Category: سرگودھا

سرگودھا (باغی ٹی وی رپورٹ) سرگودھا کے مٹھہ معصوم بائی پاس کے قریب ایک افسوسناک حادثے میں مسافر بس الٹنے سے 2 افراد جاں بحق جبکہ 10 زخمی ہو گئے۔ حادثے کے بعد امدادی کارروائیاں کرتے ہوئے زخمیوں اور جاں بحق افراد کو قریبی ڈی ایچ کیو ہسپتال منتقل کر دیا گیا۔

تفصیلات کے مطابق مسافر بس فیصل آباد سے بنوں کی جانب جا رہی تھی کہ مٹھہ معصوم بائی پاس کے قریب اچانک ڈرائیور بس پر قابو نہ رکھ سکا۔ بس الٹنے کی وجہ سے موقع پر دو افراد جان کی بازی ہار گئے جبکہ دیگر 10 مسافر زخمی ہو گئے جن میں سے کچھ کی حالت تشویشناک بتائی جا رہی ہے۔

ریسکیو اہلکاروں نے فوری طور پر جائے وقوعہ پر پہنچ کر امدادی کارروائیاں شروع کیں۔ زخمیوں کو ابتدائی طبی امداد دینے کے بعد ڈی ایچ کیو ہسپتال منتقل کیا گیا،

حکام کا کہنا ہے کہ حادثے کی وجہ تیز رفتاری یا ممکنہ طور پر ڈرائیور کی غفلت ہو سکتی ہے۔ حادثے کے وقت بس میں موجود مسافروں نے بتایا کہ ڈرائیور بس کو غیر معمولی رفتار سے چلا رہا تھا، جس کی وجہ سے یہ سانحہ پیش آیا۔

سرگودھا (باغی ٹی وی،نامہ نگارشاہنوازجالپ) ضلع کچہری کے باہر موٹر سائیکل سوار دو افراد نے پیشی کے لیے آنے والی فیملی پر فائرنگ کر دی، جس کے نتیجے میں ایک شخص جاں بحق اور دو خواتین سمیت چار افراد زخمی ہو گئے۔ پولیس کے مطابق یہ واقعہ گاؤں 73 چک بلوچاں والے سے تعلق رکھنے والی فیملی پر پیش آیا، جب موٹر سائیکل سوار حملہ آوروں نے فائرنگ کی اور ایک نوجوان نے خنجر سے بھی حملہ کیا۔

گولی لگنے سے 40 سالہ اعجاز موقع پر ہی جاں بحق ہو گیا جبکہ 65 سالہ نذر، 55 سالہ شمیم، 40 سالہ عمر دراز اور 38 سالہ کوثر پروین زخمی ہو گئے۔ تمام زخمیوں کو فوری طور پر ڈی ایچ کیو ہسپتال منتقل کر دیا گیا جہاں ان کی حالت خطرے سے باہر بتائی گئی ہے۔

پولیس کے مطابق مرنے اور زخمی ہونے والوں کا تعلق ایک ہی فیملی سے ہے۔ واقعے کے بعد پولیس نے ملزمان کی گرفتاری کے لیے علاقہ کی ناکہ بندی کر لی ہے اور تحقیقات کا آغاز کر دیا ہے۔ ڈسٹرکٹ پولیس افیسر کا دفتر بھی اس مقام کے قریب واقع ہے، جہاں یہ حملہ ہوا، اور اس علاقے میں وکلا اور عدالتوں میں پیشی کے لیے آنے والوں کا بھی رش رہتا ہے۔

پولیس ذرائع کا کہنا ہے کہ اس حملے کی وجوہات تاحال واضح نہیں ہو سکیں، تاہم معاملے کی تمام پہلوؤں سے تحقیقات جاری ہیں۔

سرگودھا (باغی ٹی وی، نامہ نگار شاہنواز جالپ) پولیس لائنز، خواتین کانسٹیبل کی ہراسگی پر انسپکٹر آزر ندیم کو ضلع بدر کر دیا گیا،انسپکٹر آزر ندیم کے خلاف انکوائری میں کرپشن اور ناجائز عزائم کی تفصیلات سامنے آئیں، آئندہ کسی اہم عہدے پر تعیناتی پر پابندی

تفصیل کے مطابق سرگودھا پولیس لائنز میں خواتین کانسٹیبل کے ساتھ ہراسگی کے معاملے میں پولیس کی اعلیٰ قیادت نے سخت کارروائی کی ہے۔ سیکورٹی انچارج انسپکٹر آزر ندیم کو ضلع بدر کر دیا گیا ہے اور ان کی آئندہ کسی بھی اہم عہدے پر تعیناتی پر واضح احکامات جاری کر دیے گئے ہیں۔

