Category: سیالکوٹ

سیالکوٹ،باغی ٹی وی (بیوروچیف شاہدریاض)ایشیا کے پہلے اسمارٹ ولیج منصوبے کا افتتاح، دیہی ترقی کا نیا دور شروع

وزیر مملکت برائے انفارمیشن ٹیکنالوجی و ٹیلی کمیونیکیشن شیزا فاطمہ خواجہ نے سیالکوٹ کے نواحی گاؤں روڑس میں ایشیا کے پہلے اسمارٹ ولیج منصوبے کا افتتاح کرتے ہوئے کہا کہ اس منصوبے کا مقصد دور دراز اور دیہی علاقوں کو انٹرنیٹ سے منسلک کرکے تعلیم، صحت اور روزمرہ مسائل کے ڈیجیٹل حل فراہم کرنا ہے۔

افتتاحی تقریب سے خطاب کرتے ہوئے انہوں نے کہا کہ پاکستان کی نوجوان آبادی بے پناہ صلاحیتوں کی حامل ہے اور اسمارٹ ولیج منصوبہ ان کی صلاحیتوں کو اجاگر کرنے اور روزگار کے مواقع فراہم کرنے میں مددگار ثابت ہوگا۔ منصوبے کے تحت 100 لڑکے اور لڑکیاں جدید کمپیوٹر اور بزنس اسکلز کے کورسز کریں گے، جس سے انہیں روزگار کے مواقع فراہم ہوں گے۔

یہ پائلٹ پروجیکٹ منسٹری آف انفارمیشن، انٹرنیشنل ٹیلی کام یونین، ہواوے، بیداری اور ٹیلی تعلیم کے اشتراک سے شروع کیا گیا ہے۔ وزیر مملکت نے کہا کہ روڑس میں جدید کمپیوٹر لیب اور ورچوئل ایجوکیشن کے ذریعے تعلیمی سہولیات کے ساتھ ڈیجیٹل میڈیکل کنسلٹنسی بھی فراہم کی جائے گی۔

ریجنل ڈائریکٹر انٹرنیشنل ٹیلی کام یونین اتسوکو اوکوڈا نے کہا کہ اسمارٹ ولیج منصوبہ صحت، تعلیم اور زراعت میں ڈیجیٹل تبدیلی کے ذریعے دیہی علاقوں میں نمایاں ترقی کا سبب بنے گا۔

افتتاحی تقریب میں گورنمنٹ گرلز ہائی اسکول روڑس میں اسمارٹ کلاس روم اور ڈیجیٹل ولیج سینٹر کا بھی آغاز کیا گیا۔ شیزا فاطمہ نے اعلان کیا کہ اس منصوبے کو جلد ملک کے دیگر صوبوں تک وسعت دی جائے گی۔

سیالکوٹ (باغی ٹی وی بیورو چیف شاہد ریاض) وزیر اعلیٰ پنجاب مریم نواز شریف کی ہدایت پر محکمہ محنت و انسانی وسائل پنجاب نے تمام صنعتی و تجارتی اداروں، دکانوں، کارخانوں، بھٹہ خشت، پرائیویٹ ہسپتالوں اور سکولوں میں کم از کم اجرت کے قانون پر عمل درآمد کے لیے خصوصی مہم شروع کر دی ہے۔ مقرر کردہ یومیہ اجرت 1423 روپے اور ماہانہ 37000 روپے پر عمل کروانے کی اس مہم کی نگرانی سیکرٹری محنت نعیم غوث اور ڈائریکٹر جنرل لیبر ویلفیئر سیدہ کلثوم حئی کر رہی ہیں۔

گوجرانوالہ ایسٹ ڈویژن میں ڈائریکٹر لیبر ویلفیئر محمد نوید سرور قریشی مہم کی قیادت کر رہے ہیں اور تمام اضلاع کا دورہ کرکے عمل درآمد یقینی بنا رہے ہیں۔ سیالکوٹ میں قانون کی خلاف ورزی پر مالکان کو نوٹس جاری کرنے کے ساتھ چالان عدالتوں میں بھجوائے جا رہے ہیں۔

