Category: کوئٹہ

لیاقت بازار میں بروقت ریسکیو آپریشن: آگ پر مکمل قابو، کسی جانی نقصان کی اطلاع نہیں

لیاقت بازار، کوئٹہ میں واقع موبائل پلازہ میں اچانک آگ لگنے کا واقعہ پیش آیا،بروقت کارروائی، مؤثر حکمتِ عملی اور پیشہ ورانہ مہارت کے نتیجے میں آگ پر مکمل طور پر قابو پا لیا گیا،واقعے کی اطلاع ملتے ہی ایف سی بلوچستان (نارتھ)، ریسکیو 1122 اور سول انتظامیہ نے فوری طور پر مشترکہ اور مربوط ریسکیو آپریشن کا آغاز کیا،ریسکیو ٹیموں نے عمارت کو محفوظ بناتے ہوئے قیمتی جانوں کے تحفظ کو یقینی بنایا، جس کے باعث کسی قسم کے جانی نقصان کی اطلاع موصول نہیں ہوئی، آگ پرقابو پانے کیلئے فائر بریگیڈاورریسکیو ٹیمیں بھی موقع پرپہنچ گئیں،مشترکہ کوششوں کے ذریعے آگ کو مزید پھیلنے سے روکا گیا اور صورتحال کو قلیل وقت میں معمول پر لے آیا گیا، مقامی شہریوں اور دکان داروں نےایف سی بلوچستان نارتھ، ریسکیو 1122 اور سول انتظامیہ کی بروقت اور مؤثر کاروائی کو سراہا اور انکی خدمات کو قابلِ تحسین قرار دیا

بلوچستان میں سرکاری محکموں میں بھرتیوں کے عمل کو شفاف اور قابلِ اعتماد بنانے کے لیے ڈیجیٹل نظام نافذ کر دیا گیا ہے۔

وزیراعلیٰ بلوچستان میر سرفراز بگٹی نے اپنے ایکس اکاؤنٹ پر جاری پیغام میں کہا کہ محکمہ خزانہ بلوچستان میں 111 بھرتیوں کا عمل شفاف، کامیاب اور عوامی اعتماد کے مطابق مکمل کیا گیا ہے،وزیراعلیٰ بلوچستان نے واضح کیا کہ حکومت نے دو ٹوک فیصلہ کیا ہے کہ اب بلوچستان میں نوکریاں سفارش پر نہیں بلکہ مکمل طور پر میرٹ پر دی جائیں گی۔ انہوں نے کہا کہ میرٹ اور شفافیت کو یقینی بنانے کے لیے تمام بھرتیوں کو بلوچستان پبلک سروس کمیشن کے معیار کے مطابق لایا جا رہا ہے،وزیراعلیٰ میر سرفراز بگٹی نے مزید بتایا کہ صوبے میں تمام سرکاری بھرتیوں کو مکمل طور پر ڈیجیٹل نظام سے منسلک کیا جائے گا تاکہ شفافیت برقرار رہے اور کسی بھی قسم کی بے ضابطگی کا خاتمہ کیا جا سکے۔ ان کا کہنا تھا کہ نوکری بیچنے اور سفارش کے کلچر کے خاتمے کے بغیر نوجوانوں کا ریاست پر اعتماد بحال نہیں ہو سکتا۔

وزیراعلیٰ بلوچستان میر سرفراز بگٹی نے اس عزم کا اعادہ کیا کہ وہ بلوچستان کے عوام سے کیا گیا وعدہ ہر صورت نبھائیں گے اور صوبے میں نوکریاں نہ تو بکیں گی اور نہ ہی سفارش کی بنیاد پر دی جائیں گی۔

نصیر آباد میں نوتل کے قریب ریلوے ٹریک پر بم دھماکے کی اطلاعات موصول ہوئی ہیں۔
تفصیلات کے مطابق دہشتگردوں نے ریلوے ٹریک پر دھماکہ خیز مواد نصب کیا تھا جو زور دار دھماکے سے پھٹ گیا، جس کے نتیجے میں ٹریک کو جزوی نقصان پہنچا۔ دھماکے کے بعد حفاظتی خدشات کے پیش نظر ٹرین سروس عارضی طور پر روک دی گئی ہے، پاکستان ریلوے کے حکام کے مطابق متاثرہ ریلوے ٹریک کی مرمت اور بحالی کا عمل جاری ہے، سکیورٹی کلیئرنس کے بعد ٹرین سروس بحال کی جائے گی۔

