Category: سرگودھا

سرگودھا (باغی ٹی وی ،سٹی رپورٹرادریس نواز چدھڑ سے) ضلع سرگودھا میں جرائم کی بڑھتی ہوئی وارداتوں نے شہریوں کی زندگی کو اجیرن بنا دیا ہے۔ مجرم بے خوف ہو کر دندناتے پھر رہے ہیں اور شہری شدید عدم تحفظ کا شکار ہو چکے ہیں۔ مقامی لوگوں نے وزیراعلیٰ پنجاب مریم نواز شریف سے علاقے میں بگڑتی ہوئی امن و امان کی صورتحال پر فوری نوٹس لینے کا مطالبہ کیا ہے۔

تفصیلات کے مطابق جنوری سے ستمبر تک ضلع بھر میں 158 سے زائد افراد قتل ہوئے ہیں۔ چوری اور ڈکیتی کی وارداتوں میں نمایاں اضافہ ہوا ہے، جبکہ دوران ڈکیتی قتل کے چار واقعات اور اقدامِ قتل کے 300 سے زائد واقعات رپورٹ ہو چکے ہیں۔ پولیس ذرائع کے مطابق زنا بالجبر کے 65، گینگ ریپ کے 75، بدفعلی کے 46، اور ڈکیتی کے 17 واقعات درج ہوئے ہیں۔ پولیس مقابلوں کی تعداد بھی 39 تک پہنچ چکی ہے۔

منشیات کے استعمال، خاص طور پر آئس کے نشے کا بڑھتا ہوا رجحان بھی پولیس کی کارکردگی پر سوالیہ نشان بن چکا ہے۔ اس ابتر صورتحال نے شہریوں کو شدید پریشانی میں مبتلا کر دیا ہے۔ ڈی پی او سرگودھا کی خاموشی پر بھی شہریوں نے حیرت کا اظہار کیا ہے، جبکہ پولیس کی جانب سے مجرموں کو گرفتار کرنے میں ناکامی پر بھی شدید تنقید کی جا رہی ہے۔

سرگودھا کے شہریوں نے آئی جی پنجاب ڈاکٹر عثمان انور اور وزیراعلیٰ پنجاب سے فوری نوٹس لے کر امن و امان کی بگڑتی ہوئی صورتحال کو بہتر بنانے کا مطالبہ کیا ہے۔

سرگودھا (باغی ٹی وی،نامہ نگارشاہنوازجالپ) سرگودھا میں بے نظیر انکم سپورٹ پروگرام کے تحت امدادی رقوم کی وصولی کے لیے خواتین کو شدید مشکلات کا سامنا ہے۔ کمپنی باغ میں قائم کیمپ میں خواتین دور دراز سے آ رہی ہیں، مگر بدترین انتظامات کے باعث انہیں گھنٹوں دھوپ میں کھڑا رہنا پڑتا ہے۔ نہ صرف پانی اور پنکھوں کی عدم دستیابی ہے، بلکہ بیٹھنے کا بھی کوئی مناسب انتظام نہیں کیا گیا۔

کیمپ میں موجود خواتین نے شکایت کی کہ وہ گرمی اور دھکم پیل کے باعث جسمانی طور پر تھک چکی ہیں اور کسی بھی وقت کوئی بڑا سانحہ پیش آ سکتا ہے۔ کئی خواتین کو گرمی اور طویل انتظار کے باعث بے ہوشی کی حالت میں ہسپتال منتقل کیا گیا ہے، لیکن حکام کی جانب سے ابھی تک کوئی کارروائی نہیں کی گئی۔

مقامی افراد اور متاثرہ خواتین نے انتظامیہ سے مطالبہ کیا ہے کہ فوری طور پر کیمپ میں انتظامات بہتر کیے جائیں تاکہ انہیں مزید ذلت اور مشکلات کا سامنا نہ کرنا پڑے۔ ان کا کہنا ہے کہ حکومت کی امدادی رقوم تو ان کا حق ہیں، مگر ان کے حصول کے لیے اس قدر تکلیف دہ مراحل سے گزرنا ناانصافی ہے۔

متاثرہ خواتین کا کہنا تھا کہ اگر انتظامات بہتر نہ کیے گئے تو وہ احتجاج کرنے پر مجبور ہوں گی۔

سرگودھا(باغی ٹی وی ،نامہ نگارشاہنوازجالپ) سرگودھا پریس کلب میں اے ایس پی سٹی عبدالسمیع شیخ کی آمد پر ایک تقریب کا اہتمام کیا گیا۔ اس موقع پر صدر پریس کلب مہر آصف حنیف نے کہا کہ سرگودھا پولیس اور پریس کے درمیان باہمی تعلقات بہت اچھے اور خوشگوار ہیں۔ دونوں ادارے مل کر جرائم کی روک تھام اور ایک صحت مند معاشرے کی تشکیل کے لیے کام کر رہے ہیں۔

