Category: سیالکوٹ

سیالکوٹ،باغی ٹی وی (بیورچیف شاہدریاض) دنیا کے معروف B2B ای کامرس پلیٹ فارم علی بابا ڈاٹ کام نے سیالکوٹ میں منعقدہ پاکستان سپلائرز ایکسپورٹ سمٹ 2025 کے دوران پاکستان میں ٹریڈ ایشورنس سروس کی لانچ کا اعلان کیا۔ یہ اقدام پاکستان کے چھوٹے اور درمیانے درجے کے کاروباروں (SMEs) کے لیے تجارت کو محفوظ اور قابل اعتماد بنانے کی جانب ایک بڑا قدم ہے۔

یہ سروس پاکستان کے سپلائرز کو لین دین کے عمل میں تحفظ فراہم کرتی ہے، جس سے وہ بین الاقوامی خریداروں کے ساتھ اعتماد کے ساتھ کاروبار کر سکیں گے۔ سپلائی کرنے والے اس سروس کے ذریعے اپنی ادائیگیاں محفوظ بنانے اور عالمی مارکیٹ میں اعتماد بڑھانے کے قابل ہوں گے۔ علی بابا ڈاٹ کام کے مطابق، ایسکرو سسٹم کے تحت خریدار آرڈر کی تسلی بخش وصولی کے بعد ہی ادائیگی کرتا ہے، جس سے خریدار اور فروخت کنندہ دونوں کے مفادات کا تحفظ یقینی بنایا جاتا ہے۔

تقریب سے خطاب کرتے ہوئے علی بابا ڈاٹ کام جنوب مشرقی ایشیا کے سربراہ، راجر لوو نے کہا: "پاکستان، پیداواری صلاحیت اور وسیع مصنوعات کی اقسام کے سبب عالمی خریداروں کے لیے ایک نمایاں سپلائر مارکیٹ ہے۔ ٹریڈ ایشورنس سروس کے ذریعے ہم پاکستانی کاروباروں کے لیے نئے مواقع پیدا کرنے اور عالمی مارکیٹ میں ان کا حصہ بڑھانے کے لیے پرعزم ہیں۔”

ایونٹ میں علی بابا ڈاٹ کام نے ملبوسات کی صنعت میں پاکستان کی مضبوط پوزیشن کو تسلیم کرتے ہوئے مقامی کاروباروں کے لیے بین الاقوامی مواقع کو اجاگر کیا۔ تقریب میں بتایا گیا کہ عالمی ملبوسات کی صنعت 2024 سے 2028 تک 2.81% سالانہ ترقی کی شرح (CAGR) سے 1.79 ٹریلین ڈالر تک پہنچنے کا امکان ہے۔

سیالکوٹ چیمبر آف کامرس اینڈ انڈسٹری کے صدر اکرام الحق نے کہا: "علی بابا ڈاٹ کام کی جانب سے سیالکوٹ میں یہ سمٹ منعقد کرنا ہمارے شہر کی صنعتی اہمیت کا ثبوت ہے۔ اس ایونٹ نے مقامی کاروباروں کو بین الاقوامی مارکیٹ میں کامیابی کے لیے ضروری ٹولز فراہم کیے ہیں۔”

نارویچ اسٹریٹ ویئر کے بانی اور تصدیق شدہ سپلائر، طیب حسنین نے کہا: "ٹریڈ ایشورنس اعتماد کے فرق کو ختم کرتے ہوئے طویل مدتی تعلقات کو فروغ دیتی ہے۔ اس سے خریدار بڑے آرڈرز دینے میں پراعتماد ہوتے ہیں، اور سپلائرز ادائیگی کے خطرات کی فکر کیے بغیر معیاری مصنوعات فراہم کر سکتے ہیں۔”

علی بابا ڈاٹ کام نے پاکستانی ملبوسات سپلائرز کے لیے خصوصی خدمات متعارف کرانے کا اعلان کیا، جس میں جدید ٹولز اور وسائل کے ذریعے مصنوعات کی نمائش کو بہتر بنانے اور عالمی خریداروں تک آسان رسائی کے مواقع فراہم کیے جائیں گے۔