گوادر میں ایک افسوسناک ٹریفک حادثے کے نتیجے میں 9 افراد جان کی بازی ہار گئے جبکہ 15 مسافر شدید زخمی ہو گئے۔ پولیس کے مطابق یہ حادثہ گوادر کے علاقے ہڈ گوٹھ کے قریب پیش آیا، جہاں کراچی سے جیونی جانے والی ایک تیز رفتار مسافر کوچ بے قابو ہو کر الٹ گئی۔

ابتدائی اطلاعات کے مطابق کوچ تیز رفتاری کے باعث ڈرائیور کے قابو سے باہر ہو گئی، جس کے نتیجے میں گاڑی سڑک کنارے الٹ گئی۔ حادثہ اتنا شدید تھا کہ کوچ میں سوار متعدد مسافر موقع پر ہی جاں بحق ہو گئے جبکہ کئی افراد زخمی ہو کر کوچ کے اندر پھنس گئے۔حادثے کی اطلاع ملتے ہی پولیس، لیویز اور ریسکیو ٹیمیں فوری طور پر جائے وقوعہ پر پہنچ گئیں۔ امدادی ٹیموں نے مقامی افراد کی مدد سے زخمیوں کو کوچ سے نکال کر قریبی اسپتال منتقل کیا، جہاں بعض زخمیوں کی حالت تشویشناک بتائی جا رہی ہے۔ جاں بحق افراد کی لاشیں بھی اسپتال منتقل کر دی گئیں، جہاں ضروری قانونی کارروائی مکمل کی جا رہی ہے۔

پولیس حکام کے مطابق مسافر کوچ کراچی سے جیونی جا رہی تھی اور حادثے کی وجوہات جاننے کے لیے مزید تحقیقات کا آغاز کر دیا گیا ہے۔ ابتدائی طور پر تیز رفتاری اور ممکنہ طور پر ڈرائیور کی غفلت کو حادثے کی وجہ قرار دیا جا رہا ہے، تاہم تکنیکی خرابی کے پہلو کو بھی مدنظر رکھا جا رہا ہے۔

وزیراعلیٰ بلوچستان سرفراز بگٹی نے انکشاف کیا کہ بلوچستان کے بہت سارے علاقوں میں انٹرنیٹ کے لیے کھمبے لگے ہوئے ہیں، یہ کس کے فنڈ سے لگے ہیں؟ کیوں لگے ہیں؟ جہاں آبادی نام کی چیز نہیں، وہاں پر بھی انٹرنیٹ ٹاورز لگے ہوئے ہیں، اس کے پیچھے کوئی دماغ ہے ، یہ سارے وہ ٹولز ہیں جو ریاست کے خلاف استعمال کیے گئے۔

کوئٹہ میں پریس کانفرنس کرتے ہوئے سرفراز بگٹی کا کہنا تھاکہ تین ارب روپے لگاکربلوچستان کے تمام اسکولوں، کالجوں، یونیورسٹیوں اور اسپتالوں میں فائبرکیبل بچھا رہے ہیں، بلوچستان میں اس کے ذریعے انٹرنیٹ فراہم کریں گے تاکہ پتا چل سکے کہ اس انٹرنیٹ کا استعمال کیا ہے۔ بلوچستان کے بہت سارے علاقوں میں انٹرنیٹ کیلئے کھمبے لگے ہوئے ہیں اورکس کے فنڈ سے لگے ہیں؟ کہاں سے لگے ہیں کیوں لگے ہیں؟ حیران ہوتا ہوں سانگان جیسے علاقے جہاں آبادی نام کی چیز نہیں وہاں پربھی انٹرنیٹ ٹاور لگے ہوئے ہیں،ہیلی کاپٹرپرجارہا ہوتا ہوں تو ان علاقوں میں 4 جی سروسز چل رہی ہوتی ہیں، ایسا کیوں ہے؟ اس کے پیچھے کوئی دماغ ہے یہ سارے وہ ٹولز ہیں جو ریاست کے خلاف استعمال کیے گئے۔

وفاقی وزیر داخلہ محسن نقوی اور وزیرِ اعلیٰ بلوچستان میر سرفراز بگٹی نے ہیڈکوارٹرز فرنٹیئر کور بلوچستان (نارتھ) کا دورہ کیا، آئی جی ایف سی نارتھ میجر جنرل محمد عاطف مجتبیٰ نے وزیرِ داخلہ کا استقبال کیا۔