انہوں نے عبدالسمیع شیخ کو نوجوان، محنتی اور عوام دوست آفیسر قرار دیا۔ اسسٹنٹ سپرنٹنڈنٹ پولیس نے بھی صحافیوں سے بات چیت کرتے ہوئے کہا کہ وہ سینئر صحافیوں سے بہت کچھ سیکھنے کے خواہش مند ہیں۔ ان کا کہنا تھا کہ ان کی کوشش ہوگی کہ شہر میں جرائم کم ہوں، تھانوں میں عوامی شکایات کم ہوں اور پولیس کا رویہ عوام دوست ہو۔

جنرل سیکرٹری رانا ساجد اقبال اور سینئر صحافی عبدالحنان چوہدری نے کہا کہ دہشت گردی اور سیاسی، مذہبی مسائل کی وجہ سے پولیس پر کام کا بوجھ بہت بڑھ گیا ہے۔ پولیس نے امن و امان اور عوام کے تحفظ کے لیے بڑی قربانیاں دی ہیں۔ انہوں نے ڈی پی او سرگودھا ڈاکٹر اسد اعجاز ملہی سمیت تمام پولیس افسران کی خدمات کو سراہا۔ انہوں نے عبدالسمیع شیخ کو ایک اچھا، فرض شناس اور محنتی افسر قرار دیا اور کہا کہ صحافی ان کے ساتھ کھڑے ہیں۔

اس موقع پر بڑی تعداد میں صحافی موجود تھے۔

سرگودھا باغی ٹی وی(ادریس نوازچدھڑ کی رپورٹ): اسسٹنٹ کمشنر سرگودھا، آمنہ احسان تارڑ، اور ڈی ایس پی جاوید اقبال نے جھال چکیاں اور حیدرآباد ٹاؤن میں غیر قانونی قبضوں کے خلاف کارروائی کی ہے۔

دونوں افسران نے خود ان علاقوں کا دورہ کیا اور تاجروں کو ہدایت کی کہ وہ اپنی دکانوں کے سامنے پڑا سامان اندر رکھیں اور قانونی حدود میں کاروبار کریں۔ انہوں نے ٹریفک کی روانی کو یقینی بنانے کے لیے بھی اقدامات کیے۔

اسسٹنٹ کمشنر نے واضح کیا کہ اگر تاجروں نے احکامات کی پابندی نہیں کی تو ان کی دکانوں کو سیل کیا جا سکتا ہے اور ان پر جرمانہ بھی عائد ہو سکتا ہے۔ انہوں نے تاجروں سے اپیل کی کہ وہ شہر کو صاف ستھرا اور خوبصورت بنانے میں انتظامیہ کا ساتھ دیں۔

ڈی ایس پی نے تاجروں کو ہدایت کی کہ وہ ٹریفک پولیس اور میونسپل کارپوریشن کے ساتھ مل کر ٹریفک کے مسائل کو حل کرنے میں مدد کریں۔ انہوں نے کہا کہ غیر قانونی قبضوں کو کسی صورت برداشت نہیں کیا جائے گا۔

پولیس اور انتظامیہ نے مشترکہ طور پر کارروائی کرتے ہوئے غیر قانونی قبضوں کو ہٹایا اور تاجروں کو آئندہ ایسا نہ کرنے کی وارننگ دی۔ جھال چکیاں مین چوک میں ریڑھی بانوں اور رکشوں کو متبادل جگہ منتقل کرنے کا حکم دیا گیا۔

اسسٹنٹ کمشنر نے سیکٹری یونین کونسل کو ہدایت کی کہ وہ بھی غیر قانونی قبضوں کے خلاف کارروائی کریں۔ حیدرآباد ٹاؤن میں بھی اسی طرح کی کارروائی کی گئی۔ اس کے علاوہ، گورنمنٹ گرلز ہائر سیکنڈری سکول کے سامنے جمع ہونے والے گندے پانی کو ہٹانے کا حکم دیا گیا۔

اسسٹنٹ کمشنر نے کہا کہ ان کا مقصد کسی کو بے روزگار کیے بغیر شہر کو بہتر بنانا ہے۔ غیر قانونی قبضوں کے خلاف سخت کارروائی کی جائے گی۔ شہریوں نے انتظامیہ کی اس کارروائی کو سراہا ہے۔