علی بابا ڈاٹ کام کی گلوبل سپلائی چین سروسز کی سربراہ، سمر گاؤ نے کہا: "ٹریڈ ایشورنس سروس پاکستانی SMEs کے لیے تجارت کو محفوظ اور آسان بناتے ہوئے انہیں عالمی خریداروں کے ساتھ مضبوط تعلقات قائم کرنے میں مدد دے گی۔”

یہ سمٹ نہ صرف علی بابا کے پاکستان میں سرمایہ کاری کے عزم کی علامت ہے بلکہ مقامی کاروباروں کو بین الاقوامی سطح پر ترقی دینے کے لیے ایک اہم سنگ میل بھی ہے۔

سیالکوٹ،باغی ٹی وی(بیوروچیف شاہدریاض)وزیر اعلیٰ پنجاب مریم نواز کا 300 ارب کا کسان دوست پیکج، زرعی پیداوار میں انقلاب کی امید

ڈپٹی کمشنر سیالکوٹ محمد ذوالقرنین لنگڑیال نے کہا ہے کہ وزیر اعلیٰ پنجاب مریم نواز شریف نے کسانوں کے لیے 300 ارب روپے کا تاریخی کسان دوست پیکج متعارف کروایا ہے۔ اس پیکج میں جدید زرعی آلات، مشینری، ٹریکٹرز اور بلا سود زرعی قرضوں کی فراہمی شامل ہے۔

زیادہ رقبے پر گندم کاشت کرنے والے کسانوں کے لیے خصوصی انعامی اسکیم کا اعلان کیا گیا ہے، جس کے تحت 25 ایکڑ سے زائد رقبے پر گندم کاشت کرنے والوں کو 1,000 گرین ٹریکٹرز، جبکہ ساڑھے 12 ایکڑ سے 25 ایکڑ تک رقبہ رکھنے والوں کو 1,000 لیزر لینڈ لیولرز بذریعہ قرعہ اندازی مفت فراہم کیے جائیں گے۔

یہ بات انہوں نے تحصیل ڈسکہ کے موضع آدمکے چیمہ میں منعقدہ زرعی آگاہی سیمینار سے خطاب کرتے ہوئے کہی۔ اس موقع پر اسسٹنٹ کمشنر ڈسکہ ماہم مشتاق، محکمہ زراعت کے حکام، اور مقامی کاشتکار بڑی تعداد میں موجود تھے۔

ڈپٹی کمشنر نے بتایا کہ جدید مشینری اور ٹریکٹرز کے لیے 9,500 کاشتکاروں کو فی ٹریکٹر 10 لاکھ روپے سبسڈی دی گئی ہے، جبکہ ڈیلیوری کا عمل شروع ہو چکا ہے۔ محکمہ زراعت کے حکام کسانوں کی رہنمائی کے لیے فیلڈ میں موجود ہیں۔

اقبال ڈے کی تقریب میں طالبات کی شاندار کارکردگی پر انعامات
ڈپٹی کمشنر نے گورنمنٹ گرلز اسلامیہ ہائی اسکول اردو بازار سیالکوٹ کی طالبات کے اعزاز میں ڈی سی آفس میں ٹی پارٹی کا انعقاد کیا۔ طالبات کو اقبال ڈے کی تقریب میں خوبصورت کلام اقبال، نعت، اور ملی نغمے پیش کرنے پر تعریفی اسناد دی گئیں۔ تقریب میں سی ای او ایجوکیشن اور اسکول کی پرنسپل بھی موجود تھیں۔

سیالکوٹ (باغی ٹی وی بیورو چیف شاہد ریاض ) سانحہ آرمی پبلک سکول کے شہداء کو خراج تحسین پیش کرنے کے لیے سیالکوٹ پولیس نے خصوصی تقریب کا انعقاد کیا۔

ڈی پی او سیالکوٹ رانا عمر فاروق کی ہدایت پر سانحہ اے پی ایس کی دسویں برسی کے موقع پر سیالکوٹ کے شہید طلباء خوشنود زیب اور شاہ زیب کی قربانیوں کو یاد کرتے ہوئے سیالکوٹ پولیس کے چاک و چوبند دستے نے ان کی قبروں پر حاضری دی۔

