کوئٹہ اپنی رہائش گاہ پر بات چیت کرتے ہوئے میں جمعیت علما اسلام کے صوبائی امیر و رکن قومی اسمبلی مولانا عبدالواسع نے کہا ہے کہ عدالتی فیصلے کے بعد وزیراعلی بلوچستان جا کر بجلی گھر تھانے میں گرفتاری پیش کریں، اگر وزیراعلی نے خود گرفتاری پیش نہیں کی تو پھر اپوزیشن جماعتیں ان کو گرفتار کرنے پرمجبور کرینگے، گزشتہ تین سالوں سے جام کمال کی حکومت نے جس طریقے سے غیر آئینی اور غیر جمہوری کام کیا ہے، آج ان کو سزا کے طورپر بھگتنا پڑے گی، جمعیت علما اسلام سلیکٹیڈ حکمرانوں کے ہر سازش کو ناکام بنائیں گے.

عبدالواسع نے مزید کہا کہ جمعیت علما اسلام ہرعدالتی فیصلے کا احترام کرتی ہے اور قانون کا احترام کرتے ہوئے 14 دن ہماری جماعت اور دیگر اپوزیشن اراکین نے بجلی گھر تھانے میں گرفتاری دینے کیلئے وہاں موجود رہے، اب عدالتی حکم کے بعد وزیراعلی بلوچستان کو چاہئے کہ وہ عدالتی حکم کی توہین کرنے کی بجائے بجلی گھر تھانے جا کر اپنی گرفتاری پیش کریں، اگر وزیراعلی نے خلاف توہین عدالت کی تو مقدمے میں سپریم کورٹ سے بھی رجوع کرینگے، جمعیت علما اسلام ایک سیاسی اور مذہبی جماعت ہے جنہوں نے ہمیشہ آئین اور قانون کی پاسداری کی ہے، اب نا اہل اور سلیکٹیڈ حکمرانوں پر زمہ داری بنتی ہے کہ وہ جمہوری اقدار کو مد نظر رکھتے ہوئے عدالتی احکامات پر پوری طورپر عمل درآمد کریں، عام شہری کی طرح تھانے میں گرفتاری پیش کریں، اگر ایسا نہ کیا گیا تو پھر ہم مجبور ہوکر وزیراعلی ہاؤس کا گھیرا کر کے وزیراعلی بلوچستان کو گرفتاری کرنے پر مجبور کرینگے، آج سنجاوی میں جمعیت علما اسلام کے زیر اہتمام پیغام کانفرنس ہے تمام کارکن کانفرنس کی تیاری کیلئے اپنا کردارادا کریں.

