Category: کوئٹہ

کوئٹہ: حکومت بلوچستان کے ترجمان شاہد رند نے کہا ہے کہ بلوچستان نیشنل پارٹی (بی این پی) کو ریڈ زون میں احتجاج کرنے کی اجازت نہیں دی جائے گی، حالانکہ بی این پی نے کوئٹہ کی جانب لانگ مارچ کا اعلان کیا ہے۔ انہوں نے اس بات کی تصدیق کرتے ہوئے کہا کہ صوبائی حکومت بی این پی کی قیادت سے مسلسل مذاکرات کر رہی ہے تاکہ معاملات سیاسی ڈائیلاگ کے ذریعے حل کیے جائیں۔

پریس کانفرنس کے دوران شاہد رند نے کہا کہ سردار اختر مینگل کی قیادت میں بی این پی سے حکومتی کمیٹی نے دو بار ملاقات کی ہے اور صوبائی حکومت نے انہیں سریاب روڈ پر احتجاج کے لیے جگہ فراہم کرنے کی پیشکش کی تھی۔ تاہم، بی این پی کی جانب سے ریڈ زون میں احتجاج کرنے کی خواہش ظاہر کی گئی ہے، جس کی اجازت نہیں دی جائے گی۔شاہد رند نے مزید کہا کہ صوبائی حکومت نے دفعہ 144 نافذ کر رکھی ہے، اور اگر اس کی خلاف ورزی کی گئی تو قانون اپنی کارروائی کرے گا۔ تاہم، ان کا کہنا تھا کہ حکومت ابھی تک صبر و تحمل کا مظاہرہ کر رہی ہے اور سیاسی مکالمے کے ذریعے مسائل کو حل کرنے کی کوشش کر رہی ہے۔ترجمان حکومت بلوچستان نے کہا کہ حکومت کی کوشش یہ ہے کہ دونوں اطراف کے درمیان لچک پیدا کی جائے تاکہ معاملات کو پرامن طریقے سے حل کیا جا سکے۔ اگر سردار اختر مینگل اپنی پوزیشن پر قائم رہیں گے تو حکومت کے پاس دیگر آپشنز بھی موجود ہیں۔

یاد رہے کہ گزشتہ دنوں سردار اختر مینگل کی قیادت میں بی این پی کا لانگ مارچ وڈھ سے شروع ہوا تھا، تاہم مستونگ کے مقام پر راستے بند ہونے کے بعد وہیں دھرنا دیا گیا تھا، جو کہ اب نویں دن میں داخل ہو چکا ہے۔حکومت بلوچستان کی طرف سے یہ واضح پیغام دیا گیا ہے کہ ریڈ زون میں کسی بھی قسم کے احتجاج کی اجازت نہیں دی جائے گی، اور قانون کی خلاف ورزی کرنے والوں کے خلاف سخت کارروائی کی جائے گی۔

کوئٹہ: جمہوری وطن پارٹی کے اہم رہنما نوابزادہ گہرام بگٹی کو پولیس نے بگٹی ہاؤس ڈیرہ بگٹی سے حراست میں لے لیا ہے۔ پولیس کے مطابق نوابزادہ گہرام بگٹی کی گرفتاری ایک اہم کارروائی کا حصہ ہے، جس کے تحت انہیں ڈیرہ بگٹی سے حراست میں لیا گیا ہے۔

ایس ایس پی ڈیرہ بگٹی نے تصدیق کرتے ہوئے کہا کہ نوابزادہ گہرام بگٹی کو حراست میں لینے کے بعد انہیں 30 روز کے لیے جیل منتقل کیا جائے گا۔ ان کا کہنا تھا کہ گہرام بگٹی کے خلاف قانون کے مطابق کارروائی کی جا رہی ہے۔گہرام بگٹی کو تھری ایم پی او کے تحت حراست میں لیا گیا ہے جس کے احکامات ڈی سی ڈیرہ بگٹی نے جاری کئے تھے، نوابزادہ گہرام نے گرفتاری کیلئے آنے والی پولیس کو بغیر مزاحمت گرفتاری دے دی

یاد رہے کہ نوابزادہ گہرام بگٹی نے بلوچستان حکومت کے خلاف ایک اہم لانگ مارچ کا اعلان کر رکھا تھا، جس کا مقصد صوبے میں جاری سیاسی اور معاشی بحرانوں کی طرف توجہ دلانا تھا۔ گہرام بگٹی کے اس اعلان کے بعد حکومت نے ان کی گرفتاری کے لیے سخت اقدامات کیے تھے، اور بالآخر انہیں حراست میں لے لیا گیا۔

