Category: سیالکوٹ

سیالکوٹ (باغی ٹی وی، بیوروچیف شاہد ریاض) پاکستان مسلم لیگ ن کی رکن قومی اسمبلی سیدہ نوشین گیلانی نے اسٹیٹ بینک آف پاکستان سیالکوٹ میں منعقدہ "خواتین کا کاروباری دن” کے سیمینار میں شرکت کی۔ تقریب میں ویمن چیمبر سیالکوٹ، سیالکوٹ چیمبر، بزنس فسیلیٹیشن سینٹر، یونیورسٹیز، کمرشل بینکوں، اور کاروباری خواتین کی بڑی تعداد موجود تھی۔

سیدہ نوشین گیلانی نے خواتین کی کاروباری سرگرمیوں کو بڑھانے کی اہمیت پر روشنی ڈالی اور کہا کہ قرضے لینے والوں میں خواتین انٹرپرینیورز کا حصہ محض 10 فیصد ہے، جب کہ بینک اکاؤنٹس میں ان کی شمولیت 26 فیصد تک محدود ہے۔ انہوں نے اسٹیٹ بینک کی خواتین کے لیے مالیاتی خدمات تک رسائی بڑھانے کی کوششوں کو سراہا۔

اسسٹنٹ چیف مینیجر نے ویمن انٹرپرینیورز کے کردار کو اجاگر کرتے ہوئے کہا کہ خواتین اختراع، معاشی ترقی، اور سماجی تبدیلی میں اہم کردار ادا کر رہی ہیں۔ انہوں نے تسلیم کیا کہ خواتین کو فنانس، مارکیٹ تک رسائی، اور رہنمائی جیسے چیلنجز کا سامنا ہے، لیکن ان مشکلات کے باوجود پاکستانی خواتین نے زراعت، ٹیکنالوجی، اور مینوفیکچرنگ میں نمایاں کامیابیاں حاصل کی ہیں۔

اسٹیٹ بینک نے 24 برانچوں کے ذریعے 50 سے زائد سیشنز کا انعقاد کیا، جس میں 1500 سے زائد کاروباری خواتین کو فنانسنگ مواقع کے بارے میں آگاہ کیا گیا۔ اس موقع پر مالیاتی اداروں کو اختراعی اور شمولیتی حکمت عملی اپنانے کی ترغیب دی گئی، اور یو این ویمن اور یو ایس ایڈ جیسے اداروں کے ساتھ شراکت داری کی اہمیت پر زور دیا گیا۔

تقریب کے اختتام پر نمایاں کارکردگی دکھانے والی خواتین انٹرپرینیورز اور بینکوں کو ایوارڈز پیش کیے گئے۔ گورنر نے کہا کہ یہ خواتین آئندہ نسلوں کے لیے مشعل راہ بنیں گی اور اسٹیٹ بینک شمولیتی مالیاتی نظام کے فروغ کے لیے پرعزم ہے جو خواتین کو مزید بااختیار بنائے گا۔

سیالکوٹ (باغی ٹی وی،بیوروچیف شاہد ریاض) پاکستان سنی تحریک کے زیر اہتمام عظیم الشان ختم نبوت و استحکام پاکستان کانفرنس ججے سائیاں میں منعقد ہوئی۔ کانفرنس میں مختلف رہنماؤں نے عقیدہ ختم نبوت کی اہمیت، دینی تعلیمات پر عمل اور ملکی استحکام پر روشنی ڈالی۔

پاکستان سنی تحریک کے صوبائی رہنما غلام مرتضیٰ قادری نے اپنے خطاب میں کہا کہ عقیدہ ختم نبوت مسلمانوں کے ایمان کی بنیاد ہے، اور اس کے تحفظ کے لیے کسی قربانی سے دریغ نہیں کیا جائے گا۔ انہوں نے کہا کہ نبی اکرم ﷺ کی محبت ایمان کا حصہ ہے اور ان کی سنتوں پر عمل سے ہماری دنیا و آخرت سنور سکتی ہے۔

ضلعی جنرل سیکرٹری حافظ افضال دتے شاہی نے کہا کہ امت کو نبی کریم ﷺ کے پیغام کو دنیا بھر میں عام کرنا ہوگا۔ انہوں نے امت کے مسائل کا سبب اللہ کے احکامات اور سنت رسول ﷺ سے دوری کو قرار دیا۔