بلوچستان صوبہ بلوچوں کو مبارک ، پشتون قوم کو پشتونستان چاہیے ، محمود خان اچکزئی

سربراہ پی کے میپ محمود خان اچکزئی نے کہا ہے کہ عثمان خان کاکڑ شہید کے چہلم کا اور اس سلسلے کا آخری جلسہ ہے ہم بہت برداشت کرتے ہیں ہم برداشت میں پیدا اور بڑے ہوئے ہیں لیکن پشتونخوا وطن اور جنوبی پشتونخوا میں سیاست کی بنیاد پشتونخوا میپ نے رکھی ہے پشتونخوا میپ نے پشتون قوم کی رہبری اور حقوق کی بات اس وقت کی تھی جب انگریز کے ڈر سے کوئی بات تک نہیں کرسکتا تھا ۔ جنوبی پشتونخوا میپ میں خان شہید عبدالصمد خان اچکزئی جس نے بغیر کسی سیاست جولائی 1929میںسنڈیمن ہال میں اپنے بھائی ایوب خان کے ساتھ جنوبی پشتونخوا میپ کے شاہی جرگے کے مشران کے سامنے پیش کئے گئے ان پر الزام تھا کہ جرگہ سے انہوں نے پوچھا کہ ہم نے کونسا کیا گناہ ہے اور ہم پر الزام کیا ہے تو انہیں بتایا گیا کہ آپ کی گاندھی جی سے تعلقات بنائے ہیں انہیں خطوط لکھتے ہیں اور تب جرگے کے مشران نے انہیں درخواست کی کہ آپ گاندھی جی سے تعلق نہیں رکھیں گے جس پر ایوب خان نے انہیں بتایا کہ آپ ہمارے معتبرین ہیں اور ہم آئندہ گاندھی جی سے تعلق نہیں رکھیں گے مگر مجسٹریٹ نے شاہی جرگے کے سربراہ خدائیداد خان کاسی کو بتایا کہ کہ ایسا نہیں ہوگا انگریز سے پوچھنا ہوگا اور بعد ازاں خان شہید کے مطابق انہیں گھر بھیج دیا گیا اور اگلے دن پیش ہونے کا کہا اور جب ہم پیش ہوئے تو انہوں نے فیصلہ لکھا تھا کہ ان نوجوانوں نے 2سال قید کاٹنی ہے اورپھر 3سال ضمانت دینی ہے تو خدائیداد خان کاسی نے ہم سے کہا کہ اگر ہم آپ کو سزا دیں تو ہم اپنے قوم کے سامنے شرمندہ ہوں گے اور آپ سے درخواست کرتے ہیں کہ سرکار سے معافی مانگے اور سرکاری زور آور ہے اور انگریز نے ہمیں بلایا کہ یا تو انہیں معافی مانگی ہوگی یا پھر دو سال قید کاٹنی ہوگی جس پر خان شہید نے کہا کہ انگریز زور آور ہوگا مگر ہم کسی سے معافی نہیں مانگیں گے یہ آج سے 93سال قبل خان شہید نے کسی سے معذرت نہیں کی آج تو پشتونخوا میپ اور بلوچوں کو کسی سے معافی مانگنی کی پالیسی نہیں اپنانی ہوگی ، پشتون قوم کو کسی کا باپ شکست نہیں دے سکتا ۔

محمود خان اچکزئی کا کہنا تھا کہ عثمان خان کاکڑ نے کیا گناہ کیا تھا کس کا قتل کیا تھا ۔ اگر ہمیں جمہوری پاکستان کے مطالبے پر شہید کیا جائے گا تو ہم چین سے نہیں بیٹھیں گے ، عثمان خان کاکڑ کی شہادت کے بعد ہمیں اپنے سیاست کی اوراق کا صفحہ تبدیل کرنا ہی ہے یہ ہم نے کب کرنا ہے اور کیسے کرنا ہے یہ ہماری ذمہ داری ہے ۔ ہمارے پولیس کے بچے کس نے قتل کئے ، عبیداللہ خان کاسی کون اغواء کرکے لے گئے تھے یہ مذاق نہیں چلے گی کہ پشتون اپنے بچے پیدا کریں گے ان پر خرچے کریں گے اور پھر آپ انہیں ایک جگہ پر شہید کریں گے اور پولیس کے سینکڑوں بچے کئی اور ماردیں گے اور پھر عثمان خان کاکڑ کو گھر میں مار دو گے ہم پاگل نہیں ہیں ہم کسی کے غلام نہیں ہے یہ ایک جمہوری ملک ہے جس کے لئے جدوجہد میں چاہے وہ قید و بند ہو پھر دیگر طرز جدوجہد ہو میں دیگر تمام اقوام سے پشتونوں نے اپنا حصہ زیادہ دیا ہے موسیٰ خیل سے لے کر چمن اور چترال سے لے کر بولان تک پشتونوں نے انگریزوں کے خلاف گائوں گائوں جدوجہد کی اور لڑا ہے اور ہم نے سب سے زیادہ جیل کاٹے ہیں ۔

محمود خان اچکزئی کا کہنا تھا کہ افغانستان کے مسئلے پر لوگ ہمیں گالیاں دے رہے ہیں پشتونوں کا وجود ہی نہیں تھا یہاں صرف افغانستان اور ہندوستان ہوا کرتے تھے اس وقت بھی ایک چھوٹا افغانستان مسلمانوں ، ہندو ، سکھوں اور دیگر کے لئے ایک پرامن ملک تھا ، آزادی کے تمام مجاہدین کابل میں بیٹھتے تھے ، افغانستان میں ہمارے ابا واجداد دفن ہیں افغانستان کے وسیع کرنے میں پشتون افغان کی حیثیت نیوکلیس/ مرکز کی ہے ، افغانستان پشتونوں نے بنایا اور دیگر نے پشتونوں کا ساتھ دیا اور افغانستان کا دفاع کرنا اور افغانستان کی ترقی اگر گناہ ہے تو ہم پشتون اس میں حصہ دار ہے اور یہ گناہ ہم کرتے رہیں گے افغانستان کو قبضہ کرنا قیامت کے مترادف ہوگا کسی نے ہمت نہیں ہارنی ہے افغانستان کسی کا باپ بھی قبضہ نہیں کرسکتا ۔

