سرگودھا ، باغی ٹی وی(نامہ نگار ملک شاہنواز جالپ) یونیورسٹی آف سرگودھا کے گیارہویں سالانہ کانووکیشن کی تقریب آج 19 دسمبر کو منعقد ہورہی ہے، جس کے مہمان خصوصی برطانیہ کی تاریخ کے کم عمر ترین نو منتخب ڈپٹی میئر عاصم نوید رانجھا ہوں گے۔
گزشتہ روز پاکستان آمد پر کوٹ مومن انٹرچینج پر سرگودھا سے تعلق رکھنے والے اس عظیم اور قابل فخر بیٹے کا شاندار استقبال کیا گیا۔ علاقہ کی سیاسی و سماجی شخصیات نے ڈھول کی تھاپ پر خوشی کا اظہار کرتے ہوئے گلاب کی پتیاں نچھاور کیں اور پنجاب کی روایتی شان – پگ – ڈپٹی میئر عاصم رانجھا کو باندھی۔
واضح رہے کہ ڈپٹی میئر عاصم رانجھا کا تعلق نصیر پور کلاں، کوٹ مومن ضلع سرگودھا سے ہے اور وہ اب مستقل طور پر برطانیہ میں مقیم ہیں۔ عاصم رانجھا چئیرمین چوہدری سرفراز خان رانجھا مرحوم کے صاحبزادے، چوہدری صفدر حسین رانجھا کے چھوٹے بھائی، اور پاکستان عوامی تحریک ضلع سرگودھا کے جنرل سیکرٹری محمد عمران ملک کے قریبی عزیز ہیں۔
کانووکیشن کی تقریب میں عاصم رانجھا کی شرکت نہ صرف یونیورسٹی بلکہ پورے علاقے کے لیے ایک قابل فخر موقع ہے، جہاں وہ اپنے خیالات اور تجربات طلبہ کے ساتھ شیئر کریں گے۔ ان کی شخصیت نہ صرف نوجوان نسل کے لیے ایک مثالی نمونہ ہے بلکہ ان کی کامیابی سرگودھا اور پاکستان کے لیے باعث افتخار ہے۔
Category: سرگودھا
-
سرگودھا یونیورسٹی کے گیارہویں سالانہ کانووکیشن کی شاندار تقریب آج منعقد ہوگی
-
سرگودھا: گورنمنٹ گریجویٹ کالج میں ڈویژنل سپورٹس مقابلوں کا افتتاح
سرگودھا، باغی ٹی وی (نامہ نگار شاہنواز جالپ)سابق وفاقی وزیر مملکت اور وزیراعظم پاکستان کے معاون خصوصی چوہدری حامد حمید نے کمشنر سرگودھا کے ہمراہ گورنمنٹ گریجویٹ کالج برائے خواتین چاندنی چوک سرگودھا میں ڈویژنل سپورٹس مقابلوں کا افتتاح کیا۔
گورنمنٹ گریجویٹ کالج برائے خواتین پہنچنے پر چوہدری حامد حمید اور کمشنر سرگودھا کا پرتپاک استقبال کیا گیا، جہاں انہیں پھولوں کے گلدستے پیش کیے گئے۔
اس موقع پر چوہدری حامد حمید نے خطاب کرتے ہوئے کہا کہ "تعلیم کے میدان میں کھیلوں کو فروغ دینا وزیراعلیٰ پنجاب مریم نواز شریف صاحبہ کا ایک احسن اقدام ہے۔ لڑکیوں کے تعلیمی اداروں میں کھیلوں کی سرگرمیاں ان کی ذہنی اور جسمانی صحت کے لیے نہایت اہم ہیں۔”
انہوں نے مزید کہا کہ وزیراعلیٰ پنجاب مریم نواز شریف صاحبہ کی تعلیمی اداروں کے لیے خدمات قابل ستائش ہیں اور ان کے یہ اقدامات نوجوان نسل کی ترقی اور بہتر مستقبل کے لیے انتہائی اہم کردار ادا کریں گے۔
ڈویژنل سپورٹس مقابلوں کے آغاز سے نہ صرف طالبات کو اپنی صلاحیتوں کے اظہار کا موقع ملے گا بلکہ یہ سرگرمیاں انہیں زندگی کے مختلف شعبوں میں کامیاب بنانے میں مددگار ثابت ہوں گی۔
-
سرگودھا :کرائے کے قاتلوں کا نیٹ ورک کا انکشاف، عوام خوفزدہ