ڈائریکٹر لیبر نے ڈپٹی ڈائریکٹر لیبر محمد طیب ورک کے ہمراہ صدر سیالکوٹ چیمبر آف کامرس اکرام الحق سے ملاقات کی اور انہیں مہم میں تعاون کی درخواست کی۔ صدر چیمبر نے ممبران کو کم از کم اجرت کے قانون پر عمل درآمد کی ترغیب دینے کی یقین دہانی کروائی، جس پر ڈائریکٹر لیبر نے ان کا شکریہ ادا کیا۔

سیالکوٹ،باغی ٹی وی (بیوروچیف شاہدریاض)ڈسکہ میں وکلاء کی اے سی اور پرائس کنٹرول مجسٹریٹ کے خلاف ہڑتال، پنجاب بار کونسل کی حمایت

تفصیل کے مطابق ڈسکہ بار کے وکلاء نے اسسٹنٹ کمشنر ڈسکہ ماہم مشتاق اور پرائس کنٹرول مجسٹریٹ محمود جاوید کے خلاف ہڑتال کرتے ہوئے ان پر سنگین الزامات عائد کر دیے ہیں۔ پنجاب بار کونسل نے بھی ڈسکہ بار کی حمایت کرتے ہوئے مذمتی قرارداد منظور کر لی۔

ڈسکہ بار کے مطابق اے سی ماہم مشتاق اور پرائس کنٹرول مجسٹریٹ محمود جاوید کی کارروائیاں شہریوں کو بلیک میل کرنے اور رشوت وصول کرنے پر مبنی ہیں۔ بار کے عہدیداروں نے کہا کہ یہ افسران بیکریوں، پیٹرول پمپس، اور میرج ہالز کو غیر قانونی طور پر سیل کرکے رشوت وصول کرتے ہیں۔

پنجاب بار کونسل کی قرارداد میں اے سی ماہم مشتاق پر کرپشن، بداخلاقی اور شہریوں کو پریشان کرنے کے الزامات عائد کیے گئے ہیں۔ قرارداد میں کہا گیا کہ اے سی ڈسکہ نے کرپشن کی نئی تاریخ رقم کر دی ہے اور ان کی تعیناتی ڈسکہ کی بدنامی کا باعث ہے۔

پنجاب بار کونسل کے عہدیداران شمشاد احمد باجوہ، راحیل کامران چیمہ اور دیگر نے اس معاملے پر سخت موقف اختیار کرتے ہوئے مطالبہ کیا ہے کہ ماہم مشتاق کو فوری طور پر ڈسکہ سے تبدیل کیا جائے۔

قرارداد میں آئی جی پنجاب، کمشنر گوجرانوالہ، ڈپٹی کمشنر سیالکوٹ، اور چیف سیکرٹری پنجاب سے درخواست کی گئی ہے کہ اس معاملے کی تحقیقات کی جائیں اور ذمہ داران کے خلاف کارروائی کی جائے۔

ڈسکہ بار کی اس ہڑتال سے عدالتی کارروائیاں معطل ہو چکی ہیں، اور عوام کو شدید مشکلات کا سامنا ہے۔ وکلاء کا کہنا ہے کہ ہڑتال مطالبات کی منظوری تک جاری رہے گی۔

سیالکوٹ ،باغی ٹی وی(بیورورپورٹ شاہدریاض) رکن صوبائی اسمبلی چودھری فیصل اکرام نے کہا ہے کہ گزشتہ حکومت نے عوام کی ترقی اور خوشحالی کو نظرانداز کرتے ہوئے انتشار کی سیاست کو فروغ دیا، جس کے نتیجے میں معیشت کا پہیہ رک گیا اور عوام کو بے شمار مشکلات کا سامنا کرنا پڑا۔ مسلم لیگ (ن) نے اقتدار سنبھالتے ہی مشکل حالات میں معیشت کو سہارا دیا، جس کے باعث معیشت دوبارہ اپنے پیروں پر کھڑی ہو چکی ہے۔

یہ بات انہوں نے اپنے حلقہ انتخاب شاہ آباد کوٹھے ظفر وال روڈ کے افتتاح کے موقع پر عوامی اجتماع سے خطاب کرتے ہوئے کہی۔ اس موقع پر جوانی ٹیپو، سابق یوسی چیئرمین معراج دین، وائس چیئرمین مظفر چیچی اور ڈسٹرکٹ پرائس کنٹرول کمیٹی کے نائب صدر خالد بٹ سمیت یونین کونسل جودھے والی کے عوام نے بڑی تعداد میں شرکت کی۔

