Category: پشاور

لنڈی کوتل(باغی ٹی وی رپورٹ) پاکستان میں ٹیگ بال کے بانی ابصار عالم نے بلوچستان کا دورہ کیا، جہاں وہ بلوچستان ٹیگ بال ایسوسی ایشن کے جنرل باڈی اجلاس میں شریک ہوئے۔ ان کے ہمراہ خیبر پختونخوا ٹیگ بال ایسوسی ایشن کے نائب صدر اختر رسول شینواری بھی موجود تھے۔

اختر رسول شینواری نے اجلاس میں شرکت کو باعثِ فخر قرار دیتے ہوئے کہا کہ بلوچستان کے پشتون عوام نے انہیں بے حد عزت دی۔ اجلاس میں نومنتخب صدر سیلاب خان ادوزے اور جنرل سیکرٹری حبیب الرحمان سمیت دیگر عہدیداران نے بھی شرکت کی۔

اجلاس میں ٹیگ بال سمیت دیگر کھیلوں کے فروغ پر اتفاق کیا گیا اور اس عزم کا اظہار کیا گیا کہ نوجوانوں کو مثبت سرگرمیوں کی طرف راغب کرنے کے لیے مشترکہ کوششیں جاری رکھی جائیں گی۔

پشاور(باغی ٹی وی رپورٹ) ڈاکٹر احسان ظہیر آفریدی کی پشتو شاعری کی کتاب "غرغونڈے” کی رونمائی

تفصیل کے مطابق پشاور کے حیات آباد میں اکادمی ادبیات کے زیر اہتمام جمرود کے معروف شاعر ڈاکٹر احسان ظہیر آفریدی کی پشتو شاعری کی کتاب "غرغونڈے” کی رونمائی تقریب منعقد ہوئی۔

تقریب کے مہمانِ خصوصی معروف ادیب پروفیسر ڈاکٹر اباسین یوسفزئی تھے، جبکہ خیبرپختونخوا کے نامور شعراء اور ادیبوں سمیت خواتین شاعراؤں نے بھی شرکت کی۔ یہ تقریب خوئیندے ادبی لخکر، اکادمی ادبیات پاکستان، خپلواک پختو ادبی جرگہ اور پختو ادبی مرکز کے اشتراک سے منعقد ہوئی۔

یہ ڈاکٹر احسان ظہیر آفریدی کی دوسری کتاب ہے، جس میں پشتو شاعری کے مختلف پہلوؤں پر تفصیلی روشنی ڈالی گئی ہے۔ مقررین میں ڈاکٹر کلیم شنواری، پروفیسر ڈاکٹر اسلم تاثیر آفریدی، نوجوان اسکالر افسرافغان اور خوئیندو ادبی لخکر کی سربراہ کلثوم زیب شامل تھے، جنہوں نے ڈاکٹر احسان ظہیر کی ادبی خدمات کو سراہا۔

ڈاکٹر احسان ظہیر آفریدی نے تقریب میں شرکت کرنے والوں کا شکریہ ادا کرتے ہوئے کہا کہ ان کا مشن پشتو زبان کی خدمت ہے اور وہ نئی نسل کو بھی یہی پیغام دیتے ہیں کہ وہ اپنی مادری زبان کے فروغ کے لیے کام کریں۔

لنڈی کوتل (باغی ٹی وی رپورٹ) بینظیر انکم سپورٹ پروگرام (بی آئی ایس پی) کی چیئرپرسن سینیٹر روبینہ خالد نے لنڈی کوتل سنٹر کا دورہ کیا، جہاں انہوں نے دی گئی سہولیات کا جائزہ لیا، عملے سے میٹنگ کی اور مستحق خواتین کے مسائل سنے۔

اس موقع پر پیپلز پارٹی خیبر کے سینئر نائب صدر خیال رسول شینواری، صوبائی رہنما حاجی عطا محمد سمیت دیگر پارٹی رہنما بھی موجود تھے۔ روبینہ خالد نے عوامی شکایات پر برہمی کا اظہار کرتے ہوئے عملے کو ایمانداری سے فرائض انجام دینے کی ہدایت کی اور خبردار کیا کہ ڈیوٹی میں غفلت برداشت نہیں کی جائے گی۔

میڈیا سے گفتگو میں روبینہ خالد نے بی آئی ایس پی کو بین الاقوامی معیار کا فلاحی منصوبہ قرار دیا اور کہا کہ یہ پاکستان پیپلز پارٹی کا تاریخی اقدام ہے، جس سے لاکھوں غریب خواتین مستفید ہو رہی ہیں۔