سرگودھا(باغی ٹی وی ،سٹی رپورٹرادریس نواز چدھڑ)کرائے کے قاتلوں کا نیٹ ورک کا انکشاف، عوام خوفزدہ
تفصیلات کے مطابق سرگودھا ضلع بھر میں قتل اور اقدام قتل کے واقعات میں تشویشناک حد تک اضافہ ہو چکا ہے، جس سے شہری عدم تحفظ کا شکار ہیں۔ ذرائع کے مطابق ضلع میں کرائے کے قاتلوں کا ایک منظم نیٹ ورک فعال ہے جو چند لاکھ روپے کے عوض کسی کو بھی جان سے مارنے کو تیار ہو جاتے ہیں۔ واردات کے بعد یہ قاتل روپوش ہو جاتے ہیں اور مقتول کے لواحقین اپنے مخالفین کے خلاف مقدمات درج کروا دیتے ہیں۔
اکثر یہ دیکھا گیا ہے کہ قتل کے اصل ذمہ دار یعنی قتل کروانے والے اور کرائے کے قاتل دونوں تفتیش کے دوران رعایت حاصل کر لیتے ہیں جس کی وجہ سے انصاف کے تقاضے پورے نہیں ہو پاتے اور جرائم میں مزید اضافہ ہوتا ہے۔
پولیس کی کارکردگی صرف اتنا ہی ہے جو صرف مقدمات درج کرنے تک محدود رہتی ہے۔ بعض اوقات دشمنی والے افراد کے خلاف اسلحہ رکھنے کے باوجود مقدمات درج کر لیے جاتے ہیں، جس سے عام شہری اپنی حفاظت کے لیے ہتھیار رکھنے سے بھی کتراتے ہیں اور اپنے مخالفین کے ہاتھوں آسانی سے نشانہ بن جاتے ہیں۔
عدالتی نظام اور تفتیشی نقائص بھی ان واقعات میں اضافے کا ایک بڑا سبب ہیں۔ قتل کے مقدمات میں ملوث ملزمان کو رعایت دی جاتی ہے اور تفتیش کے دوران کرپشن کے معاملات بھی سامنے آتے ہیں، جس کی وجہ سے ملزمان عدالت سے ضمانت پر رہا ہو جاتے ہیں۔ یہ صورتحال متاثرین میں بدلے کے جذبات کو بڑھاتی ہے اور علاقہ مزید بدامنی کا شکار ہو جاتا ہے۔
علاقہ مکینوں اور سماجی حلقوں نے حکومت اور قانون نافذ کرنے والے اداروں سے مطالبہ کیا ہے کہ کرائے کے قاتلوں کے خلاف سخت کارروائی کی جائے تاکہ ان کا نیٹ ورک مکمل طور پر ختم ہو سکے۔ قتل کے مقدمات کی غیر جانبدار تفتیش یقینی بنائی جائے اور ملوث افراد کو سخت سزائیں دی جائیں۔ پولیس افسران اور ایس ایچ اوز کو علاقے میں امن و امان کے قیام کے لیے فعال کردار ادا کرنے کی ضرورت ہے۔
عوام کا کہنا ہے کہ انصاف کے فقدان اور سزاؤں کے نہ ہونے کی وجہ سے لوگ اپنی دشمنیوں کو ختم کرنے کے بجائے مزید بڑھا رہے ہیں، جس سے علاقہ بدامنی کا شکار ہو رہا ہے۔ عوام نے وزیراعظم پاکستان اور اعلیٰ حکام سے اپیل کی ہے کہ ان مسائل کو فوری حل کیا جائے تاکہ علاقے میں امن بحال ہو سکے۔
-
سرگودھا:چک 54 شمالی میں گیس نایاب، عوام مشکلات کا شکار
سرگودھا (باغی ٹی وی،سٹی رپورٹرادریس نواز چدھڑ) سرگودھا کے نواحی علاقے چک 54 شمالی میں گیس کی فراہمی مکمل طور پر بند ہو گئی ہے، جس سے عوام شدید پریشانی میں مبتلا ہیں۔ علاقہ مکینوں کا کہنا ہے کہ بھاری بلوں کی ادائیگی کے باوجود گھروں میں گیس کی سہولت موجود نہیں اور وہ مہنگی لکڑیاں اور ایل پی جی خریدنے پر مجبور ہیں۔