محمود خان اچکزئی نے کہا کہ امریکہ ، اسٹریلیا اور دیگر ممالک انگریزوں کی کالونیاں تھیں اور چین جاپان کی کالونی تھی روس در بدر تھا ، جرمن متحد نہیں تھا مگر افغانستان وہ واحد ملک ہے جس کی گواہی پوری دنیا دے رہی ہے کہ اس کی جھنڈا سربلند تھا ۔ پاکستان ہمار املک ہے ہم اسے توڑنا نہیں چاہتے مگر پاکستان کو افغانستان میں مداخلت نہیں کرنی گی ۔میں ایک بزرگ بلوچ سیاسی رہنماء کی عیادت کے لئے گیا تو اس نے اپنے بیٹے اور ایک ساتھی کے سامنے بتایا جو آج ایک پارٹی کا ذمہ داری نمائندہ ہے کہ میں نے جو کچھ سیکھا میرا استاد عبدالصمد خان اچکزئی تھا اور اس نے مجھے اور پشتونخوا میپ کے درخواست کی کہ آپ نے بلوچستان پر ہاتھ ہلکا رکھنا ہے آج ہم ایک خاص حالت کا سامنا کررہے ہیں اور آج ہم بلوچ دوستوں سے کہہ رہے ہیں کہ جیسے آپ کے ایک بزرگ رہنماء نے ہم سے کہا تھا کہ بلوچ اور بلوچستان پر ہاتھ ہلکا رکھنا ہے ہم کہتے ہیں کہ آپ کا بلوچستان آپ کو زندہ آباد ہو میں اور پشتونخوا میپ آپ کا ساتھی ہے تاہم ہم بھی یہ حق رکھتے ہیں کہ یہ صوبہ ہندوستان کے مسلمانوں کا سب سے پہلا چیف کمشنر صوبہ تھا ، صوبہ سرحد پنجاب کا حصہ تھا اور سندھ صوبہ نہیں تھا ، 1887میں گندمک کے معاہدے میں جن علاقوں پشین ، کوئٹہ ، کچلاک تا بارکھان ، ژوب کو شامل کر تے ہوئے اسے برٹش افغان کی بجائے برٹش بلوچستان کا نام دیا گیا ، خان شہید کی تمام سیاست اس پر تھی کہ اس صوبے کو بھی گورنر صوبہ بنایا جائے جس پر خان شہید کو قائد اعظم محمد علی جناح کی بھی حمایت حاصل تھی ۔ ہم نے ہر وقت آئین کی جنگ لڑی ہے اور آئین کی بالادستی چاہی ہے ، آج ہماری ضرورت ہے ہم پشتونخوا وطن کے سیاسی پارٹیوں اور بلوچ سیاسی پارٹوں سے کہہ رہے ہیں کہ ہمارا آئندہ فیصلہ یہ ہونا چاہیے کہ ہم نے عوام کی طاقت اور تنظیم کے بل بوتے پر تمام پشتونوں علاقوں وسطی پشتونخوا ، جنوبی پشتونخوا اور خیبر پشتونخواہ کو پشتونستان بنانا ہے اس لئے ہمیں تیاری کرنی ہے ۔ پوری پشتون قوم نے ہمارے ساتھ وعدہ کیا ہے کہ ہر گھر پر ایک ایک بندہ انہوں نے ہمیں دینا ہے یہ لاکھوں انسانوں کی طاقت ہے ۔