ذرائع کے مطابق دوران انکوائری یہ بات سامنے آئی کہ آر اے لیڈی کانسٹیبل انسپکٹر آزر ندیم کے ناجائز عزائم کی تکمیل میں سہولت کاری کرتی رہی۔ انسپکٹر آزر ندیم نے اپنے اوپر لگائے گئے الزامات کی تردید کی لیکن اپنی صفائی میں کوئی ٹھوس ثبوت یا گواہ پیش نہ کر سکے۔

انکوائری کے دوران یہ بھی پتا چلا کہ آزر ندیم کی شہرت اچھی نہیں ہے اور وہ محکمے کے لیے بڑی بدنامی کا باعث بن سکتے ہیں۔ ریکارڈ چیک کرنے پر یہ بھی انکشاف ہوا کہ انسپکٹر آزر ندیم کو تین مرتبہ محکمہ سے ڈسمس کیا جا چکا ہے اور وہ کرپشن کے دو مقدمات میں بھی ملوث ہیں۔

اس تمام صورتحال کے بعد پولیس لائنز کی خواتین کانسٹیبل نے ہراسگی کے حوالے سے آئی جی پنجاب کو خط لکھا تھا، جس کے بعد انکوائری کی گئی اور انسپکٹر آزر ندیم کے خلاف کارروائی عمل میں لائی گئی۔

سرگودھا (باغی ٹی وی،سٹی رپورٹرادریس نواز چدھڑ)سرگودھا میں ڈی پی او کی سربراہی میں پولیس کی بہترین حکمت عملی کے نتیجے میں گزشتہ چھ ماہ کے دوران جرائم کی شرح میں نمایاں کمی دیکھنے میں آئی ہے۔ سرگودھا پولیس نے ماہ اکتوبر 2024 کی کارکردگی رپورٹ جاری کی جس کے مطابق مختلف نوعیت کے سنگین جرائم میں خاطرخواہ کمی نظرآئی ہے۔

تفصیلات کے مطابق سرگودھا پولیس کے ترجمان کے مطابق گزشتہ چھ ماہ میں ڈکیتی کی وارداتوں میں 66 فیصد کمی آئی، کم عمر بچیوں سے زیادتی کی وارداتوں میں 57 فیصد کمی، اقدام قتل کے واقعات میں 54 فیصد کمی، بچوں سے بدفعلی کے واقعات میں 52 فیصد کمی، کار چوری کی وارداتوں میں 47 فیصد کمی، موٹر سائیکل چھیننے کی وارداتوں میں 44 فیصد کمی، راہزنی کی وارداتوں میں 28 فیصد کمی، موٹرسائیکل چوری میں 26 فیصد، قتل کی وارداتوں میں 22 فیصد اور چوری کی وارداتوں میں 20 فیصد کمی ریکارڈ کی گئی۔ اس کے علاوہ خواتین سے زیادتی کے کیسز میں بھی 20 فیصد کمی اور نقب زنی کی وارداتوں میں 18 فیصد تک کمی دیکھنے میں آئی۔

ماہ اکتوبر 2024 کے دوران برآمدہ شدہ مال مسروقہ کی مالیت تقریباً 5 کروڑ 73 لاکھ روپے رہی، جو قانونی کارروائی کے بعد اصل مالکان کے حوالے کیا گیا۔ جرائم پیشہ عناصر کے خلاف کارروائیوں کے دوران 362 اشتہاری مجرمان کو گرفتار کیا گیا جبکہ غیر قانونی اسلحہ رکھنے اور اس کی نمائش پر 223 مقدمات درج کیے گئے۔ برآمدہ شدہ غیر قانونی اسلحہ میں 15 کلاشنکوف، 19 رائفل، 35 بندوقیں، 159 پستول اور 1254 گولیاں شامل ہیں۔

اسی طرح منشیات فروشوں کے خلاف کارروائیوں میں 175 مقدمات درج کیے گئے، جن میں 81.85 کلو چرس، 2.7 کلو ہیروئن، 3.2 کلو افیون، 700 لیٹر لہن اور 5601 لیٹر شراب برآمد کی گئی۔ پولیس نے مختلف علاقوں میں جرائم پیشہ عناصر کے خلاف کریک ڈاؤن کرتے ہوئے 12 خطرناک گینگز کو بھی گرفتار کیا۔

ڈی پی او سرگودھا ڈاکٹر اسد اعجاز ملہی نے اس موقع پر اپنے خیالات کا اظہار کرتے ہوئے کہا کہ سرگودھا پولیس جرائم پیشہ عناصر کے خلاف کریک ڈاؤن جاری رکھے گی اور قانون شکنی پر سخت کارروائی عمل میں لائی جائے گی۔ انہوں نے شہریوں سے اپیل کی کہ وہ جرائم کے خاتمے میں پولیس کے ساتھ تعاون کریں تاکہ سرگودھا کو ایک محفوظ اور پُرامن شہر بنایا جا سکے۔

