Category: سیالکوٹ

سیالکوٹ، باغی ٹی وی ( بیوروچیف شاہد ریاض ) قائداعظم کے یوم ولادت اور نواز شریف کی سالگرہ کی پروقار تقریب

پاکستان مسلم لیگ (ن) کے مرکزی رابطہ آفس پیرس روڈ پر قائداعظم محمد علی جناح کے 148ویں یوم ولادت اور پارٹی قائد میاں محمد نواز شریف کی 75ویں سالگرہ کے حوالے سے ایک پروقار تقریب منعقد ہوئی۔

تقریب کی صدارت رکن صوبائی اسمبلی محمد منشاء اللہ بٹ نے کی، جبکہ رکن قومی اسمبلی گلناز شجاعت، اراکین صوبائی اسمبلی چودھری فیصل اکرام، چودھری نوید اشرف، سابق میئر توحید اختر، جنرل سیکرٹری شجاعت علی پاشا، فاروق گھمن، تنویر اختر چودھری اور مسلم لیگ (ن) یوتھ ونگ کے اراکین سمیت مقامی عہدیداران اور کارکنان نے بھرپور شرکت کی۔

محمد منشاء اللہ بٹ نے اپنے خطاب میں کہا کہ پاکستان قدرت کا عظیم تحفہ ہے جسے قائداعظم نے علامہ اقبال کے خواب کو حقیقت کا روپ دے کر دنیا کے نقشے پر اُجاگر کیا۔ انہوں نے کہا کہ قائداعظم کا پاکستان، میاں نواز شریف کی قیادت میں ایٹمی طاقت بن کر ناقابل تسخیر بن چکا ہے۔

انہوں نے مزید کہا کہ 25 دسمبر نہ صرف قائداعظم کی ولادت بلکہ حضرت عیسیٰ علیہ السلام کا یوم پیدائش بھی ہے، جو مسلمانوں اور مسیحی برادری دونوں کے لیے یکساں اہمیت کا حامل ہے۔ تقریب کے دوران شرکاء نے دونوں شخصیات کو زبردست خراج تحسین پیش کیا اور کیک کاٹ کر ان کے نظریات اور خدمات کو یاد کیا۔

ڈسکہ، باغی ٹی وی(نامہ نگار ملک عمران) ڈسکہ پریس کلب رجسٹرڈ میں قائداعظم محمد علی جناح کی سالگرہ اور مسیحی برادری کے ساتھ کرسمس کے حوالے سے ایک شاندار تقریب منعقد کی گئی۔ تقریب میں پرنٹ اور الیکٹرانک میڈیا کے نمائندگان نے شرکت کی۔

اس موقع پر قائداعظم کی سالگرہ کا کیک کاٹ کر ان کی بے مثال قیادت اور پاکستان کے قیام کے لیے خدمات کو خراج تحسین پیش کیا گیا۔ تقریب کے دوران بین المذاہب ہم آہنگی کو فروغ دینے کے لیے مسیحی برادری کے ساتھ کرسمس کیک بھی کاٹا گیا اور خوشی کے اس موقع پر مسیحی کمیونٹی کو تحائف پیش کیے گئے۔

سرپرست اعلیٰ محمد افضل منشاء نے اپنے خطاب میں قائداعظم کی قیادت، اتحاد، ایمان اور تنظیم کے اصولوں کو اجاگر کیا اور کہا کہ قومی ہیروز کو یاد کرنا اور اقلیتوں کی خوشیوں میں شریک ہونا ڈسکہ پریس کلب کی دیرینہ روایت ہے۔

سیالکوٹ،باغی ٹی وی (بیوروچیف شاہد ریاض) کرسمس کے موقع پر بین المذاہب ہم آہنگی کا مظاہرہ۔کرسمس کیک کاٹاگیا

تفصیل کے مطابق ڈپٹی کمشنر سیالکوٹ محمد ذوالقرنین لنگڑیال اور ڈسٹرکٹ پولیس آفیسر رانا عمر فاروق کی زیرِ صدارت ڈی سی آفس کمیٹی روم میں کرسمس کے حوالے سے ایک خصوصی اجلاس منعقد ہوا۔ اجلاس میں بین المذاہب ہم آہنگی کمیٹی کے اراکین نے شرکت کی۔ اس موقع پر کرسمس کا کیک کاٹا گیا اور مسیحی برادری کو کرسمس کی مبارکباد پیش کی گئی۔

ڈپٹی کمشنر نے کہا کہ کرسمس کی تقریبات کے لیے مسیحی عبادت گاہوں پر چراغاں، صفائی اور سیکیورٹی کے فول پروف انتظامات کیے جائیں گے۔ انہوں نے وزیر اعلیٰ مریم نواز شریف کے "منیاریٹی کارڈ پروگرام” کی تفصیلات بیان کرتے ہوئے بتایا کہ اس پروگرام کے تحت 5 دسمبر سے 5 جنوری تک رجسٹریشن جاری رہے گی، جس میں 50 ہزار مستحق اقلیتی خاندانوں کو مالی امداد فراہم کی جائے گی۔