گوجرانوالہ (باغی ٹی وی نامہ نگارمحمدرمضان نوشاہی)محکمہ ماحولیات میں بڑے پیمانے پر رشوت خوری کا انکشاف ہوا ہے۔ عوام کی شکایات کے بعد کمشنر گوجرانوالہ نے فوری کارروائی کرتے ہوئے محکمے کے عارضی انسپکٹر غلام رسول کو معطل کر دیا ہے۔

تفصیلات کے مطابق، غلام رسول کو تقریباً چار ماہ قبل انسپکٹر کا عارضی چارج دیا گیا تھا۔ اس نے اپنے عہدے کا ناجائز فائدہ اٹھاتے ہوئے فیکٹری مالکان سے بھاری رشوت وصول کی اور ان پر جھوٹے مقدمات درج کیے۔ اس کے ڈرائیور رانا سلیم بھی اس میں اس کا ساتھی تھا۔

فیکٹری مالکان اس بھتہ خوری سے تنگ آکر کمشنر گوجرانوالہ سے رجوع ہوئے۔ کمشنر نے فوری نوٹس لیتے ہوئے غلام رسول کو معطل کر دیا اور اس کے خلاف محکمانہ کارروائی کا حکم دے دیا۔

واضح رہے کہ غلام رسول کے خلاف محکمہ اینٹی کرپشن میں پہلے سے ہی رشوت طلب کرنے کی شکایت درج ہے۔

اس کارروائی پر کھیالی سرکل کے فیکٹری مالکان نے کمشنر گوجرانوالہ نوید حیدر شیرازی کا شکریہ ادا کیا اور کرپٹ ملازم کے خلاف سخت سے سخت کارروائی کا مطالبہ کیا۔

سرگودھا،باغی ٹی وی ( ادریس نواز چدھڑ سے ) تھانہ ساہیوال پولیس کی کارروائی،غیر قانونی اسلحہ رکھنے والے 5 ملزمان گرفتار

تفصیلات کے مطابق ڈی پی او سرگودھا ڈاکٹر اسد اعجاز ملہی کے احکامات پر تھانہ ساہیوال پولیس کا ایک اور کامیاب سرچ آپریشن، دوران سرچ آپریشن غیر قانونی اسلحہ رکھنے والے 05 ملزمان گرفتار ، گرفتار ملزمان میں ظل،صدام،اشرف، ابراہیم اور فرحان شامل ہیں ۔ گرفتار ملزمان کے قبضہ سے کلاشنکوف، 9mm پسٹل ، 02 پسٹل 30بور اور بھاری مقدار میں کارتوس و گولیاں برآمد

گرفتار ملزمان کے خلاف غیر قانونی اسلحہ رکھنے کی دفعات کے تحت الگ الگ مقدمات درج کر لیے گئے ہیں ۔ گرفتار ملزم صدام کو اشتہاری مجرم کو پناہ دینے کے جرم میں گرفتار کیا گیا ہے ۔

اس موقع پر ڈی پی او سرگودھا کا کہنا تھا کہ انسداد جرائم کے لیے ضلع بھر میں سرچ آپریشن کیئے جا رہے ہیں ، جرائم کی بیخ کنی کے لیئے سرگودھا پولیس ہر لمحہ کوشاں اور متحرک ہے ۔

جبکہ بہترین کارکردگی کا مظاہرہ کرنے پر ڈی پی او سرگودھا نے ایس ایچ او تھانہ ساہیوال انسپکٹر افضل اور انکی ٹیم کو شاباش دی ۔

سرگودھا ( ادریس نواز چدھڑ سے )ٹریفک پولیس روزانہ لاکھوں روپے کے ناجائز چالان کرکے غریب شہریوں کا جینامحال کردیا، شہریوں کا کہناہے کہ ٹریفک پولیس والے کبھی کسی امیر کو نہیں روکتے، انکا غصہ اور فرض صرف غریب کو چالان کر کے پورا ہوتا ہے،شہریوں کا ڈی پی او سرگودھا اور آئی جی پنجاب سے فوری نوٹس کا مطالبہ

تفصیلات کے مطابق ٹریفک پولیس سرگودھا روزانہ لاکھوں روپے کے چالان کرکے غریب شہریوں کا خون نچوڑنے میں مصروف عمل ھے ۔ شہری روٹی کے ایک ایک نوالہ کو ترس رہے ہیں اور ٹریفک پولیس نے نوری گیٹ، 47 اڈا، بس سٹینڈ اور جھال چکیاں سمیت شہر کے مختلف بازاروں میں ناکے لگا رکھے ہیں ۔