پاکستان پیپلزپارٹی کے مرکزی ڈپٹی سیکرٹری اطلاعات چوہدری منورانجم نے کہا ہے کہ چیئرمین پاکستان پیپلز پارٹی بلاول بھٹو زرداری آج بروز اتوار کوئٹہ کا ایک روزہ دورہ کریں گے، اہم سیاسی و قبائلی شخصیات پیپلزپارٹی میں شمولیت اختیار کریں گے، چیف آف جھالاوان نواب ثنااللہ زہری، سابق وزیراعلی بلوچستان شمولیت اختیار کریں گے، جنرل ریٹائرڈ عبدالقادر بلوچ، سابق گورنر، جنرل ریٹائرڈ یونس چنگیزی، سابق صوبائی وزیر شمولیت اختیار کریں گے، نواب محمد خان شاہوانی، سابق صوبائی وزیر میڈم کشور احمد جتک، سابق مشیر وزیراعلی شمولیت اختیار کریں گے، سردار چنگیز ساسولی، سابق ضلعی ناظم، سردارعمران بنگلزئی، مرکزی رہنما بلوچستان نیشنل پارٹی میرعبدالرحمان زہری، سابق چیئرمین خضدار ن لیگ بھی شمولیت کریں گے، نواب شیرباز نوشیروانی، ن لیگ میرعرفان کرد، ن لیگ آغا عرفان کریم احمد زئی، سابق صوبائی وزیرمیرغازی خان پندرانی، ن لیگ شمولیت کریں گے، سید عباس شاہ، مرکزی رہنما بلوچستان نیشنل پارٹی مینگل گروپ بھی شمولیت اختیار کریں گے.

پاکستان کرکٹ بورڈ نے کوئٹہ گلیڈیٹرز اور حکومت بلوچستان کو ویمن ٹی ٹونٹی ٹورنا منٹ کے کامیاب انعقاد پر مبارکباد دی ہے. پانچ ٹیموں پر مشتمل ٹورنامنٹ 26 جولائی سے 3 اگست تک کوئٹہ کے بُگٹی کرکٹ اسٹیڈیم میں کھیلا گیا ہے.

چیف ایگزیکٹیو پی سی بی وسیم خان کا کہنا ہے کوئٹہ میں کامیاب ٹی ٹونٹی ٹورنامنٹ کے انعقاد پر میں حکومت بلوچستان اور کوئٹہ گلیڈیٹرز کو مبارک باد دیتا ہوں، ٹورنامنٹ کے دوران کھلاڑیوں نے بہترین کھیل کا مظاہرہ کیا ہے، ایونٹ میں شریک کھلاڑی پی سی بی کے انڈر18، ایمرجنگ اور نیشنل ٹورنمنٹز میں شریک ہوچکی ہیں، ایونٹ کو کرکٹ کے فینز اور چاہنے والوں نے ملک کے نامور اسپورٹس چینل پردیکھا ہے.

ٹورنامنٹ میں شریک کھلاڑیوں کی کارکردگی کا ویمن چیف سلیکٹرعروج ممتاز اور ویمن ٹیم ہیڈ کوچ ڈیویڈ ہیمپ نے بھرپور جائزہ لیا ہے، اس ایونٹ سے خواتین کرکٹ میں نئے ٹیلنٹ کی شناخت کرنے میں مدد حاصل ہوگی، ہمارے لیئے یہ ضروری ہے کے ہم ویمن کرکٹ کو اسی طرح سے پروموٹ کریں اور کھلاڑیوں کیلیے کھیلنے کے نئے مواقع پیدا کرتے رہیں تاکہ ملک بھر سے مزید کھلاڑی سامنے آئیں، اس سلسلے میں تمام کرکٹ ایسوسیشنز اور پی سی بی کو مل کر کام کرنے کی ضرورت ہے، ویمن کرکٹ کو مزید فروغ دینا پی سی بی کی پانچ سالہ حکمت عملی کا اہم حصہ ہے اور ہم بھرپور توجہ کیساتھ ویمن کرکٹ پر کام کرتے رہیں گے.