پولیس کے دستے نے شہداء کی قبروں کو سلامی دی، پھولوں کی چادریں چڑھائیں اور ان کے درجات کی بلندی کے لیے دعا کی۔

یہ تقریب اس عزم کا اعادہ ہے کہ شہداء کی قربانیاں ہمیشہ یاد رکھی جائیں گی اور ان کا خون رائیگاں نہیں جائے گا۔

سیالکوٹ (باغی ٹی وی، بیورو چیف شاہد ریاض)پاکستان نیوی کمانڈر کا ویمن کالج میں آگاہی سیمینار سے خطاب

پاکستان نیوی کے کمانڈر احمد شفیع عتیق نے گورنمنٹ علامہ اقبال ویمن پوسٹ گریجویٹ کالج کا دورہ کیا اور نیوی کے حوالے سے منعقدہ آگاہی سیمینار سے خطاب کیا۔ پرنسپل پروفیسر زیبا ظہور، کالج اسٹاف، اور طالبات نے کمانڈر کا پرتپاک استقبال کرتے ہوئے پھولوں کے گلدستے پیش کیے۔

نیول کمانڈر احمد شفیع عتیق نے سیمینار میں پاکستان نیوی کی خدمات اور بحری دفاع کی اہمیت پر روشنی ڈالی۔ انہوں نے بتایا کہ پاکستان نیوی کے جوان زمینی، فضائی، اور بحری حدود میں ملک کی حفاظت کے لیے ہمہ وقت تیار رہتے ہیں۔ ان کا کہنا تھا کہ سمندری جنگ بری جنگ کے مقابلے میں زیادہ پیچیدہ ہوتی ہے، اور نیوی کے جوان ہر طرح کی چیلنجز کا مقابلہ کرنے کی بھرپور صلاحیت رکھتے ہیں۔

کمانڈر نے گوادر پورٹ کی عالمی اہمیت پر بھی روشنی ڈالتے ہوئے کہا کہ یہ دنیا کی واحد بندرگاہ ہے جہاں بڑے بحری بیڑے آسانی سے گڈز کی ترسیل کر سکتے ہیں، اور پاکستان کی بحری حدود میں پانی نہ جمنا بحری جہازوں کے لیے اضافی سہولت فراہم کرتا ہے۔

سیمینار کے دوران پرنسپل پروفیسر زیبا ظہور نے کمانڈر احمد شفیع عتیق اور نیول آفیسر محمد ارشد کو یادگاری گفٹ پیش کیے اور پروفیسر اصغر سودائی کی قومی خدمات کو بھی اجاگر کیا۔ انہوں نے پاکستان نیوی کی قربانیوں اور خدمات کو خراج تحسین پیش کیا۔

اس آگاہی سیمینار میں طالبات کو پاکستان نیوی کی اہمیت اور دفاعی کردار کے حوالے سے گہری معلومات فراہم کی گئیں۔

ڈسکہ ،باغی ٹی وی(نامہ نگارملک عمران)پنجاب کے دیگر شہروں کی طرح ڈسکہ میں بھی پانچ روزہ قومی انسداد پولیو مہم کا آغاز ہوگیا۔ تحصیل بھر میں 1,76,210 بچوں کو پولیو کے قطرے پلانے کے لیے 611 ٹیمیں تشکیل دی گئی ہیں۔

ڈپٹی ڈسٹرکٹ ہیلتھ آفیسر نے مہم کا افتتاح پانچ سال تک کے بچوں کو پولیو کے قطرے پلا کر کیا۔ یہ مہم 16 سے 20 دسمبر تک جاری رہے گی۔ انہوں نے بتایا کہ مہم کے دوران 568 موبائل ٹیمیں، 29 فکس ٹیمیں اور 14 ٹرانزٹ ٹیمیں تحصیل بھر میں گھر گھر جا کر پانچ سال سے کم عمر بچوں کو پولیو کے قطرے پلائیں گی۔

ڈپٹی ہیلتھ آفیسر نے والدین سے اپیل کی کہ وہ اپنے بچوں کو پولیو کے قطرے ضرور پلائیں تاکہ انہیں مستقل معذوری سے بچایا جا سکے۔

ڈسکہ ،باغی ٹی وی( نامہ نگار ملک عمران) خودکشی کا بڑھتا رجحان دین سے دوری کا نتیجہ ہے، عبدالقدیر اعوان