دورے کے موقع پر وزیر داخلہ نے یادگارِ شہداء پر حاضری دی اور ملک کے لیے جانوں کا نذرانہ پیش کرنے والے شہداء کی عظیم قربانیوں کو خراجِ عقیدت پیش کیا۔ اس موقع پر وزیر داخلہ کو بلوچستان میں امن و امان کی مجموعی صورتحال، درپیش چیلنجز اور سیکیورٹی مزید مؤثر بنانے کے لیے مستقبل کی حکمتِ عملی پر بھی آگاہ کیا گیا۔ وزیرِ داخلہ نے اس موقع پر ایف سی بلوچستان نارتھ اور سیکورٹی اداروں کی دہشت گردی کی خلاف مسلسل کاروائیوں اور امن کے قیام کے لئے کی گئی انتھک کوششوں اور شاندار کارکردگی کو سراہا ۔

“بلوچستان کے دل، لورالائی کی سرزمین،جہاں پہاڑوں کے دامن میں اگنے والا زیتون آج دنیا میں اپنی پہچان بنا رہا ہے۔یہی وہ زیتون ہے جس نے سلور ایوارڈ حاصل کیااور معیار کے اعتبار سے، اسپین کے بعد دنیا کا دوسرا بہترین زیتون تسلیم کیا گیا۔”

“یہاں کے زیتون کے باغات صرف خوبصورتی نہیں…بلکہ ایک انقلاب کی علامت ہیں۔ایک ایسا انقلاب جو کسانوں کی قسمت بدل رہا ہے،اور پاکستان کو زرعی معیشت میں نئی طاقت دے رہا ہے۔”

تیل نکالنے کا مرحلہ
“زیتون توڑ کر جدید ملز تک لایا جاتا ہے…
جہاں سب سے پہلے اس کی صفائی ہوتی ہے۔
پھر بڑے اسٹیل گرائنڈر میں زیتون کو پیس کر موٹی پیسٹ بنائی جاتی ہے۔
اس کے بعد ملنگ مشین میں پیسٹ کو آہستہ آہستہ گھمایا جاتا ہے…
تاکہ تیل کے ذرات الگ ہو سکیں۔
پھر سینٹری فیوج مشین تیل کو پانی اور ٹھوس اجزا سے جدا کر دیتی ہے۔
اور یوں…
خالص، قدرتی، ایکسٹرا ورجن لورالائی اولیو آئل تیار ہوتا ہے۔
وہی تیل… جس کا معیار آج پوری دنیا تسلیم کر رہی ہے۔”

صحت بخش فوائد
“لورالائی کا زیتون کا تیل
دل کی بیماریوں سے بچاتا ہے…
کولیسٹرول کنٹرول کرتا ہے…
جسم کو اینٹی آکسیڈنٹس فراہم کرتا ہے…
اور قدرت کا وہ تحفہ ہے جسے ڈاکٹر بھی سونے سے زیادہ قیمتی کہتے ہیں۔”

“زیتون کی کاشت نے لورالائی کے کسانوں کی آمدن میں کئی گنا اضافہ کیا ہے۔
مقامی ملز نے روزگار پیدا کیا،
نئے کاروبار کھڑے کیے،
اور بلوچستان کو زیتون کے نقشے پر نمایاں جگہ دی۔

سینئر سائنٹیفک آفیسر ڈاکٹر عبداللہ بلوچ کا کہنا ہے کہ بلوچستان کے سائنٹیفک اعلیٰ سطح کے کام کر سکتے ہیں، جیسا کہ اپر بلوچستان میں زیتون کے تیل کے تجربے کا نتیجہ ظاہر کرتا ہے۔یہ ایک ایسا فخر ہے،جس نے پاکستان کے شمالی بلوچستان کو بین الاقوامی مارکیٹ میں کامیابی کی نئی راہیں دی ہیں۔”

بلوچستان کے دل میں واقع ضلع دُکی قدرتی وسائل سے مالا مال ایک اہم خطہ ہے، جو اعلیٰ معیار کے کوئلے کی بدولت پاکستان کی معیشت میں نمایاں کردار ادا کر رہا ہے۔

دُکی سے یومیہ اوسطاً 2235 ٹن کوئلہ نکالا جاتا ہے، جس کی مالیت تقریباً 33.5 ملین روپے بنتی ہے۔ یہ پیداوار ملک کی توانائی اور صنعتی ضروریات پوری کرنے میں کلیدی حیثیت رکھتی ہے۔کوئلہ کانیں 19 ہزار سے زائد خاندانوں کے لیے روزگار کا ذریعہ ہیں، جبکہ حاصل ہونے والے وسائل سے تعلیم، صحت اور دیگر بنیادی سہولیات کی بہتری پر بھی کام کیا جا رہا ہے۔امن و امان اور ترقی کے تسلسل کو یقینی بنانے کے لیے سول انتظامیہ اور سیکیورٹی فورسز مؤثر اقدامات کر رہی ہیں۔ضلع دُکی آج محنت، وسائل اور قومی ترقی کی ایک روشن مثال بن چکا ہے۔