Category: سیالکوٹ

سیالکوٹ (باغی ٹی وی،بیوروچیف شاہدریاض) گھوئینکی اور گردونواح کے شہری گیس لوڈشیڈنگ کے باعث شدید مشکلات کا سامنا کر رہے ہیں۔ سردیوں میں گیس کی بندش کے باعث گھریلو امور متاثر ہو رہے ہیں، اور لوگ لکڑیوں یا مہنگے گیس سلینڈرز پر انحصار کرنے پر مجبور ہیں۔

شہریوں نے شکایت کی کہ انتظامیہ اور سیاستدانوں کی جانب سے مسئلے پر کوئی توجہ نہیں دی جا رہی۔ ہر سال سردیوں میں احتجاج کے بعد عارضی طور پر گیس کا دباؤ بڑھا دیا جاتا ہے، لیکن کوئی مستقل حل تلاش نہیں کیا جاتا۔

شہریوں کا کہنا ہے کہ گرمیوں میں گیس کی کمی کا مسئلہ نظرانداز ہو جاتا ہے اور یہی سلسلہ سالہا سال سے جاری ہے۔ عوام نے منتخب نمائندوں سے گیس بحران کا مستقل حل نکالنے کا مطالبہ کیا ہے، لیکن افسوس کہ عوامی مشکلات پر کوئی توجہ نہیں دی جا رہی۔

سیالکوٹ (باغی ٹی وی،بیوروچیف شاہدریاض) وزیر اعلیٰ پنجاب کی گرین ٹریکٹر اسکیم کے تحت ضلع سیالکوٹ کے 189 کاشتکاروں کو 10 لاکھ روپے فی ٹریکٹر سبسڈی پر ٹریکٹرز فراہم کیے گئے۔

رکن صوبائی اسمبلی چودھری فیصل اکرام اور ڈپٹی کمشنر محمد ذوالقرنین لنگڑیال نے کاشتکاروں کو ٹریکٹرز کی حوالگی کی تقریب میں شرکت کی اور مبارکباد پیش کی۔ اس موقع پر ڈائریکٹر زراعت توسیع گوجرانوالہ شکیل احمد، ڈپٹی ڈائریکٹر زراعت ڈاکٹر رانا قربان علی خان اور ٹریکٹر حاصل کرنے والے خوش نصیب کاشتکار بھی موجود تھے۔

چودھری فیصل اکرام نے کہا کہ وزیر اعلیٰ پنجاب نے 300 ارب روپے کے کسان دوست پروگرام کے ذریعے زرعی انقلاب کی بنیاد رکھ دی ہے۔ اس پروگرام کے تحت کاشتکاروں کو کسان کارڈ، جدید آلات، سولر ٹیوب ویلز اور دیگر سہولیات سبسڈی پر فراہم کی جا رہی ہیں۔

ڈپٹی کمشنر نے بتایا کہ ضلع سیالکوٹ میں 16,410 درخواستیں موصول ہوئیں، جن کی قرعہ اندازی لاہور میں کی گئی۔ کامیاب امیدواروں کو آج سے ٹریکٹرز کی فراہمی شروع کر دی گئی ہے۔

سیالکوٹ،باغی ٹی وی (بیوروچیف شاہدریاض) کم از کم اجرت قانون پر عملدرآمد کے لیے خصوصی مہم کا آغاز

تفصیلات کے مطابق وزیر اعلیٰ پنجاب مریم نواز شریف کی ہدایت پر محکمہ محنت و انسانی وسائل پنجاب نے صنعتی و تجارتی اداروں، دکانوں، کارخانوں، بھٹہ خشت، پرائیویٹ ہسپتالوں اورسکولوں میں کم از کم اجرت کے قانون پر عملدرآمد کے لیے خصوصی مہم شروع کی ہے۔