تفصیل کے مطابق معاشرتی ترقی، جدید آسائشوں اور خوبصورت گھروں کے باوجود انسانوں میں خوشی اور سکون کی شدید کمی نے خودکشی کے رجحان میں اضافہ کر دیا ہے۔ یہ بات امیر عبدالقدیر اعوان شیخ سلسلہ نقشبندیہ اویسیہ و سربراہ تنظیم الاخوان پاکستان نے جمعتہ المبارک کے خطاب میں کہی۔

انہوں نے کہا کہ جہاں دین اسلام اور قرآن کریم کی تعلیمات پر عمل کیا جا رہا ہوتا ہے، وہاں زندگی سکون اور اطمینان کے ساتھ گزر رہی ہوتی ہے، خواہ دنیاوی وسائل محدود ہی کیوں نہ ہوں۔ دین سے جڑنے اور اللہ کی رضا کے مطابق زندگی گزارنے پر زور دیتے ہوئے انہوں نے کہا کہ ہمارے معاشرے میں سکون کی کمی اس بات کا مظہر ہے کہ ہم دین کو مان تو رہے ہیں لیکن حقیقی یقین سے عاری ہیں۔

انہوں نے کہا، "ضرورت اس امر کی ہے کہ ہم اپنی زندگی کے ہر پہلو کو دین اسلام کے مطابق ڈھالیں۔ دین اسلام وہ نظام حیات ہے جو ہماری ذاتی، معاشرتی، اور اجتماعی زندگی کو کامیاب بنا سکتا ہے۔ جہاں اللہ کے احکامات کو ترک کر کے ذاتی پسند کو ترجیح دی جائے گی، وہاں نقصان کے سوا کچھ حاصل نہیں ہوگا۔”

آخر میں انہوں نے ملکی سلامتی اور بقا کے لیے اجتماعی دعا بھی فرمائی۔

سیالکوٹ،باغی ٹی وی( بیورو چیف شاہد ریاض) مستحق خاندانوں کی رجسٹریشن کیلئے خصوصی ڈیسک قائم

ڈپٹی کمشنر سیالکوٹ محمد ذوالقرنین لنگڑیال نے اعلان کیا ہے کہ پنجاب سوشل اکنامک رجسٹری کے تحت ضلع سیالکوٹ کے مستحق خاندانوں کی رجسٹریشن یونین کونسل کی سطح پر کی جائے گی۔ اس مقصد کے لیے ضلع کی تمام یونین کونسلز، ضلع کونسلز، اور میونسپل کارپوریشن کے دفاتر میں رجسٹریشن ڈیسک قائم کیے جائیں گے۔

یہ ڈیسک پنجاب سوشل اکنامک رجسٹری کی خصوصی ایپ کے ذریعے مستحق خاندانوں کا ڈیٹا مرتب کریں گے، جس کی بدولت عوامی ریلیف کے لیے شفاف اور موثر منصوبہ بندی ممکن ہوگی۔ ڈپٹی کمشنر کے مطابق، اس اقدام سے حقیقی مستحقین تک حکومتی امداد کی فراہمی یقینی بنائی جائے گی۔

یہ بات انہوں نے یونین کونسل ماڈل ٹاؤن سیالکوٹ میں منعقدہ اجلاس کے دوران کہی، جہاں ضلع بھر کے 178 رجسٹریشن ملازمین کو خصوصی تربیت فراہم کی گئی۔ اس موقع پر ڈپٹی ڈائریکٹر لوکل گورنمنٹ عمر امجد بیگ، اسسٹنٹ ڈائریکٹر لوکل گورنمنٹ عبدالجلیل بھٹہ، اور اسسٹنٹ محمد ارشد بھی موجود تھے۔

قبل ازیں، ڈپٹی کمشنر محمد ذوالقرنین لنگڑیال نے سیالکوٹ پبلک سکول پسرور روڈ پر منعقدہ فاؤنڈر ڈے کی تقریب میں بطور مہمانِ خصوصی شرکت کی۔ انہوں نے مختلف ہاؤسز کی پریڈ کا معائنہ کیا اور ننھے طلبہ کی جانب سے پیش کیے گئے ملی نغموں اور رنگا رنگ ٹیبلو کی پرفارمنس کو سراہا۔