اجلاس میں اقلیتوں کی فلاح و بہبود کے لیے حکومتی اقدامات کا ذکر کیا گیا، جن میں مستحق طلباء کے لیے تعلیمی اسکالرشپ، اقلیتی علاقوں کی ترقی، مذہبی مقامات اور قبرستانوں کی تزئین و آرائش، اور اقلیتی نوجوانوں کے لیے ہنر کی تربیت شامل ہیں۔ ڈپٹی کمشنر نے اقلیتوں کے حقوق، آزادی، اور مساوی مواقع کو یقینی بنانے کے عزم کا اعادہ کیا۔

ڈسٹرکٹ پولیس آفیسر رانا عمر فاروق نے کہا کہ مسیحی برادری نے صحت اور تعلیم کے میدان میں اہم خدمات انجام دی ہیں اور پاکستان کی تعمیر و ترقی میں ان کا کردار قابل ستائش ہے۔

تقریب کے اختتام پر ملک و قوم کی سلامتی اور اقلیتوں کی خوشحالی کے لیے دعا کی گئی۔

سیالکوٹ ،باغی ٹی وی( بیوروچیف شاہدریاض)انسداد پولیو مہم میں 7 لاکھ سے زائد بچوں کو پولیو کے قطرے پلائے گئے

تفصیل کے مطابق ضلع سیالکوٹ میں جاری سپلیمنٹری قومی انسداد پولیو مہم کے پہلے تین دنوں میں پانچ سال سے کم عمر 7 لاکھ 48 ہزار 421 بچوں کو پولیو سے بچاؤ کے حفاظتی قطرے پلائے جا چکے ہیں۔ یہ بات ڈپٹی کمشنر محمد ذوالقرنین لنگڑیال نے ایک اجلاس میں بتائی۔

ڈپٹی کمشنر نے کہا کہ مہم کے دوران ضلع کے مختلف علاقوں میں کچی آبادیوں، خانہ بدوش اور مائیگرنٹ موبائل پاپولیشن کو بھی کور کیا جا رہا ہے۔ انہوں نے کہا کہ اب تک ٹارگٹ کے مطابق 94 فیصد بچوں کو کور کیا جا چکا ہے اور باقی بچوں کو بھی مہم کے اختتام تک کور کر لیا جائے گا۔

ڈپٹی کمشنر نے عوام سے اپیل کی کہ وہ پولیو ٹیموں کا تعاون کریں اور اپنے بچوں کو پولیو کے قطرے ضرور پلائیں۔ انہوں نے کہا کہ پولیو ایک مہلک بیماری ہے اور اس سے بچاؤ کے لیے پولیو کے قطرے پلائینا بہت ضروری ہے۔

سیالکوٹ ،باغی ٹی وی(بیوروچیف شاہدریاض)سلسلہ نقشبندیہ اویسیہ تنظیم الااخوان ضلع سیالکوٹ کا ماہانہ ذکر قلبی اجتماع دارالعرفان ڈسکہ مرکز میں منعقد ہوا۔ اس اجتماع میں ضلع بھر سے سینکڑوں سالکین نے شرکت کی جس میں خواتین کی تعداد بھی قابل ذکر تھی۔

اس موقع پر شیخ سلسلہ اور تنظیم الااخوان پاکستان کے سربراہ امیر عبدالقدیر اعوان نے سالکین سے ویڈیو لنک کے ذریعے خطاب کیا۔ صاحب مجاز عبدالحمید چھینہ ایڈووکیٹ نے نئے آنے والے ساتھیوں کو طریقہ ذکر سکھایا۔ ضلع سیالکوٹ کے جنرل سیکرٹری عارف رفیق نے ضلع بھر کے ذمہ داران سے مختصر خطاب کرتے ہوئے تنظیمی امور پر روشنی ڈالی۔ آخر میں ملک کی ترقی اور سلامتی کے لیے دعا کی گئی۔

سیالکوٹ ،باغی ٹی وی(سٹی رپورٹر مدثر رتو)محمد اجمل نے ضلعی سنوکر چیمپئن شپ جیت لی

تفصیل کے مطابق ایبٹ روڈ بورڈ والا چوک میں منعقد ہونے والے ضلعی سنوکر چیمپئن شپ میں سیالکوٹ کے نوجوان کھلاڑی محمد اجمل نے شاندار کارکردگی کا مظاہرہ کرتے ہوئے فتح حاصل کی اور ضلعی سنوکر چیمپئن کا اعزاز اپنے نام کر لیا۔

