Category: سیالکوٹ

سیالکوٹ (بیوروچیف خرم میر)ڈپٹی کمشنر صبا اصغر علی کی زیر صدارت ڈی سی آفس کانفرنس روم میں ایک اہم اجلاس منعقد ہوا، جس میں واسا، میونسپل کارپوریشن اور پیسپ (PICIIP) کے مقامی حکام نے شرکت کی۔ اجلاس کا مقصد واسا سیالکوٹ کو مکمل طور پر فعال کر کے شہریوں کو بلدیاتی سہولیات کی فراہمی کو یقینی بنانا تھا۔

ڈپٹی کمشنر نے واسا حکام کو فوری طور پر دفتر قائم کرنے کی ہدایت دی، جبکہ میونسپل کارپوریشن کو حکم دیا گیا کہ وہ سینی ٹیشن اسٹاف، مشینری اور دیگر اسٹاک جلد از جلد واسا کے حوالے کرے تاکہ ادارہ اپنی ذمہ داریاں باقاعدہ طور پر ادا کر سکے۔

انہوں نے زور دیا کہ واسا کو ہنگامی بنیادوں پر وسائل فراہم کیے جائیں تاکہ شہریوں کو صاف پانی، نکاسی آب اور صفائی کی سہولیات میں بہتری دی جا سکے۔ اجلاس میں پیسپ حکام کو زیر تعمیر واٹر سپلائی، سیوریج اور ڈسپوزل اسٹیشنز کے منصوبے جلد مکمل کر کے واسا کے سپرد کرنے کی ہدایت بھی جاری کی گئی۔

اجلاس میں ایڈیشنل ڈپٹی کمشنر جنرل ایوب بخاری، ایم ڈی واسا ابوبکر عمران، چیف آفیسر میونسپل کارپوریشن ملک اعجاز احمد، مینیجر پیسپ علی خان سمیت متعلقہ افسران شریک ہوئے۔ ڈپٹی کمشنر نے تمام اداروں کو باہمی روابط اور مربوط حکمت عملی کے تحت کام کرنے کی ہدایت دی تاکہ شہریوں کو معیاری بلدیاتی خدمات مہیا کی جا سکیں۔

سیالکوٹ (باغی ٹی وی) باغی ٹی وی ڈویژن گوجرانوالہ و سیالکوٹ کے بیوروچیف ڈاکٹر شاہد ریاض کی ساس رضائے الٰہی سے انتقال فرما گئیں۔ مرحومہ ایک باعمل، باوقار اور دیندار خاتون تھیں۔ ان کے انتقال پر عزیز و اقارب، دوست احباب اور صحافتی برادری میں گہرے رنج و غم کا اظہار کیا جا رہا ہے۔

مرحومہ کی نمازِ جنازہ آج 3 اگست بروز ہفتہ رات 8 بجے ان کے آبائی گاؤں رڈیال، نزد گڑی گوندل والے قبرستان میں ادا کی جائے گی۔

باغی ٹی وی کی پوری ٹیم اور تمام نمائندگان اس افسوسناک سانحے پر ڈاکٹر شاہد ریاض اور ان کے اہلِ خانہ کے غم میں برابر کے شریک ہیں۔ دکھ کی اس گھڑی میں اللہ تعالیٰ سے دعا ہے کہ وہ مرحومہ کو جوارِ رحمت میں اعلیٰ مقام عطا فرمائے، ان کی مغفرت فرمائے، درجات بلند کرے اور تمام لواحقین کو صبرِ جمیل عطا فرمائے۔

سیالکوٹ (بیوروچیف خرم میر)ڈپٹی کمشنر صبا اصغر علی اور رکن صوبائی اسمبلی محمد منشاء اللہ بٹ نے اسپیشل ایجوکیشن سنٹر سیالکوٹ میں ہیلپنگ ہینڈ آرگنائزیشن کے تحت تزئین و آرائش اور جدید آئی ٹی سہولیات کی فراہمی کے منصوبے کا افتتاح کر دیا۔