یکم جولائی 2024 سے مقرر کردہ کم از کم یومیہ اجرت 1423 روپے اور 26 دنوں کی مجموعی اجرت 37000 روپے یقینی بنانے کے لیے یہ مہم جاری ہے۔ اس کی نگرانی سیکرٹری محکمہ محنت نعیم غوث اور ڈائریکٹر جنرل لیبر ویلفیئر سیدہ کلثوم حئی کر رہی ہیں، جبکہ گوجرانوالہ ایسٹ ڈویژن میں ڈائریکٹر لیبر ویلفیئر محمد نوید سرور قریشی تمام اضلاع میں دورے کر کے اس مہم کو کامیاب بنانے میں سرگرم ہیں۔

ضلع سیالکوٹ میں خلاف ورزی کرنے والے مالکان کے خلاف قانونی کارروائیاں کی جا رہی ہیں، جنہیں نوٹسز جاری کرنے کے ساتھ عدالتوں میں چالان بھجوائے جا رہے ہیں۔ اس دوران مالکان اور ٹریڈ باڈیز کے نمائندوں سے ملاقاتیں کر کے انہیں قانون پر عملدرآمد کے لیے آمادہ کیا جا رہا ہے۔

ڈائریکٹر لیبر ویلفیئر محمد نوید سرور قریشی نے ڈپٹی ڈائریکٹر لیبر محمد طیب ورک کے ہمراہ صدر سیالکوٹ ایوان صنعت و تجارت اکرام الحق سے ملاقات کی۔ صدر نے یقین دلایا کہ چیمبر کے تمام ممبران کو قانون کے مطابق اجرت ادا کرنے کے لیے تحریری ہدایات جاری کی جائیں گی۔

ڈائریکٹر لیبر ویلفیئر اور ڈپٹی ڈائریکٹر نے صدر اکرام الحق کے تعاون پر ان کا شکریہ ادا کرتے ہوئے کہا کہ اس مہم کا مقصد مزدوروں کے حقوق کی حفاظت اور اجرت کے قوانین پر مکمل عملدرآمد کو یقینی بنانا ہے۔

سیالکوٹ،باغی ٹی وی (بیوروچیف شاہدریاض) اقلیتی خاندانوں کے لیے مالی امداد، کرسمس پر فول پروف سیکیورٹی کا اعلان

تفصیل کے مطابق ڈپٹی کمشنر سیالکوٹ محمد ذوالقرنین لنگڑیال نے کہا ہے کہ وزیر اعلیٰ پنجاب مریم نواز شریف نے صوبے کے ہزار مستحق اقلیتی خاندانوں کے لیے سہ ماہی مالی امداد کی فراہمی کا اعلان کیا ہے۔ اس کے لیے رجسٹریشن 5 جنوری تک آن لائن پورٹل mcard.punjab.gov.pk پر جاری ہے۔

مسیحی، ہندو، سکھ اور دیگر اقلیتی مذاہب کے شناختی کارڈ رکھنے والے خاندان اس پروگرام میں درخواست دے سکتے ہیں۔ مزید رہنمائی کے لیے 1040 ہیلپ لائن پر رابطہ کیا جا سکتا ہے۔

یہ بات انہوں نے اسسٹنٹ کمشنر انعم بابر اور مسیحی عمائدین کے ہمراہ کرسمس کیک کاٹنے کی تقریب میں کہی۔ اس موقع پر محکمہ انسانی حقوق و اقلیتی امور کے عہدیداران اور کمیونٹی کے دیگر نمایاں افراد موجود تھے۔

ڈپٹی کمشنر نے کرسمس کی مبارکباد دیتے ہوئے کہا کہ ضلعی انتظامیہ کرسمس کے موقع پر اپنی ذمہ داریوں کو بخوبی انجام دے گی۔ ضلع بھر کے چرچز اور کرسمس تقریبات کو فول پروف سیکیورٹی فراہم کی جائے گی تاکہ مسیحی برادری اپنے تہوار کو پرامن اور محفوظ ماحول میں منائے۔

سیالکوٹ،ڈسکہ،باغی ٹی وی (بیورورپورٹ+نامہ نگار)ڈسکہ میں ترقیاتی منصوبے آخری مراحل میں داخل،عوامی مسائل کے حل کا وعدہ پورا کریں گے – میاں ذیشان رفیق