چودھری فیصل اکرام نے کہا کہ حلقے کے پسماندہ علاقوں میں ترقیاتی کاموں کو ترجیح دی جا رہی ہے اور منصوبوں کے معیار پر کوئی سمجھوتا نہیں کیا جائے گا۔ انہوں نے یقین دلایا کہ تمام ترقیاتی منصوبوں کو شفافیت کے ساتھ مکمل کیا جائے گا تاکہ عوام ان منصوبوں سے طویل مدت تک مستفید ہو سکیں۔ انہوں نے کہا کہ عوامی امنگوں کے مطابق ترقیاتی کام جاری رہیں گے اور کسی بھی قسم کی غفلت یا تاخیر برداشت نہیں کی جائے گی۔

تقریب میں شرکت کے دوران اہل علاقہ نے چودھری فیصل اکرام کا پرتپاک استقبال کیا، گل پاشی کی اور روایتی بینڈ باجے کے ساتھ انہیں بگھی میں بٹھا کر علاقہ کا دورہ کرایا۔ رکن صوبائی اسمبلی نے اس موقع پر کہا کہ ترقیاتی منصوبوں کا ایک ایک پیسہ عوامی فلاح کے لیے سوچ سمجھ کر خرچ کیا جائے گا تاکہ ان منصوبوں کے مثبت اثرات دیرپا رہیں۔

سیالکوٹ (باغی ٹی وی بیورو چیف شاہد ریاض) ڈی ایس پی سٹی ٹریفک مدثر خان کی قیادت میں ضلعی انتظامیہ اور میونسپل کارپوریشن کا ناجائز تجاوزات کے خلاف بھرپور آپریشن جاری ہے۔ دو ٹیموں پر مشتمل اسکواڈ، ڈی پی او سیالکوٹ کی ہدایات کے تحت، شہر کے مختلف بازاروں اور چوکوں میں پختہ اور عارضی تجاوزات کو ہٹانے میں سرگرم ہے۔

ڈی ایس پی مدثر خان اور انکروچمنٹ ٹیموں نے سردار بیگم چوک اور تحصیل بازار میں لفٹر اور ہیوی مشینری کے ذریعے سڑک پر موجود ٹھیلے اور دوکانوں کو ہٹایا۔ اس کارروائی کے نتیجے میں ٹریفک کی روانی بہتر ہوئی، اور شہریوں نے سہولت محسوس کی۔

چیف آفیسر میونسپل کارپوریشن اعجاز ملک کا کہنا ہے کہ پنجاب حکومت کی ہدایات پر جاری یہ آپریشن تجاوزات کے مکمل خاتمے تک جاری رہے گا تاکہ ٹریفک اور شہریوں کو درپیش مسائل حل کیے جا سکیں۔

سیالکوٹ (باغی ٹی وی بیورو چیف شاہد ریاض) پاکستان مسلم لیگ (ن) کے مرکزی رہنما اور رکن صوبائی اسمبلی محمد منشاء اللہ بٹ نے کہا ہے کہ حلقہ انتخاب میں 30 کروڑ روپے کی لاگت سے ترقیاتی منصوبوں کا آغاز کر دیا گیا ہے۔ وزیر اعلیٰ پنجاب کے ترقیاتی پیکج کے تحت یہ منصوبے جلد مکمل کیے جائیں گے اور ان کا معیار یقینی بنایا جائے گا۔

یہ بات انہوں نے یونین کونسل فتح گڑھ اور مظفر پورہ کی گلیوں اور سیوریج منصوبوں کے افتتاح کے موقع پر کہی۔ اس موقع پر سابق ڈپٹی میئر چودھری بشیر احمد، یونین کونسل چیئرمینز نواز بھٹی اور چودھری شکیل، اور دیگر معززین بشمول ایکسین سروسز بلال احمد، بشپ ندیم غوری، پاسٹرز اور مقامی رہنما موجود تھے۔

محمد منشاء اللہ بٹ نے خطاب میں کہا کہ مسلم لیگ (ن) کی حکومت جب بھی اقتدار میں آئی، ملک نے ترقی کی منازل طے کیں۔ انہوں نے کہا کہ ایک سال کے قلیل عرصے میں موجودہ حکومت نے گرتی ہوئی معیشت کو دوبارہ اپنے پیروں پر کھڑا کر دیا ہے، اور معاشی اشاریے مثبت ہو گئے ہیں۔

