Category: سیالکوٹ

سیالکوٹ (باغی ٹی وی ،بیوروچیف شاہد ریاض) کنگرہ روڈ پر موٹرسائیکل حادثہ، 32 سالہ نوجوان جاں بحق، تین زخمی

تھانہ سبز پیر کے علاقہ کنگرہ روڈ پر دو موٹرسائیکلوں کے خوفناک تصادم میں 32 سالہ ذیشان عارف جاں بحق ہو گیا، جبکہ اس کے ساتھ 8 سالہ ازان اور دوسری موٹرسائیکل پر سوار 16 سالہ علی رضا اور 17 سالہ حسنین شدید زخمی ہو گئے۔

موٹرسائیکل حادثات میں زیادہ تر زخمی ہونے والے نوجوانوں کی عمریں 15 سے 20 سال کے درمیان ہوتی ہیں، جو زیادہ تر تیز رفتاری کا نتیجہ ہیں۔ والدین اور نوجوانوں سے اپیل ہے کہ احتیاط کریں اور اپنی زندگی کو محفوظ بنائیں۔

سیالکوٹ (باغی ٹی وی، بیوروچیف شاہد ریاض)ڈپٹی کمشنر سیالکوٹ محمد ذوالقرنین لنگڑیال نے کہا ہے کہ ناجائز منافع خوروں کے خلاف سخت کارروائی جاری ہے۔ گزشتہ تین ہفتوں میں گراں فروشی کے الزام میں 1,298 دکانداروں پر 78 لاکھ 6 ہزار روپے جرمانہ عائد کیا گیا، جبکہ 3 دکانداروں کے خلاف پرائس کنٹرول ایکٹ کے تحت ایف آئی آر درج کی گئی، 52 افراد کو گرفتار کیا گیا اور 21 دکانوں اور گوداموں کو سیل کر دیا گیا۔

ڈپٹی کمشنر نے یہ بات پرائس مجسٹریٹس کی کارکردگی کے جائزہ اجلاس میں کہی۔ اجلاس میں اے ڈی سی جنرل ایوب بخاری، اے سی سیالکوٹ انعم بابر، اور ڈی او انڈسٹریز عبد القدوس سمیت ڈسکہ، پسرور، اور سمبڑیال کے اسسٹنٹ کمشنرز نے بھی وڈیو لنک کے ذریعے شرکت کی۔

ڈپٹی کمشنر نے اسسٹنٹ کمشنرز کو ہدایت کی کہ ون ڈش اور شادی کے اوقات پر عملدرآمد کو یقینی بنایا جائے اور میرج ہالز کی مانیٹرنگ مزید سخت کی جائے۔ مزید برآں ماحولیاتی آلودگی کا باعث بننے والے اینٹوں کے بھٹوں کے خلاف کارروائی اور فصلوں کی باقیات کو جلانے پر زیرو ٹالرنس پالیسی اپنانے کے احکامات بھی دیے۔

سیالکوٹ (باغی ٹی وی،بیوروچیف شاہد ریاض) تھانہ کوتوالی کے ایس ایچ او سب انسپکٹر کاشف علی بٹ نے چارج سنبھالتے ہی جرائم پیشہ عناصر کے خلاف سخت کریک ڈاؤن کا آغاز کر دیا۔ ڈسٹرکٹ پولیس آفیسر سیالکوٹ رانا عمر فاروق کے کرائم کنٹرول میکنزم کے تحت کارروائیوں میں ناجائز اسلحہ رکھنے اور ہوائی فائرنگ کرنے والے متعدد ملزمان کو گرفتار کر کے ان کے خلاف مقدمات درج کر لیے گئے۔

ایس ایچ او کاشف بٹ نے اپنی پولیس ٹیم کے ہمراہ کارروائی کرتے ہوئے ایسے عناصر کو گرفتار کیا جو ہوائی فائرنگ کے ذریعے علاقے میں خوف و ہراس پھیلانے کے مرتکب تھے۔ ان کی اس کامیاب مہم پر شہری حلقوں کی جانب سے انہیں خراجِ تحسین پیش کیا جا رہا ہے۔

واضح رہے کہ کاشف بٹ اس سے قبل تھانہ ہیڈ مرالہ میں ایس ایچ او کے طور پر امن و امان کے قیام میں نمایاں خدمات انجام دے چکے ہیں۔ شہریوں کا کہنا ہے کہ ڈی پی او سیالکوٹ کی جانب سے اس قابل افسر کی تھانہ کوتوالی میں تعیناتی کے بعد جرائم پیشہ عناصر کے خلاف کارروائیوں میں تیزی آئی ہے، جس سے عوام میں تحفظ کا احساس بڑھ رہا ہے۔