تفصیل کے مطابق ڈسکہ میں ترقیاتی کاموں کے جال بچھانے کا دعویٰ کرتے ہوئے صوبائی وزیر بلدیات میاں ذیشان رفیق نے کہا ہے کہ شہر کی سڑکوں، گلیوں، سیوریج اور اسٹریٹ لائٹس کے درجنوں منصوبے تکمیل کے قریب ہیں۔ ان منصوبوں کی بدولت ڈسکہ کے دیرینہ مسائل حل ہوں گے اور عوام سے کیے گئے وعدے پورے کیے جائیں گے۔

یہ بات انہوں نے گلہ تیلیاں والا، محلہ راجپوتاں، محلہ موتی مسجد اور محلہ حق پورہ میں ٹف ٹائلز اور اسٹریٹ لائٹس کے منصوبے کا افتتاح کرتے ہوئے کہی۔ اس موقع پر مسلم لیگ ن کے رہنما محمد عظیم بٹ، ندیم بٹ اور دیگر معززین سمیت کثیر تعداد میں عوام موجود تھے۔

میاں ذیشان رفیق نے کہا کہ مسلم لیگ ن کی سیاست ہمیشہ خدمت اور ترقی کی ضمانت رہی ہے۔ انہوں نے دعویٰ کیا کہ ستھرا پنجاب پروگرام اور ڈور ٹو ڈور ویسٹ کلیکشن جیسے منصوبے صوبے کی ترقی کی جانب اہم اقدامات ہیں، جن کا دائرہ کار جلد ڈسکہ تک بھی بڑھایا جائے گا۔

انہوں نے بتایا کہ نکاسی آب کے لیے 77 کروڑ روپے کی لاگت سے جاری ڈرین منصوبہ بھی تکمیل کے قریب ہے اور ترقیاتی منصوبوں میں معیار کو یقینی بنایا جا رہا ہے۔ انہوں نے ترقیاتی کاموں کے معیار پر عوام کو چیلنج دیتے ہوئے کہا کہ ہمارے منصوبوں کی کوالٹی چیک کی جا سکتی ہے۔

مزید برآں انہوں نے مہنگائی میں کمی اور ملکی معیشت میں بہتری کے دعوے کرتے ہوئے سابق حکومت پر کرپشن اور انتشار کے الزامات لگائے۔ انہوں نے کہا کہ مسلم لیگ ن عوام کے مسائل حل کرنے اور ملک کو ترقی کی راہ پر گامزن کرنے کے لیے سنجیدہ اقدامات کر رہی ہے۔

تقریب کے اختتام پر ملک کی خوشحالی اور عوامی مسائل کے حل کے لیے دعائیں کی گئیں۔

سیالکوٹ (باغی ٹی وی,بیوروچیف شاہدریاض) کسان بورڈ پاکستان کے مرکزی نظم سے مشاورت اور صوبائی صدر کسان بورڈ پنجاب وسطی کی منظوری کے بعد چودھری عصمت اللہ وریاہ کو کسان بورڈ ضلع سیالکوٹ کا صدر مقرر کر دیا گیا ہے۔

عصمت اللہ وریاہ کی تقرری پر جماعت اسلامی سیالکوٹ کے ضلعی امیر چودھری امتیاز احمد بریار، شیخ عتیق الرحمان، ڈاکٹر خالد خلیل، محمد رمضان، عارف محمود شیخ، مختیار احمد، دانش خان، ملک منیر حسین، انصر فاروق بھٹی، عامر صدیق چیمہ ایڈووکیٹ، سید مشہود الحق شاہ، وقار عظیم اور حافظ محمد اکرم سمیت دیگر رہنماؤں نے مبارکباد پیش کی ہے۔

رہنماؤں نے دعا کی کہ اللہ تعالیٰ عصمت اللہ وریاہ کو استقامت کے ساتھ کسان برادری کی خدمت کرنے کی توفیق عطا فرمائے۔ تقرری کے بعد کسان کمیونٹی میں خوشی کی لہر دوڑ گئی، اور ان سے بڑی توقعات وابستہ کی جا رہی ہیں۔