یہ منصوبہ قوتِ سماعت و گفتار سے محروم بچوں کے لیے قائم سرکاری ادارے میں تعلیم کے معیار اور سہولیات کی بہتری کے لیے ترتیب دیا گیا ہے۔ ہیلپنگ ہینڈ آرگنائزیشن نے نہایت خلوص اور جذبے کے ساتھ خصوصی بچوں کی ضروریات کو مدنظر رکھتے ہوئے مختلف اقدامات کیے ہیں، جن میں تمام کلاس رومز میں ایئر کولرز کی تنصیب، 2025 ماڈل اسمارٹ وائٹ بورڈز کی فراہمی اور مکمل کمپیوٹر لیب کا قیام شامل ہے، تاکہ طلبہ کو جدید ٹیکنالوجی سے روشناس کرایا جا سکے۔

اس کے علاوہ سافٹ بورڈز کی تنصیب، وال کلاکس، ٹیبل شیٹس، ڈسٹبنز اور خوبصورت گلدان بھی فراہم کیے گئے ہیں تاکہ کلاس رومز کا ماحول صاف ستھرا، خوشگوار اور تخلیقی صلاحیتوں کو ابھارنے والا بنایا جا سکے۔ ادارے کی دیواروں کو تازہ اور جاذب نظر رنگوں سے آراستہ کیا گیا ہے۔

اس موقع پر ڈپٹی کمشنر صبا اصغر علی نے کہا کہ خصوصی بچوں کو معیاری تعلیم اور آرام دہ تعلیمی ماحول کی فراہمی نہ صرف ان کا بنیادی حق ہے بلکہ یہ ہماری معاشرتی ذمہ داری بھی ہے۔ انہوں نے ہیلپنگ ہینڈ آرگنائزیشن کی خدمات کو سراہتے ہوئے کہا کہ ایسے ادارے معاشرے میں مثبت تبدیلی کے ضامن ہوتے ہیں۔

رکن صوبائی اسمبلی محمد منشاء اللہ بٹ نے اس منصوبے کو تعلیم کے شعبے میں ایک نمایاں سنگِ میل قرار دیا اور اس بات پر زور دیا کہ دیگر تنظیموں اور اداروں کو بھی اس مثال سے رہنمائی حاصل کرنی چاہیے۔

ہیلپنگ ہینڈ آرگنائزیشن کی بانی مائرہ خرم شیخ اور ماہ نور اکبر بٹ نے بتایا کہ یہ منصوبہ ٹیم ممبران کی رضاکارانہ محنت اور جذبے سے ممکن ہوا، جس پر تقریباً 20 لاکھ روپے کی لاگت آئی۔ ان کے مطابق خصوصی بچوں کے ساتھ کام کرنے سے ان کی اپنی سیکھنے کی صلاحیت میں بھی اضافہ ہوا، اور وہ مستقبل میں بھی اس مشن کو جاری رکھیں گی۔

تقریب کے اختتام پر ڈپٹی کمشنر اور رکن اسمبلی نے ہیلپنگ ہینڈ آرگنائزیشن کی فاؤنڈرز مائرہ خرم شیخ اور ماہ نور اکبر بٹ کو ٹرافیاں اور ٹیم کے دیگر ممبران کو تعریفی اسناد سے نوازا۔ اس موقع پر اس عزم کا اظہار کیا گیا کہ دکھی انسانیت کی خدمت کا یہ سفر اسی جذبے اور عزم سے جاری رہے گا۔

سیالکوٹ (بیوروچیف خرم میر کی رپورٹ) وزیر اعلیٰ پنجاب مریم نواز شریف کی ہدایت پر صوبہ بھر میں بچوں کی پیدائش اور افراد کی وفات کے اندراج اور سرٹیفکیٹس کا اجرا مکمل طور پر مفت کر دیا گیا ہے۔ یہ اعلان ایڈیشنل ڈپٹی کمشنر فنانس اینڈ پلاننگ مظفر مختار نے لوکل گورنمنٹ اینڈ کمیونٹی ڈویلپمنٹ ڈیپارٹمنٹ سیالکوٹ کے زیر اہتمام جناح ہال قلعہ سیالکوٹ میں منعقدہ آگاہی سیمینار سے خطاب کرتے ہوئے کیا۔

مظفر مختار نے واضح کیا کہ پنجاب لوکل گورنمنٹ کے "رجسٹریشن آف برتھ اینڈ ڈیتھ رولز 2025” کے تحت یہ قانون فوری طور پر نافذالعمل ہوچکا ہے۔ انہوں نے بتایا کہ اب اگر کوئی شہری سات سال تک کی تاخیر سے بھی بچے کی پیدائش یا کسی فرد کی وفات کا اندراج کرواتا ہے تو اس پر کوئی فیس عائد نہیں کی جائے گی اور سرٹیفکیٹ بھی بلا معاوضہ جاری ہوگا۔