علاقے کے رہائشیوں نے محکمہ سوئی گیس کے افسران پر تنقید کرتے ہوئے کہا کہ یہ صورتحال ان کی ناقص کارکردگی کا واضح ثبوت ہے۔ مکینوں کا مزید کہنا تھا کہ گیس کی عدم موجودگی نے ان کی زندگی اجیرن بنا دی ہے، اور اگر فوری طور پر مسئلہ حل نہ کیا گیا تو احتجاج کیا جائے گا۔
عوام نے وزیراعظم پاکستان اور منتخب عوامی نمائندوں سے مطالبہ کیا ہے کہ گیس کی فراہمی کو یقینی بنانے کے لیے فوری اقدامات کیے جائیں۔
-
سرگودھا: انٹر کالجیٹ بیڈمنٹن ٹورنامنٹ اختتام پذیر، فاروق کالونی کالج کی شاندار میزبانی
سرگودھا (باغی ٹی وی، نامہ نگار ملک شاہنواز جالپ) تعلیمی بورڈ سرگودھا کے زیر اہتمام گورنمنٹ گریجویٹ کالج برائے خواتین فاروق کالونی میں دو روزہ انٹر کالجیٹ گرلز بیڈمنٹن ٹورنامنٹ کا اختتام ہوا۔
اختتامی تقریب کی مہمان خصوصی پرنسپل میڈم منتہیٰ جاوید تھیں، جنہوں نے اس موقع پر طالبات کے جوش و جذبے کو سراہا۔ تقریب میں ڈائریکٹر سپورٹس روشن ضمیر کالرو، وقاص بٹ، اور پروفیسر میڈم صباحت بھی شریک تھیں۔
ٹورنامنٹ میں گورنمنٹ گریجویٹ کالج فاروق کالونی نے دوسری پوزیشن حاصل کی جبکہ پہلی اور تیسری پوزیشن نجی کالجوں نے اپنے نام کی۔
تقریب سے خطاب کرتے ہوئے میڈم منتہیٰ جاوید نے کہا کہ کھیلوں کے مقابلے نہ صرف نوجوانوں کی صلاحیتوں کو نکھارتے ہیں بلکہ ان کے اعتماد اور جسمانی صحت میں بھی اضافہ کرتے ہیں۔ انہوں نے اس بات پر زور دیا کہ ایسے مواقع خواتین کھلاڑیوں کو قومی اور بین الاقوامی سطح پر اپنی صلاحیتوں کے اظہار کا پلیٹ فارم فراہم کرتے ہیں۔
اختتام پر روشن ضمیر کالرو نے میڈم منتہیٰ جاوید اور میڈم صباحت کی میزبانی اور عمدہ انتظامات کو سراہتے ہوئے شکریہ ادا کیا۔
-
سرگودھا: پٹرولنگ پولیس کی غنڈہ گردی، صحافی اور کیمرہ مین پر تشدد، افسران خاموش
سرگودھا (باغی ٹی وی،سٹی رپورٹرادریس نواز چدھڑ) پٹرولنگ پولیس کے اہلکاروں کی جانب سے نجی چینل کے صحافی اور کیمرہ مین پر بہیمانہ تشدد کا واقعہ پیش آیا ہے۔ غلام اکبر اور کیمرہ مین ساگر عارف اجنالہ روڈ پر کوریج کے لیے جا رہے تھے جب 27 چک کے قریب پٹرولنگ چیک پوسٹ پر اہلکاروں نے انہیں روکا اور شناختی کارڈ دکھانے کے باوجود بدسلوکی کرتے ہوئے زد و کوب کیا۔
کیمرہ مین ساگر عارف کی میڈیکل رپورٹ میں تشدد کی تصدیق ہو چکی ہے، لیکن پولیس اپنے اہلکاروں کے خلاف کارروائی کرنے سے انکاری ہے۔ اس واقعے کے بعد صحافتی برادری نے شدید احتجاج کیا ہے اور اعلیٰ حکام سے نوٹس لینے کا مطالبہ کیا ہے۔
صحافیوں کا کہنا ہے کہ اگر میڈیا کے نمائندوں کے ساتھ ایسا رویہ اختیار کیا جا رہا ہے تو عام شہریوں کے لیے انصاف کا حصول مزید مشکل ہو جائے گا۔ معروف قانون دان ایڈووکیٹ احسان چٹکال نے اس واقعے کو قانون کی خلاف ورزی قرار دیتے ہوئے کہا کہ پولیس افسران ماتحت عملے کے غیر قانونی رویے پر خاموشی اختیار کیے ہوئے ہیں، جس کا نقصان عوام کو ہو رہا ہے۔