دیگر رہنماؤں چوہدری راشد گجر، ملک عامر اقبال قادری، سرفراز قادری، اور مفتی علامہ سمر عباس نے بھی خطاب کیا اور عقیدہ ختم نبوت کے تحفظ پر اپنے عزم کا اظہار کیا۔ انہوں نے پاک فوج کے کردار کو سراہتے ہوئے کہا کہ دفاع وطن میں فوج کا کردار ناقابل فراموش ہے اور قوم ہر موقع پر ان کے ساتھ کھڑی ہے۔

سیالکوٹ (باغی ٹی وی،بیوروچیف شاہد ریاض) پاکستان مسلم لیگ (ن) بلوچستان کے رہنما سردار شاہ محمد ناصر نے تحریک انصاف کے الزامات کو مسترد کرتے ہوئے کہا ہے کہ سابقہ دور میں سیاسی مخالفین کے خلاف آمرانہ ہتھکنڈے استعمال کرنے والی جماعت آج خود کو مظلوم ظاہر کر رہی ہے۔ انہوں نے کہا کہ بانی تحریک انصاف کو ان کے جرائم کی سزا دی جا رہی ہے، اور ان کی رہائی کسی احتجاج سے ممکن نہیں۔

یہ بات انہوں نے پاکستان پیپلز پارٹی آزاد کشمیر کے رہنماؤں حاجی محمد عارف چوہدری، سردار امجد گورسی، اور چوہدری وسیم اصغر سے ملاقات کے دوران کہی۔ سردار شاہ محمد ناصر نے کہا کہ مسلم لیگ (ن) اور پیپلز پارٹی اتحادی حکومت کی کامیاب مثال قائم کر رہی ہیں، جبکہ تحریک انصاف کا غیر ملکی حمایت پر انحصار بے سود ثابت ہوگا۔

انہوں نے مزید کہا کہ عدلیہ آزاد ہے اور آئین و قانون کی بالادستی کو یقینی بناتے ہوئے فیصلے کر رہی ہے۔ میاں محمد نواز شریف نے ملکی ترقی اور عوامی خوشحالی کے لیے تمام انتقامی کاروائیوں کو پس پشت ڈال دیا ہے۔ موجودہ حکومت وزیراعظم شہباز شریف اور وزیراعلیٰ مریم نواز شریف کی قیادت میں ترقیاتی منصوبوں کو آگے بڑھا رہی ہے اور معیشت کی بحالی کے لیے اقدامات کر رہی ہے۔

انہوں نے تحریک انصاف کو تنقید کا نشانہ بناتے ہوئے کہا کہ احتجاج کی سیاست چھوڑ کر عوامی مسائل پر توجہ دی جائے

سیالکوٹ (باغی ٹی وی،بیوروچیف شاہد ریاض) انجمن خدمت خلق رجسٹرڈ ڈسکہ کا 748 واں ماہانہ اجلاس زیر صدارت میاں سعید احمد صراف، صدر انجمن، زچہ بچہ ہسپتال پسرور روڈ ڈسکہ میں منعقد ہوا۔ اجلاس کا آغاز تلاوت قرآن پاک سے ہوا جس کی سعادت مولانا ایوب خان نے حاصل کی، جبکہ نعت رسول ﷺ حافظ عبد الغفار نے پیش کی۔

جنرل سیکرٹری محمد انور مغل ایڈووکیٹ نے گزشتہ اجلاس کی کارروائی پیش کی، جسے متفقہ طور پر منظور کیا گیا۔ فنانس سیکرٹری انوار احمد سیال نے ماہ ستمبر 2024 کے آمدن و اخراجات کی رپورٹ پیش کی، جسے منظوری دی گئی۔ سیکرٹری نشرو اشاعت سہیل سلمان ٹھروہی نے گزشتہ اجلاس کی شائع شدہ خبریں پڑھ کر سنائیں۔

اجلاس میں حاجی ضرار احمد کی والدہ، خان عباس خان کے بہنوئی، ریاض احمد وڑائچ کی ہمشیرہ اور سہیل سلمان کی عزیزہ کی وفات پر دعائے مغفرت کی گئی۔ نو منتخب عہدیداروں اور ایگزیکٹو ممبران محمد اطہر لون اور چوہدری محمد افضل کو بھی خوش آمدید کہا گیا۔