ایک اور اہم تبدیلی کا ذکر کرتے ہوئے مظفر مختار نے بتایا کہ سات سال سے زائد تاخیر کی صورت میں عدالت کی ڈگری کی شرط کو بھی ختم کر دیا گیا ہے۔ اب یہ اختیار ڈپٹی ڈائریکٹر لوکل گورنمنٹ کو سونپ دیا گیا ہے، جس سے عوام کو عدالتی کارروائی سے نجات مل گئی ہے اور اس سے وقت اور پیسوں کی بچت ہوگی۔

تقریب میں اسسٹنٹ کمشنر سیالکوٹ انعم بابر، ڈائریکٹر لوکل گورنمنٹ گوجرانوالہ قمر ذیشان، ڈپٹی ڈائریکٹر عمر امجد بیگ، اے ڈی ایل جیز محمد جلیل بھٹی، معظم علی تارڑ، رانا آصف علی، محمد ارشد کے علاوہ یونین کونسلز کے سیکرٹریز، نکاح رجسٹرار، این جی اوز، محکمہ تعلیم اور وکلاء کے نمائندگان نے بھرپور شرکت کی۔

ڈائریکٹر لوکل گورنمنٹ ڈویژن قمر ذیشان نے اس موقع پر کہا کہ بچے کی برتھ رجسٹریشن ان کا بنیادی قانونی حق ہے۔ انہوں نے والدین، اساتذہ، سوشل ورکرز اور نکاح رجسٹرار حضرات سے اپیل کی کہ وہ حکومت کی جانب سے فراہم کردہ اس سہولت سے فائدہ اٹھائیں اور عوام میں اس سے متعلق زیادہ سے زیادہ آگاہی پیدا کریں تاکہ کوئی بھی بچہ قانونی شناخت سے محروم نہ رہے۔ ان کا کہنا تھا کہ بچے کو فوری طور پر قریبی یونین کونسل میں مفت اندراج اور سرٹیفکیٹ کے ذریعے قانونی شناخت دلائی جائے۔

سیالکوٹ (بیوروچیف خرم میر) ڈپٹی کمشنر سیالکوٹ صبا اصغر علی کی زیر صدارت میٹرک کے سالانہ امتحانات 2025ء میں شاندار کارکردگی کا مظاہرہ کرنے والے طلبہ و طالبات کے اعزاز میں ایک پروقار تقریب کا انعقاد کیا گیا۔ اس تقریب کا مقصد ضلع سیالکوٹ کے سرکاری اسکولوں سے تعلق رکھنے والے ہونہار طلبہ کی تعلیمی محنت کو سراہنا اور ان کی کامیابیوں کو اجاگر کرنا تھا۔

تقریب میں پوزیشن ہولڈر طلبہ و طالبات کے ساتھ ان کے والدین، اساتذہ اور محکمہ تعلیم کے افسران نے بھرپور شرکت کی۔ ڈپٹی کمشنر صبا اصغر علی نے نمایاں کارکردگی دکھانے والے طلبہ میں شیلڈز تقسیم کیں اور ان کی محنت کو سراہتے ہوئے کہا کہ یہ بچے نہ صرف اپنے خاندان بلکہ پورے ضلع کا فخر ہیں۔ ان کی کامیابی اساتذہ کی محنت اور والدین کی دعاؤں کا بھی نتیجہ ہے۔

ڈپٹی کمشنر نے طلبہ کو نصیحت کی کہ وہ آئندہ بھی تعلیم کو اپنی اولین ترجیح بنائیں اور اسی جذبے، لگن اور دیانت داری سے آگے بڑھتے رہیں۔ انہوں نے والدین اور اساتذہ کو بھی مبارکباد پیش کرتے ہوئے کہا کہ بچوں کی یہ کامیابیاں ایک بہتر اور روشن مستقبل کی ضمانت ہیں۔

ڈسٹرکٹ ایجوکیشن اتھارٹی سیالکوٹ کے مطابق اس سال متعدد سرکاری اسکولوں کے طلبہ و طالبات نے میٹرک کے امتحانات میں نمایاں پوزیشنیں حاصل کیں:

