ممبران نے شرکت کی۔

اجلاس کی صدارت فاٹا لویہ جرگہ کے صدر بسم اللہ خان قبائلی نے کی، جبکہ نظامت جنرل سیکرٹری اعظم خان محسود نے انجام دی۔ شرکاء نے ایک بار پھر فاٹا انضمام کو غیر قانونی اور غیر آئینی قرار دیتے ہوئے اسے مسترد کر دیا اور کہا کہ اس فیصلے پر نظر ثانی کی جائے۔

اہم مطالبات:
فاٹا انضمام کا خاتمہ: جرگہ نے موقف اختیار کیا کہ انضمام کے بعد قبائلی علاقوں میں دہشت گردی اور جرائم میں اضافہ ہوا، جبکہ معدنی وسائل پر قبضہ کیا جا رہا ہے، جو کسی صورت قبول نہیں۔
تجارتی راستے کھولنے کا مطالبہ: افغانستان کے ساتھ تمام تجارتی راستے فوری طور پر کھولنے کا مطالبہ کیا تاکہ قبائلی عوام مزید معاشی نقصان سے بچ سکیں۔
سپریم کورٹ میں کیس کی سماعت: سپریم کورٹ آف پاکستان سے مطالبہ کیا گیا کہ فاٹا انضمام کے خلاف دائر کیس کو فوری سماعت کے لیے مقرر کیا جائے، کیونکہ تین سال گزرنے کے باوجود کوئی پیش رفت نہیں ہوئی۔
ملک نصیر احمد کو فوری رہا کیا جائے: جرگہ نے ملک نصیر احمد کوکی خیل کی گرفتاری کی مذمت کرتے ہوئے ان کے خلاف درج مقدمات کو جعلی قرار دیا اور فوری رہائی کا مطالبہ کیا۔
"قبائل کو انصاف دو” ریلی کا اعلان: 9 مارچ کو قبائلی حقوق کے تحفظ کے لیے احتجاجی ریلی نکالی جائے گی۔

فاٹا لویہ جرگہ کا اعلامیہ:
فاٹا انضمام کو زبردستی مسلط کیا گیا، جو ناقابل قبول ہے۔
25ویں آئینی ترمیم کو ختم کر کے فاٹا کی خصوصی آئینی حیثیت بحال کی جائے۔
فاٹا کے معدنی وسائل پر قبضے کی سازش بند کی جائے۔
جرگہ نے اعلان کیا کہ جمرود میں فاٹا لویہ جرگہ کا مرکزی دفتر رمضان کے بعد کھولا جائے گا تاکہ قبائلی عوام کے مسائل کو مزید مؤثر انداز میں اجاگر کیا جا سکے۔

لنڈی کوتل (باغی ٹی وی) ایف سی کے پی (نارتھ) خیبر رائفلز کے زیر اہتمام 43واں خیبر تاتارا کرکٹ ٹورنامنٹ شاندار مقابلوں کے بعد اختتام پذیر ہوگیا۔ فائنل میچ میں خیبر ازمری کلب نے شاندار کارکردگی کا مظاہرہ کرتے ہوئے شمع کرکٹ کلب کو 56 رنز سے شکست دے کر ٹرافی اپنے نام کرلی۔

یہ ٹورنامنٹ خیبر تاتارا گراؤنڈ میں گزشتہ 43 سال سے مسلسل منعقد ہورہا ہے، جس میں اس سال ضلع بھر سے 48 ٹیموں نے شرکت کی۔ فائنل میچ کے مہمان خصوصی ایف سی کے پی (نارتھ) خیبر رائفلز 101 ونگ کے کمانڈر کرنل افتخار بشیر جدون تھے، جنہوں نے ونر ٹیم کے لیے ایک لاکھ روپے، رنر اپ ٹیم کے لیے پچاس ہزار روپے، جبکہ بیسٹ باؤلر، بیسٹ بیٹسمین، بیسٹ وکٹ کیپر اور بیسٹ آل راؤنڈر کو دس، دس ہزار روپے انعام دیا۔