صحافتی تنظیموں نے وزیر اعلیٰ پنجاب مریم نواز شریف سے مطالبہ کیا ہے کہ تشدد میں ملوث اہلکاروں کو فوری طور پر برخاست کیا جائے اور ان کے خلاف مقدمہ درج کر کے متاثرین کو انصاف فراہم کیا جائے۔ عوامی حلقے بھی اس واقعے پر غم و غصے کا اظہار کر رہے ہیں اور پولیس کے رویے میں اصلاح کی ضرورت پر زور دے رہے ہیں۔
-
سرگودھا: ستھرا پنجاب اور دھی رانی پروگرام پر پیش رفت کا جائزہ اجلاس
سرگودھا (باغی ٹی وی،سٹی رپورٹرادریس نواز چدھڑ) کمشنر جہانزیب اعوان کی زیر صدارت اجلاس میں وزیر اعلیٰ پنجاب کے عوامی بہبود اقدامات، ستھرا پنجاب اور دھی رانی پروگرام پر پیش رفت کا جائزہ لیا گیا۔ چاروں ڈپٹی کمشنرز، اے ڈی سی آرز، سوشل ویلفیئر اور لوکل گورنمنٹ کے افسران نے شرکت کی۔
کمشنر نے اسسٹنٹ کمشنرز کو دیہات کے دورے کر کے ستھرا پنجاب پروگرام کی سرگرمیوں کا معائنہ کرنے کی ہدایت دی۔ دھی رانی پروگرام کے تحت موصول 715 درخواستوں میں سے خوشاب، میانوالی، اور بھکر میں تصدیق کا عمل مکمل ہو چکا ہے، جبکہ سرگودھا میں یہ عمل 30 نومبر تک مکمل ہوگا۔
کمشنر نے تمام ڈپٹی کمشنرز کو عوامی بہبود منصوبوں کی بروقت تکمیل اور میدان میں جا کر اہداف کا جائزہ لینے کی ہدایت کی۔ انہوں نے کہا کہ انتظامیہ کو عوام کی سہولت اور سرکاری امور میں بہتری کے لیے زیادہ محنت کرنی چاہیے۔ اجلاس میں ماڈل بازار کے قیام اور سرکاری اداروں کی پبلک سروس ڈلیوری میں بہتری لانے کے اقدامات پر بھی زور دیا گیا۔
-
سرگودھا: نواز شریف کارڈیالوجی ہسپتال کی تعمیر جاری
سرگودھا (باغی ٹی وی ،سٹی رپورٹرادریس نواز چدھڑ) میڈیکل سپرنٹنڈنٹ ڈسٹرکٹ ٹیچنگ ہسپتال ڈاکٹر مشتاق بشیر عاکف نے کہا ہے کہ نواز شریف کارڈیالوجی ہسپتال کی تعمیر تیزی سے جاری ہے، جس سے علاقے کے مریضوں کو معیاری طبی سہولیات فراہم کی جائیں گی۔
انہوں نے بتایا کہ مریضوں کی سہولت کے لیے ایم آر آئی کے اوقات کار رات 8 بجے تک بڑھا دیے گئے ہیں، جبکہ فارمیسی کے اوقات میں بھی ایک گھنٹے کا اضافہ کیا گیا ہے تاکہ مریضوں کو بروقت ادویات مہیا کی جا سکیں۔ مزید برآں، ڈائیلسز اور سی ٹی اسکین کی خدمات بھی بہتر انداز میں دستیاب ہیں۔
ڈاکٹر مشتاق بشیر نے کہا کہ ہسپتال میں مریضوں کو سہولیات کی فراہمی اولین ترجیح ہے۔ کسی بھی قسم کی شکایت کے ازالے کے لیے میرے دروازے کھلے ہیں۔ مریضوں کی شکایت پر سائیکل اسٹینڈ کے ٹھیکیدار کے خلاف اوور چارجنگ پر مقدمہ درج کروا دیا گیا ہے، جبکہ ہسپتال کی کینٹین پر معیاری اشیاء کی فراہمی کو یقینی بنایا جا رہا ہے۔
انہوں نے مزید کہا کہ ایمرجنسی وارڈ میں ڈاکٹرز ہمہ وقت مریضوں کو بہترین خدمات فراہم کر رہے ہیں، جبکہ ایمرجنسی کو مزید وسعت دینے کے لیے حکومت سے فنڈز کی درخواست کی گئی ہے۔ کارڈیالوجی ہسپتال کی تعمیر مکمل ہونے سے سرگودھا سمیت دور دراز کے علاقوں کے مریضوں کو معیاری اور جدید طبی سہولیات میسر آئیں گی۔