گورنمنٹ گرلز ہائی سکول پسرور کی رمین احسن نے 1177 نمبر حاصل کیے۔گورنمنٹ اسلامیہ گرلز ہائی سکول ڈسکہ کی آمنہ عمران نے 1171 اور ماہ نور نے 1165 نمبر حاصل کیے۔گورنمنٹ ہائی سکول ڈسکہ کے مصطفیٰ عبدالاحد نے 1171 اور محمد سامران نے 1161 نمبر حاصل کیے۔گورنمنٹ ہائی سکول جوڑیاں کلاں کے ربان علی نے 1162 نمبر حاصل کرکے نمایاں کارکردگی دکھائی۔

تقریب کے اختتام پر ڈپٹی کمشنر صبا اصغر علی نے اس کامیابی پر تمام والدین اور اساتذہ کو مبارکباد دی اور یقین دہانی کرائی کہ ضلعی انتظامیہ تعلیم کے فروغ اور باصلاحیت نوجوانوں کے لیے ہر ممکن سہولیات کی فراہمی جاری رکھے گی تاکہ آنے والی نسلیں ایک روشن اور کامیاب پاکستان کی بنیاد رکھ سکیں۔

سیالکوٹ (باغی ٹی وی، سٹی رپورٹر مدثر رتو) پنجاب حکومت کی ریشنلائزیشن پالیسی بری طرح ناکام ہو چکی ہے، جس کے باعث ہزاروں پی ایس ٹی (PST) اور ای ایس ٹی (EST) اساتذہ، بالخصوص خواتین اساتذہ شدید مشکلات کا شکار ہیں۔ بڑی تعداد میں اساتذہ کو بغیر مناسب تعیناتی کے "سرپلس” قرار دے دیا گیا، جبکہ ان کے لیے نئی تعیناتی کے لیے درکار سیٹیں ہی موجود نہیں۔

پنجاب ٹیچرز یونین کے ضلعی صدر محمد اصغر کاہلوں، جنرل سیکرٹری سید دستار علی نقوی، سینیئر نائب صدر امجد پرویز گھمن اور دیگر درجنوں رہنماؤں نے اپنے ایک مشترکہ بیان میں کہا ہے کہ حکومت کی پالیسی سازیاں زمینی حقائق سے نابلد اور اساتذہ کے ساتھ مشاورت کے بغیر طے کی جاتی ہیں، جس کا خمیازہ اب تعلیم کے شعبے کو بھگتنا پڑ رہا ہے۔

ٹیچرز یونین رہنماؤں نے الزام لگایا کہ پہلے سے طے شدہ منصوبے کے تحت بڑی تعداد میں پی ایس ٹی اساتذہ کو ای ایس ٹی کے طور پر پروموشن دی گئی، تاکہ پرائمری اسکولوں میں اساتذہ کی کمی کا جواز پیدا کیا جا سکے اور پھر ان اسکولوں کو آؤٹ سورس کرنے کی راہ ہموار کی جا سکے۔ اب یہی اساتذہ، خاص طور پر خواتین، سرپلس قرار دے کر دربدر کیے جا رہے ہیں اور انہیں اپنے گھروں سے 30 سے 40 کلومیٹر دور اسکولوں میں زبردستی ٹرانسفر ہونے پر مجبور کیا جا رہا ہے۔

انہوں نے کہا کہ پنجاب میں پالیسیوں کی تیاری کے دوران اساتذہ کی نمائندہ تنظیموں کو اعتماد میں نہیں لیا جاتا، یہی وجہ ہے کہ تعلیم کے شعبے میں بننے والی بیشتر پالیسیاں ناکامی سے دوچار ہوتی ہیں۔

رہنماؤں نے وزیراعلیٰ پنجاب سے مطالبہ کیا ہے کہ فوری طور پر ریشنلائزیشن پالیسی پر عمل درآمد روکا جائے، اور پہلے اوپن میرٹ پر تمام اساتذہ کو ٹرانسفر کا موقع دیا جائے۔ اس کے بعد اگر کوئی استاد سرپلس ہوتا ہے تو اسے شفاف طریقے سے ٹرانسفر کیا جائے۔

اساتذہ رہنماؤں نے خبردار کیا کہ اگر ان کے مطالبات پر سنجیدگی سے غور نہ کیا گیا تو وہ احتجاج کا راستہ اختیار کرنے پر مجبور ہوں گے۔