سرگودھا (باغی ٹی وی،سٹی رپورٹر،ادریس نواز چدھڑ) سٹی سرکل میں بڑھتی چوری و ڈکیتی کی وارداتیں، شہری عدم تحفظ کا شکار

تفصیل کے مطابق سرگودھا کے سٹی سرکل میں چوری اور ڈکیتی کی بڑھتی وارداتوں نے شہریوں کو عدم تحفظ میں مبتلا کر دیا ہے۔گذشتہ ایک ہفتے میں سٹی سرکل کے مختلف تھانوں کے علاقوں میں کل 41 موٹرسائیکل چوری کے واقعات رپورٹ ہوئے ہیں۔ اس کے علاوہ، شہریوں سے گن پوائنٹ پر پیسے چھیننے اور گھروں، دکانوں اور دیگر مقامات پر ڈکیتی و چوری کی وارداتیں بھی جاری ہیں۔ شہریوں نے پولیس کی ناکامی پر تشویش کا اظہار کیا ہے اور اعلیٰ حکام سے فوری نوٹس لینے کا مطالبہ کیا ہے۔

پچھلے ایک ہفتے کے دوران سرگودھا کے مختلف تھانوں میں درج کی گئی وارداتوں کی تفصیلات مندرجہ ذیل ہیں
تھانہ سیٹلائیٹ ٹاؤن کی حدود میں موٹرسائیکل چوری کی 5 وارداتیں، 3 چوری کے کیسز اور مویشی چوری کے 2 واقعات رپورٹ ہوئے ہیں۔ یہاں کے رہائشیوں نے پولیس کی ناقص کارکردگی پر برہمی کا اظہار کیا ہے۔

تھانہ سٹی کے علاقوں میں موٹر سائیکل چوری کی 12 وارداتیں سامنے آئیں۔ اس کے علاوہ ہاؤس و شاپ رابری اور گن پوائنٹ پر پیسے چھیننے کی وارداتیں بھی رپورٹ ہوئیں۔ یہاں پر شہریوں کا کہنا ہے کہ ان وارداتوں نے ان کی روزمرہ زندگی کو متاثر کیا ہے۔

تھانہ اربن ایریا کے علاقے میں موٹرسائیکل چوری کی 8 وارداتیں اور دیگر چوری کی وارداتیں رپورٹ ہوئیں۔ اس تھانے کے علاقے میں بھی متعدد سٹور و سٹریٹ رابری کے واقعات پیش آئے ہیں۔

تھانہ ساجد شہید میں بھی موٹرسائیکل چوری کے 7 واقعات اور اس کے علاوہ دو سنیچنگ کی وارداتیں رپورٹ ہوئیں، جس نے عوام میں خوف کی فضا پیدا کر دی ہے۔

تھانہ فیکٹری ایریا کی حدودسے بھی 4 موٹرسائیکل چوری کے کیسز اور سٹریٹ رابری کے مزید کیسز رپورٹ ہوئے ہیں۔ علاقے کے لوگوں نے پولیس پر عدم اعتماد کا اظہار کیا ہے۔

اسی طرح تھانہ کینٹ کےعلاقے میں موٹرسائیکل چوری کی 5 وارداتیں سامنے آئیں۔ دیگر چوری کی وارداتیں بھی بڑھ رہی ہیں اور مقامی پولیس ان واقعات کو روکنے میں ناکام دکھائی دے رہی ہے۔

شہریوں نے پولیس کی ناکامی پر سخت غصے کا اظہار کیا ہے اور کہا ہے کہ پولیس نے اگرچہ وارداتوں کی ایف آئی آر درج کی ہیں، مگر ملزمان کو گرفتار کرنے اور چوری شدہ اشیاءکی بازیابی میں ناکام رہی ہے۔ اس صورتحال میں اے ایس پی سٹی سرکل انعم شیر کی خاموشی نے بھی شہریوں کو تشویش میں مبتلا کر دیا ہے۔ شہریوں کا کہنا ہے کہ پولیس کی جانب سے وارداتوں پر قابو پانے اور مجرموں کو گرفتار کرنے کے اقدامات ناکافی ہیں۔

شہریوں کا کہنا ہے کہ سرگودھا کے سٹی سرکل میں بڑھتی ہوئی وارداتوں نے ان کے روزمرہ کے معمولات کو متاثر کر دیا ہے۔ چوروں اور ڈاکوؤں کی دہشت کے باعث لوگ عدم تحفظ کا شکار ہو چکے ہیں۔ شہریوں نے ڈی پی او سرگودھا، آر پی او سرگودھا، آئی جی پنجاب اور وزیر اعلیٰ پنجاب سے فوری نوٹس لینے کا مطالبہ کیا ہے تاکہ سرگودھا میں عوام کو تحفظ فراہم کیا جا سکے اور چوری و ڈکیتی کے واقعات کو روکا جا سکے۔