انہوں نے مزید کہا کہ مسلم لیگ (ن) کی سیاست کا بنیادی منشور عوامی خدمت ہے اور یہ سفر بلا تعطل جاری رہے گا۔ حلقے کے عوام نے ترقیاتی منصوبوں کے آغاز پر اطمینان کا اظہار کرتے ہوئے مسلم لیگ (ن) کی قیادت کو سراہا۔

سیالکوٹ (باغی ٹی وی بیورو چیف شاہد ریاض) ڈپٹی کمشنر سیالکوٹ محمد ذوالقرنین لنگڑیال نے کہا ہے کہ ملک میں پولیو کیسز میں اضافے پر تشویش ہے۔ اس مہلک مرض سے بچاؤ کے لیے 16 دسمبر سے سال 2024 کی چوتھی قومی انسداد پولیو مہم کا آغاز کیا جائے گا۔ پانچ روزہ مہم کے دوران ضلع سیالکوٹ میں 5 سال سے کم عمر ہر بچے کو پولیو سے بچاؤ کے قطرے پلائے جائیں گے، چاہے ان کا تعلق کسی دوسرے ملک، صوبے یا ضلع سے ہو۔

ڈپٹی کمشنر نے مہم کی تیاریوں کا جائزہ لیتے ہوئے کہا کہ پولیو کا خاتمہ محکمہ صحت کی بنیادی ذمہ داری ہے، جبکہ تمام متعلقہ ادارے، بشمول پولیس، اس قومی مہم کو کامیاب بنانے میں اپنا کردار ادا کریں گے۔ انہوں نے خبردار کیا کہ مہم کے دوران غفلت یا کوتاہی کو کسی صورت برداشت نہیں کیا جائے گا، اور ذمہ داران کے خلاف سخت کارروائی کی جائے گی۔

ڈپٹی کمشنر نے مزید کہا کہ پولیو ٹیموں کی میپنگ کے ساتھ جی پی ایس ٹریکنگ کا نظام نافذ کیا جائے گا تاکہ مہم کو مکمل اور شفاف بنایا جا سکے۔ مہم میں 6,500 سے زائد افسران و ملازمین حصہ لیں گے اور 8 لاکھ بچوں کو قطرے پلانے کا ہدف حاصل کیا جائے گا۔

انہوں نے بتایا کہ پولیس ٹیموں کو مکمل سیکیورٹی فراہم کرے گی، جبکہ ٹرانزٹ پوائنٹس پر موجود بچوں کو ویکسین دینے کے لیے ٹریفک عملہ اور سیکیورٹی اہلکار ہمہ وقت تیار رہیں گے۔ مزید برآں، جنرل بس اسٹینڈ پر ایک مستقل پولیو پوسٹ قائم کرنے کے لیے حکومت کو درخواست دی جائے گی تاکہ پولیو وائرس کے ممکنہ داخلے کو بروقت روکا جا سکے۔

ڈپٹی کمشنر نے شہریوں سے اپیل کی ہے کہ وہ انسداد پولیو مہم میں تعاون کریں تاکہ آئندہ نسلوں کو اس موذی مرض سے محفوظ رکھا جا سکے۔

سیالکوٹ (باغی ٹی وی بیورو چیف شاہد ریاض) تعلیم و تربیت بہترین معاشرے کی بنیاد ہے: چوہدری سلیم یونس چیمہ

پنجاب میں معیاری تعلیم فراہم کرنے والے ادارے اینجلز گروپ آف اسکول سسٹم ڈسکہ کے چیئرمین چوہدری سلیم یونس چیمہ نے کہا ہے کہ ایک بہترین معاشرے کی تشکیل کے لیے افراد کی تعلیم و تربیت کو اولین ترجیح دی جانی چاہیے۔ ان خیالات کا اظہار انہوں نے اپنی پریس ریلیز میں کیا۔

چوہدری سلیم یونس چیمہ کا کہنا تھا کہ تعلیم و تربیت اس نہج پر کی جانی چاہیے کہ افراد حاصل کردہ علم کو معاشرے میں مثبت تبدیلیاں لانے کے لیے استعمال کر سکیں۔ انہوں نے مزید کہا کہ اساتذہ اور والدین کی مشترکہ محنت سے ایسے افراد تیار کیے جا سکتے ہیں جو ایک بہتر اور روشن مستقبل کی ضمانت بن سکیں۔