بلوچستان کے عوام امن کے خواہاں،دہشتگردی کو مسترد کر دیا،حافظ محمد امجد
بلوچ محب وطن،پاکستان پر کوئی آنچ نہیں آنے دیں گے، میر عارف بادینی
پاکستان مرکزی مسلم لیگ کے زیر اہتمام کوئٹہ میں بلوچستان امن مارچ کے شرکا سے خطاب کرتے ہوئے سیاسی و سماجی رہنماؤں نے کہا ہے کہ بلوچستان کے عوام امن چاہتے ہیں، دہشت گردی کے خلاف بلوچ قوم کا آج سڑکوں پر آنا اس امر کی دلیل ہے کہ اہل بلوچستان نے ملک دشمن قوتوں کو مسترد کر دیا ہے،بلوچستان محفوظ ہو گا تو پاکستان محفوظ ہو گا، بلوچستان امن مارچ کا مقصد بلوچستان میں امن و استحکام کے لیے آواز بلند کرنا ہے،پاکستان مرکزی مسلم لیگ قیام امن کے لئے ملک بھر کی سیاسی جماعتوں کو متحد کر کے تحریک چلائے گی.

ان خیالات کا اظہار پاکستان مرکزی مسلم لیگ کے زیر اہتمام ریلوے سٹیشن سے پریس کلب تک منعقدہ بلوچستان امن مارچ سے پاکستان مرکزی مسلم لیگ بلوچستان کے صدر حافظ محمد امجد،بلوچ رہنماؤں میر عارف بادینی ،صدر ملی لیبر فیڈریشن بلوچستان میر شکر خان رئیسانی ،چیئرمین سرمست قومی اتحاد غلام حسین مومن و دیگرنے خطاب کرتے ہوئے کیا، بلوچستان امن مارچ کی قیادت مرکزی مسلم لیگ بلوچستان کے صدر حافظ محمد امجد نے کی، بلوچستان امن مارچ کا آغاز ریلوے اسٹیشن سے ہوا اور مختلف راستوں سے ہوتا ہوا کوئٹہ پریس کلب پر اختتام پذیر ہوا، بلوچستان امن مارچ میں بڑی تعداد میں شہری شریک ہوئے .شرکا نے ہاتھوں میں پاکستانی پرچم اٹھا رکھے تھے،امن مارچ کےشرکاء نے امن و یکجہتی کے حق میں نعرے لگائے.

بلوچستان امن مارچ کے دوران شرکاء سے خطاب کرتے ہوئے حافظ محمد امجد نے کہا کہ بلوچستان کے عوام امن چاہتے ہیں اور ترقی کے خواہاں ہیں،بلوچستان میں دہشت گردی کی نئی لہر نہ صرف صوبے بلکہ ملک کے امن و امان کے لئے انتہائی خطرناک ہے،سی پیک پاکستان کا بہترین منصوبہ جس کو ناکام بنانے کے لئے مذموم سازشیں کی جا رہی ہیں،مرکزی مسلم لیگ بلوچستان کے عوام کے حقوق کا تحفظ کرے گی، بلوچستان کے مسائل کا حل پرامن مذاکرات اور باہمی مشاورت سے ہی ممکن ہے۔تمام سیاسی جماعتیں بلوچستان میں امن کے قیام کے لیے ہر ممکن کردار ادا کریں،صوبے کے مسائل کو ترجیحی بنیادوں پر حل کیا جائے۔ہمارا دل بلوچی بھائیوں کے ساتھ دھڑکتا ہے۔ہمارا بلوچستان کے ساتھ لا الہ الا اللہ کا رشتہ ہے اور اسی کلمے کو بنیاد بنا کر ہم سیاست کے میدان میں اترے ہیں

بلوچ رہنماؤں میر عارف بادینی ،صدر ملی لیبر فیڈریشن بلوچستان میر شکر خان رئیسانی ،چیئرمین سرمست قومی اتحاد غلام حسین مومن و دیگرکا کہنا تھا کہ بلوچستان کے شہری دہشت گردی کو مسترد کرتے ہیں، بلوچ محب وطن ہیں اور پاکستان پر کوئی آنچ نہیں آنے دیں گے، بلوچوں کا خون پاکستان کے دفاع کے لئے سب سے پہلے گرے گا، بلوچ قوم دہشت گردی کے خلاف جنگ میں قربانیاں دے رہی ہیں، بلوچستان کے باسیوں کی محرومیوں کا ازالہ کیا جائے، ہم امن چاہتے ہیں اور پاکستان کو محفوظ و خوشحال ملک کے طور پر دیکھنا چاہتے ہیں، بلوچستان میں امن ہو گا تو پاکستان ترقی کرے گا.