انہوں نے واضح کیا کہ ان کا دورے کا مقصد غریب خواتین کے مسائل جاننا اور ان کے حل کے لیے اقدامات کرنا ہے۔ ان کا کہنا تھا کہ بینظیر انکم سپورٹ پروگرام کے بانی صدر آصف علی زرداری ہیں، اور اس میں کسی بھی بدعنوانی یا کٹوتی کو ہرگز برداشت نہیں کیا جائے گا۔

لنڈی کوتل(باغی ٹی وی رپورٹ) پاکستان کرکٹ بورڈ کے زیر اہتمام فاٹا ریجن کے انڈر 15 اور انڈر 17 کے فائنل ٹرائلز خیبر جمرود میں منعقد ہوئے، جن میں 10 اضلاع کے کھلاڑیوں نے بھرپور شرکت کی۔ ٹرائلز کا مقصد نوجوانوں کو قومی سطح پر کھیلنے کے مواقع فراہم کرنا تھا۔

ہیڈ کوچ اور سابق ٹیسٹ کرکٹر ریاض آفریدی کے مطابق انتخاب مکمل طور پر میرٹ پر کیا گیا اور 20 کھلاڑیوں کو منتخب کیا گیا، جن میں 15 مین اور 5 ریزرو کھلاڑی شامل ہیں۔ ان کا کہنا تھا کہ تمام قانونی تقاضے، بون ٹیسٹ اور دیگر ایس او پیز مکمل کر لی گئی ہیں، جبکہ منتخب کھلاڑیوں کی فہرست پی سی بی ہیڈکوارٹر بھیج دی گئی ہے۔

ریاض آفریدی نے واضح کیا کہ کسی سفارش یا ذاتی تعلق کی بنیاد پر کوئی انتخاب نہیں ہوا، اور تمام فیصلے صرف ٹیلنٹ اور مہارت کو مدنظر رکھتے ہوئے کیے گئے ہیں۔ غیر متعلقہ افراد کو ٹرائلز میں داخلے کی اجازت نہیں دی گئی تاکہ کھلاڑیوں کو دباؤ سے آزاد ماحول فراہم کیا جا سکے۔

انڈر 19 ٹیموں کے حوالے سے انہوں نے کہا کہ ضلع کی سطح پر ٹیمیں بنائی جائیں گی، جس سے نیا ٹیلنٹ سامنے آئے گا۔

جمرود (باغی ٹی وی) ضلع خیبر کے تحصیل جمرود جرگہ ہال میں آئی سی آر سی (ICRC) اور پی آئی پی او ایس (PIPOS) کے تعاون سے خصوصی افراد کے لیے تقریب منعقد کی گئی، جس میں انہیں مصنوعی اعضاء اور ویل چیئرز فراہم کیے گئے۔

تقریب کے مہمان خصوصی ڈپٹی کمشنر خیبر بلال شاہد راؤ تھے، جبکہ دیگر شریک شخصیات میں آئی سی آر سی کی زرتاشہ قیصر خان، پی آئی پی او ایس کے نمائندے، اسسٹنٹ ڈائریکٹر سوشل ویلفیئر عبید، اے سی جمرود عامر زیب، خیبر اسپیشل پرسن ویلفیئر آرگنائزیشن کے صدر حضرت اللہ، ڈی ایچ او خیبر فیصل کمال، ایم ایس ڈی ایچ کیو ہسپتال احتشام، تحصیل چیئرمین عظمت آفریدی اور دیگر معززین شامل تھے۔

پچاس ویل چیئرز تقسیم کی گئیں اور بیس خصوصی افراد کو مصنوعی اعضاء لگائے گئے، جن سے وہ اب چلنے کے قابل ہو گئے ہیں۔ ڈپٹی کمشنر خیبر نے خصوصی افراد کو مکمل تعاون کی یقین دہانی کراتے ہوئے کہا کہ یہ سلسلہ آئندہ بھی جاری رہے گا۔

تقریب میں خصوصی افراد کو درپیش دیگر مسائل بھی اجاگر کیے گئے، جن میں سرکاری محکموں میں کوٹے پر عملدرآمد نہ ہونا اور سوشل ویلفیئر خیبر کے مستقل دفتر کی عدم موجودگی شامل تھے۔ شرکاء نے حکام سے فوری اقدامات کی اپیل کی تاکہ خصوصی افراد کے مسائل حل کیے جا سکیں۔

پشاور (باغی ٹی وی) حیات آباد میں نوابزادہ فضل کریم کے حجرے میں فاٹا انضمام مخالف تحریکوں اور قبائلی مشران کا مشاورتی اجلاس منعقد ہوا، جس کی صدارت حاجی بسم اللہ خان آفریدی (صدر فاٹا لویہ جرگہ) نے کی۔ اجلاس میں قبائلی اضلاع سمیت ایف آرز سے مشران نے شرکت کی۔