اہلکار سارا دن شہر کی سڑکیں بلاک کرکے غریب موٹر سائیکل سواروں کے چالان کرکے بھاری جرمانے اور لفٹر موٹر سائیکل اور گاڑیاں اٹھا کر لے جاتے ہیں اور فی موٹرسائیکل 2 ہزار روپے جرمانہ وصول کیا جاتا ہے ، شہر میں ظلم کی انتہا ہو گئی ہے ۔ ٹریفک پولیس کے اہلکارلفٹر کے ذریعے بازاروں اور مارکیٹوں سے چوروں کی طرح موٹر سائیکل اٹھا کر لے جاتے ہیں اور موٹر سائیکل کا مالک پریشان حال بھاگا پھرتا ہے

ٹریفک پولیس غریب کا خون نچوڑنے پر لگی ہے اور افسران نے خاموشی اختیار کر رکھی ہے ۔ شہر یوں کا کوئی پرسان حال نہیں ہے ۔ غریب لوگ جرمانہ ادا نہیں کر سکتے اور وہ رونے لگ جاتے ہیں ۔ جو رویہ ٹریفک پولیس نے اختیار کر رکھا ہے ،

روزانہ کی بنیاد پر غریب جو محنت مزدوری کر کے واپس گھر آ رہا ہوتا ہے اور اسے بھاری جرمانہ کر دیا جاتا ہے، جس کی وجہ سے مزدور طبقہ فاقہ کشی پر مجبور ہو چکا ہے

شہریوں کا کہناہے کہ ٹریفک پولیس والے کبھی کسی امیر کو نہیں روکتے، انکا غصہ اور فرض صرف غریب کو چالان کر کے پورا ہوتا ہے۔ جو ہمارے ساتھ ظلم ہے، شہریوں نے ڈی پی او سرگودھا ڈاکٹر اسد اعجاز ملہی اور آئی جی پنجاب ڈاکٹر عثمان انور سے فوری نوٹس لینے کا مطالبہ کیا ہے ۔

سرگودھا ( ادریس نواز چدھڑ سے ) ڈی ایس پی بھیرہ چوہدری فیاض احمد ہنجرا کی نگرانی میں تھانہ بھیرہ پولیس ان ایکشن ۔ ایک ماہ میں 1 کروڑ 50 لاکھ روپے مالیت کا سامان اور نقدی برآمد ۔

تفصیلات کے مطابق آئی جی پنجاب کے ویژن اور آر پی او سرگودھا شارق کمال صدیقی اور ڈی پی او سرگودھا ڈاکٹر اسد اعجاز ملہی کی ہدایت پر ڈی ایس پی بھیرہ چوہدری فیاض احمد ہنجرا کی نگرانی میں ایس ایچ او تھانہ بھیرہ حافظ نوید اکرم نے ایک ماہ کی تعیناتی کے دوران 1 کروڑ 50 لاکھ مالیت کا سامان اور نقدی برآمد کر کے اصل مالکان کو واپس کر دی ۔

عادل شہزاد ، ظہیر اور عدنان نامی ملزمان جوکہ سرعام ہوائی فائرنگ اور اقدام قتل میں ملوث تھے کو بروقت کارروائی کرتے ہوے گرفتار کیا گیا ۔

اقدام قتل میں 2023 کے مطلوب ملزمان کو گرفتار کیا گیا اس کے علاوہ مقدمات برخلاف مال میں مبلغ 59 لاکھ 80 ہزار روپے کے مال مویشی برآمد کیئے گئے ۔ موٹر وہیکل چوری میں کل مالیتی 43 لاکھ 10 ہزار روپے مالیت کے موٹر سائیکل و گاڑیاں برآمد کی گئیں ۔ 3 مقدمات راہزنی کے یکسو کرتے ہوئے ملزمان سے موٹر سائیکل اور نقدی کل مسروقہ تقریباً 5 لاکھ برآمد کیئے گئے ۔ اس کے علاوہ دو رکنی گینگ گرفتار کیا گیا ۔ جس سے تقریباً 50 لاکھ روپے مالیت سے زائد کا مال مسروقہ برآمد کیا گیا اور ملزمان کو جیل بند کروایا گیا ۔

اس کے علاوہ ناجائز اسلحہ ملزمان سے 2 رائفل 44 بور , 4 بندوق 12 بور , رپیٹر , 7 عدد پسٹل اسلحہ برآمد کر کے مقدمہ درج کیا گیا ۔ اشتہاری A کیٹگری کے دو ملزمان جبکہ B کیٹیگری کے 23 مجرمان اشتہاری گرفتار کیئے گئے ۔

اسی طرح گینگ ریپ کے مقدمہ نمبر 549/24 بجرم 375A تھانہ بھیرہ میں مطلوب ملزمان محمد آصف وغیرہ 2 کس کو بروقت کارروائی کرتے ہوئے گرفتار کر کے جیل بند کروایا گیا ۔