صدر مملکت ڈاکٹر عارف علوی نے کوئٹہ میں گرین ٹریکٹراسکیم کا افتتاح کردیا ہے، گرین ٹریکٹرز بلوچستان حکومت کی طرف سے چھوٹے زمینداروں کو سبسڈی پردئیے جارہے ہیں، اسکیم کا مقصد زرعی پیداوار میں اضافہ کو یقینی بنانا ہے، گرین ٹریکٹرز بلوچستان میں زرعی شعبہ میں ترقی کی سمت ایک اور انقلابی پیش رفت ہے، ٹریکٹرز قرعہ اندازی کے زریعے دئیے جائیں گے، گرین ٹریکٹرز اسکیم کی منظوری گذشتہ سال دسمبر میں بلوچستان کابینہ کے اجلاس میں دی گئی تھی، اسکیم کے تحت صوبے کے تمام اضلاع کے زمینداروں کو ٹریکٹرز دئیے جائیں گے، ایک ہزار ٹریکٹرز 50 فیصد رعایتی ریٹس پردئے جائیں گے، زرعی شعبہ کو بلوچستان کی معیشت میں ریڑھ کی ہڈی کی حیثیت حاصل ہے.

پاکستان میں پروٹوکول راج کا خاتمہ نہیں ہوسکا ہے، حکومت پروٹوکول کلچر کو ختم کرنے کے دعوے کرتی رہتی ہے، ابھی تک اس دعوے کو عملی جامہ نہیں‌ پہنا سکی ہے.

آج صدرپاکستان ڈاکٹرعارف علوی شیڈول دورہ کرنے کیلئے کوئیٹہ پہنچے ہیں، ان کے پہنچنے پر بدترین ٹریفک جام ہوگیا ہے، ٹریفک پولیس نے دورہ کا شیڈول معلوم ہونے کے باوجود کوئی متبادل پلین تیارنہیں‌ کیا ہے، صدرکے پروٹوکول کیلئے مین روڈ بند کیا گیا ہے، عوام کو متبادل راستہ نہیں‌ دیا گیا ہے، جس کی وجہ سے بدترین ٹریفک جام ہے، گرمی کی وجہ سے بچے، بوڑھے اورخواتین پریشان ہوگئے ہیں، انتظامیہ موقع سے غائب ہے، عوام سراپہ احتجاج ہے، مشکل کی اس گھڑی میں‌ انتظامیہ کی غفلت پر کون ایکشن لیگا.

پچھلی حکومتوں میں بھی پروٹوکول کلچر بہت زیادہ عروج پر تھا، جب موجودہ حکومت اپوزیشن میں تھی تو بڑے دعوے کرتی تھی کہ اس کلچر کو ختم کردیا جائے گا، ابھی تک اس کلچر کا کوئی سدباب نہیں کیا گیا ہے.

بلوچستان میں پانچ روزہ پولیو مہم کا آغاز

باغی ٹی وی: بلوچستان کے 16اضلاع میں پانچ روزہ پولیو مہم کل سے شروع ہوگی، مہم کے حوالے سے تمام تیاریاں مکمل کرلی گئی ہیں۔

کوئٹہ میں ایمرجنسی آپریشن سینٹر کے کوآرڈینیٹرراشد رزاق نے کہا ہے کہ بلوچستان میں پولیو مہم صوبے کے 16 اضلاع کی 438 یونین کونسلز میں کل سے شروع ہو رہی ہے۔ ان اضلاع میں کوئٹہ، پشین، قلعہ عبداللہ ، جعفر آباد، نصیرآباد ،لورالائی، خضدار، بارکھان، ڈیرہ بگٹی، قلعہ سیف اللہ، دکی، موسی خیل، مستونگ، شیرانی، ژوب، اورصحبت پور شامل ہیں۔

صوبے کے 18اضلاع میں انسداد پولیو مہم جاری ہے جبکہ مہم کے لیے 16 ہزار731 تربیت یافتہ ٹیمیں تشکیل دی گئی ہیں۔

کوآرڈینیٹر عبدالباسط کا کہنا ہے کہ 15ہزار 965 موبائل،708 ٹرانزٹ اور 58رومنگ ٹیمیں شامل ہیں جبکہ 4 ہزار 385ایریا انچارجز بھی تعینات کیے گئے ہیں اور 26ہزار719اہلکار پولیو ٹیموں کی حفاظت کے لیے مامور ہونگے۔

واضح رہے کہ مہم کے دوران37 لاکھ سے زائد بچوں کو پولیو قطرے پلائے جائیں گے۔