اجلاس میں فاٹا انضمام مخالف تحریک کو مزید مؤثر بنانے کے لیے تنظیمی ڈھانچہ، فنانس کمیٹی اور میڈیا و سوشل میڈیا کمیٹیاں تشکیل دی گئیں۔ مشاورت کے بعد تحریک کو مشترکہ طور پر "فاٹا لویہ جرگہ” کا نام دیا گیا۔

شرکاء نے اتفاق کیا کہ قبائلی نوجوانوں کو بھی تحریک کا حصہ بنایا جائے کیونکہ یہ ان کے مستقبل کی جدوجہد ہے۔ مقررین نے مؤقف اختیار کیا کہ فاٹا انضمام محض قبائلی وسائل پر قبضے کی سازش ہے، اگر یہ ان کے حق میں ہوتا تو حکومت این ایف سی ایوارڈ اور سالانہ 110 ارب روپے کی فراہمی کے وعدے پورے کرتی، مگر ایسا نہیں ہوا۔

اجلاس میں سپریم کورٹ میں دائر کیس کی جلد سماعت کے لیے وکلاء سے ملاقات اور بڑی سیاسی جماعتوں کے سربراہان سے رابطے کا بھی فیصلہ کیا گیا تاکہ فاٹا انضمام کو غیر آئینی و غیر قانونی قرار دے کر واپس لینے کی راہ ہموار کی جا سکے۔ قبائلی مشران نے واضح کیا کہ قبائلی عوام نے انضمام کو روزِ اول سے مسترد کیا ہے اور کسی صورت قبول نہیں کریں گے۔

لنڈی کوتل(باغی ٹی وی رپورٹ) گورنمنٹ ڈگری کالج جمرود میں نئے طلباء کے اعزاز میں ویلکم پارٹی کا انعقاد کیا گیا، جس میں کالج کے پرنسپل، اساتذہ اور طلباء کی بڑی تعداد نے شرکت کی۔ تقریب کے مہمان خصوصی جماعت اسلامی خیبرپختونخوا کے یوتھ نائب صدر اور آفریدی میڈیکل کمپلیکس کے اونر شاجہان آفریدی تھے، جنہیں روایتی لونگی پہنائی گئی۔

تقریب کے دوران سیکنڈ ائیر کے طلباء نے فرسٹ ائیر کے نئے آنے والے طلباء کو خوش آمدید کہا۔ مہمان خصوصی شاجہان آفریدی نے طلباء کے لیے 50 ہزار روپے کی مالی معاونت کا اعلان کرتے ہوئے انہیں ہر ممکن تعاون کی یقین دہانی کرائی۔

تقریب سے خطاب کرتے ہوئے شاجہان آفریدی نے کہا کہ "طلباء کو اپنی صلاحیتوں کی قدر کرتے ہوئے مکمل طور پر تعلیم پر توجہ دینی چاہیے اور وقت ضائع نہیں کرنا چاہیے۔” انہوں نے مزید کہا کہ "نوجوانوں کو منشیات اور بری صحبت سے دور رہنا ہوگا تاکہ وہ ایک کامیاب اور روشن مستقبل حاصل کر سکیں۔”

تقریب خوشگوار ماحول میں اختتام پذیر ہوئی، جہاں طلباء نے اس موقع پر اپنی بھرپور شرکت پر مسرت کا اظہار کیا۔

لنڈی کوتل(باغی ٹی وی رپورٹ) شینواری ماڈل کالج کے زیر اہتمام منشیات کے خلاف آگاہی واک کا انعقاد کیا گیا، جس میں طلبہ، تحصیل کونسل کے نمائندوں، فلاحی تنظیموں اور سیاسی رہنماؤں نے شرکت کی۔ واک کالج سے شروع ہو کر حمزہ بابا چوک پر اختتام پذیر ہوئی۔

واک کے شرکاء سے تحصیل چیئرمین شاہ خالد شینواری، جماعت اسلامی کے مقتدر شاہ آفریدی، بنارس شینواری، ضیاء الحق آفریدی، کلیم اللہ شینواری، منظور علی شینواری، معرف آفریدی اور ڈی آر سی انچارج اسلام الدین شینواری نے خطاب کیا۔ مقررین نے کہا کہ نوجوان نسل کو سازش کے تحت منشیات میں دھکیلا جا رہا ہے، جس کے خلاف پوری قوم کو کھڑا ہونا ہوگا۔

کالج کے پرنسپل عبید شینواری نے کہا کہ اس واک کا مقصد نوجوانوں میں منشیات کے نقصانات سے آگاہی پیدا کرنا ہے۔ انہوں نے طلبہ کو تعلیم پر توجہ مرکوز رکھنے اور نشہ سے دور رہنے کی تلقین کی۔ ان کا کہنا تھا کہ "منشیات سے پاک معاشرہ ہی ترقی و خوشحالی کی ضمانت ہے۔”