Category: پشاور

خیبر (باغی ٹی وی رپورٹ) ملگری استاذان ضلع خیبر کے صدر گلاب دین آفریدی نے کہا ہے کہ خیبر میں اساتذہ، بالخصوص ینگ ٹیچرز کی بڑی تعداد میں شمولیت ہمارے حوصلے مزید بلند کر رہی ہے۔

ڈسٹرکٹ ایجوکیشن آفس خیبر میں صدر ملگری استاذان تحصیل جمرود عثمان گل کی زیر صدارت اجلاس منعقد ہوا، جس میں صوبائی نائب صدر خیبرپختونخوا رحمت شاہ آفریدی نے خصوصی شرکت کی۔ اجلاس میں تنظیمی امور، اساتذہ کے مسائل اور حقوق کے حصول کے لیے لائحہ عمل پر تفصیلی تبادلہ خیال کیا گیا۔

ملگری استاذان نے میرٹ اور اصولوں کی پاسداری پر زور دیتے ہوئے انتظامیہ سے بھی شفاف فیصلوں کا مطالبہ کیا۔ شرکاء نے غریب ملازمین کے حقوق پر کٹوتی جبکہ اشرافیہ کے مراعات میں اضافے کو مسترد کرتے ہوئے کہا کہ اپنے حقوق کے لیے کسی بھی حد تک جانے کو تیار ہیں۔

اجلاس میں نئے شامل ہونے والے اساتذہ برہان الدین قاری، محمد زبیر DM، محترم خان DM، اشتیاق الرحمن CT، راحد محمد CT، ہارون خان PSHT، عبد المالک PST، نور سید PST، معروف خان PST، انزل PST اور عدنان پرویز PST کو خوش آمدید کہتے ہوئے مکمل تعاون کا یقین دلایا گیا۔

لنڈی کوتل(باغی ٹی وی رپورٹ)ٹرائبل یونین آف جرنلسٹس کے انتخابات 22 فروری کو ہوں گے،حسبان اللہ کا صدارتی امیدوار کے طور پر اعلان

تفصیلات کے مطابق ٹرائبل یونین آف جرنلسٹس کے 22 فروری کو ہونے والے انتخابات کے لیے باجوڑ پریس کلب کے صدر حسبان اللہ نے صدارتی امیدوار کے طور پر میدان میں اترنے کا اعلان کردیا۔

حسبان اللہ نے اپنے کاغذات نامزدگی جمع کروا دیے اور کہا کہ وہ "حسبان میڈیا پینل” کے تحت انتخاب میں حصہ لیں گے۔ پینل میں دیگر امیدواروں میں شاکر اللہ (سینئر نائب صدر، مہمند)، ایوب خان (نائب صدر، شمالی وزیرستان)، شہید خان (نائب صدر، اورکزئی) اور جمیل خان (جنرل سیکرٹری، کرم) شامل ہیں، جبکہ خیبر اور کرم کے دیگر نمائندگان کا اعلان جلد کیا جائے گا۔

حسبان اللہ نے کہا کہ انہوں نے ماضی میں بھی قبائلی صحافیوں کے حقوق کے لیے کام کیا ہے اور کامیابی کی صورت میں صحافیوں کی فلاح و بہبود کے لیے مزید اقدامات کریں گے۔

لنڈی کوتل(باغی ٹی وی رپورٹ)جمرود میں جمعیت علماء اسلام (جے یو آئی) جمرود کے زیر اہتمام 25 فروری کو ایک فضلاء کانفرنس اور دستار بندی پروگرام کا انعقاد کیا جائے گا۔ یہ پروگرام حاجی محمد کریم کے حجرے میں منعقد ہوگا اور اس میں کثیر تعداد میں علماء کرام، مشائخ عظام اور طلباء شرکت کریں گے۔

جے یو آئی جمرود کے امیر مولانا سعید خان نے ایک پریس کانفرنس میں بتایا کہ کانفرنس کے مہمان خصوصی سابق ایم این اے و شیخ الحدیث مولانا محمد قاسم آف شیر گڑھ ہوں گے۔ کانفرنس میں مختلف مدارس سے فارغ التحصیل طلباء کی دستار بندی کی جائے گی اور جمرود کی سطح پر سکولوں میں میٹرک میں پوزیشن ہولڈرز طلباء کو بھی انعامات سے نوازا جائے گا۔

مولانا سعید خان نے مزید کہا کہ دینی مدارس نے ہمیشہ ملک و قوم کو فضلاء و علماء دیے ہیں اور ان علماء و فضلاء نے معاشرے میں ہمیشہ مثبت کردار ادا کیا ہے۔ انہوں نے کہا کہ دینی مدارس کا کردار کسی سے ڈھکا چھپا نہیں ہے اور ہمارے علماء و فضلاء دین کے ساتھ ساتھ معاشرے میں مختلف برائیوں کو روکنے کے لیے بھی موثر آواز اٹھاتے ہیں۔

جے یو آئی جمرود کے امیر نے جمرود کے عوام کو 25 فروری کو فضلاء کانفرنس و دستار بندی پروگرام میں کثیر تعداد میں شرکت کی دعوت دی۔ انہوں نے کہا کہ اس پروگرام میں جے یو آئی کے صوبائی و ضلعی قائدین بھی شریک ہوں گے۔

لنڈی کوتل(باغی ٹی وی رپورٹ)تین نوجوان کرکٹرز کے اعزاز میں پروقار تقریب، سپورٹس کمپلیکس کے قیام کا مطالبہ

لنڈی کوتل کے ڈے نائٹ ریسٹورنٹ میں ضلع خیبر انڈر 19 کرکٹ ٹیم کے ٹرائلز میں کامیاب ہونے والے حامد آفریدی، شبیر شینواری اور شاہ فہد شینواری کے اعزاز میں ایک پروقار تقریب کا انعقاد کیا گیا۔ تقریب کا مقصد نوجوان کھلاڑیوں کی حوصلہ افزائی تھا۔

تقریب سے خطاب کرتے ہوئے خیبر سپورٹس کلب کے صدر معراج الدین شینواری، کلیم اللہ اور منظور علی شینواری نے کہا کہ لنڈی کوتل کے نوجوان کھلاڑی سخت جان اور باصلاحیت ہیں، لیکن وسائل کی کمی کے باوجود انہوں نے پاکستان کرکٹ ٹیم کو باصلاحیت کھلاڑی فراہم کیے ہیں۔ انہوں نے حکومت سے مطالبہ کیا کہ لنڈی کوتل میں ایک جدید سپورٹس کمپلیکس تعمیر کیا جائے تاکہ نوجوان کھلاڑیوں کو بہتر مواقع مل سکیں۔

رہنماؤں کا کہنا تھا کہ علاقے میں کرکٹ اکیڈمیز اپنی مدد آپ کے تحت چلائی جا رہی ہیں، جنہیں حکومتی سطح پر سرپرستی کی ضرورت ہے۔ واضح رہے کہ ٹرائلز میں کامیاب ہونے والے کھلاڑیوں میں پی ٹی آئی رہنما امیر نواز کے بیٹے شاہ فہد شینواری بھی شامل ہیں۔

تقریب کے اختتام پر ڈے نائٹ ریسٹورنٹ کے مالک جان زادہ کا شکریہ ادا کیا گیا، جنہوں نے نوجوان کھلاڑیوں کے اعزاز میں تقریب کا انعقاد کر کے ان کی حوصلہ افزائی کی۔