سیالکوٹ (باغی ٹی وی،بیوروچیف شاہدریاض) ڈپٹی کمشنر محمد ذوالقرنین لنگڑیال نے ماحولیاتی آلودگی کے تدارک کے لیے اہم اقدامات کا اعلان کرتے ہوئے بتایا کہ زگ زیگ ٹیکنالوجی کے اصولوں کی خلاف ورزی پر 15 بھٹے مسمار کر دیے گئے ہیں، جبکہ 65 بھٹوں کو سربمہر کیا گیا اور 36 بھٹہ مالکان کے خلاف مقدمات درج کیے گئے ہیں۔

ڈپٹی کمشنر نے کہا کہ رواں سیزن میں بھٹہ مالکان کو ایس او پیز کی خلاف ورزی پر 24 لاکھ روپے جرمانہ کیا جا چکا ہے اور 174 بھٹوں کو نوٹسز جاری کیے گئے ہیں۔ انہوں نے کہا کہ فضائی آلودگی پھیلانے والوں کے لیے زیرو ٹالرنس کی پالیسی اپنائی گئی ہے۔

مزید برآں، ڈپٹی کمشنر نے کہا کہ اسموگ کی بڑی وجوہات میں دھواں چھوڑتی گاڑیاں شامل ہیں۔ حکومت پنجاب کی ہدایات پر نجی اور کمرشل گاڑیوں کی انسپکشن جاری ہے، اور رواں ماہ 144 گاڑیوں کو 2 لاکھ 94 ہزار روپے جرمانہ کیا گیا، جبکہ 71 گاڑیاں بند کی گئیں۔

پلاسٹک بیگز کے خلاف کارروائی کے حوالے سے انہوں نے کہا کہ ممنوعہ شاپر بیگز کے استعمال پر پابندی کے نفاذ کو یقینی بنانے کے لیے روزانہ کی بنیاد پر انسپکشن کی جا رہی ہے۔ اب تک 850 من ممنوعہ شاپر بیگز ضبط، 10 دکانوں کے خلاف ایف آئی آر درج اور 3 لاکھ 50 ہزار روپے جرمانہ کیا جا چکا ہے۔

ڈپٹی کمشنر نے ماحولیات کے تحفظ کے لیے جاری مہم کو مزید مؤثر بنانے کا عزم ظاہر کیا اور تمام متعلقہ اداروں کو سختی سے قوانین پر عملدرآمد کی ہدایت کی۔

سیالکوٹ(باغی ٹی وی ،بیوروچیف شاہدریاض) 4 سالہ بچے پر مقدمے کا جھوٹ بے نقاب، قبضہ مافیا کی چال ناکام،پولیس کے خلاف سازش کرنے والوں کی حقیقت سامنے آگئی، باغی ٹی وی نے ویڈیو کے ذریعے مقدمے کی اصل حقیقت بے نقاب کردی

تفصیل کے مطابق سیالکوٹ کے تھانہ صدر کے علاقے رتہ آرائیاں میں درج مقدمے کی حقیقت سامنے آگئی، جہاں 4 سالہ بچے پر مقدمے کا ڈرامہ مخالفین کی جانب سے پولیس کے خلاف سازش ثابت ہوا۔

باغی ٹی وی نے واقعے کی اصل ویڈیو حاصل کرلی، جس میں واضح طور پر 50 سالہ ملزم عبدالرحمن عرف بھولا کو اپنے ساتھیوں کے ہمراہ پلاٹ پر قبضے کی کوشش کرتے دیکھا جا سکتا ہے۔

قبضہ مافیا نے پولیس کو بدنام کرنے کے لیے 4 سالہ بچے عبدالرحمن کو عدالت میں پیش کرکے یہ تاثر دیا کہ پولیس نے کم عمر بچے پر مقدمہ درج کیا ہے۔ اس واقعے کو سوشل میڈیا پر وائرل کرکے منفی پروپیگنڈا کیا گیا، تاہم باغی ٹی وی کی تحقیق سے یہ سازش بے نقاب ہوگئی۔

پولیس کے خلاف جھوٹے الزامات لگانے والے عناصر کی کوششیں ناکام ہو گئیں، اور مقدمے کی حقیقت سامنے آ گئی۔