ڈاکٹر مشتاق بشیر نے ہسپتال کی موجودہ کارکردگی پر اطمینان کا اظہار کرتے ہوئے اسے مزید بہتر بنانے کے عزم کا اعادہ کیا۔
-
سرگودھا: مسافر بس الٹ گئی، 2 افراد جاں بحق، 10 زخمی
سرگودھا (باغی ٹی وی رپورٹ) سرگودھا کے مٹھہ معصوم بائی پاس کے قریب ایک افسوسناک حادثے میں مسافر بس الٹنے سے 2 افراد جاں بحق جبکہ 10 زخمی ہو گئے۔ حادثے کے بعد امدادی کارروائیاں کرتے ہوئے زخمیوں اور جاں بحق افراد کو قریبی ڈی ایچ کیو ہسپتال منتقل کر دیا گیا۔
تفصیلات کے مطابق مسافر بس فیصل آباد سے بنوں کی جانب جا رہی تھی کہ مٹھہ معصوم بائی پاس کے قریب اچانک ڈرائیور بس پر قابو نہ رکھ سکا۔ بس الٹنے کی وجہ سے موقع پر دو افراد جان کی بازی ہار گئے جبکہ دیگر 10 مسافر زخمی ہو گئے جن میں سے کچھ کی حالت تشویشناک بتائی جا رہی ہے۔
ریسکیو اہلکاروں نے فوری طور پر جائے وقوعہ پر پہنچ کر امدادی کارروائیاں شروع کیں۔ زخمیوں کو ابتدائی طبی امداد دینے کے بعد ڈی ایچ کیو ہسپتال منتقل کیا گیا،
حکام کا کہنا ہے کہ حادثے کی وجہ تیز رفتاری یا ممکنہ طور پر ڈرائیور کی غفلت ہو سکتی ہے۔ حادثے کے وقت بس میں موجود مسافروں نے بتایا کہ ڈرائیور بس کو غیر معمولی رفتار سے چلا رہا تھا، جس کی وجہ سے یہ سانحہ پیش آیا۔
-
سرگودھا: کچہری کے باہر فائرنگ اور خنجر سے حملہ، ایک جاں بحق،2خواتین سمیت 4 زخمی
سرگودھا (باغی ٹی وی،نامہ نگارشاہنوازجالپ) ضلع کچہری کے باہر موٹر سائیکل سوار دو افراد نے پیشی کے لیے آنے والی فیملی پر فائرنگ کر دی، جس کے نتیجے میں ایک شخص جاں بحق اور دو خواتین سمیت چار افراد زخمی ہو گئے۔ پولیس کے مطابق یہ واقعہ گاؤں 73 چک بلوچاں والے سے تعلق رکھنے والی فیملی پر پیش آیا، جب موٹر سائیکل سوار حملہ آوروں نے فائرنگ کی اور ایک نوجوان نے خنجر سے بھی حملہ کیا۔
گولی لگنے سے 40 سالہ اعجاز موقع پر ہی جاں بحق ہو گیا جبکہ 65 سالہ نذر، 55 سالہ شمیم، 40 سالہ عمر دراز اور 38 سالہ کوثر پروین زخمی ہو گئے۔ تمام زخمیوں کو فوری طور پر ڈی ایچ کیو ہسپتال منتقل کر دیا گیا جہاں ان کی حالت خطرے سے باہر بتائی گئی ہے۔
پولیس کے مطابق مرنے اور زخمی ہونے والوں کا تعلق ایک ہی فیملی سے ہے۔ واقعے کے بعد پولیس نے ملزمان کی گرفتاری کے لیے علاقہ کی ناکہ بندی کر لی ہے اور تحقیقات کا آغاز کر دیا ہے۔ ڈسٹرکٹ پولیس افیسر کا دفتر بھی اس مقام کے قریب واقع ہے، جہاں یہ حملہ ہوا، اور اس علاقے میں وکلا اور عدالتوں میں پیشی کے لیے آنے والوں کا بھی رش رہتا ہے۔
پولیس ذرائع کا کہنا ہے کہ اس حملے کی وجوہات تاحال واضح نہیں ہو سکیں، تاہم معاملے کی تمام پہلوؤں سے تحقیقات جاری ہیں۔