ٹورنامنٹ میں ضلع بھر کے نوجوانوں نے حصہ لیا اور دلچسپ اور سنسنی خیز مقابلے دیکھنے کو ملے لیکن محمد اجمل نے اپنی مہارت اور اعتماد سے سب کو پیچھے چھوڑ دیا۔

محمد اجمل مغل جو اس سے قبل بھی کئی مقابلے جیت چکے ہیں، تیزی سے ترقی کی منازل طے کر رہے ہیں۔ سیالکوٹ کی عوام نے ان کے لیے نیک خواہشات کا اظہار کرتے ہوئے کہا کہ یہ نوجوان ہمارا قیمتی اثاثہ ہے اور اس کی مزید تربیت اور سپورٹ سے یہ بین الاقوامی سطح پر پاکستان کا نام روشن کرنے کی صلاحیت رکھتا ہے۔

محمد اجمل کی جیت پر اہل علاقہ اور کھیل کے شائقین نے خوشی کا اظہار کیا اور امید ظاہر کی کہ وہ مستقبل میں مزید کامیابیاں سمیٹیں گے۔

سیالکوٹ ,باغی ٹی وی(بیوروچیف شاہد ریاض)گروپ ہیڈ آف ٹریڈ اینڈ اکانومی اور برطانوی ہائی کمیشن کے پولیٹیکل قونصلر مسٹر مہیش مشرا نے اپنی ٹیم کے ہمراہ ایوان صنعت و تجارت سیالکوٹ کا دورہ کیا۔ چیمبر آف کامرس کے صدر اکرام الحق، نائب صدر عمر خالد اور ایگزیکٹو باڈی ممبران نے مہمانوں کا پھولوں کے گلدستے پیش کر کے پرتپاک استقبال کیا۔

مسٹر مہیش مشرا نے خطاب میں بتایا کہ برطانیہ نے پاکستانی برآمدی کاروباروں کی مدد کے لیے ایک نیا ترقیاتی پروگرام متعارف کرایا ہے۔ اس پروگرام کا مقصد برآمدی صلاحیت میں اضافہ، جدت کو فروغ دینا اور بین الاقوامی منڈیوں خصوصاً برطانیہ تک زیادہ رسائی ممکن بنانا ہے۔

ملاقات کے دوران دونوں ممالک میں ممکنہ تعاون، اسٹریٹجک اہداف اور سیالکوٹ کی برآمداتی صنعت کے کردار پر تفصیلی بات چیت کی گئی۔

قبل ازیں صدر چیمبر آف کامرس اکرام الحق نے سپاسنامہ پیش کرتے ہوئے سیالکوٹ کی صنعت سے جڑے ترقیاتی منصوبوں پر بریفنگ دی۔ اس موقع پر فہد سلہری، نائب صدر عمر خالد، صبیحہ احمد، ڈاکٹر مریم صدیقہ، اعجاز غوری، فیضان اکبر اور دیگر ایگزیکٹو باڈی ممبران بھی موجود تھے۔

سیالکوٹ (باغی ٹی وی بیورو چیف شاہد ریاض)وکلاء کی فلاح و بہبود کے لئے اقدامات ترجیح، افضال اسلم چوہدری

ڈسٹرکٹ بار ایسوسی ایشن کے امیدوار برائے سیکرٹری، افضال اسلم چوہدری ایڈووکیٹ نے کہا ہے کہ وکلاء برادری کی فلاح و بہبود کے لیے ہر ممکن اقدامات کیے جائیں گے۔ یہ بات انہوں نے آرائیں وکلاء اتحاد کی جانب سے اپنے اعزاز میں منعقدہ ظہرانے کے موقع پر کہی۔

انہوں نے کہا کہ اگر منتخب ہوا تو وکلاء کو درپیش مسائل کو ترجیحی بنیادوں پر حل کروں گا۔ دوستوں کی حمایت اور اللہ کے فضل سے ہمارا قافلہ کامیابی کی جانب تیزی سے بڑھ رہا ہے۔ افضال اسلم نے اپنے حامیوں کا شکریہ ادا کرتے ہوئے کہا کہ وہ ان کی کامیابی کے لیے بھرپور محنت کر رہے ہیں۔

ظہرانے کی تقریب میں میاں جاوید اقبال ایڈووکیٹ، چوہدری شہزاد خالد ایڈووکیٹ، میاں ناصر اقبال ایڈووکیٹ، چوہدری اقبال علی راہی ایڈووکیٹ، میاں فہیم ایڈووکیٹ، امیر حمزہ ایڈووکیٹ، میاں اسداللہ ایڈووکیٹ اور میاں فریدالدین مسعود ایڈووکیٹ نے بھی خطاب کیا۔ اس موقع پر وکلاء برادری کی بڑی تعداد موجود تھی۔