ایف سی کے پی (نارتھ) خیبر رائفلز کی جانب سے گراؤنڈ کی اپ گریڈیشن اور سہولیات کے لیے ایک لاکھ روپے پہلے ہی فراہم کیے جا چکے تھے، جس پر خیبر تاتارا اسپورٹس آرگنائزر صاحب علی شنواری، عمران آفریدی، صائم آفریدی اور دیگر مقامی کھیلوں سے وابستہ افراد نے شکریہ ادا کیا۔

اس موقع پر مہمان خصوصی تعمیر کریٹیو بلڈرز کے حاجی ضیاء الحق آفریدی نے بھی ٹورنامنٹ آرگنائزر کمیٹی کے لیے دو لاکھ روپے نقد دینے کا اعلان کیا۔ دیگر مہمانان میں ایس ایچ او عدنان آفریدی، تحصیلدار تیمور آفریدی، عمائدین علاقہ اور بڑی تعداد میں شائقین موجود تھے، جو سنسنی خیز مقابلوں سے محظوظ ہوئے۔

فائنل میں خیبر ازمری کلب نے پہلے بیٹنگ کرتے ہوئے 165 رنز بنائے، جس کے جواب میں شمع کرکٹ کلب 108 رنز پر آل آؤٹ ہوگئی۔ یوں خیبر ازمری کلب نے 56 رنز سے کامیابی حاصل کی۔

تقریب کے آخر میں خیبر تاتارا کرکٹ کمیٹی اور تعمیر کریٹیو بلڈرز کے سی ای او ضیاء الحق آفریدی نے ایم این اے، صوبائی وزیر عدنان قادری کے پرسنل سیکریٹری مولانا شعیب قادری، ڈی ایس او خیبر، ملک دریا خان آفریدی، ملک ماصل شینواری سمیت تمام مہمانوں کا شکریہ ادا کیا۔

لنڈی کوتل (باغی ٹی وی رپورٹ) سابق ممبر صوبائی اسمبلی الحاج شفیق شیر آفریدی نے اپنے ساتھیوں چیئرمین تحصیل لنڈی کوتل حاجی شاہ خالد شینواری، ملک نثار آفریدی، ساجد علی آفریدی و دیگر کے ہمراہ لنڈی کوتل پریس کلب میں ایک اہم پریس کانفرنس کی۔

انہوں نے کہا کہ عوام کو حقائق سے آگاہ رکھنا ان کی ذمہ داری ہے، اور وہ علاقے کی ترقی اور خوشحالی کے لیے ہمیشہ آواز بلند کرتے رہیں گے۔ انہوں نے انکشاف کیا کہ بطور اپوزیشن رکن ہوتے ہوئے بھی انہیں 20 کروڑ روپے کے ترقیاتی فنڈز دیے گئے، جن میں سے 10 کروڑ روپے توانائی کے منصوبوں پر خرچ کیے گئے۔

شفیق شیر آفریدی نے دعویٰ کیا کہ ترقیاتی فنڈز میں بے ضابطگیاں کی گئیں اور منتخب نمائندوں نے بیوروکریسی کے ساتھ مل کر تین فیصد کمیشن وصول کیا، جو کہ کھلی ناانصافی ہے۔ انہوں نے کہا کہ ترقیاتی منصوبوں میں غیر ضروری کٹوتیاں ان کے معیار کو متاثر کرتی ہیں اور عوام کے پیسوں کا ضیاع ہے۔

سابق ایم پی اے نے لنڈی کوتل میں جاری ترقیاتی کاموں پر روشنی ڈالتے ہوئے کہا کہ ورلڈ بینک کے تعاون سے ایک اہم سڑک کی تعمیر جاری ہے، جس کا سروے اور منظوری ان کے دور میں دی گئی تھی۔ ان کے مطابق، اس منصوبے میں فی کلومیٹر لاگت تقریباً 8 کروڑ روپے ہے، اور اسے مکمل کرانے کے لیے ہر ممکن کوشش کی جائے گی۔