ممبران نے اسرائیل کی فلسطین میں مسلمانوں پر جارحیت کی شدید مذمت کی، اور شہر ڈسکہ میں چوری و ڈکیتی کی بڑھتی وارداتوں پر انتظامیہ سے امن و امان کے قیام کا مطالبہ کیا۔ اجلاس میں پولیو کی مہم کے حوالے سے بھی آگاہی دی گئی اور عوام سے اپیل کی گئی کہ اپنے بچوں کو پولیو کے قطرے ضرور پلائیں۔

مولانا ایوب خان ثاقب کی دعا کے ساتھ اجلاس اپنے اختتام کو پہنچا۔

سیالکوٹ(باغی ٹی وی،بیوروچیف شاہدریاض)ضلع بھر میں ہفت روزہ صحت کیمپ کا آغاز

سیالکوٹ میں پانچ تحصیل ہیڈ کوارٹر ہسپتالوں، چھ دیہی مراکز صحت، تین بنیادی مراکز صحت اور ڈسٹرکٹ جیل سیالکوٹ میں ہفتہ صحت کیمپ کا آغاز کر دیا گیا ہے۔ ڈپٹی کمشنر محمد ذوالقرنین لنگڑیال نے مراد پور بی ایچ یو میں میڈیکل کیمپ کا افتتاح کیا اور کہا کہ ان صحت کیمپوں کا مقصد وزیر اعلیٰ پنجاب کے صحت کے فروغ کے انقلابی پروگرام کے تحت شہریوں کو طبی معائنہ، علاج، رجسٹریشن، ہیماٹولوجیکل اسکریننگ، شوگر ٹیسٹ، پھپھڑوں کی صحت اور ٹی بی اسکریننگ کی سہولت فراہم کرنا ہے۔

کیمپ میں حاملہ خواتین اور دو سال سے کم عمر بچوں کی ویکسی نیشن کے ساتھ مریضوں کو طبی مشاورت اور مفت ادویات بھی فراہم کی جائیں گی۔ ڈپٹی کمشنر نے عوام کو اس موقع سے بھرپور استفادہ کرنے کی ترغیب دی۔ یہ صحت کیمپ سمبڑیال، پسرور، ڈسکہ، چونڈہ، کوٹلی لوہاراں اور مختلف دیہی مراکز میں جاری رہیں گے۔

سیالکوٹ (باغی ٹی وی بیورو چیف شاہد ریاض): سیالکوٹ چیمبر آف کامرس اینڈ انڈسٹری میں "فکر اقبال” سیمینار اور "تاریخ ادبیات سیالکوٹ” از ڈاکٹر نصیر احمد اسد کی کتاب کی رونمائی کی تقریب منعقد ہوئی۔ سیمینار کی صدارت صدر سیالکوٹ چیمبر آف سمال ٹریڈرز اینڈ سمال انڈسٹری میاں محمد خلیل نے کی جس میں فکر اقبال سے وابستہ افراد کی بڑی تعداد نے شرکت کی۔

تقریب کا آغاز تلاوت کلام پاک سے ہوا، جس کے بعد نعت رسول مقبول اور کلام اقبال پیش کیا گیا۔ ذیشان ساغر نے جب کلام اقبال پڑھا تو سامعین پر سحر طاری ہوگیا۔

میاں محمد خلیل نے اپنے خطاب میں کہا کہ ہم صرف فکر اقبال پر عمل پیرا ہو کر اپنی زندگی کو کامیاب بنا سکتے ہیں۔ انہوں نے چیمبر کی جانب سے ہمیشہ اقبال کے افکار و نظریات کی ترویج کے لیے مثبت کردار ادا کرنے کی کوششوں کا ذکر کیا اور اس طرح کی تقریبات کے لیے مکمل تعاون کی یقین دہانی کرائی۔

تقریب کے مہمانان خصوصی میں کونسل وائس چیئر پرسن لائنز انٹرنیشنل ایل ایم ڈی 305 پاکستان، لائن شفقت خاور چوہدری، سیکنڈ وائس ڈسٹرکٹ گورنر لائن محمد سلیم، سینئر نائب صدر سیالکوٹ چیمبر آف سمال ٹریڈرز اینڈ سمال انڈسٹری محمد اعجاز غوری، چیئرمین ہلٹن سٹی سیالکوٹ ندیم مشتاق چوہدری، مدیر سٹی میگ خالد لطیف، چیئرپرسن اقبال چیئر جی سی خواتین یونیورسٹی سیالکوٹ ڈاکٹر سبینہ اویس اعوان، اور جنرل سیکرٹری پاکستان لٹریری فورم فریدالدین مسعود برہانی شامل تھے۔