Category: سکھر

میرپورماتھیلو باغی ٹی وی (نامہ نگار مشتاق علی لغاری)ڈپٹی کمشنر گھوٹکی منظور احمد کنرانی نے واضح کیا ہے کہ غیر حاضر اساتذہ کی رپورٹ جمع نہ کروانے والے ہیڈ ماسٹرز کے خلاف بھی کارروائی کی جائے گی۔ انہوں نے کہا کہ جب تک مسلسل غیر حاضر رہنے والے اساتذہ کے خلاف مؤثر ایکشن نہیں ہوگا، انہیں احساس نہیں ہوگا کہ وہ قوم کے بچوں کے مستقبل سے کھیل رہے ہیں۔

وہ کمیٹی روم میں منعقدہ ڈسٹرکٹ سروس ڈلیوری کمیشن کے اجلاس کی صدارت کر رہے تھے، جس میں چیف مانیٹرنگ آفیسر عمران علی سیال، ڈی ای اوز پرائمری و سیکنڈری، ٹی ای اوز اور محکمہ تعلیم کے دیگر افسران نے شرکت کی۔

اجلاس میں ضلع بھر کے اسکولوں کی کارکردگی، اساتذہ کی حاضری، تدریسی معیار اور تعلیمی عملے کی کمی پر تفصیلی غور کیا گیا۔
ڈپٹی کمشنر نے غیر حاضر اساتذہ پر سخت ناراضگی کا اظہار کرتے ہوئے ڈی ای اوز کو ہدایات دیں کہ:

مسلسل غیر حاضر رہنے والے اساتذہ کی تنخواہوں میں کٹوتی کے لیے اکاؤنٹس آفیسر کو مراسلہ بھیجا جائے۔

منظور شدہ رخصت کو سروس بک میں لازمی درج کیا جائے۔

انہوں نے حالیہ STR سسٹم کے تحت ہونے والے تبادلوں پر بھی خدشات ظاہر کیے اور کہا کہ بعض اسکولوں میں اساتذہ کی شدید کمی کے باوجود تعیناتیاں نہیں ہو رہیں، جبکہ کچھ اسکولوں میں ضرورت سے زیادہ اسٹاف موجود ہے۔ انہوں نے اس غیر متوازن صورتحال کو تعلیمی معیار میں کمی کا سبب قرار دیتے ہوئے اس حوالے سے مکمل رپورٹ طلب کر لی تاکہ سفارشات سیکریٹری تعلیم کو ارسال کی جا سکیں۔

ڈپٹی کمشنر منظور کنرانی نے کہا کہ اگرچہ ضلع گھوٹکی کے بہت سے اساتذہ اپنی ذمہ داریاں ایمانداری سے ادا کر رہے ہیں، تاہم چند مسلسل غیر حاضر اساتذہ پورے نظام کو نقصان پہنچا رہے ہیں۔ انہوں نے اساتذہ پر زور دیا کہ وہ مثبت سوچ، جذبہ خدمت اور خلوص کے ساتھ اپنی ذمہ داریاں ادا کریں تاکہ علاقے میں تعلیم کا فروغ ممکن ہو سکے۔

انہوں نے کہا کہ ڈسٹرکٹ سروس ڈلیوری کمیشن کا اصل مقصد ضلع میں تعلیم کے معیار کو بہتر بنانا ہے، اس لیے تمام متعلقہ افسران پوری توانائی کے ساتھ ذمہ داریاں ادا کریں تاکہ گھوٹکی تعلیمی میدان میں نمایاں مقام حاصل کر سکے۔

قبل ازیں سی ایم او نے بریفنگ دیتے ہوئے بتایا کہ گزشتہ چھ ماہ میں 44 سیکنڈری اور 75 پرائمری اساتذہ مسلسل غیر حاضر پائے گئے ہیں۔

گھوٹکی(باغی ٹی وی،نامہ نگار مشتاق علی لغاری) ضلع گھوٹکی کے زرعی علاقے ڈہرکی اور اس کے نواحی دیہات میں گنے کی فصل کی کٹائی کا باقاعدہ آغاز ہو گیا ہے۔ صبح سویرے سے کھیتوں میں کسان اور مزدور گنے کی فصل کاٹنے میں مصروف نظر آتے ہیں، جہاں سخت دھوپ اور جسمانی مشقت کے باوجود مزدور روزگار کی امید لیے کام کر رہے ہیں۔

مقامی کاشتکاروں کا کہنا ہے کہ رواں سال گنے کی پیداوار توقع سے بہتر ہوئی ہے، تاہم شوگر ملز کی جانب سے خریداری ریٹ کا اعلان نہ ہونے کے باعث کسانوں میں شدید بے چینی پائی جا رہی ہے۔ ان کا مطالبہ ہے کہ حکومت فوری طور پر گنے کا منصفانہ نرخ مقرر کرے تاکہ انہیں اپنی محنت کا جائز معاوضہ مل سکے۔

گنے کی کٹائی کے آغاز سے دیہی علاقوں میں روزگار کے مواقع بھی بڑھ گئے ہیں۔ مزدور طبقہ اس موسم کو روزگار کا ذریعہ سمجھتے ہوئے کچھ سکون کا سانس لیتا دکھائی دے رہا ہے۔ تاہم، ریٹ کے تعین میں تاخیر نہ صرف کسانوں بلکہ مزدوروں کے لیے بھی تشویش کا باعث بن رہی ہے۔

کسانوں نے حکومت سے اپیل کی ہے کہ وہ شوگر ملز کو نرخ مقرر کرنے کا پابند بنائے اور کسانوں کے مفادات کا تحفظ یقینی بنائے، تاکہ زرعی شعبہ مستحکم ہو اور دیہی معیشت کو سہارا ملے۔