سیالکوٹ (باغی ٹی وی، بیوروچیف خرم میر+سٹی رپورٹر مدثر رتو)گورنمنٹ کالج ویمن یونیورسٹی سیالکوٹ نے فال 2025 سیشن کے داخلوں میں نئی تاریخ رقم کر دی ہے، جہاں انٹرمیڈیٹ، بی ایس، ایم ایس اور پی ایچ ڈی پروگرامز کے لیے ریکارڈ تعداد میں داخلہ درخواستیں موصول ہوئی ہیں۔ بی ایس پروگرام کے فیز 1 میں 16,000 سے زائد طالبات نے درخواستیں جمع کروائیں، جس پر پہلی میرٹ لسٹ جاری کر دی گئی ہے۔

اس موقع پر وائس چانسلر پروفیسر ڈاکٹر شازیہ بشیر نے خوشی کا اظہار کرتے ہوئے کہا کہ مختلف پروگرامز میں طالبات کی غیر معمولی دلچسپی یونیورسٹی کی علمی ساکھ اور معیاری تدریسی ماحول کا ثبوت ہے۔ انہوں نے بتایا کہ داخلوں کے عمل کو سہل، شفاف اور منظم بنانے کے لیے یونیورسٹی میں ایک خصوصی ایڈمیشن آفس قائم کیا گیا، جہاں امیدواروں اور ان کے والدین کو مکمل رہنمائی فراہم کی گئی اور آن لائن سسٹم کے ذریعے درخواست دینے کی سہولت دی گئی۔

ڈاکٹر شازیہ بشیر نے سینٹرل ایڈمیشن کمیٹی کے کنوینئر پروفیسر ڈاکٹر الیاس اور دیگر تمام ممبران کی انتھک محنت اور پیشہ ورانہ کارکردگی کو سراہا۔ ان کا کہنا تھا کہ رواں برس داخل ہونے والی طالبات کی باصلاحیت اور پُرعزم نسل پاکستان کا مستقبل سنوارنے میں اہم کردار ادا کرے گی۔

سیالکوٹ (باغی ٹی وی، سٹی رپورٹر مدثر رتو)کہتے ہیں "ذرا نم ہو تو یہ مٹی بڑی زرخیز ہے ساقی”، اور اس کی روشن مثال سیالکوٹ کی ہونہار طالبہ علیزہ آصف نے پیش کی، جنہوں نے میٹرک کے سالانہ امتحان میں شاندار کارکردگی دکھاتے ہوئے 1052 نمبر حاصل کیے اور اہل علاقہ کو خوشگوار حیرت میں مبتلا کر دیا۔

ای ایل سی کڈز کلب حسنات کیمپس کی ہونہار طالبہ علیزہ آصف نے باغی ٹی وی سے خصوصی گفتگو کرتے ہوئے کہا کہ یہ کامیابی اللہ تعالیٰ کے خاص کرم، والدین کی دعاؤں، اساتذہ کی دن رات محنت اور رہنمائی کا نتیجہ ہے، جس کے لیے وہ ہمیشہ شکر گزار رہیں گی۔ انہوں نے مزید کہا کہ ان کا شوق انسانیت کی خدمت ہے، اور انشاءاللہ وہ مستقبل میں ڈاکٹر بن کر امت محمدی کی خدمت کریں گی۔

اس شاندار موقع پر ای ایل سی کڈز کلب حسنات کیمپس کے ڈائریکٹر سر محسن سردار، سیالکوٹ انفارمیشن ٹیم کے رکن خواجہ ایمان بدر، حسنین راجہ اور میڈم عمارہ انجم نے علیزہ آصف کو مبارکباد پیش کی اور نیک تمناؤں کا اظہار کیا۔

ڈائریکٹر سر محسن سردار نے علیزہ کی کامیابی کو سراہتے ہوئے ان کے لیے ایک لیپ ٹاپ کا اعلان بھی کیا اور دعا کی کہ وہ مستقبل میں مزید کامیابیاں سمیٹیں اور ملک و ملت کا نام روشن کریں۔

سیالکوٹ (بیوروچیف خرم میر) وزیراعلیٰ پنجاب مریم نواز شریف کی خصوصی ہدایت پر صنعتی شہر سیالکوٹ میں محکمہ ویمن ڈویلپمنٹ پنجاب کے تحت ورکنگ ویمن کیلئے میگ ٹاؤن میں ایک جدید ہاسٹل قائم کر دیا گیا ہے۔ اس ہاسٹل میں فرنشڈ کمرے، صاف ستھرا ماحول، تمام بنیادی سہولیات اور مکمل طور پر آراستہ کچن موجود ہے، جبکہ رہائش کا کرایہ صرف ایک ہزار سے ڈیڑھ ہزار روپے ماہانہ مقرر کیا گیا ہے۔

