Category: سکھر

سندھ کے مختلف اضلاع میں سیلابی ریلوں نے تباہی مچا دی ہے۔ ضلع دادو میں متاثرہ دیہات کی تعداد بڑھ کر 50 ہوگئی ہے جبکہ دادو کی تحصیل میہڑ سے آنے والا زور دار سیلابی ریلا لاڑکانہ کے سیہون بچاؤ بند سے ٹکرا گیا۔

تفصیلات کے مطابق سیلابی ریلا ٹکرانے سے 3 دیہات اور رابطہ سڑکیں زیرِ آب آگئیں جبکہ کچے کے علاقے نئوں گوٹھ میں پانی داخل ہوگیا۔ صورتحال اس قدر سنگین ہے کہ بنیادی صحت مرکز بھی پانی میں ڈوب گیا، جس سے مقامی آبادی کو طبی سہولتوں کے فقدان کا سامنا ہے۔اسی طرح نوشہرو فیروز میں لوپ بند میں پڑنے والے شگاف کے باعث بکھری کے قریبی کئی گاؤں زیرِ آب آگئے۔ تاہم اس حوالے سے صوبائی وزیر آبپاشی جام خان شورو نے مؤقف دیا ہے کہ "دریائے سندھ میں بکھری کے قریب بند مکمل طور پر محفوظ ہے اور کہیں بھی شگاف نہیں پڑا۔”

ادھر سندھ کے سینئر وزیر شرجیل انعام میمن نے دعویٰ کیا ہے کہ اب تک سیلاب سے متاثرہ 1 لاکھ 85 ہزار 550 افراد کو محفوظ مقامات پر منتقل کیا جا چکا ہے۔ ان کا کہنا تھا کہ حکومت نہ صرف متاثرہ افراد بلکہ ان کی املاک اور مویشیوں کو بچانے کے لیے بھی ہنگامی اقدامات کر رہی ہے۔

سیلابی صورتحال کے باعث مقامی آبادی شدید مشکلات کا شکار ہے۔ متاثرین کا کہنا ہے کہ پانی کی بلند ہوتی سطح نے رہائش، خوراک اور علاج معالجے کی سہولیات مزید محدود کر دی ہیں، جبکہ فوری ریلیف اور بحالی کے اقدامات کی ضرورت ہے۔

ملک کے بالائی علاقوں میں مسلسل بارشوں اور دریائے سندھ میں پانی کے غیر معمولی اضافے کے باعث سیلابی صورتحال سنگین ہوگئی ہے۔ لاڑکانہ، گھوٹکی اور کشمور کے اضلاع میں ہزاروں افراد متاثر اور وسیع رقبہ زیرِ آب آگیا۔

لاڑکانہ میں زمینداری بند میں 100 فٹ چوڑا شگاف پڑنے کے نتیجے میں سیلابی پانی کا تیز ریلا درگاہ ملوک شاہ بخاری میں داخل ہوگیا، جس کے بعد پانی تیزی سے زرعی زمینوں اور آبادیوں کی طرف بڑھ رہا ہے۔ مقامی زمینداروں اور رہائشیوں کا کہنا ہے کہ اگر شگاف بند نہ ہوا تو مزید سینکڑوں ایکڑ رقبہ اور درجنوں دیہات متاثر ہوسکتے ہیں۔ادھر گھوٹکی میں قادرپور گیس فیلڈ کے 10 کنویں سیلابی پانی سے متاثر ہوکر بند ہوگئے، جس کے باعث علاقے میں گیس کی فراہمی معطل ہوگئی ہے۔ توانائی کے ماہرین کے مطابق گیس کی بندش سے ملکی سطح پر بھی سپلائی متاثر ہونے کا خدشہ ہے۔ حکام کا کہنا ہے کہ صورتحال قابو میں آتے ہی متاثرہ کنوؤں کی بحالی کا عمل شروع کیا جائے گا۔

کشمور میں دریائے سندھ میں گڈو بیراج کے مقام پر پانی کے بہاؤ میں مزید اضافہ ریکارڈ کیا گیا ہے، جہاں اس وقت اونچے درجے کا سیلاب برقرار ہے۔ فلڈ کنٹرول ذرائع کے مطابق اگلے 48 گھنٹوں میں پانی کا دباؤ سکھر بیراج تک پہنچنے کا امکان ہے۔ تاہم انتظامیہ نے مؤقف اختیار کیا ہے کہ گڈو بیراج کو فی الحال کوئی خطرہ نہیں۔انتظامیہ کے مطابق اب تک کچے کے علاقوں سے 30 ہزار افراد محفوظ مقامات پر منتقل کیے جاچکے ہیں، تاہم درجنوں دیہات اب بھی زیرِ آب ہیں اور وہاں کے باسی مشکلات میں گھرے ہوئے ہیں۔ خاص طور پر گھوٹکی کی تحصیل جان محمد علی کے گردونواح میں کئی بستیاں ڈوب گئی ہیں جبکہ متاثرین کا کہنا ہے کہ سرکاری سطح پر انخلا کا عمل تیز نہیں ہوا، جس کی وجہ سے لوگ اپنی مدد آپ کے تحت نقل مکانی پر مجبور ہیں۔ماہرین نے خبردار کیا ہے کہ اگر دریائے سندھ میں پانی کی سطح مزید بلند ہوئی تو نہ صرف زرعی معیشت کو شدید نقصان پہنچے گا بلکہ گیس اور بجلی کی فراہمی پر بھی منفی اثرات مرتب ہوسکتے ہیں۔

چیئرمین پی پی بلاول بھٹو زرداری کا کہنا ہے کہ وزیراعظم شہباز شریف سے بات ہونے کے باوجود سیلاب متاثرین کی امداد میں تاخیر ہو رہی ہے۔

سکھر میں میڈيا سے گفتگو کرتے ہوئے چیئرمین پی پی بلاول بھٹو زرداری نے کہا کہ میں نے وزیرا‏عظم شہباز شریف سے بات کی تھی کہ سیلاب متاثرہ علاقوں میں بے نظیر انکم سپورٹ پروگرام کے تحت امداد پہنچائی جائے لیکن 2 ہفتے گزرنے کے بعد بھی پنجاب کے عوام ابھی تک امداد کے منتظر ہیں،میں وفاق سے سندھ کےعوام کے لیے بھی یہی درخواست دہراؤں گا، سیلاب سے ڈيڑھ ارب ڈالرز کا نقصان ہوگا لہٰذا ملک بھر میں زرعی ایمرجنسی نافذ کرنی چاہیے، پیپلزپارٹی ڈیمز کی حمایت کرتی ہے لیکن دریائے سندھ پر ڈیم بنانے کے شوشے کیوں چھوڑے جا رہے ہيں ، سیلاب گزرنے کے بعد متنازع ایشوز پر بات کریں۔

واضح رہے کہ اس سے قبل بلاول بھٹو زرداری کی جانب سے سیلاب متاثرہ علاقوں میں کسانوں کے بجلی بل معاف کرنے کا مطالبہ کیا گیا تھا۔