ڈپٹی کمشنر نے زور دیا کہ مستحق خاندانوں کے لیے رجسٹریشن عمل کو صاف، شفاف اور مؤثر بنانے کے لیے تمام محکمے بھرپور تعاون کریں تاکہ عوام کو ریلیف کی فراہمی یقینی بنائی جا سکے۔

سیالکوٹ،باغی ٹی وی(بیوروچیف شاہدریاض) محمد منشاء اللہ بٹ کا یونین کونسل پکاگڑھا کا دورہ، ترقیاتی منصوبوں کا جائزہ

تفصیل کے مطابق سیالکوٹ میں پاکستان مسلم لیگ ن کے مرکزی رہنما اور رکن صوبائی اسمبلی محمد منشاء اللہ بٹ نے اپنے حلقہ انتخاب یونین کونسل پکاگڑھا کا دورہ کیا اور بونکن روڈ پر ٹف ٹائلز لگانے کے منصوبے کا جائزہ لیا۔ اس موقع پر سابق یوسی چیئرمین عمر بٹ، عبدالحمید قاسم، میونسپل کارپوریشن اور پنجاب انٹرسٹیز امپروومنٹ انویسٹمنٹ پروگرام کے مقامی حکام بھی موجود تھے۔

رکن صوبائی اسمبلی محمد منشاء اللہ بٹ نے ترقیاتی منصوبوں کے آغاز پر اہل علاقہ کا شکریہ ادا کیا اور کہا کہ ان کی سیاست کا مقصد خلق خدا کی خدمت ہے۔ انہوں نے مزید کہا کہ مسلم لیگ ن کا منشور عوامی مسائل کے حل کے لیے جدوجہد کرنا ہے۔

انہوں نے وزیر اعلی پنجاب مریم نواز شریف کی تعریف کرتے ہوئے کہا کہ وزیر اعلی نے مشکل حالات کے باوجود ترقیاتی فنڈز فراہم کرکے مسلم لیگ ن کی خدمت کی روایت کو آگے بڑھایا ہے۔ ان کا کہنا تھا کہ صوبے کی عوام کی خوش قسمتی ہے کہ انہیں مریم نواز جیسی باصلاحیت وزیر اعلی ملی ہیں، جو دن رات عوام کی ترقی اور خوشحالی کے لیے کام کر رہی ہیں۔

محمد منشاء اللہ بٹ نے اس عزم کا اظہار کیا کہ ترقیاتی منصوبوں میں معیار کو یقینی بنایا جائے گا اور ہر پیسہ ایمانداری اور کفایت شعاری سے خرچ کیا جائے گا۔

ڈسکہ، باغی ٹی وی( نامہ نگار ملک عمران )میترانوالی کی انوکھی بارات، لاکھوں روپے کی برسات، لوٹنے والوں کی چاندی

ڈسکہ کے نواحی گاؤں میترانوالی میں ایک منفرد اور شاہانہ شادی نے سب کی توجہ حاصل کر لی، جہاں دولہا کے بھائیوں اور بیرون ملک سے آئے دوستوں نے پاکستانی کرنسی کے ساتھ ساتھ ڈالر، پاؤنڈ، اور ریال کی بارش کر دی۔

بارات گاؤں میترانوالی سے گوجرانوالہ پہنچی، جہاں براتیوں نے نوٹوں سے بھرے بیگوں کے منہ کھول دئیے اور کنٹینر پر کھڑے ہو کر لاکھوں روپے نچھاور کیے۔ براتیوں نے نہ صرف نوٹوں کی بارش کی بلکہ قیمتی کپڑے بھی تقسیم کیے، جس سے مقامی افراد اور لوٹنے والوں کی چاندی ہو گئی۔

بارات لوٹنے کے مناظر انتہائی دلچسپ تھے، لوگ جال لگا کر نوٹ اور سوٹ جمع کرتے رہے، یہاں تک کہ بعض براتی بھی پیچھے نہ رہے۔ یہ انوکھی شادی علاقہ بھر میں موضوع بحث بن گئی ہے، جسے عوام شاہ خرچی کی منفرد مثال قرار دے رہے ہیں۔