یہ معلومات مینجر ورکنگ ویمن ہاسٹل ہاجرہ لیاقت نے میڈیا بریفنگ کے دوران فراہم کیں۔ انہوں نے بتایا کہ وزیراعلیٰ مریم نواز شریف کی ہدایت پر تمام اضلاع میں محکمہ ویمن ڈویلپمنٹ کے زیر انتظام ایسے ہاسٹلز کا قیام عمل میں لایا جا رہا ہے، تاکہ ورکنگ ویمن کو محفوظ، سستا اور آرام دہ رہائشی ماحول فراہم کیا جا سکے۔

ہاجرہ لیاقت کے مطابق سیالکوٹ میں کام کرنے والی خواتین، خواہ ان کا تعلق دیگر اضلاع یا سیالکوٹ کی دیگر تحصیلوں سے ہو، اس سہولت سے استفادہ کر سکتی ہیں۔ ہاسٹل میں مکمل سیکیورٹی کا بندوبست کیا گیا ہے، سی سی ٹی وی کیمروں کے ذریعے نگرانی کی جاتی ہے، اور آن لائن حاضری کا نظام بھی نافذ ہے۔

انہوں نے مزید کہا کہ اس سہولت سے فائدہ اٹھانے کے خواہشمند افراد www.punjab.gov.pk پر وزٹ کر کے یا گوگل پلے اسٹور پر دستیاب مخصوص ایپ ڈاؤن لوڈ کر کے آن لائن اپلائی کر سکتے ہیں۔

سیالکوٹ (بیوروچیف خرم میر) ڈپٹی کمشنر سیالکوٹ صبا اصغر علی نے آج صبح ہونے والی شدید بارش کے بعد شہر کے مختلف علاقوں میں قائم رین ایمرجنسی کیمپس، ڈسپوزل اسٹیشنز، ڈی واٹرنگ سیٹس اور سینی ٹیشن عملے کی کارکردگی کا ہنگامی دورہ کیا۔ انہوں نے موقع پر موجود افسران کو ہدایت کی کہ بارش کے پانی کی فوری نکاسی کو یقینی بنایا جائے اور تمام چوکنگ پوائنٹس پر متعلقہ عملہ ہر وقت موجود رہے تاکہ کسی بھی جگہ پانی جمع ہونے کی شکایت نہ ہو۔

ڈپٹی کمشنر کے مطابق آج صبح 10 بجے تک مختلف علاقوں میں بارش کا ریکارڈ درج کیا گیا، جن میں سیالکوٹ کینٹ میں 24 ملی میٹر، شہر میں 18 ملی میٹر، ایئرپورٹ پر 48 ملی میٹر، سمبڑیال میں 25 ملی میٹر، ڈسکہ کالج روڈ پر 63 ملی میٹر، ایم سی ڈسکہ میں 58 ملی میٹر اور پسرور میں 7 ملی میٹر بارش ریکارڈ کی گئی۔

دریائے چناب میں مرالہ ہیڈورکس پر پانی کی آمد 1,53,234 کیوسک جبکہ اخراج 1,26,284 کیوسک ریکارڈ کیا گیا، جو کہ درمیانے درجے کے سیلاب کی صورتحال کو ظاہر کرتا ہے۔ تاہم نالہ ڈیک، نالہ ایک، نالہ بھیڈ، نالہ پلکھو سمیت دیگر آبی گزرگاہوں میں پانی کی روانی محفوظ سطح پر ہے اور تمام مقامات کو "نارمل” قرار دیا گیا ہے۔ یو سی سی اور ایم آر لنک میں بھی پانی کی سطح حفاظتی حد سے کم رپورٹ ہوئی ہے۔

ڈپٹی کمشنر صبا اصغر علی نے کہا کہ تمام متعلقہ محکمے مکمل الرٹ رہیں، صفائی اور نکاسی آب کے عمل میں تیزی لائی جائے اور شہریوں کو ہرممکن سہولت فراہم کی جائے تاکہ بارش کے بعد پیدا ہونے والی صورتحال پر مؤثر انداز میں قابو پایا جا سکے۔ شہری کسی بھی شکایت کی صورت میں ضلعی کنٹرول روم کی ہیلپ لائن 1718 پر رابطہ کریں۔