شفیق شیر آفریدی نے موجودہ صوبائی حکومت کو شدید تنقید کا نشانہ بنایا اور کہا کہ وہ ترقیاتی منصوبے دینے میں مکمل ناکام رہی ہے۔ انہوں نے حکومت کو چیلنج کیا کہ وہ کوئی ایک بھی ایسا منصوبہ دکھائے جو عوامی فلاح کے لیے شروع کیا گیا ہو۔

انہوں نے کہا کہ وہ ترقیاتی کاموں میں کسی بھی قسم کی رکاوٹ ڈالنے کے خلاف ہیں، لیکن عوام کے حقوق کی پامالی کسی صورت برداشت نہیں کی جائے گی۔ انہوں نے اس بات پر افسوس کا اظہار کیا کہ موجودہ حکومت نے پہلے سے منظور شدہ تعلیمی منصوبوں کو منسوخ کر دیا، جو کہ تعلیم دشمنی کی واضح مثال ہے۔

آخر میں شفیق شیر آفریدی نے مطالبہ کیا کہ سابقہ پی سی ون کے مطابق ترقیاتی منصوبے مکمل کیے جائیں اور ترقیاتی فنڈز میں مبینہ خورد برد کی شفاف تحقیقات کرائی جائیں۔ انہوں نے واضح کیا کہ اگر عوامی حقوق پر ڈاکا ڈالا گیا تو وہ خاموش نہیں رہیں گے اور ہر فورم پر آواز بلند کریں گے۔

لنڈی کوتل(باغی ٹی وی رپورٹ) ٹرائبل یونین آف جرنلسٹس (ضم اضلاع) کے سالانہ انتخابات 2025-26 مکمل ہوگئے، جس میں دو مضبوط پینلز، حسبان میڈیا پینل اور بانی پینل کے درمیان سخت مقابلہ ہوا۔ حسبان میڈیا پینل کے حسبان اللہ 131 ووٹ لے کر صدر جبکہ محمد جمیل 129 ووٹ حاصل کر کے جنرل سیکرٹری منتخب ہوگئے۔

دیگر کامیاب امیدواروں میں شاکر اللہ مہمند 88 ووٹ لے کر سینئر نائب صدر اور محمد جواد شینواری 95 ووٹ لے کر پریس سیکرٹری منتخب ہوئے۔

الیکشن کمیٹی کے چیئرمین انور زادہ گل یار نے انتخابی نتائج کا اعلان کیا اور بتایا کہ ضم اضلاع سے تعلق رکھنے والے 141 صحافیوں نے اپنا حق رائے دہی استعمال کیا۔ انتخابات کے شفاف انعقاد کے لیے تمام قبائلی اضلاع کے پریس کلبوں میں پولنگ اسٹیشن قائم کیے گئے، جہاں مقامی صدور کی نگرانی میں ووٹنگ ہوئی۔ ضم اضلاع کے جو صحافی پشاور میں مقیم تھے، ان کے لیے پشاور میں مرکزی الیکشن آفس میں پولنگ اسٹیشن بنایا گیا۔

پولنگ کا آغاز صبح 9 بجے ہوا اور دوپہر 3 بجے تک جاری رہا، جبکہ نتائج کا اعلان مرکزی الیکشن سیل، جو پشاور کے ایک نجی ہوٹل میں قائم کیا گیا تھا، سے کیا گیا۔

نومنتخب صدر حسبان اللہ نے اس موقع پر کہا کہ قبائلی صحافیوں نے ہمیشہ حق اور سچ کی آواز بلند کی اور کئی صحافیوں نے اس راہ میں جانوں کا نذرانہ بھی پیش کیا۔ انہوں نے اس عزم کا اظہار کیا کہ وہ قبائلی صحافیوں کی فلاح و بہبود کے لیے کام کریں گے اور انہیں ہر ممکن سہولیات فراہم کریں گے۔

انہوں نے حکومت اور متعلقہ اداروں سے مطالبہ کیا کہ قبائلی صحافیوں کو درپیش مسائل کے حل کے لیے عملی اقدامات کیے جائیں۔