میرپورماتھیلو (باغی ٹی وی نامہ نگار مشتاق علی لغاری) ڈپٹی کمشنر گھوٹکی منظور احمد کنرانی نے اچانک مختیارکار آفس میرپورماتھیلو کا دورہ کیا اور شہریوں سے ملاقات کر کے ان کے مسائل سنے۔ انہوں نے متعلقہ عملے کو ہدایات دی کہ تمام شکایات فوری اور مؤثر انداز میں حل کی جائیں اور ہر سائل عزت و احترام کے ساتھ پیش آئے۔

ڈپٹی کمشنر نے عملے کو وقت کی پابندی، حاضری یقینی بنانے اور عوام کے ساتھ خوش اخلاقی سے پیش آنے کی تاکید کی۔ انہوں نے کہا کہ کوئی غفلت یا غیر حاضری برداشت نہیں کی جائے گی اور عوام کو شکایت کا موقع نہیں ملنا چاہیے۔

منظور احمد کنرانی نے کہا کہ ضلع گھوٹکی میں اچھی حکمرانی، شفافیت اور عوامی خدمت حکومت سندھ کی اولین ترجیح ہے، اور غفلت برتنے والے اہلکاروں کے خلاف سخت کارروائی ہوگی۔

گھوٹکی (باغی ٹی وی، نامہ نگار مشتاق علی لغاری) گھوٹکی پولیس نے محمد انور کھیتران کی ہدایت پر جواریوں اور دیگر جرائم پیشہ افراد کے خلاف کریک ڈاؤن کیا۔ تھانہ ریتی پولیس نے خفیہ اطلاع پر کارروائی کرتے ہوئے تاش کے پتوں پر جواء کھیلنے والے 9 افراد جمیل ملک، سچے ڈنو شر، اویس شر، علی دوست شر، کبوتر مینگھواڑ، محمد عثمان ابڑو، تاج چانڈیو، سونو چانڈیو اور فیروز چانڈیو کو گرفتار کرلیا۔

کارروائی کے دوران پولیس نے 2 تاشوں، 9 موٹر سائیکلیں اور 12,000 روپے نقد بھی ضبط کیے۔ گرفتار ملزمان کے 6 ساتھی فرار ہوگئے۔ پولیس نے گرفتار افراد کے خلاف کرائم نمبر 37/2025 دفعہ 5 سندھ جواء ایکٹ کے تحت مقدمہ درج کر دیا ہے۔

میرپورماتھیلو (باغی ٹی وی، نامہ نگارمشتاق علی لغاری)جسقم (شہید بشیر خان گروپ) کے سربراہ ڈاکٹر نیاز کالانی نے کہا ہے کہ مجوزہ 27ویں آئینی ترمیم صوبوں کے آئینی و جمہوری حقوق کے خلاف ایک خطرناک سازش ہے، جس کے ذریعے صوبوں کے اختیارات چھین کر مرکز کے حوالے کرنے کی کوشش کی جا رہی ہے۔

میرپورماتھیلو بار ایسوسی ایشن سے خطاب کرتے ہوئے ڈاکٹر کالانی نے کہا کہ اگر یہ ترمیم منظور ہو گئی تو مرکزی حکمران اپنی مرضی سے صوبے توڑ کر نئے صوبے بنا سکیں گے، جس سے انتظامی و سیاسی انتشار پیدا ہوگا اور وفاقی نظام کمزور ہو جائے گا۔

انہوں نے واضح کیا کہ سندھ کے عوام اپنے وسائل اور حقوق کے تحفظ کیلئے مزید خاموش نہیں بیٹھیں گے۔ سندھ کی زمین، پانی، گیس اور دیگر وسائل پر سب سے پہلا حق سندھ کے عوام کا ہے، جسے کسی صورت غصب نہیں ہونے دیا جائے گا۔

ڈاکٹر نیاز کالانی نے کہا کہ سندھ ایکشن کمیٹی کی جانب سے 11 نومبر کو صوبے بھر میں بھرپور احتجاج کا اعلان کیا گیا ہے، جس میں تمام سیاسی و سماجی تنظیموں، باشعور عوام اور قومی کارکنوں سے شرکت کی اپیل کی گئی ہے۔

انہوں نے اس موقع پر کہا کہ سندھ کی وحدت، وسائل اور خودمختاری کے تحفظ کیلئے مشترکہ جدوجہد وقت کی اہم ضرورت بن چکی ہے۔
ڈاکٹر کالانی نے وکلا برادری سے اپیل کی کہ وہ آئینی و قانونی بنیادوں پر اس مجوزہ ترمیم کی مخالفت میں پیش پیش کردار ادا کریں۔

گھوٹکی(باغی ٹی وی، نامہ نگار مشتاق علی لغاری)سپیکر قومی اسمبلی سردار ایاز صادق خانگڑھ پہنچے، جہاں انہوں نے سردار علی گوہر مہر کی والدہ محترمہ کے انتقال پر اہلِ خانہ سے اظہارِ تعزیت کیا۔

اس موقع پر سردار ایاز صادق نے مرحومہ کے ایصالِ ثواب کے لیے دعا کی اور کہا کہ وہ سردار علی گوہر مہر اور ان کے خاندان کے غم میں برابر کے شریک ہیں۔ انہوں نے دعا کی کہ اللہ تعالیٰ مرحومہ کو جنت الفردوس میں اعلیٰ مقام عطا فرمائے اور لواحقین کو صبر جمیل دے۔